| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. अम्बपिण्डियत्थेरअपदानं
9. Ambapiṇḍiyattheraapadānaṃ
७२.
72.
‘‘हत्थिराजा तदा आसिं, ईसादन्तो उरुळ्हवा।
‘‘Hatthirājā tadā āsiṃ, īsādanto uruḷhavā;
विचरन्तो ब्रहारञ्ञे, अद्दसं लोकनायकं॥
Vicaranto brahāraññe, addasaṃ lokanāyakaṃ.
७३.
73.
‘‘अम्बपिण्डं गहेत्वान, अदासिं सत्थुनो अहं।
‘‘Ambapiṇḍaṃ gahetvāna, adāsiṃ satthuno ahaṃ;
पटिग्गण्हि महावीरो, सिद्धत्थो लोकनायको॥
Paṭiggaṇhi mahāvīro, siddhattho lokanāyako.
७४.
74.
‘‘मम निज्झायमानस्स, परिभुञ्जि तदा जिनो।
‘‘Mama nijjhāyamānassa, paribhuñji tadā jino;
तत्थ चित्तं पसादेत्वा, तुसितं उपपज्जहं॥
Tattha cittaṃ pasādetvā, tusitaṃ upapajjahaṃ.
७५.
75.
‘‘ततो अहं चवित्वान, चक्कवत्ती अहोसहं।
‘‘Tato ahaṃ cavitvāna, cakkavattī ahosahaṃ;
एतेनेव उपायेन, अनुभुत्वान सम्पदा॥
Eteneva upāyena, anubhutvāna sampadā.
७६.
76.
‘‘पधानपहितत्तोहं, उपसन्तो निरूपधि।
‘‘Padhānapahitattohaṃ, upasanto nirūpadhi;
सब्बासवे परिञ्ञाय, विहरामि अनासवो॥
Sabbāsave pariññāya, viharāmi anāsavo.
७७.
77.
‘‘चतुन्नवुतितो कप्पे, यं फलमददिं तदा।
‘‘Catunnavutito kappe, yaṃ phalamadadiṃ tadā;
दुग्गतिं नाभिजानामि, फलदानस्सिदं फलं॥
Duggatiṃ nābhijānāmi, phaladānassidaṃ phalaṃ.
७८.
78.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
७९.
79.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
८०.
80.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा अम्बपिण्डियो थेरो इमा गाथायो
Itthaṃ sudaṃ āyasmā ambapiṇḍiyo thero imā gāthāyo
अभासित्थाति।
Abhāsitthāti.
अम्बपिण्डियत्थेरस्सापदानं नवमं।
Ambapiṇḍiyattherassāpadānaṃ navamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-६०. सकिंसम्मज्जकत्थेरअपदानादिवण्णना • 1-60. Sakiṃsammajjakattheraapadānādivaṇṇanā
