Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya

    ೬. ಆನನ್ದಸುತ್ತಂ

    6. Ānandasuttaṃ

    ೧೦೬. ಏಕಂ ಸಮಯಂ ಭಗವಾ ಕೋಸಮ್ಬಿಯಂ ವಿಹರತಿ ಘೋಸಿತಾರಾಮೇ। ಅಥ ಖೋ ಆಯಸ್ಮಾ ಆನನ್ದೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ಆನನ್ದೋ ಭಗವನ್ತಂ ಏತದವೋಚ –

    106. Ekaṃ samayaṃ bhagavā kosambiyaṃ viharati ghositārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –

    ‘‘ಕಿತ್ತಾವತಾ ನು ಖೋ, ಭನ್ತೇ, ಭಿಕ್ಖು ಸಙ್ಘೇ 1 ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ? ‘‘ಯತೋ ಖೋ, ಆನನ್ದ, ಭಿಕ್ಖು ಅತ್ತನಾ 2 ಸೀಲಸಮ್ಪನ್ನೋ ಹೋತಿ, ನೋ 3 ಪರಂ ಅಧಿಸೀಲೇ ಸಮ್ಪವತ್ತಾ 4; ಏತ್ತಾವತಾಪಿ ಖೋ, ಆನನ್ದ, ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ।

    ‘‘Kittāvatā nu kho, bhante, bhikkhu saṅghe 5 viharanto phāsuṃ vihareyyā’’ti? ‘‘Yato kho, ānanda, bhikkhu attanā 6 sīlasampanno hoti, no 7 paraṃ adhisīle sampavattā 8; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘ಸಿಯಾ ಪನ, ಭನ್ತೇ, ಅಞ್ಞೋಪಿ ಪರಿಯಾಯೋ ಯಥಾ ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ? ‘‘ಸಿಯಾ, ಆನನ್ದ 9! ಯತೋ ಖೋ, ಆನನ್ದ, ಭಿಕ್ಖು ಅತ್ತನಾ ಸೀಲಸಮ್ಪನ್ನೋ ಹೋತಿ, ನೋ ಪರಂ ಅಧಿಸೀಲೇ ಸಮ್ಪವತ್ತಾ; ಅತ್ತಾನುಪೇಕ್ಖೀ ಚ ಹೋತಿ, ನೋ ಪರಾನುಪೇಕ್ಖೀ; ಏತ್ತಾವತಾಪಿ ಖೋ, ಆನನ್ದ, ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ।

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda 10! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘ಸಿಯಾ ಪನ, ಭನ್ತೇ, ಅಞ್ಞೋಪಿ ಪರಿಯಾಯೋ ಯಥಾ ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ? ‘‘ಸಿಯಾ, ಆನನ್ದ! ಯತೋ ಖೋ, ಆನನ್ದ, ಭಿಕ್ಖು ಅತ್ತನಾ ಸೀಲಸಮ್ಪನ್ನೋ ಹೋತಿ, ನೋ ಪರಂ ಅಧಿಸೀಲೇ ಸಮ್ಪವತ್ತಾ; ಅತ್ತಾನುಪೇಕ್ಖೀ ಚ ಹೋತಿ, ನೋ ಪರಾನುಪೇಕ್ಖೀ; ಅಪಞ್ಞಾತೋ ಚ ಹೋತಿ, ತೇನ ಚ ಅಪಞ್ಞಾತಕೇನ ನೋ ಪರಿತಸ್ಸತಿ; ಏತ್ತಾವತಾಪಿ ಖೋ, ಆನನ್ದ, ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ।

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘ಸಿಯಾ ಪನ, ಭನ್ತೇ, ಅಞ್ಞೋಪಿ ಪರಿಯಾಯೋ ಯಥಾ ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ? ‘‘ಸಿಯಾ, ಆನನ್ದ! ಯತೋ ಖೋ, ಆನನ್ದ, ಭಿಕ್ಖು ಅತ್ತನಾ ಸೀಲಸಮ್ಪನ್ನೋ ಹೋತಿ, ನೋ ಪರಂ ಅಧಿಸೀಲೇ ಸಮ್ಪವತ್ತಾ; ಅತ್ತಾನುಪೇಕ್ಖೀ ಚ ಹೋತಿ, ನೋ ಪರಾನುಪೇಕ್ಖೀ; ಅಪಞ್ಞಾತೋ ಚ ಹೋತಿ, ತೇನ ಚ ಅಪಞ್ಞಾತಕೇನ ನೋ ಪರಿತಸ್ಸತಿ; ಚತುನ್ನಞ್ಚ 11 ಝಾನಾನಂ ಆಭಿಚೇತಸಿಕಾನಂ ದಿಟ್ಠಧಮ್ಮಸುಖವಿಹಾರಾನಂ ನಿಕಾಮಲಾಭೀ ಹೋತಿ ಅಕಿಚ್ಛಲಾಭೀ ಅಕಸಿರಲಾಭೀ; ಏತ್ತಾವತಾಪಿ ಖೋ, ಆನನ್ದ, ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ।

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca 12 jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘ಸಿಯಾ ಪನ, ಭನ್ತೇ, ಅಞ್ಞೋಪಿ ಪರಿಯಾಯೋ ಯಥಾ ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯಾ’’ತಿ? ‘‘ಸಿಯಾ, ಆನನ್ದ! ಯತೋ ಖೋ, ಆನನ್ದ, ಭಿಕ್ಖು ಅತ್ತನಾ ಸೀಲಸಮ್ಪನ್ನೋ ಹೋತಿ, ನೋ ಪರಂ ಅಧಿಸೀಲೇ ಸಮ್ಪವತ್ತಾ; ಅತ್ತಾನುಪೇಕ್ಖೀ ಚ ಹೋತಿ, ನೋ ಪರಾನುಪೇಕ್ಖೀ; ಅಪಞ್ಞಾತೋ ಚ ಹೋತಿ, ತೇನ ಚ ಅಪಞ್ಞಾತಕೇನ ನೋ ಪರಿತಸ್ಸತಿ; ಚತುನ್ನಞ್ಚ ಝಾನಾನಂ ಆಭಿಚೇತಸಿಕಾನಂ ದಿಟ್ಠಧಮ್ಮಸುಖವಿಹಾರಾನಂ ನಿಕಾಮಲಾಭೀ ಹೋತಿ ಅಕಿಚ್ಛಲಾಭೀ ಅಕಸಿರಲಾಭೀ; ಆಸವಾನಞ್ಚ 13 ಖಯಾ ಅನಾಸವಂ ಚೇತೋವಿಮುತ್ತಿಂ ಪಞ್ಞಾವಿಮುತ್ತಿಂ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರತಿ; ಏತ್ತಾವತಾಪಿ ಖೋ, ಆನನ್ದ, ಭಿಕ್ಖು ಸಙ್ಘೇ ವಿಹರನ್ತೋ ಫಾಸುಂ ವಿಹರೇಯ್ಯ।

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; āsavānañca 14 khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ettāvatāpi kho, ānanda, bhikkhu saṅghe viharanto phāsuṃ vihareyya.

    ‘‘ಇಮಮ್ಹಾ ಚಾಹಂ, ಆನನ್ದ, ಫಾಸುವಿಹಾರಾ ಅಞ್ಞೋ ಫಾಸುವಿಹಾರೋ ಉತ್ತರಿತರೋ ವಾ ಪಣೀತತರೋ ವಾ ನತ್ಥೀತಿ ವದಾಮೀ’’ತಿ। ಛಟ್ಠಂ।

    ‘‘Imamhā cāhaṃ, ānanda, phāsuvihārā añño phāsuvihāro uttaritaro vā paṇītataro vā natthīti vadāmī’’ti. Chaṭṭhaṃ.




    Next: ೭. ಸೀಲಸುತ್ತಂ • 7. Sīlasuttaṃ




    Footnotes:
    1. ಭಿಕ್ಖುಂಸಂಘೋ (ಸ್ಯಾ॰ ಪೀ॰)
    2. ಅತ್ತನಾ ಚ (ಪೀ॰ ಕ॰)
    3. ನೋ ಚ (ಕ॰)
    4. ಸಮ್ಪವತ್ತಾ ಹೋತಿ (ಕ॰)
    5. bhikkhuṃsaṃgho (syā. pī.)
    6. attanā ca (pī. ka.)
    7. no ca (ka.)
    8. sampavattā hoti (ka.)
    9. ಆನನ್ದಾತಿ ಭಗವಾ ಆವೋಚ (ಸ್ಯಾ॰ ಪೀ॰)
    10. ānandāti bhagavā āvoca (syā. pī.)
    11. ಚತುನ್ನಂ (ಪೀ॰ ಕ॰)
    12. catunnaṃ (pī. ka.)
    13. ಆಸವಾನಂ (ಸೀ॰ ಪೀ॰ ಕ॰)
    14. āsavānaṃ (sī. pī. ka.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೬. ಆನನ್ದಸುತ್ತವಣ್ಣನಾ • 6. Ānandasuttavaṇṇanā

    ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೬-೧೦. ಆನನ್ದಸುತ್ತಾದಿವಣ್ಣನಾ • 6-10. Ānandasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact