| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౧౦. ఆనన్దసుత్తం
10. Ānandasuttaṃ
౨౧. సావత్థియం … ఆరామే. అథ ఖో ఆయస్మా ఆనన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా ఆనన్దో భగవన్తం ఏతదవోచ – ‘‘‘నిరోధో నిరోధో’తి, భన్తే, వుచ్చతి. కతమేసానం ఖో, భన్తే, ధమ్మానం నిరోధో 1 ‘నిరోధో’తి వుచ్చతీ’’తి? ‘‘రూపం ఖో, ఆనన్ద, అనిచ్చం సఙ్ఖతం పటిచ్చసముప్పన్నం ఖయధమ్మం వయధమ్మం విరాగధమ్మం నిరోధధమ్మం. తస్స నిరోధో 2 ‘నిరోధో’తి వుచ్చతి. వేదనా అనిచ్చా సఙ్ఖతా పటిచ్చసముప్పన్నా ఖయధమ్మా వయధమ్మా విరాగధమ్మా నిరోధధమ్మా. తస్సా నిరోధో ‘నిరోధో’తి వుచ్చతి. సఞ్ఞా… సఙ్ఖారా అనిచ్చా సఙ్ఖతా పటిచ్చసముప్పన్నా ఖయధమ్మా వయధమ్మా విరాగధమ్మా నిరోధధమ్మా. తేసం నిరోధో ‘నిరోధో’తి వుచ్చతి. విఞ్ఞాణం అనిచ్చం సఙ్ఖతం పటిచ్చసముప్పన్నం ఖయధమ్మం వయధమ్మం విరాగధమ్మం నిరోధధమ్మం. తస్స నిరోధో ‘నిరోధో’తి వుచ్చతి. ఇమేసం ఖో, ఆనన్ద, ధమ్మానం నిరోధో ‘నిరోధో’తి వుచ్చతీ’’తి. దసమం.
21. Sāvatthiyaṃ … ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘‘nirodho nirodho’ti, bhante, vuccati. Katamesānaṃ kho, bhante, dhammānaṃ nirodho 3 ‘nirodho’ti vuccatī’’ti? ‘‘Rūpaṃ kho, ānanda, aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho 4 ‘nirodho’ti vuccati. Vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tassā nirodho ‘nirodho’ti vuccati. Saññā… saṅkhārā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tesaṃ nirodho ‘nirodho’ti vuccati. Viññāṇaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho ‘nirodho’ti vuccati. Imesaṃ kho, ānanda, dhammānaṃ nirodho ‘nirodho’ti vuccatī’’ti. Dasamaṃ.
అనిచ్చవగ్గో దుతియో.
Aniccavaggo dutiyo.
తస్సుద్దానం –
Tassuddānaṃ –
అనిచ్చం దుక్ఖం అనత్తా, యదనిచ్చాపరే తయో;
Aniccaṃ dukkhaṃ anattā, yadaniccāpare tayo;
హేతునాపి తయో వుత్తా, ఆనన్దేన చ తే దసాతి.
Hetunāpi tayo vuttā, ānandena ca te dasāti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౧-౧౦. అనిచ్చసుత్తాదివణ్ణనా • 1-10. Aniccasuttādivaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౧-౧౦. అనిచ్చాదిసుత్తవణ్ణనా • 1-10. Aniccādisuttavaṇṇanā
