Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya

    ૬. આનન્દસુત્તં

    6. Ānandasuttaṃ

    ૧૦૬. એકં સમયં ભગવા કોસમ્બિયં વિહરતિ ઘોસિતારામે. અથ ખો આયસ્મા આનન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા આનન્દો ભગવન્તં એતદવોચ –

    106. Ekaṃ samayaṃ bhagavā kosambiyaṃ viharati ghositārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –

    ‘‘કિત્તાવતા નુ ખો, ભન્તે, ભિક્ખુ સઙ્ઘે 1 વિહરન્તો ફાસું વિહરેય્યા’’તિ? ‘‘યતો ખો, આનન્દ, ભિક્ખુ અત્તના 2 સીલસમ્પન્નો હોતિ, નો 3 પરં અધિસીલે સમ્પવત્તા 4; એત્તાવતાપિ ખો, આનન્દ, ભિક્ખુ સઙ્ઘે વિહરન્તો ફાસું વિહરેય્યા’’તિ.

    ‘‘Kittāvatā nu kho, bhante, bhikkhu saṅghe 5 viharanto phāsuṃ vihareyyā’’ti? ‘‘Yato kho, ānanda, bhikkhu attanā 6 sīlasampanno hoti, no 7 paraṃ adhisīle sampavattā 8; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘સિયા પન, ભન્તે, અઞ્ઞોપિ પરિયાયો યથા ભિક્ખુ સઙ્ઘે વિહરન્તો ફાસું વિહરેય્યા’’તિ? ‘‘સિયા, આનન્દ 9! યતો ખો, આનન્દ, ભિક્ખુ અત્તના સીલસમ્પન્નો હોતિ, નો પરં અધિસીલે સમ્પવત્તા; અત્તાનુપેક્ખી ચ હોતિ, નો પરાનુપેક્ખી; એત્તાવતાપિ ખો, આનન્દ, ભિક્ખુ સઙ્ઘે વિહરન્તો ફાસું વિહરેય્યા’’તિ.

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda 10! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘સિયા પન, ભન્તે, અઞ્ઞોપિ પરિયાયો યથા ભિક્ખુ સઙ્ઘે વિહરન્તો ફાસું વિહરેય્યા’’તિ? ‘‘સિયા, આનન્દ! યતો ખો, આનન્દ, ભિક્ખુ અત્તના સીલસમ્પન્નો હોતિ, નો પરં અધિસીલે સમ્પવત્તા; અત્તાનુપેક્ખી ચ હોતિ, નો પરાનુપેક્ખી; અપઞ્ઞાતો ચ હોતિ, તેન ચ અપઞ્ઞાતકેન નો પરિતસ્સતિ; એત્તાવતાપિ ખો, આનન્દ, ભિક્ખુ સઙ્ઘે વિહરન્તો ફાસું વિહરેય્યા’’તિ.

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘સિયા પન, ભન્તે, અઞ્ઞોપિ પરિયાયો યથા ભિક્ખુ સઙ્ઘે વિહરન્તો ફાસું વિહરેય્યા’’તિ? ‘‘સિયા, આનન્દ! યતો ખો, આનન્દ, ભિક્ખુ અત્તના સીલસમ્પન્નો હોતિ, નો પરં અધિસીલે સમ્પવત્તા; અત્તાનુપેક્ખી ચ હોતિ, નો પરાનુપેક્ખી; અપઞ્ઞાતો ચ હોતિ, તેન ચ અપઞ્ઞાતકેન નો પરિતસ્સતિ; ચતુન્નઞ્ચ 11 ઝાનાનં આભિચેતસિકાનં દિટ્ઠધમ્મસુખવિહારાનં નિકામલાભી હોતિ અકિચ્છલાભી અકસિરલાભી; એત્તાવતાપિ ખો, આનન્દ, ભિક્ખુ સઙ્ઘે વિહરન્તો ફાસું વિહરેય્યા’’તિ.

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca 12 jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘સિયા પન, ભન્તે, અઞ્ઞોપિ પરિયાયો યથા ભિક્ખુ સઙ્ઘે વિહરન્તો ફાસું વિહરેય્યા’’તિ? ‘‘સિયા, આનન્દ! યતો ખો, આનન્દ, ભિક્ખુ અત્તના સીલસમ્પન્નો હોતિ, નો પરં અધિસીલે સમ્પવત્તા; અત્તાનુપેક્ખી ચ હોતિ, નો પરાનુપેક્ખી; અપઞ્ઞાતો ચ હોતિ, તેન ચ અપઞ્ઞાતકેન નો પરિતસ્સતિ; ચતુન્નઞ્ચ ઝાનાનં આભિચેતસિકાનં દિટ્ઠધમ્મસુખવિહારાનં નિકામલાભી હોતિ અકિચ્છલાભી અકસિરલાભી; આસવાનઞ્ચ 13 ખયા અનાસવં ચેતોવિમુત્તિં પઞ્ઞાવિમુત્તિં દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહરતિ; એત્તાવતાપિ ખો, આનન્દ, ભિક્ખુ સઙ્ઘે વિહરન્તો ફાસું વિહરેય્ય.

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; āsavānañca 14 khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ettāvatāpi kho, ānanda, bhikkhu saṅghe viharanto phāsuṃ vihareyya.

    ‘‘ઇમમ્હા ચાહં, આનન્દ, ફાસુવિહારા અઞ્ઞો ફાસુવિહારો ઉત્તરિતરો વા પણીતતરો વા નત્થીતિ વદામી’’તિ. છટ્ઠં.

    ‘‘Imamhā cāhaṃ, ānanda, phāsuvihārā añño phāsuvihāro uttaritaro vā paṇītataro vā natthīti vadāmī’’ti. Chaṭṭhaṃ.




    Next: ૭. સીલસુત્તં • 7. Sīlasuttaṃ




    Footnotes:
    1. ભિક્ખુંસંઘો (સ્યા॰ પી॰)
    2. અત્તના ચ (પી॰ ક॰)
    3. નો ચ (ક॰)
    4. સમ્પવત્તા હોતિ (ક॰)
    5. bhikkhuṃsaṃgho (syā. pī.)
    6. attanā ca (pī. ka.)
    7. no ca (ka.)
    8. sampavattā hoti (ka.)
    9. આનન્દાતિ ભગવા આવોચ (સ્યા॰ પી॰)
    10. ānandāti bhagavā āvoca (syā. pī.)
    11. ચતુન્નં (પી॰ ક॰)
    12. catunnaṃ (pī. ka.)
    13. આસવાનં (સી॰ પી॰ ક॰)
    14. āsavānaṃ (sī. pī. ka.)



    Related texts:



    અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૬. આનન્દસુત્તવણ્ણના • 6. Ānandasuttavaṇṇanā

    ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૬-૧૦. આનન્દસુત્તાદિવણ્ણના • 6-10. Ānandasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact