| Library / Tipiṭaka / ཏིཔིཊཀ • Tipiṭaka / ཝིནཡཱལངྐཱར-ཊཱིཀཱ • Vinayālaṅkāra-ṭīkā |
༧. ཨནཱམཱསཝིནིཙྪཡཀཐཱ
7. Anāmāsavinicchayakathā
༤༠. ཨེཝཾ མཙྪམཾསཝིནིཙྪཡཾ ཀཐེཏྭཱ ཨིདཱནི ཨནཱམཱསཝིནིཙྪཡཾ ཀཐེཏུཾ ‘‘ཨནཱམཱས’’ནྟིཨཱདིམཱཧ། ཏཏྠ ཨཱམསིཡཏེཏི ཨཱམཱསཾ, ན ཨཱམཱསཾ ཨནཱམཱསཾ, ཨཔརཱམསིཏབྦནྟི ཨཏྠོ། པཱརིཔནྠིཀཱཏི ཝིཀུཔྤནིཀཱ, ཨནྟརཱཡིཀཱཏི ཝུཏྟཾ ཧོཏི། ནདཱིསོཏེན ཝུཡ྄ཧམཱནཾ མཱཏརནྟི ཨེཏཾ ཨུཀྐཊྛཔརིཙྪེདདསྶནཏྠཾ ཝུཏྟཾ། ཨཉྙཱསུ པན ཨིཏྠཱིསུ ཀཱརུཉྙཱདྷིཔྤཱཡེན མཱཏརི ཝུཏྟནཡེན པཊིཔཛྫནྟསྶ ནེཝཏྠི དོསོཏི ཝདནྟི། ‘‘མཱཏར’’ནྟི ཝུཏྟཏྟཱ ཨཉྙཱསུ ན ཝཊྚཏཱིཏི ཝདནྟཱཔི ཨཏྠི། ཨེཏྠ གཎྷཱཧཱིཏི ན ཝཏྟབྦཱཏི གེཧསྶིཏཔེམེན ཀཱཡཔྤཊིབདྡྷེན ཕུསནེ དུཀྐཊཾ སནྡྷཱཡ ཝུཏྟཾ། ཀཱརུཉྙེན པན ཝཏྠཱདིཾ གཧེཏུཾ ཨསཀྐོནྟིཾ ‘‘གཎྷཱཧཱི’’ཏི ཝདནྟསྶཔི ཨཝསབྷཱཝཔྤཏྟིཏོ ཨུདཀེ ནིམུཛྫནྟིཾ ཀཱརུཉྙེན སཧསཱ ཨནཱམཱསནྟི ཨཙིནྟེཏྭཱ ཀེསཱདཱིསུ གཧེཏྭཱ མོཀྑཱདྷིཔྤཱཡེན ཨཱཀཌྜྷཏོཔི ཨནཱཔཏྟིཡེཝ། ན ཧི མཱིཡམཱནཾ མཱཏརཾ ཨུཔེཀྑིཏུཾ ཝཊྚཏི། ཨཉྙཱཏིཀཱཡ ཨིཏྠིཡཱཔི ཨེསེཝ ནཡོ། ཨུཀྐཊྛཱཡ མཱཏུཡཱཔི ཨཱམཱསོ ན ཝཊྚཏཱིཏི དསྶནཏྠཾ ‘‘མཱཏར’’ནྟི ཝུཏྟཾ། ཏསྶ ཀཱཏབྦཾ པན ཨཉྙཱསམྤི ཨིཏྠཱིནཾ ཀརོནྟསྶཔི ཨནཱཔཏྟིཡེཝ ཨནཱམཱསཏྟེ ཝིསེསཱབྷཱཝཱ།
40. Evaṃ macchamaṃsavinicchayaṃ kathetvā idāni anāmāsavinicchayaṃ kathetuṃ ‘‘anāmāsa’’ntiādimāha. Tattha āmasiyateti āmāsaṃ, na āmāsaṃ anāmāsaṃ, aparāmasitabbanti attho. Pāripanthikāti vikuppanikā, antarāyikāti vuttaṃ hoti. Nadīsotena vuyhamānaṃ mātaranti etaṃ ukkaṭṭhaparicchedadassanatthaṃ vuttaṃ. Aññāsu pana itthīsu kāruññādhippāyena mātari vuttanayena paṭipajjantassa nevatthi dosoti vadanti. ‘‘Mātara’’nti vuttattā aññāsu na vaṭṭatīti vadantāpi atthi. Ettha gaṇhāhīti na vattabbāti gehassitapemena kāyappaṭibaddhena phusane dukkaṭaṃ sandhāya vuttaṃ. Kāruññena pana vatthādiṃ gahetuṃ asakkontiṃ ‘‘gaṇhāhī’’ti vadantassapi avasabhāvappattito udake nimujjantiṃ kāruññena sahasā anāmāsanti acintetvā kesādīsu gahetvā mokkhādhippāyena ākaḍḍhatopi anāpattiyeva. Na hi mīyamānaṃ mātaraṃ upekkhituṃ vaṭṭati. Aññātikāya itthiyāpi eseva nayo. Ukkaṭṭhāya mātuyāpi āmāso na vaṭṭatīti dassanatthaṃ ‘‘mātara’’nti vuttaṃ. Tassa kātabbaṃ pana aññāsampi itthīnaṃ karontassapi anāpattiyeva anāmāsatte visesābhāvā.
ཏིཎཎྜུཔཀནྟི ཧིརིཝེརཱདིམཱུལེཧི ཀེསཱལངྐཱརཏྠཱཡ ཀཏཙུམྦཊཀཾ། ཏཱལཔཎྞམུདྡིཀནྟི ཏཱལཔཎྞེཧི ཀཏཾ ཨངྒུལིམུདྡིཀཾ། ཏེན ཏཱལཔཎྞཱདིམཡཾ ཀཊིསུཏྟཀཎྞཔིལ༹ནྡྷནཱདི སབྦཾ ན ཝཊྚཏཱིཏི སིདྡྷཾ། པརིཝཏྟེཏྭཱཏི ཨཏྟནོ ནིཝཱསནཔཱརུཔནབྷཱཝཏོ ཨཔནེཏྭཱ, ཙཱིཝརཏྠཱཡ པརིཎཱམེཏྭཱཏི ཝུཏྟཾ ཧོཏི། ཙཱིཝརཏྠཱཡ པཱདམཱུལེ ཋཔེཏཱིཏི ཨིདཾ ནིདསྶནམཏྟཾ། པཙྩཏྠརཎཝིཏཱནཱདིཨཏྠམྤི ཝཊྚཏིཡེཝ, པཱུཛཱདིཨཏྠཾ ཏཱཝཀཱལིཀམྤི ཨཱམསིཏུཾ ཝཊྚཏི། སཱིསཔསཱདྷནདནྟསཱུཙཱིཏི ཨིདཾ སཱིསཱལངྐཱརཏྠཱཡ པཊཔིལོཏིཀཱཧི ཀཏསཱིསཔསཱདྷནཀཉྩེཝ དནྟསཱུཙིཨཱདི ཙཱཏི དྭེ ཏཡོ། སཱིསཔསཱདྷནཾ སིཔཱཊིཀོཔཀརཎཏྠཱཡ ཙེཝ དནྟསཱུཙིཾ སཱུཙིཨུཔཀརཎཏྠཱཡ ཙ གཧེཏབྦནྟི ཡཐཱཀྐམཾ ཨཏྠཾ དསྶེཏི། ཀེསཀལཱཔཾ བནྡྷིཏྭཱ ཏཏྠ ཏིརིཡཾ པཝེསནཏྠཱཡ ཀཏཱ སཱུཙི ཨེཝ སཱིསཔསཱདྷནཀདནྟསཱུཙཱིཏི ཨེཀམེཝ ཀཏྭཱ སིཔཱཊིཀཱཡ པཀྑིཔིཏྭཱ པརིཧརིཏབྦསཱུཙིཡེཝ ཏསྶ ཏསྶ ཀིཙྩསྶ ཨུཔཀརཎནྟི སིཔཱཊིཀསཱུཙིཨུཔཀརཎཾ, ཨེཝཾ ཝཱ ཡོཛནཱ ཀཱཏབྦཱ།
Tiṇaṇḍupakanti hiriverādimūlehi kesālaṅkāratthāya katacumbaṭakaṃ. Tālapaṇṇamuddikanti tālapaṇṇehi kataṃ aṅgulimuddikaṃ. Tena tālapaṇṇādimayaṃ kaṭisuttakaṇṇapiḷandhanādi sabbaṃ na vaṭṭatīti siddhaṃ. Parivattetvāti attano nivāsanapārupanabhāvato apanetvā, cīvaratthāya pariṇāmetvāti vuttaṃ hoti. Cīvaratthāya pādamūle ṭhapetīti idaṃ nidassanamattaṃ. Paccattharaṇavitānādiatthampi vaṭṭatiyeva, pūjādiatthaṃ tāvakālikampi āmasituṃ vaṭṭati. Sīsapasādhanadantasūcīti idaṃ sīsālaṅkāratthāya paṭapilotikāhi katasīsapasādhanakañceva dantasūciādi cāti dve tayo. Sīsapasādhanaṃ sipāṭikopakaraṇatthāya ceva dantasūciṃ sūciupakaraṇatthāya ca gahetabbanti yathākkamaṃ atthaṃ dasseti. Kesakalāpaṃ bandhitvā tattha tiriyaṃ pavesanatthāya katā sūci eva sīsapasādhanakadantasūcīti ekameva katvā sipāṭikāya pakkhipitvā pariharitabbasūciyeva tassa tassa kiccassa upakaraṇanti sipāṭikasūciupakaraṇaṃ, evaṃ vā yojanā kātabbā.
པོཏྠཀརཱུཔནྟི སུདྷཱདཱིཧི ཀཏཾ པཱརཱཛིཀཝཏྠུབྷཱུཏཱནཾ ཏིརཙྪཱནགཏིཏྠཱིནཾ སཎྛཱནེན ཀཏམྤི ཨནཱམཱསམེཝ ། ཨིཏྠིརཱུཔཱནི དསྶེཏྭཱ ཀཏཾ ཝཏྠུབྷིཏྟིཨཱདིཉྩ ཨིཏྠིརཱུཔཾ ཨནཱམསིཏྭཱ ཝལ༹ཉྫེཏུཾ ཝཊྚཏི། ཨེཝརཱུཔེ ཧི ཨནཱམཱསེ ཀཱཡསཾསགྒརཱགེ ཨསཏི ཀཱཡཔྤཊིབདྡྷེན ཨཱམསཏོ དོསོ ནཏྠི། བྷིནྡིཏྭཱཏི ཨེཏྠ ཧཏྠེན ཨགྒཧེཏྭཱཝ ཀེནཙི དཎྜཱདིནཱ བྷིནྡིཏབྦཾ། ཨེཏྠ ཙ ཨནཱམཱསམྤི དཎྜཔཱསཱཎཱདཱིཧི བྷེདནསྶ ཨཊྛཀཐཱཡཾ ཝུཏྟཏྟཱ, པཱལི༹ཡམྤི ཨཱཔདཱསུ མོཀྑཱདྷིཔྤཱཡསྶ ཨཱམསནེཔི ཨནཱཔཏྟིཡཱ ཝུཏྟཏྟཱ ཙ སཔྤིནིཨཱདིཝཱལ༹མིགཱིཧི གཧིཏཔཱཎཀཱནཾ མོཙནཏྠཱཡ ཏཾ ཏཾ སཔྤིནིཨཱདིཝཏྠུཾ དཎྜཱདཱིཧི པཊིཀྑིཔིཏྭཱ གཧེཏུཾ, མཱཏུཨཱདིཾ ཨུདཀེ མཱིཡམཱནཾ ཝཏྠཱདཱིཧི གཧེཏུཾ, ཨསཀྐོནྟིཾ ཀེསཱདཱིསུ གཧེཏྭཱ ཀཱརུཉྙེན ཨུཀྑིཔིཏུཉྩ ཝཊྚཏཱིཏི ཨཡམཏྠོ གཧེཏབྦོཝ། ‘‘ཨཊྛཀཐཱཡཾ ‘ན ཏྭེཝ ཨཱམསིཏབྦཱ’ཏི ཨིདཾ པན ཝཙནཾ ཨམཱིཡམཱནཾ ཝཏྠུཾ སནྡྷཱཡ ཝུཏྟནྟི ཨཡཾ ཨམྷཱཀཾ ཁནྟཱི’’ཏི ཝིམཏིཝིནོདནིཡཾ (ཝི॰ ཝི॰ ཊཱི॰ ༡.༢༨༡) ཝུཏྟཾ།
Potthakarūpanti sudhādīhi kataṃ pārājikavatthubhūtānaṃ tiracchānagatitthīnaṃ saṇṭhānena katampi anāmāsameva . Itthirūpāni dassetvā kataṃ vatthubhittiādiñca itthirūpaṃ anāmasitvā vaḷañjetuṃ vaṭṭati. Evarūpe hi anāmāse kāyasaṃsaggarāge asati kāyappaṭibaddhena āmasato doso natthi. Bhinditvāti ettha hatthena aggahetvāva kenaci daṇḍādinā bhinditabbaṃ. Ettha ca anāmāsampi daṇḍapāsāṇādīhi bhedanassa aṭṭhakathāyaṃ vuttattā, pāḷiyampi āpadāsu mokkhādhippāyassa āmasanepi anāpattiyā vuttattā ca sappiniādivāḷamigīhi gahitapāṇakānaṃ mocanatthāya taṃ taṃ sappiniādivatthuṃ daṇḍādīhi paṭikkhipitvā gahetuṃ, mātuādiṃ udake mīyamānaṃ vatthādīhi gahetuṃ, asakkontiṃ kesādīsu gahetvā kāruññena ukkhipituñca vaṭṭatīti ayamattho gahetabbova. ‘‘Aṭṭhakathāyaṃ ‘na tveva āmasitabbā’ti idaṃ pana vacanaṃ amīyamānaṃ vatthuṃ sandhāya vuttanti ayaṃ amhākaṃ khantī’’ti vimativinodaniyaṃ (vi. vi. ṭī. 1.281) vuttaṃ.
༤༡. མགྒཾ ཨདྷིཊྛཱཡཱཏི ‘‘མགྒོ ཨཡ’’ནྟི མགྒསཉྙཾ ཨུཔྤཱདེཏྭཱཏི ཨཏྠོ། པཉྙཔེཏྭཱ དེནྟཱིཏི ཨིདཾ སཱམཱིཙིཝསེན ཝུཏྟཾ, ཏེཧི པན ‘‘ཨཱསནཾ པཉྙཔེཏྭཱཝ ནིསཱིདཐཱ’’ཏི ཝུཏྟེ སཡམེཝ པཉྙཔེཏྭཱ ནིསཱིདིཏུཾ ཝཊྚཏི། ཏཏྠ ཛཱཏཀཱནཱིཏི ཨཙྪིནྡིཏྭཱ བྷཱུཏགཱམབྷཱཝེནེཝ ཋིཏཱནི། ‘‘ཀཱིལ༹ནྟེནཱ’’ཏི ཝུཏྟཏྟཱ སཏི པཙྩཡེ ཨཱམསནྟསྶ ཨནཱཔཏྟི, ཨིདཉྩ གིཧིསནྟཀཾ སནྡྷཱཡ ཝུཏྟཾ, བྷིཀྑུསནྟཀཾ པན པརིབྷོགཱརཧཾ སབྦཐཱ ཨཱམསིཏུཾ ན ཝཊྚཏི དུརཱུཔཙིཎྞཏྟཱ། ཏཱལཔནསཱདཱིནཱིཏི ཙེཏྠ ཨཱདི-སདྡེན ནཱལི༹ཀེརལབུཛཏིཔུསཨལཱབུཀུམྦྷཎྜཔུསྶཕལཨེལཱ༹ལུཀཕལཱནཾ སངྒཧོ དཊྛབྦོ། ‘‘ཡཐཱཝུཏྟཕལཱནཾཡེཝ ཙེཏྠ ཀཱིལཱ༹དྷིཔྤཱཡེན ཨཱམསནཾ ན ཝཊྚཏཱི’’ཏི ཝུཏྟཏྟཱ པཱསཱཎསཀྑརཱདཱིནི ཀཱིལཱ༹དྷིཔྤཱཡེནཔི ཨཱམསིཏུཾ ཝཊྚཏི། ཨནུཔསམྤནྣཱནཾ དསྶཱམཱིཏི ཨིདཾ ཨཔཊིགྒཧེཏྭཱ གཧཎཾ སནྡྷཱཡ ཝུཏྟཾ། ཨཏྟནོཔི ཨཏྠཱཡ པཊིགྒཧེཏྭཱ གཧཎེ དོསོ ནཏྠི ཨནཱམཱསཏྟཱབྷཱཝཱ།
41.Maggaṃ adhiṭṭhāyāti ‘‘maggo aya’’nti maggasaññaṃ uppādetvāti attho. Paññapetvā dentīti idaṃ sāmīcivasena vuttaṃ, tehi pana ‘‘āsanaṃ paññapetvāva nisīdathā’’ti vutte sayameva paññapetvā nisīdituṃ vaṭṭati. Tattha jātakānīti acchinditvā bhūtagāmabhāveneva ṭhitāni. ‘‘Kīḷantenā’’ti vuttattā sati paccaye āmasantassa anāpatti, idañca gihisantakaṃ sandhāya vuttaṃ, bhikkhusantakaṃ pana paribhogārahaṃ sabbathā āmasituṃ na vaṭṭati durūpaciṇṇattā. Tālapanasādīnīti cettha ādi-saddena nāḷikeralabujatipusaalābukumbhaṇḍapussaphalaeḷālukaphalānaṃ saṅgaho daṭṭhabbo. ‘‘Yathāvuttaphalānaṃyeva cettha kīḷādhippāyena āmasanaṃ na vaṭṭatī’’ti vuttattā pāsāṇasakkharādīni kīḷādhippāyenapi āmasituṃ vaṭṭati. Anupasampannānaṃ dassāmīti idaṃ apaṭiggahetvā gahaṇaṃ sandhāya vuttaṃ. Attanopi atthāya paṭiggahetvā gahaṇe doso natthi anāmāsattābhāvā.
༤༢. མུཏྟཱཏི (མ॰ ནི॰ ཊཱི॰ ༡.༢ པཐཝཱིཝཱརཝཎྞནཱ; སཱརཏྠ॰ ཊཱི॰ ༢.༢༨༡) ཧཏྠིཀུམྦྷཛཱཏིཀཱ ཨཊྛཝིདྷཱ མུཏྟཱ། ཏཐཱ ཧི ཧཏྠིཀུམྦྷཾ, ཝརཱཧདཱཋཾ, བྷུཛགསཱིསཾ, ཝལཱཧཀཾ, ཝེལུ༹, མཙྪསིརོ, སངྑོ, སིཔྤཱིཏི ཨཊྛ མུཏྟཱཡོནིཡོ། ཏཏྠ ཧཏྠིཀུམྦྷཛཱ པཱིཏཝཎྞཱ པབྷཱཧཱིནཱ། ཝརཱཧདཱཋཱ ཝརཱཧདཱཋཱཝཎྞཱཝ། བྷུཛགསཱིསཛཱ ནཱིལཱདིཝཎྞཱ སུཝིསུདྡྷཱ ཝཊྚལཱ ཙ། ཝལཱཧཀཛཱ བྷཱསུརཱ དུབྦིབྷཱགཱ རཏྟིབྷཱགེ ཨནྡྷཀཱརཾ ཝིདྷམེནྟིཡོ ཏིཊྛནྟི, དེཝཱུཔབྷོགཱ ཨེཝ ཙ ཧོནྟི། ཝེལུ༹ཛཱ ཀརཀཕལསམཱནཝཎྞཱ ན བྷཱསུརཱ, ཏེ ཙ ཝེལཱུ༹ ཨམནུསྶགོཙརེཡེཝ པདེསེ ཛཱཡནྟི ། མཙྪསིརཛཱ པཱཋཱིནཔིཊྛིསམཱནཝཎྞཱ ཝཊྚལཱ ལགྷཝོ ཙ ཏེཛཝནྟཱ ཧོནྟི པབྷཱཝིཧཱིནཱ ཙ, ཏེ ཙ མཙྪཱ སམུདྡམཛ྄ཛྷེཡེཝ ཛཱཡནྟི། སངྑཛཱ སངྑཨུདརཙྪཝིཝཎྞཱ ཀོལཕལཔྤམཱཎཱཔི ཧོནྟི པབྷཱཝིཧཱིནཱཝ། སིཔྤིཛཱ པབྷཱཝིསེསཡུཏྟཱ ཧོནྟི ནཱནཱསཎྛཱནཱ། ཨེཝཾ ཛཱཏིཏོ ཨཊྛཝིདྷཱསུ མུཏྟཱསུ ཡཱ མཙྪསངྑསིཔྤིཛཱ, ཏཱ སཱམུདྡིཀཱ། བྷུཛགཛཱཔི ཀཱཙི སཱམུདྡིཀཱ ཧོནྟི, ཨིཏརཱ ཨསཱམུདྡིཀཱ། ཡསྨཱ བཧུལཾ སཱམུདྡིཀཱཝ མུཏྟཱ ལོཀེ དིསྶནྟི, ཏཏྠཱཔི སིཔྤིཛཱཝ, ཨིཏརཱ ཀདཱཙི ཀཱཙི, ཏསྨཱ སམྨོཧཝིནོདནིཡཾ (ཝིབྷ॰ ཨཊྛ॰ ༡༧༣) ‘‘མུཏྟཱཏི སཱམུདྡིཀཱ མུཏྟཱ’’ཏི ཝུཏྟཾ།
42.Muttāti (ma. ni. ṭī. 1.2 pathavīvāravaṇṇanā; sārattha. ṭī. 2.281) hatthikumbhajātikā aṭṭhavidhā muttā. Tathā hi hatthikumbhaṃ, varāhadāṭhaṃ, bhujagasīsaṃ, valāhakaṃ, veḷu, macchasiro, saṅkho, sippīti aṭṭha muttāyoniyo. Tattha hatthikumbhajā pītavaṇṇā pabhāhīnā. Varāhadāṭhā varāhadāṭhāvaṇṇāva. Bhujagasīsajā nīlādivaṇṇā suvisuddhā vaṭṭalā ca. Valāhakajā bhāsurā dubbibhāgā rattibhāge andhakāraṃ vidhamentiyo tiṭṭhanti, devūpabhogā eva ca honti. Veḷujā karakaphalasamānavaṇṇā na bhāsurā, te ca veḷū amanussagocareyeva padese jāyanti . Macchasirajā pāṭhīnapiṭṭhisamānavaṇṇā vaṭṭalā laghavo ca tejavantā honti pabhāvihīnā ca, te ca macchā samuddamajjheyeva jāyanti. Saṅkhajā saṅkhaudaracchavivaṇṇā kolaphalappamāṇāpi honti pabhāvihīnāva. Sippijā pabhāvisesayuttā honti nānāsaṇṭhānā. Evaṃ jātito aṭṭhavidhāsu muttāsu yā macchasaṅkhasippijā, tā sāmuddikā. Bhujagajāpi kāci sāmuddikā honti, itarā asāmuddikā. Yasmā bahulaṃ sāmuddikāva muttā loke dissanti, tatthāpi sippijāva, itarā kadāci kāci, tasmā sammohavinodaniyaṃ (vibha. aṭṭha. 173) ‘‘muttāti sāmuddikā muttā’’ti vuttaṃ.
མཎཱིཏི ཝེལུ༹རིཡཱདིཏོ ཨཉྙོ ཛོཏིརསཱདིབྷེདོ སབྦོ མཎི། ཝེལུ༹རིཡོཏི ཨལླཝེལུ༹ཝཎྞོ མཎི, ‘‘མཛྫཱརཀྑིམཎྜལཝཎྞོ’’ཏིཔི ཝདནྟི། སངྑོཏི སཱམུདྡིཀསངྑོ། སིལཱཏི མུགྒཝཎྞཱ ཨཏིསིནིདྡྷཱ ཀཱལ༹སིལཱ། མཎིཝོཧཱརཾ ཨགཏཱ རཏྟསེཏཱདིཝཎྞཱ སུམཊྛཱཔི སིལཱ ཨནཱམཱསཱ ཨེཝཱཏི ཝདནྟི། སཱརཏྠདཱིཔནིཡཾ (སཱརཏྠ॰ ཊཱི॰ ༢.༢༨༡) པན ‘‘སངྑོཏི སཱམུདྡིཀསངྑོ། སིལཱཏི ཀཱལ༹སིལཱཔཎྜུསིལཱསེཏསིལཱདིབྷེདཱ སབྦཱཔི སིལཱ’’ཏི ཝུཏྟཾ། པཝཱལ༹ཾ སམུདྡཏོ ཛཱཏནཱཏིརཏྟམཎི། རཛཏནྟི ཀཧཱཔཎམཱསཱདིབྷེདཾ ཛཏུམཱསཱདིཾ ཨུཔཱདཱཡ སབྦཾ ཝུཏྟཱཝསེསརཱུཔིཡཾ གཧིཏཾ། ཛཱཏརཱུཔནྟི སུཝཎྞཾ། ལོཧིཏངྐོཏི རཏྟམཎི། མསཱརགལླནྟི ཀབརཝཎྞོ མཎི། ‘‘མརཀཏ’’ནྟིཔི ཝདནྟི།
Maṇīti veḷuriyādito añño jotirasādibhedo sabbo maṇi. Veḷuriyoti allaveḷuvaṇṇo maṇi, ‘‘majjārakkhimaṇḍalavaṇṇo’’tipi vadanti. Saṅkhoti sāmuddikasaṅkho. Silāti muggavaṇṇā atisiniddhā kāḷasilā. Maṇivohāraṃ agatā rattasetādivaṇṇā sumaṭṭhāpi silā anāmāsā evāti vadanti. Sāratthadīpaniyaṃ (sārattha. ṭī. 2.281) pana ‘‘saṅkhoti sāmuddikasaṅkho. Silāti kāḷasilāpaṇḍusilāsetasilādibhedā sabbāpi silā’’ti vuttaṃ. Pavāḷaṃ samuddato jātanātirattamaṇi. Rajatanti kahāpaṇamāsādibhedaṃ jatumāsādiṃ upādāya sabbaṃ vuttāvasesarūpiyaṃ gahitaṃ. Jātarūpanti suvaṇṇaṃ. Lohitaṅkoti rattamaṇi. Masāragallanti kabaravaṇṇo maṇi. ‘‘Marakata’’ntipi vadanti.
བྷཎྜམཱུལཏྠཱཡཱཏི པཏྟཙཱིཝརཱདིམཱུལཏྠཱཡ། ཀུཊྛརོགསྶཱཏི ནིདསྶནམཏྟཾ། ཏཱཡ ཝཱུཔསམེཏབྦསྶ ཡསྶ ཀསྶཙི རོགསྶ ཨཏྠཱཡ ཝཊྚཏིཡེཝ། ‘‘བྷེསཛྫཏྠཉྩ ཨཝིདྡྷཱཡེཝ མུཏྟཱ ཝཊྚཏཱི’’ཏི ཏཱིསུཔི གཎྛིཔདེསུ ཝུཏྟཱ། བྷེསཛྫཏྠཱཡ པིསིཏྭཱ ཡོཛིཏཱནཾ མུཏྟཱནཾ རཏནབྷཱཝཝིཛཧནཏོ གཧཎཀྑཎེཔི རཏནཱཀཱརེན ཨཔེཀྑཱབྷཱཝཱ ‘‘བྷེསཛྫཏྠཱཡ པན ཝཊྚཏཱི’’ཏི ཝུཏྟཾ། ཡཱཝ པན ཏཱ མུཏྟཱ རཏནརཱུཔེན ཏིཊྛནྟི, ཏཱཝ ཨཱམསིཏུཾ ན ཝཊྚནྟི། ཨེཝཾ ཨཉྙམྤི རཏནཔཱསཱཎཾ པིསིཏྭཱ བྷེསཛྫེ ཡོཛནཏྠཱཡ གཧེཏུཾ ཝཊྚཏི ཨེཝ། ཛཱཏརཱུཔརཛཏཾ པན མིསྶེཏྭཱ ཡོཛནབྷེསཛྫཏྠཱཡཔི སམྤཊིཙྪིཏུཾ ན ཝཊྚཏི། གཧཊྛེཧི ཡོཛེཏྭཱ དིནྣམྤི ཡདི བྷེསཛྫེ སུཝཎྞཱདིརཱུཔེན ཏིཊྛཏི, ཝིཡོཛེཏུཉྩ སཀྐཱ, ཏཱདིསཾ བྷེསཛྫམྤི ན ཝཊྚཏི། ཏཾ ཨབྦོཧཱརིཀཏྟགཏཉྩེ ཝཊྚཏི། ‘‘ཛཱཏིཕལིཀཾ ཨུཔཱདཱཡཱ’’ཏི ཝུཏྟཏྟཱ སཱུརིཡཀནྟཙནྡཀནྟཱདིཀཾ ཛཱཏིཔཱསཱཎཾ མཎིམྷི ཨེཝ སངྒཧིཏནྟི དཊྛབྦཾ། ཨཱཀརམུཏྟོཏི ཨཱཀརཏོ མུཏྟམཏྟོ། བྷཎྜམཱུལཏྠཾ སམྤཊིཙྪིཏུཾ ཝཊྚཏཱིཏི ཨིམིནཱཝ ཨཱམསིཏུམྤི ཝཊྚཏཱིཏི དསྶེཏི། པཙིཏྭཱ ཀཏོཏི ཀཱཙཀཱརེཧི པཙིཏྭཱ ཀཏོ།
Bhaṇḍamūlatthāyāti pattacīvarādimūlatthāya. Kuṭṭharogassāti nidassanamattaṃ. Tāya vūpasametabbassa yassa kassaci rogassa atthāya vaṭṭatiyeva. ‘‘Bhesajjatthañca aviddhāyeva muttā vaṭṭatī’’ti tīsupi gaṇṭhipadesu vuttā. Bhesajjatthāya pisitvā yojitānaṃ muttānaṃ ratanabhāvavijahanato gahaṇakkhaṇepi ratanākārena apekkhābhāvā ‘‘bhesajjatthāya pana vaṭṭatī’’ti vuttaṃ. Yāva pana tā muttā ratanarūpena tiṭṭhanti, tāva āmasituṃ na vaṭṭanti. Evaṃ aññampi ratanapāsāṇaṃ pisitvā bhesajje yojanatthāya gahetuṃ vaṭṭati eva. Jātarūparajataṃ pana missetvā yojanabhesajjatthāyapi sampaṭicchituṃ na vaṭṭati. Gahaṭṭhehi yojetvā dinnampi yadi bhesajje suvaṇṇādirūpena tiṭṭhati, viyojetuñca sakkā, tādisaṃ bhesajjampi na vaṭṭati. Taṃ abbohārikattagatañce vaṭṭati. ‘‘Jātiphalikaṃ upādāyā’’ti vuttattā sūriyakantacandakantādikaṃ jātipāsāṇaṃ maṇimhi eva saṅgahitanti daṭṭhabbaṃ. Ākaramuttoti ākarato muttamatto. Bhaṇḍamūlatthaṃsampaṭicchituṃ vaṭṭatīti imināva āmasitumpi vaṭṭatīti dasseti. Pacitvā katoti kācakārehi pacitvā kato.
དྷམནསངྑོ ཙ དྷོཏཝིདྡྷོ ཙ རཏནམིསྶོ ཙཱཏི ཡོཛེཏབྦཾ། ཝིདྡྷོཏིཨཱདིབྷཱཝེན ཀཏཚིདྡོ། རཏནམིསྶོཏི ཀཉྩནལཏཱདིཝིཙིཏྟོ མུཏྟཱདིརཏནཁཙིཏོ ཙ། ཨེཏེན དྷམནསངྑཏོ ཨཉྙོ རཏནསམྨིསྶོ ཨནཱམཱསོཏི དསྶེཏི། སིལཱཡམྤི ཨེསེཝ ནཡོ། པཱནཱིཡསངྑོཏི ཨིམིནཱ ཐཱལཀཱདིཨཱཀཱརེན ཀཏསངྑམཡབྷཱཛནཱནི བྷིཀྑཱུནཾ སམྤཊིཙྪིཏུཾ ཝཊྚནྟཱིཏི སིདྡྷཾ། སེསནྟི རཏནམིསྶཾ ཋཔེཏྭཱ ཨཝསེསཾ། མུགྒཝཎྞཾཡེཝ རཏནསམྨིསྶཾ ཀརོནྟི, ན ཨཉྙནྟི ཨཱཧ ‘‘མུགྒཝཎྞཱཝཱ’’ཏི, མུགྒཝཎྞཱ རཏནསམྨིསྶཱཝ ན ཝཊྚཏཱིཏི ཝུཏྟཾ ཧོཏི། སེསཱཏི རཏནསམྨིསྶཾ ཋཔེཏྭཱ ཨཝསེསཱ སིལཱ།
Dhamanasaṅkho ca dhotaviddho ca ratanamisso cāti yojetabbaṃ. Viddhotiādibhāvena katachiddo. Ratanamissoti kañcanalatādivicitto muttādiratanakhacito ca. Etena dhamanasaṅkhato añño ratanasammisso anāmāsoti dasseti. Silāyampi eseva nayo. Pānīyasaṅkhoti iminā thālakādiākārena katasaṅkhamayabhājanāni bhikkhūnaṃ sampaṭicchituṃ vaṭṭantīti siddhaṃ. Sesanti ratanamissaṃ ṭhapetvā avasesaṃ. Muggavaṇṇaṃyeva ratanasammissaṃ karonti, na aññanti āha ‘‘muggavaṇṇāvā’’ti, muggavaṇṇā ratanasammissāva na vaṭṭatīti vuttaṃ hoti. Sesāti ratanasammissaṃ ṭhapetvā avasesā silā.
བཱིཛཏོ པཊྛཱཡཱཏི དྷཱཏུཔཱསཱཎཏོ པཊྛཱཡ། སུཝཎྞཙེཏིཡནྟི དྷཱཏུཀརཎྜཀཾ། པཊིཀྑིཔཱིཏི ‘‘དྷཱཏུཊྛཔནཏྠཱཡ གཎྷཐཱ’’ཏི ཨཝཏྭཱ ‘‘ཏུམྷཱཀཾ གཎྷཐཱ’’ཏི པེསིཏཏྟཱ པཊིཀྑིཔི། ཝིམཏིཝིནོདནིཡཾ (ཝི॰ ཝི॰ ཊཱི॰ ༡.༢༨༡) པན ‘‘པཊིཀྑིཔཱིཏི སུཝཎྞམཡསྶ དྷཱཏུཀརཎྜཀསྶ བུདྡྷཱདིརཱུཔསྶ ཙ ཨཏྟནོ སནྟཀཀརཎེ ནིསྶགྒིཡཏྟཱ ཝུཏྟ’’ནྟི ཝུཏྟཾ། སུཝཎྞབུབྦུལ༹ཀནྟི སུཝཎྞཏཱརཀཾ། ‘‘རཱུཔིཡཚཌྜཀཊྛཱནེ’’ཏི ཝུཏྟཏྟཱ རཱུཔིཡཚཌྜཀསྶ ཛཱཏརཱུཔརཛཏཾ ཨཱམསིཏྭཱ ཚཌྜེཏུཾ ཝཊྚཏཱིཏི ཝུཏྟཾ། ཀེལཱ༹པཡིཏུནྟི ཨཱམསིཏྭཱ ཨིཏོ ཙིཏོ ཙ སཉྩཱརེཏུཾ། ཝུཏྟནྟི མཧཱཨཊྛཀཐཱཡཾ ཝུཏྟཾ། ཀཙཝརམེཝ ཧརིཏུཾ ཝཊྚཏཱིཏི གོཔཀཱ ཝཱ ཧོནྟུ ཨཉྙེ ཝཱ, ཧཏྠེནཔི པུཉྪིཏྭཱ ཀཙཝརཾ ཨཔནེཏུཾ ཝཊྚཏི, ‘‘མལམྤི པམཛྫིཏུཾ ཝཊྚཏིཡེཝཱ’’ཏི སཱརཏྠདཱིཔནིཡཾ (སཱརཏྠ॰ ཊཱི॰ ༢.༢༨༡) ཝུཏྟཾ། ཝིམཏིཝིནོདནིཡཾ (ཝི॰ ཝི॰ ཊཱི॰ ༡.༢༨༡) པན ‘‘ཀཙཝརམེཝ ཧརིཏུཾ ཝཊྚཏཱིཏི གོཔཀཱ ཝཱ ཧོནྟུ ཨཉྙེ ཝཱ, ཧཏྠེནཔི པུཉྪིཏྭཱ ཀཙཝརཾ ཨཔནེཏུཾ ཝཊྚཏི, མལམྤི མཛྫིཏུཾ ཝཊྚཏི ཨེཝཱཏི ཝདནྟི, ཏཾ ཨཊྛཀཐཱཡ ན སམེཏི ཀེལཱ༹ཡནསདིསཏྟཱ’’ཏི ཝུཏྟཾ། ཀཐཾ ན སམེཏི? མཧཱཨཊྛཀཐཱཡཾ ཙེཏིཡགྷརགོཔཀཱ རཱུཔིཡཚཌྜཀཊྛཱནེ ཋིཏཱཏི ཏེསཾཡེཝ ཀེལཱ༹ཡནཾ ཨནུཉྙཱཏཾ, ན ཨཉྙེསཾ, ཏསྨཱ ‘‘གོཔཀཱ ཝཱ ཧོནྟུ ཨཉྙེ ཝཱ’’ཏི ཝཙནཾ མཧཱཨཊྛཀཐཱཡ ན སམེཏི།
Bījato paṭṭhāyāti dhātupāsāṇato paṭṭhāya. Suvaṇṇacetiyanti dhātukaraṇḍakaṃ. Paṭikkhipīti ‘‘dhātuṭṭhapanatthāya gaṇhathā’’ti avatvā ‘‘tumhākaṃ gaṇhathā’’ti pesitattā paṭikkhipi. Vimativinodaniyaṃ (vi. vi. ṭī. 1.281) pana ‘‘paṭikkhipīti suvaṇṇamayassa dhātukaraṇḍakassa buddhādirūpassa ca attano santakakaraṇe nissaggiyattā vutta’’nti vuttaṃ. Suvaṇṇabubbuḷakanti suvaṇṇatārakaṃ. ‘‘Rūpiyachaḍḍakaṭṭhāne’’ti vuttattā rūpiyachaḍḍakassa jātarūparajataṃ āmasitvā chaḍḍetuṃ vaṭṭatīti vuttaṃ. Keḷāpayitunti āmasitvā ito cito ca sañcāretuṃ. Vuttanti mahāaṭṭhakathāyaṃ vuttaṃ. Kacavarameva harituṃ vaṭṭatīti gopakā vā hontu aññe vā, hatthenapi puñchitvā kacavaraṃ apanetuṃ vaṭṭati, ‘‘malampi pamajjituṃ vaṭṭatiyevā’’ti sāratthadīpaniyaṃ (sārattha. ṭī. 2.281) vuttaṃ. Vimativinodaniyaṃ (vi. vi. ṭī. 1.281) pana ‘‘kacavarameva harituṃ vaṭṭatīti gopakā vā hontu aññe vā, hatthenapi puñchitvā kacavaraṃ apanetuṃ vaṭṭati, malampi majjituṃ vaṭṭati evāti vadanti, taṃ aṭṭhakathāya na sameti keḷāyanasadisattā’’ti vuttaṃ. Kathaṃ na sameti? Mahāaṭṭhakathāyaṃ cetiyagharagopakā rūpiyachaḍḍakaṭṭhāne ṭhitāti tesaṃyeva keḷāyanaṃ anuññātaṃ, na aññesaṃ, tasmā ‘‘gopakā vā hontu aññe vā’’ti vacanaṃ mahāaṭṭhakathāya na sameti.
ཀུརུནྡིཡཾ པན ཏམྤི པཊིཀྑིཏྟཾ, སུཝཎྞཙེཏིཡེ ཀཙཝརམེཝ ཧརིཏུཾ ཝཊྚཏཱིཏི ཨེཏྟཀམེཝ ཨནུཉྙཱཏཾ, ཏསྨཱ སཱཝདྷཱརཎཾ ཀཏྭཱ ཝུཏྟཏྟཱ ‘‘ཧཏྠེནཔི པུཉྪིཏྭཱ’’ཏི ཙ ‘‘མལམྤི པམཛྫིཏུཾ ཝཊྚཏི ཨེཝཱ’’ཏི ཙ ཝཙནཾ ཀུརུནྡཊྛཀཐཱཡ ན སམེཏི, ཏསྨཱ ཝིཙཱརེཏབྦམེཏནྟི། ཨཱརཀཱུཊལོཧནྟི སུཝཎྞཝཎྞོ ཀིཏྟིམལོཧཝིསེསོ། ཏིཝིདྷཉྷི ཀིཏྟིམལོཧཾ – ཀཾསལོཧཾ ཝཊྚལོཧཾ ཨཱརཀཱུཊལོཧནྟི། ཏཏྠ ཏིཔུཏམྦེ མིསྶེཏྭཱ ཀཏཾ ཀཾསལོཧཾ ནཱམ, སཱིསཏམྦེ མིསྶེཏྭཱ ཀཏཾ ཝཊྚལོཧཾ, རསཏུཏྠེཧི རཉྫིཏཾ ཏམྦཾ ཨཱརཀཱུཊལོཧཾ ནཱམ། ‘‘པཀཏིརསཏམྦེ མིསྶེཏྭཱ ཀཏཾ ཨཱརཀཱུཊ’’ནྟི ཙ སཱརཏྠདཱིཔནིཡཾ (སཱརཏྠ॰ ཊཱི॰ ༢.༢༨༡) ཝུཏྟཾ། ཏཾ པན ‘‘ཛཱཏརཱུཔགཏིཀ’’ནྟི ཝུཏྟཏྟཱ ཨུགྒཎྷཏོ ནིསྶགྒིཡམྤི ཧོཏཱིཏི ཀེཙི ཝདནྟི, རཱུཔིཡེསུ པན ཨགཎིཏཏྟཱ ནིསྶགྒིཡཾ ན ཧོཏི, ཨཱམསནེ སམྤཊིཙྪནེ ཙ དུཀྐཊམེཝཱཏི ཝེདིཏབྦཾ། སབྦོཔི ཀཔྤིཡོཏི ཡཐཱཝུཏྟསུཝཎྞཱདིམཡཱནཾ སེནཱསནཔརིཀྑཱརཱནཾ ཨཱམསནགོཔནཱདིཝསེན པརིབྷོགོ སབྦཐཱ ཀཔྤིཡོཏི ཨདྷིཔྤཱཡོ། ཏེནཱཧ ‘‘ཏསྨཱ’’ཏིཨཱདི། ‘‘བྷིཀྑཱུནཾ དྷམྨཝིནཡཝཎྞནཊྛཱནེ’’ཏི ཝུཏྟཏྟཱ སངྒྷིཀམེཝ སུཝཎྞཱདིམཡཾ སེནཱསནཾ སེནཱསནཔརིཀྑཱརཱ ཙ ཝཊྚནྟི, ན པུགྒལིཀཱནཱིཏི གཧེཏབྦཾ། པཊིཛགྒིཏུཾ ཝཊྚནྟཱིཏི སེནཱསནཔཊིབནྡྷཏོ ཝུཏྟཾ།
Kurundiyaṃ pana tampi paṭikkhittaṃ, suvaṇṇacetiye kacavarameva harituṃ vaṭṭatīti ettakameva anuññātaṃ, tasmā sāvadhāraṇaṃ katvā vuttattā ‘‘hatthenapi puñchitvā’’ti ca ‘‘malampi pamajjituṃ vaṭṭati evā’’ti ca vacanaṃ kurundaṭṭhakathāya na sameti, tasmā vicāretabbametanti. Ārakūṭalohanti suvaṇṇavaṇṇo kittimalohaviseso. Tividhañhi kittimalohaṃ – kaṃsalohaṃ vaṭṭalohaṃ ārakūṭalohanti. Tattha tiputambe missetvā kataṃ kaṃsalohaṃ nāma, sīsatambe missetvā kataṃ vaṭṭalohaṃ, rasatutthehi rañjitaṃ tambaṃ ārakūṭalohaṃ nāma. ‘‘Pakatirasatambe missetvā kataṃ ārakūṭa’’nti ca sāratthadīpaniyaṃ (sārattha. ṭī. 2.281) vuttaṃ. Taṃ pana ‘‘jātarūpagatika’’nti vuttattā uggaṇhato nissaggiyampi hotīti keci vadanti, rūpiyesu pana agaṇitattā nissaggiyaṃ na hoti, āmasane sampaṭicchane ca dukkaṭamevāti veditabbaṃ. Sabbopi kappiyoti yathāvuttasuvaṇṇādimayānaṃ senāsanaparikkhārānaṃ āmasanagopanādivasena paribhogo sabbathā kappiyoti adhippāyo. Tenāha ‘‘tasmā’’tiādi. ‘‘Bhikkhūnaṃ dhammavinayavaṇṇanaṭṭhāne’’ti vuttattā saṅghikameva suvaṇṇādimayaṃ senāsanaṃ senāsanaparikkhārā ca vaṭṭanti, na puggalikānīti gahetabbaṃ. Paṭijaggituṃ vaṭṭantīti senāsanapaṭibandhato vuttaṃ.
༤༣. སཱམིཀཱནཾ པེསེཏབྦནྟི སཱམིཀཱནཾ སཱསནཾ པེསེཏབྦཾ། བྷིནྡིཏྭཱཏི པཋམམེཝ ཨནཱམསིཏྭཱ པཱསཱཎཱདིནཱ ཀིཉྩིམཏྟཾ བྷེདཾ ཀཏྭཱ པཙྪཱ ཀཔྤིཡབྷཎྜཏྠཱཡ ཨདྷིཊྛཧིཏྭཱ ཧཏྠེན གཧེཏུཾ ཝཊྚཏི། ཏེནཱཧ ‘‘ཀཔྤིཡབྷཎྜཾ ཀརིསྶཱམཱིཏི སམྤཊིཙྪིཏུཾ ཝཊྚཏཱི’’ཏི། ཨེཏྠཱཔི ཏཉྩ ཝིཡོཛེཏྭཱ ཨཱམསིཏབྦཾ། ཕལཀཛཱལིཀཱདཱིནཱིཏི ཨེཏྠ སརཔརིཏྟཱཎཱཡ ཧཏྠེན གཧེཏབྦཾ། ཀིཊིཀཱཕལཀཾ ཨཀྑིརཀྑཎཏྠཱཡ ཨཡལོཧཱདཱིཧི ཛཱལཱཀཱརེན ཀཏྭཱ སཱིསཱདཱིསུ པཊིམུཉྩིཏབྦཾ ཛཱལིཀཾ ནཱམ། ཨཱདི-སདྡེན ཀཝཙཱདིཀཾ སངྒཎྷཱཏི། ཨནཱམཱསཱནཱིཏི མཙྪཛཱལཱདིཔརཱུཔརོདྷཾ སནྡྷཱཡ ཝུཏྟཾ, ན སརཔརིཏྟཱཎཾ ཏསྶ ཨཱཝུདྷབྷཎྜཏྟཱབྷཱཝཱ། ཏེན ཝཀྑཏི ‘‘པརཱུཔརོདྷནིཝཱརཎཉྷཱི’’ཏིཨཱདི (ཝི॰ སངྒ॰ ཨཊྛ॰ ༤༣)། ཨཱསནསྶཱཏི ཙེཏིཡསྶསམནྟཱ ཀཏཔརིབྷཎྜསྶ། བནྡྷིསྶཱམཱིཏི ཀཱཀཱདཱིནཾ ཨདཱུསནཏྠཱཡ བནྡྷིསྶཱམི།
43.Sāmikānaṃ pesetabbanti sāmikānaṃ sāsanaṃ pesetabbaṃ. Bhinditvāti paṭhamameva anāmasitvā pāsāṇādinā kiñcimattaṃ bhedaṃ katvā pacchā kappiyabhaṇḍatthāya adhiṭṭhahitvā hatthena gahetuṃ vaṭṭati. Tenāha ‘‘kappiyabhaṇḍaṃ karissāmīti sampaṭicchituṃ vaṭṭatī’’ti. Etthāpi tañca viyojetvā āmasitabbaṃ. Phalakajālikādīnīti ettha saraparittāṇāya hatthena gahetabbaṃ. Kiṭikāphalakaṃ akkhirakkhaṇatthāya ayalohādīhi jālākārena katvā sīsādīsu paṭimuñcitabbaṃ jālikaṃ nāma. Ādi-saddena kavacādikaṃ saṅgaṇhāti. Anāmāsānīti macchajālādiparūparodhaṃ sandhāya vuttaṃ, na saraparittāṇaṃ tassa āvudhabhaṇḍattābhāvā. Tena vakkhati ‘‘parūparodhanivāraṇañhī’’tiādi (vi. saṅga. aṭṭha. 43). Āsanassāti cetiyassasamantā kataparibhaṇḍassa. Bandhissāmīti kākādīnaṃ adūsanatthāya bandhissāmi.
‘‘བྷེརིསངྒྷཱཊོཏི སངྒྷཊིཏཙམྨབྷེརཱི། ཝཱིཎཱསངྒྷཱཊོཏི སངྒྷཊིཏཙམྨཝཱིཎཱ’’ཏི སཱརཏྠདཱིཔནིཡཾ (སཱརཏྠ॰ ཊཱི॰ ༢.༢༨༡) ཝུཏྟཾ། ‘‘ཙམྨཝིནདྡྷཱ ཝཱིཎཱབྷེརིཨཱདཱིནཱི’’ཏི མཧཱཨཊྛཀཐཱཡཾ ཝུཏྟཝཙནཏོ ཝིསེསཱབྷཱཝཱ ‘‘ཀུརུནྡིཡཾ པནཱ’’ཏིཨཱདིནཱ ཏཏོ ཝིསེསསྶ ཝཏྟུམཱརདྡྷཏྟཱ ཙ བྷེརིཨཱདཱིནཾ ཝིནདྡྷོཔཀརཎསམཱུཧོ བྷེརིཝཱིཎཱསངྒྷཱཊོཏི ཝེདིཏབྦོ ‘‘སངྒྷཊིཏབྦོཏི སངྒྷཱཊོ’’ཏི ཀཏྭཱ། ཏུཙྪཔོཀྑརནྟི ཨཝིནདྡྷཙམྨབྷེརིཝཱིཎཱནཾ པོཀྑརཾ། ཨཱརོཔིཏཙམྨནྟི པུབྦེ ཨཱརོཔིཏཾ ཧུཏྭཱ པཙྪཱ ཏཏོ ཨཔནེཏྭཱ ཝིསུཾ ཋཔིཏམུཁཙམྨམཏྟཾ, ན སེསོཔཀརཎསཧིཏཾ, ཏཾ པན སངྒྷཱཏོཏི ཨཡཾ ཝིསེསོ། ཨོནཧིཏུནྟི བྷེརིཔོཀྑརཱདཱིནི ཙམྨཾ ཨཱརོཔེཏྭཱ ཙམྨཝདྡྷིཨཱདཱིཧི སབྦེཧི ཨུཔཀརཎེཧི ཝིནནྡྷིཏུཾ། ཨོནཧཱཔེཏུནྟི ཏཐེཝ ཨཉྙེཧི ཝིནནྡྷཱཔེཏུཾ།
‘‘Bherisaṅghāṭoti saṅghaṭitacammabherī. Vīṇāsaṅghāṭoti saṅghaṭitacammavīṇā’’ti sāratthadīpaniyaṃ (sārattha. ṭī. 2.281) vuttaṃ. ‘‘Cammavinaddhā vīṇābheriādīnī’’ti mahāaṭṭhakathāyaṃ vuttavacanato visesābhāvā ‘‘kurundiyaṃ panā’’tiādinā tato visesassa vattumāraddhattā ca bheriādīnaṃ vinaddhopakaraṇasamūho bherivīṇāsaṅghāṭoti veditabbo ‘‘saṅghaṭitabboti saṅghāṭo’’ti katvā. Tucchapokkharanti avinaddhacammabherivīṇānaṃ pokkharaṃ. Āropitacammanti pubbe āropitaṃ hutvā pacchā tato apanetvā visuṃ ṭhapitamukhacammamattaṃ, na sesopakaraṇasahitaṃ, taṃ pana saṅghātoti ayaṃ viseso. Onahitunti bheripokkharādīni cammaṃ āropetvā cammavaddhiādīhi sabbehi upakaraṇehi vinandhituṃ. Onahāpetunti tatheva aññehi vinandhāpetuṃ.
ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ
Iti vinayasaṅgahasaṃvaṇṇanābhūte vinayālaṅkāre
ཨནཱམཱསཝིནིཙྪཡཀཐཱལངྐཱརོ ནཱམ
Anāmāsavinicchayakathālaṅkāro nāma
སཏྟམོ པརིཙྪེདོ།
Sattamo paricchedo.
