Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya

    ၆. အာနန္ဒသုတ္တံ

    6. Ānandasuttaṃ

    ၁၀၆. ဧကံ သမယံ ဘဂဝာ ကောသမ္ဗိယံ ဝိဟရတိ ဃောသိတာရာမေ။ အထ ခော အာယသ္မာ အာနန္ဒော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အာယသ္မာ အာနန္ဒော ဘဂဝန္တံ ဧတဒဝောစ –

    106. Ekaṃ samayaṃ bhagavā kosambiyaṃ viharati ghositārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –

    ‘‘ကိတ္တာဝတာ နု ခော, ဘန္တေ, ဘိက္ခု သင္ဃေ 1 ဝိဟရန္တော ဖာသုံ ဝိဟရေယ္ယာ’’တိ? ‘‘ယတော ခော, အာနန္ဒ, ဘိက္ခု အတ္တနာ 2 သီလသမ္ပန္နော ဟောတိ, နော 3 ပရံ အဓိသီလေ သမ္ပဝတ္တာ 4; ဧတ္တာဝတာပိ ခော, အာနန္ဒ, ဘိက္ခု သင္ဃေ ဝိဟရန္တော ဖာသုံ ဝိဟရေယ္ယာ’’တိ။

    ‘‘Kittāvatā nu kho, bhante, bhikkhu saṅghe 5 viharanto phāsuṃ vihareyyā’’ti? ‘‘Yato kho, ānanda, bhikkhu attanā 6 sīlasampanno hoti, no 7 paraṃ adhisīle sampavattā 8; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘သိယာ ပန, ဘန္တေ, အညောပိ ပရိယာယော ယထာ ဘိက္ခု သင္ဃေ ဝိဟရန္တော ဖာသုံ ဝိဟရေယ္ယာ’’တိ? ‘‘သိယာ, အာနန္ဒ 9! ယတော ခော, အာနန္ဒ, ဘိက္ခု အတ္တနာ သီလသမ္ပန္နော ဟောတိ, နော ပရံ အဓိသီလေ သမ္ပဝတ္တာ; အတ္တာနုပေက္ခီ စ ဟောတိ, နော ပရာနုပေက္ခီ; ဧတ္တာဝတာပိ ခော, အာနန္ဒ, ဘိက္ခု သင္ဃေ ဝိဟရန္တော ဖာသုံ ဝိဟရေယ္ယာ’’တိ။

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda 10! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘သိယာ ပန, ဘန္တေ, အညောပိ ပရိယာယော ယထာ ဘိက္ခု သင္ဃေ ဝိဟရန္တော ဖာသုံ ဝိဟရေယ္ယာ’’တိ? ‘‘သိယာ, အာနန္ဒ! ယတော ခော, အာနန္ဒ, ဘိက္ခု အတ္တနာ သီလသမ္ပန္နော ဟောတိ, နော ပရံ အဓိသီလေ သမ္ပဝတ္တာ; အတ္တာနုပေက္ခီ စ ဟောတိ, နော ပရာနုပေက္ခီ; အပညာတော စ ဟောတိ, တေန စ အပညာတကေန နော ပရိတသ္သတိ; ဧတ္တာဝတာပိ ခော, အာနန္ဒ, ဘိက္ခု သင္ဃေ ဝိဟရန္တော ဖာသုံ ဝိဟရေယ္ယာ’’တိ။

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘သိယာ ပန, ဘန္တေ, အညောပိ ပရိယာယော ယထာ ဘိက္ခု သင္ဃေ ဝိဟရန္တော ဖာသုံ ဝိဟရေယ္ယာ’’တိ? ‘‘သိယာ, အာနန္ဒ! ယတော ခော, အာနန္ဒ, ဘိက္ခု အတ္တနာ သီလသမ္ပန္နော ဟောတိ, နော ပရံ အဓိသီလေ သမ္ပဝတ္တာ; အတ္တာနုပေက္ခီ စ ဟောတိ, နော ပရာနုပေက္ခီ; အပညာတော စ ဟောတိ, တေန စ အပညာတကေန နော ပရိတသ္သတိ; စတုန္နဉ္စ 11 ဈာနာနံ အာဘိစေတသိကာနံ ဒိဋ္ဌဓမ္မသုခဝိဟာရာနံ နိကာမလာဘီ ဟောတိ အကိစ္ဆလာဘီ အကသိရလာဘီ; ဧတ္တာဝတာပိ ခော, အာနန္ဒ, ဘိက္ခု သင္ဃေ ဝိဟရန္တော ဖာသုံ ဝိဟရေယ္ယာ’’တိ။

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca 12 jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘သိယာ ပန, ဘန္တေ, အညောပိ ပရိယာယော ယထာ ဘိက္ခု သင္ဃေ ဝိဟရန္တော ဖာသုံ ဝိဟရေယ္ယာ’’တိ? ‘‘သိယာ, အာနန္ဒ! ယတော ခော, အာနန္ဒ, ဘိက္ခု အတ္တနာ သီလသမ္ပန္နော ဟောတိ, နော ပရံ အဓိသီလေ သမ္ပဝတ္တာ; အတ္တာနုပေက္ခီ စ ဟောတိ, နော ပရာနုပေက္ခီ; အပညာတော စ ဟောတိ, တေန စ အပညာတကေန နော ပရိတသ္သတိ; စတုန္နဉ္စ ဈာနာနံ အာဘိစေတသိကာနံ ဒိဋ္ဌဓမ္မသုခဝိဟာရာနံ နိကာမလာဘီ ဟောတိ အကိစ္ဆလာဘီ အကသိရလာဘီ; အာသဝာနဉ္စ 13 ခယာ အနာသဝံ စေတောဝိမုတ္တိံ ပညာဝိမုတ္တိံ ဒိဋ္ဌေဝ ဓမ္မေ သယံ အဘိညာ သစ္ဆိကတ္ဝာ ဥပသမ္ပဇ္ဇ ဝိဟရတိ; ဧတ္တာဝတာပိ ခော, အာနန္ဒ, ဘိက္ခု သင္ဃေ ဝိဟရန္တော ဖာသုံ ဝိဟရေယ္ယ။

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; āsavānañca 14 khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ettāvatāpi kho, ānanda, bhikkhu saṅghe viharanto phāsuṃ vihareyya.

    ‘‘ဣမမ္ဟာ စာဟံ, အာနန္ဒ, ဖာသုဝိဟာရာ အညော ဖာသုဝိဟာရော ဥတ္တရိတရော ဝာ ပဏီတတရော ဝာ နတ္ထီတိ ဝဒာမီ’’တိ။ ဆဋ္ဌံ။

    ‘‘Imamhā cāhaṃ, ānanda, phāsuvihārā añño phāsuvihāro uttaritaro vā paṇītataro vā natthīti vadāmī’’ti. Chaṭṭhaṃ.




    Next: ၇. သီလသုတ္တံ • 7. Sīlasuttaṃ




    Footnotes:
    1. ဘိက္ခုံသံဃော (သ္ယာ. ပီ.)
    2. အတ္တနာ စ (ပီ. က.)
    3. နော စ (က.)
    4. သမ္ပဝတ္တာ ဟောတိ (က.)
    5. bhikkhuṃsaṃgho (syā. pī.)
    6. attanā ca (pī. ka.)
    7. no ca (ka.)
    8. sampavattā hoti (ka.)
    9. အာနန္ဒာတိ ဘဂဝာ အာဝောစ (သ္ယာ. ပီ.)
    10. ānandāti bhagavā āvoca (syā. pī.)
    11. စတုန္နံ (ပီ. က.)
    12. catunnaṃ (pī. ka.)
    13. အာသဝာနံ (သီ. ပီ. က.)
    14. āsavānaṃ (sī. pī. ka.)



    Related texts:



    အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၆. အာနန္ဒသုတ္တဝဏ္ဏနာ • 6. Ānandasuttavaṇṇanā

    ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆-၁၀. အာနန္ဒသုတ္တာဒိဝဏ္ဏနာ • 6-10. Ānandasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact