| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೯. ಅಮ್ಬಪಿಣ್ಡಿಯತ್ಥೇರಅಪದಾನಂ
9. Ambapiṇḍiyattheraapadānaṃ
೭೨.
72.
‘‘ಹತ್ಥಿರಾಜಾ ತದಾ ಆಸಿಂ, ಈಸಾದನ್ತೋ ಉರುಳ್ಹವಾ।
‘‘Hatthirājā tadā āsiṃ, īsādanto uruḷhavā;
ವಿಚರನ್ತೋ ಬ್ರಹಾರಞ್ಞೇ, ಅದ್ದಸಂ ಲೋಕನಾಯಕಂ॥
Vicaranto brahāraññe, addasaṃ lokanāyakaṃ.
೭೩.
73.
‘‘ಅಮ್ಬಪಿಣ್ಡಂ ಗಹೇತ್ವಾನ, ಅದಾಸಿಂ ಸತ್ಥುನೋ ಅಹಂ।
‘‘Ambapiṇḍaṃ gahetvāna, adāsiṃ satthuno ahaṃ;
ಪಟಿಗ್ಗಣ್ಹಿ ಮಹಾವೀರೋ, ಸಿದ್ಧತ್ಥೋ ಲೋಕನಾಯಕೋ॥
Paṭiggaṇhi mahāvīro, siddhattho lokanāyako.
೭೪.
74.
‘‘ಮಮ ನಿಜ್ಝಾಯಮಾನಸ್ಸ, ಪರಿಭುಞ್ಜಿ ತದಾ ಜಿನೋ।
‘‘Mama nijjhāyamānassa, paribhuñji tadā jino;
ತತ್ಥ ಚಿತ್ತಂ ಪಸಾದೇತ್ವಾ, ತುಸಿತಂ ಉಪಪಜ್ಜಹಂ॥
Tattha cittaṃ pasādetvā, tusitaṃ upapajjahaṃ.
೭೫.
75.
‘‘ತತೋ ಅಹಂ ಚವಿತ್ವಾನ, ಚಕ್ಕವತ್ತೀ ಅಹೋಸಹಂ।
‘‘Tato ahaṃ cavitvāna, cakkavattī ahosahaṃ;
ಏತೇನೇವ ಉಪಾಯೇನ, ಅನುಭುತ್ವಾನ ಸಮ್ಪದಾ॥
Eteneva upāyena, anubhutvāna sampadā.
೭೬.
76.
‘‘ಪಧಾನಪಹಿತತ್ತೋಹಂ, ಉಪಸನ್ತೋ ನಿರೂಪಧಿ।
‘‘Padhānapahitattohaṃ, upasanto nirūpadhi;
ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ॥
Sabbāsave pariññāya, viharāmi anāsavo.
೭೭.
77.
‘‘ಚತುನ್ನವುತಿತೋ ಕಪ್ಪೇ, ಯಂ ಫಲಮದದಿಂ ತದಾ।
‘‘Catunnavutito kappe, yaṃ phalamadadiṃ tadā;
ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ॥
Duggatiṃ nābhijānāmi, phaladānassidaṃ phalaṃ.
೭೮.
78.
‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ॰… ವಿಹರಾಮಿ ಅನಾಸವೋ॥
‘‘Kilesā jhāpitā mayhaṃ…pe… viharāmi anāsavo.
೭೯.
79.
‘‘ಸ್ವಾಗತಂ ವತ ಮೇ ಆಸಿ…ಪೇ॰… ಕತಂ ಬುದ್ಧಸ್ಸ ಸಾಸನಂ॥
‘‘Svāgataṃ vata me āsi…pe… kataṃ buddhassa sāsanaṃ.
೮೦.
80.
‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥
‘‘Paṭisambhidā catasso…pe… kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ಅಮ್ಬಪಿಣ್ಡಿಯೋ ಥೇರೋ ಇಮಾ ಗಾಥಾಯೋ
Itthaṃ sudaṃ āyasmā ambapiṇḍiyo thero imā gāthāyo
ಅಭಾಸಿತ್ಥಾತಿ।
Abhāsitthāti.
ಅಮ್ಬಪಿಣ್ಡಿಯತ್ಥೇರಸ್ಸಾಪದಾನಂ ನವಮಂ।
Ambapiṇḍiyattherassāpadānaṃ navamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಅಪದಾನ-ಅಟ್ಠಕಥಾ • Apadāna-aṭṭhakathā / ೧-೬೦. ಸಕಿಂಸಮ್ಮಜ್ಜಕತ್ಥೇರಅಪದಾನಾದಿವಣ್ಣನಾ • 1-60. Sakiṃsammajjakattheraapadānādivaṇṇanā
