| Library / Tipiṭaka / तिपिटक • Tipiṭaka / मज्झिमनिकाय (टीका) • Majjhimanikāya (ṭīkā) |
२. आनन्दभद्देकरत्तसुत्तवण्णना
2. Ānandabhaddekarattasuttavaṇṇanā
२७६. बहिद्धा पुथुत्तारम्मणतो निवत्तेत्वा एकस्मिंयेव आरम्मणे चित्तस्स सम्मदेव लयनं अप्पनं पटिसल्लानं, यो कोचि समापत्तिविहारो, इध पन अरियविहारो अधिप्पेतोति आह – ‘‘पटिसल्लाना वुट्ठितो’’तिआदि। जानन्तोव भगवा कथासमुट्ठापनत्थं पुच्छि। वुत्तञ्हेतं – ‘‘जानन्तापि तथागता पुच्छन्ति, जानन्तापि न पुच्छन्ती’’तिआदि (पारा॰ १६)।
276. Bahiddhā puthuttārammaṇato nivattetvā ekasmiṃyeva ārammaṇe cittassa sammadeva layanaṃ appanaṃ paṭisallānaṃ, yo koci samāpattivihāro, idha pana ariyavihāro adhippetoti āha – ‘‘paṭisallānā vuṭṭhito’’tiādi. Jānantova bhagavā kathāsamuṭṭhāpanatthaṃ pucchi. Vuttañhetaṃ – ‘‘jānantāpi tathāgatā pucchanti, jānantāpi na pucchantī’’tiādi (pārā. 16).
२७८. साधुकारमदासीति साधुसद्दं सावेसि। तं पन पसंसा होतीति पसंसत्थो साधुसद्दो। तेनाह ‘‘देसनं पसंसन्तो’’ति। विज्जमानेहि वण्णेहि गुणवन्ते उदग्गताकरणं सम्पहंसनं, केवलं गुणसंकित्तनवसेन थोमना पसंसाति अयमेतेसं विसेसो।
278.Sādhukāramadāsīti sādhusaddaṃ sāvesi. Taṃ pana pasaṃsā hotīti pasaṃsattho sādhusaddo. Tenāha ‘‘desanaṃ pasaṃsanto’’ti. Vijjamānehi vaṇṇehi guṇavante udaggatākaraṇaṃ sampahaṃsanaṃ, kevalaṃ guṇasaṃkittanavasena thomanā pasaṃsāti ayametesaṃ viseso.
आनन्दभद्देकरत्तसुत्तवण्णनाय लीनत्थप्पकासना समत्ता।
Ānandabhaddekarattasuttavaṇṇanāya līnatthappakāsanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / मज्झिमनिकाय • Majjhimanikāya / २. आनन्दभद्देकरत्तसुत्तं • 2. Ānandabhaddekarattasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / मज्झिमनिकाय (अट्ठकथा) • Majjhimanikāya (aṭṭhakathā) / २. आनन्दभद्देकरत्तसुत्तवण्णना • 2. Ānandabhaddekarattasuttavaṇṇanā
