| Library / Tipiṭaka / తిపిటక • Tipiṭaka / కథావత్థుపాళి • Kathāvatthupāḷi |
౫. పఞ్చమవగ్గో
5. Pañcamavaggo
(౫౦) ౮. అనాగతఞాణకథా
(50) 8. Anāgatañāṇakathā
౪౩౯. అనాగతే ఞాణం అత్థీతి? ఆమన్తా. అనాగతం మూలతో జానాతి, హేతుతో జానాతి, నిదానతో జానాతి, సమ్భవతో జానాతి, పభవతో జానాతి, సముట్ఠానతో జానాతి, ఆహారతో జానాతి , ఆరమ్మణతో జానాతి, పచ్చయతో జానాతి, సముదయతో జానాతీతి? న హేవం వత్తబ్బే…పే॰….
439. Anāgate ñāṇaṃ atthīti? Āmantā. Anāgataṃ mūlato jānāti, hetuto jānāti, nidānato jānāti, sambhavato jānāti, pabhavato jānāti, samuṭṭhānato jānāti, āhārato jānāti , ārammaṇato jānāti, paccayato jānāti, samudayato jānātīti? Na hevaṃ vattabbe…pe….
అనాగతే ఞాణం అత్థీతి? ఆమన్తా. అనాగతం హేతుపచ్చయతం జానాతి, ఆరమ్మణపచ్చయతం జానాతి, అధిపతిపచ్చయతం జానాతి, అనన్తరపచ్చయతం జానాతి, సమనన్తరపచ్చయతం జానాతీతి? న హేవం వత్తబ్బే…పే॰….
Anāgate ñāṇaṃ atthīti? Āmantā. Anāgataṃ hetupaccayataṃ jānāti, ārammaṇapaccayataṃ jānāti, adhipatipaccayataṃ jānāti, anantarapaccayataṃ jānāti, samanantarapaccayataṃ jānātīti? Na hevaṃ vattabbe…pe….
అనాగతే ఞాణం అత్థీతి? ఆమన్తా. గోత్రభునో పుగ్గలస్స సోతాపత్తిమగ్గే ఞాణం అత్థీతి? న హేవం వత్తబ్బే…పే॰…. సోతాపత్తిఫలసచ్ఛికిరియాయ పటిపన్నస్స పుగ్గలస్స సోతాపత్తిఫలే ఞాణం అత్థీతి? న హేవం వత్తబ్బే…పే॰….
Anāgate ñāṇaṃ atthīti? Āmantā. Gotrabhuno puggalassa sotāpattimagge ñāṇaṃ atthīti? Na hevaṃ vattabbe…pe…. Sotāpattiphalasacchikiriyāya paṭipannassa puggalassa sotāpattiphale ñāṇaṃ atthīti? Na hevaṃ vattabbe…pe….
సకదాగామి…పే॰… అనాగామి …పే॰… అరహత్తసచ్ఛికిరియాయ పటిపన్నస్స పుగ్గలస్స అరహత్తే ఞాణం అత్థీతి? న హేవం వత్తబ్బే…పే॰….
Sakadāgāmi…pe… anāgāmi …pe… arahattasacchikiriyāya paṭipannassa puggalassa arahatte ñāṇaṃ atthīti? Na hevaṃ vattabbe…pe….
౪౪౦. న వత్తబ్బం – ‘‘అనాగతే ఞాణం అత్థీ’’తి? ఆమన్తా. నను వుత్తం భగవతా – ‘‘పాటలిపుత్తస్స ఖో, ఆనన్ద, తయో అన్తరాయా భవిస్సన్తి – అగ్గితో వా ఉదకతో వా మిథుభేదా వా’’తి 1! అత్థేవ సుత్తన్తోతి? ఆమన్తా. తేన హి అనాగతే ఞాణం అత్థీతి.
440. Na vattabbaṃ – ‘‘anāgate ñāṇaṃ atthī’’ti? Āmantā. Nanu vuttaṃ bhagavatā – ‘‘pāṭaliputtassa kho, ānanda, tayo antarāyā bhavissanti – aggito vā udakato vā mithubhedā vā’’ti 2! Attheva suttantoti? Āmantā. Tena hi anāgate ñāṇaṃ atthīti.
అనాగతఞాణకథా నిట్ఠితా.
Anāgatañāṇakathā niṭṭhitā.
Footnotes:
Related texts:
అట్ఠకథా • Aṭṭhakathā / అభిధమ్మపిటక (అట్ఠకథా) • Abhidhammapiṭaka (aṭṭhakathā) / పఞ్చపకరణ-అట్ఠకథా • Pañcapakaraṇa-aṭṭhakathā / ౮. అనాగతఞాణకథావణ్ణనా • 8. Anāgatañāṇakathāvaṇṇanā
టీకా • Tīkā / అభిధమ్మపిటక (టీకా) • Abhidhammapiṭaka (ṭīkā) / పఞ్చపకరణ-మూలటీకా • Pañcapakaraṇa-mūlaṭīkā / ౮. అనాగతఞాణకథావణ్ణనా • 8. Anāgatañāṇakathāvaṇṇanā
టీకా • Tīkā / అభిధమ్మపిటక (టీకా) • Abhidhammapiṭaka (ṭīkā) / పఞ్చపకరణ-అనుటీకా • Pañcapakaraṇa-anuṭīkā / ౮. అనాగతఞాణకథావణ్ణనా • 8. Anāgatañāṇakathāvaṇṇanā
