| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. အာနန္ဒသုတ္တံ
10. Ānandasuttaṃ
၄၁၉. အထ ခော ဝစ္ဆဂောတ္တော ပရိဗ္ဗာဇကော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝတာ သဒ္ဓိံ သမ္မောဒိ။ သမ္မောဒနီယံ ကထံ သာရဏီယံ ဝီတိသာရေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော ဝစ္ဆဂောတ္တော ပရိဗ္ဗာဇကော ဘဂဝန္တံ ဧတဒဝောစ – ‘‘ကိံ နု ခော, ဘော ဂောတမ, အတ္ထတ္တာ’’တိ? ဧဝံ ဝုတ္တေ, ဘဂဝာ တုဏ္ဟီ အဟောသိ။ ‘‘ကိံ ပန, ဘော ဂောတမ, နတ္ထတ္တာ’’တိ? ဒုတိယမ္ပိ ခော ဘဂဝာ တုဏ္ဟီ အဟောသိ။ အထ ခော ဝစ္ဆဂောတ္တော ပရိဗ္ဗာဇကော ဥဋ္ဌာယာသနာ ပက္ကာမိ။
419. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘kiṃ nu kho, bho gotama, atthattā’’ti? Evaṃ vutte, bhagavā tuṇhī ahosi. ‘‘Kiṃ pana, bho gotama, natthattā’’ti? Dutiyampi kho bhagavā tuṇhī ahosi. Atha kho vacchagotto paribbājako uṭṭhāyāsanā pakkāmi.
အထ ခော အာယသ္မာ အာနန္ဒော အစိရပက္ကန္တေ ဝစ္ဆဂောတ္တေ ပရိဗ္ဗာဇကေ ဘဂဝန္တံ ဧတဒဝောစ – ‘‘ကိံ နု ခော, ဘန္တေ, ဘဂဝာ ဝစ္ဆဂောတ္တသ္သ ပရိဗ္ဗာဇကသ္သ ပဉ္ဟံ ပုဋ္ဌော န ဗ္ယာကာသီ’’တိ? ‘‘အဟဉ္စာနန္ဒ, ဝစ္ဆဂောတ္တသ္သ ပရိဗ္ဗာဇကသ္သ ‘အတ္ထတ္တာ’တိ ပုဋ္ဌော သမာနော ‘အတ္ထတ္တာ’တိ ဗ္ယာကရေယ္ယံ, ယေ တေ, အာနန္ဒ, သမဏဗ္ရာဟ္မဏာ သသ္သတဝာဒာ တေသမေတံ သဒ္ဓိံ 1 အဘဝိသ္သ။ အဟဉ္စာနန္ဒ, ဝစ္ဆဂောတ္တသ္သ ပရိဗ္ဗာဇကသ္သ ‘နတ္ထတ္တာ’တိ ပုဋ္ဌော သမာနော ‘နတ္ထတ္တာ’တိ ဗ္ယာကရေယ္ယံ, ယေ တေ, အာနန္ဒ, သမဏဗ္ရာဟ္မဏာ ဥစ္ဆေဒဝာဒာ တေသမေတံ သဒ္ဓိံ အဘဝိသ္သ။ အဟဉ္စာနန္ဒ, ဝစ္ဆဂောတ္တသ္သ ပရိဗ္ဗာဇကသ္သ ‘အတ္ထတ္တာ’တိ ပုဋ္ဌော သမာနော ‘အတ္ထတ္တာ’တိ ဗ္ယာကရေယ္ယံ, အပိ နု မေ တံ, အာနန္ဒ, အနုလောမံ အဘဝိသ္သ ဉာဏသ္သ ဥပ္ပာဒာယ – ‘သဗ္ဗေ ဓမ္မာ အနတ္တာ’’’တိ? ‘‘နော ဟေတံ, ဘန္တေ’’။ ‘‘အဟဉ္စာနန္ဒ, ဝစ္ဆဂောတ္တသ္သ ပရိဗ္ဗာဇကသ္သ ‘နတ္ထတ္တာ’တိ ပုဋ္ဌော သမာနော ‘နတ္ထတ္တာ’တိ ဗ္ယာကရေယ္ယံ , သမ္မူဠ္ဟသ္သ, အာနန္ဒ, ဝစ္ဆဂောတ္တသ္သ ပရိဗ္ဗာဇကသ္သ ဘိယ္ယော သမ္မောဟာယ အဘဝိသ္သ – ‘အဟုဝာ မေ နူန ပုဗ္ဗေ အတ္တာ, သော ဧတရဟိ နတ္ထီ’’’တိ။ ဒသမံ။
Atha kho āyasmā ānando acirapakkante vacchagotte paribbājake bhagavantaṃ etadavoca – ‘‘kiṃ nu kho, bhante, bhagavā vacchagottassa paribbājakassa pañhaṃ puṭṭho na byākāsī’’ti? ‘‘Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, ye te, ānanda, samaṇabrāhmaṇā sassatavādā tesametaṃ saddhiṃ 2 abhavissa. Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ, ye te, ānanda, samaṇabrāhmaṇā ucchedavādā tesametaṃ saddhiṃ abhavissa. Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, api nu me taṃ, ānanda, anulomaṃ abhavissa ñāṇassa uppādāya – ‘sabbe dhammā anattā’’’ti? ‘‘No hetaṃ, bhante’’. ‘‘Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ , sammūḷhassa, ānanda, vacchagottassa paribbājakassa bhiyyo sammohāya abhavissa – ‘ahuvā me nūna pubbe attā, so etarahi natthī’’’ti. Dasamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. အာနန္ဒသုတ္တဝဏ္ဏနာ • 10. Ānandasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. အာနန္ဒသုတ္တဝဏ္ဏနာ • 10. Ānandasuttavaṇṇanā
