| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. ஆனந்த³ஸுத்தவண்ணனா
2. Ānandasuttavaṇṇanā
32. து³தியே ததா²ரூபோதி ததா²ஜாதிகோ. ஸமாதி⁴படிலாபோ⁴தி சித்தேகக்³க³தாலாபோ⁴. இமஸ்மிங் ச ஸவிஞ்ஞாணகேதி எத்த² அத்தனோ ச பரஸ்ஸ சாதி உப⁴யேஸம்பி காயோ ஸவிஞ்ஞாணகட்டே²ன ஏகதோ கத்வா இமஸ்மிந்தி வுத்தோ. அஹங்காரமமங்காரமானானுஸயாதி அஹங்காரதி³ட்டி² ச மமங்காரதண்ஹா ச மானானுஸயோ சாதி அத்தனோ ச பரஸ்ஸ ச கிலேஸா. நாஸ்ஸூதி ந ப⁴வெய்யுங். ப³ஹித்³தா⁴ ச ஸப்³ப³னிமித்தேஸூதி ரூபனிமித்தங், ஸத்³த³னிமித்தங், க³ந்த⁴னிமித்தங், ரஸனிமித்தங், பொ²ட்ட²ப்³ப³னிமித்தங், ஸஸ்ஸதாதி³னிமித்தங், புக்³க³லனிமித்தங் த⁴ம்மனிமித்தந்தி ஏவரூபேஸு ச ப³ஹித்³தா⁴ ஸப்³ப³னிமித்தேஸு. சேதோவிமுத்திங் பஞ்ஞாவிமுத்திந்தி ப²லஸமாதி⁴ஞ்சேவ ப²லஞாணஞ்ச. ஸியாதி ப⁴வெய்ய.
32. Dutiye tathārūpoti tathājātiko. Samādhipaṭilābhoti cittekaggatālābho. Imasmiṃ ca saviññāṇaketi ettha attano ca parassa cāti ubhayesampi kāyo saviññāṇakaṭṭhena ekato katvā imasminti vutto. Ahaṅkāramamaṅkāramānānusayāti ahaṅkāradiṭṭhi ca mamaṅkārataṇhā ca mānānusayo cāti attano ca parassa ca kilesā. Nāssūti na bhaveyyuṃ. Bahiddhā ca sabbanimittesūti rūpanimittaṃ, saddanimittaṃ, gandhanimittaṃ, rasanimittaṃ, phoṭṭhabbanimittaṃ, sassatādinimittaṃ, puggalanimittaṃ dhammanimittanti evarūpesu ca bahiddhā sabbanimittesu. Cetovimuttiṃ paññāvimuttinti phalasamādhiñceva phalañāṇañca. Siyāti bhaveyya.
இதா⁴னந்த³, பி⁴க்கு²னோதி, ஆனந்த³, இமஸ்மிங் ஸாஸனே பி⁴க்கு²னோ. ஏதங் ஸந்தங் ஏதங் பணீதந்தி நிப்³பா³னங் த³ஸ்ஸெந்தோ ஆஹ. நிப்³பா³னங் ஹி கிலேஸானங் ஸந்ததாய ஸந்தங் நாம, நிப்³பா³னங் ஸந்தந்தி ஸமாபத்திங் அப்பெத்வாவ தி³வஸம்பி நிஸின்னஸ்ஸ சித்துப்பாதோ³ ஸந்தந்தேவ பவத்ததீதிபி ஸந்தங். பணீதந்தி ஸமாபத்திங் அப்பெத்வா நிஸின்னஸ்ஸாபி சித்துப்பாதோ³ பணீதந்தேவ பவத்ததீதி நிப்³பா³னங் பணீதங் நாம. ஸப்³ப³ஸங்கா²ரஸமதோ²திஆதீ³னிபி தஸ்ஸேவ வேவசனானி. ‘‘ஸப்³ப³ஸங்கா²ரஸமதோ²’’தி ஸமாபத்திங் அப்பெத்வா நிஸின்னஸ்ஸ ஹி தி³வஸபா⁴க³ம்பி சித்துப்பாதோ³ ஸப்³ப³ஸங்கா²ரஸமதோ²தேவ பவத்ததி…பே॰… ததா² தீஸு ப⁴வேஸு வானஸங்கா²தாய தண்ஹாய அபா⁴வேன நிப்³பா³னந்தி லத்³த⁴னாமே தஸ்மிங் ஸமாபத்திங் அப்பெத்வா நிஸின்னஸ்ஸ சித்துப்பாதோ³ நிப்³பா³னங் நிப்³பா³னந்தேவ பவத்ததீதி ஸப்³ப³ஸங்கா²ரஸமதோ²திஆதீ³னி நாமானி லப⁴தி. இமஸ்மிங் பன அட்ட²விதே⁴ ஆபோ⁴க³ஸமன்னாஹாரே இமஸ்மிங் டா²னே ஏகோபி லப்³ப⁴தி, த்³வேபி ஸப்³பே³பி லப்³ப⁴ந்தேவ.
Idhānanda, bhikkhunoti, ānanda, imasmiṃ sāsane bhikkhuno. Etaṃ santaṃ etaṃ paṇītanti nibbānaṃ dassento āha. Nibbānaṃ hi kilesānaṃ santatāya santaṃ nāma, nibbānaṃ santanti samāpattiṃ appetvāva divasampi nisinnassa cittuppādo santanteva pavattatītipi santaṃ. Paṇītanti samāpattiṃ appetvā nisinnassāpi cittuppādo paṇītanteva pavattatīti nibbānaṃ paṇītaṃ nāma. Sabbasaṅkhārasamathotiādīnipi tasseva vevacanāni. ‘‘Sabbasaṅkhārasamatho’’ti samāpattiṃ appetvā nisinnassa hi divasabhāgampi cittuppādo sabbasaṅkhārasamathoteva pavattati…pe… tathā tīsu bhavesu vānasaṅkhātāya taṇhāya abhāvena nibbānanti laddhanāme tasmiṃ samāpattiṃ appetvā nisinnassa cittuppādo nibbānaṃ nibbānanteva pavattatīti sabbasaṅkhārasamathotiādīni nāmāni labhati. Imasmiṃ pana aṭṭhavidhe ābhogasamannāhāre imasmiṃ ṭhāne ekopi labbhati, dvepi sabbepi labbhanteva.
ஸங்கா²யாதி ஞாணேன ஜானித்வா. பரோபரானீதி பரானி ச ஓபரானி ச. பரஅத்தபா⁴வஸகஅத்தபா⁴வானி ஹி பரானி ச ஓபரானி சாதி வுத்தங் ஹோதி. யஸ்ஸாதி யஸ்ஸ அரஹதோ. இஞ்ஜிதந்தி ராகி³ஞ்ஜிதங் தோ³ஸமோஹமானதி³ட்டி²கிலேஸது³ச்சரிதிஞ்ஜிதந்தி இமானி ஸத்த இஞ்ஜிதானி சலிதானி ப²ந்தி³தானி. நத்தி² குஹிஞ்சீதி கத்த²சி ஏகாரம்மணேபி நத்தி². ஸந்தோதி பச்சனீககிலேஸானங் ஸந்ததாய ஸந்தோ. விதூ⁴மோதி காயது³ச்சரிதாதி³தூ⁴மவிரஹிதோ. அனீகோ⁴தி ராகா³தி³ஈக⁴விரஹிதோ. நிராஸோதி நித்தண்ஹோ. அதாரீதி திண்ணோ உத்திண்ணோ ஸமதிக்கந்தோ. ஸோதி ஸோ அரஹங் கீ²ணாஸவோ. ஜாதிஜரந்தி எத்த² ஜாதிஜராக³ஹணேனேவ ப்³யாதி⁴மரணம்பி க³ஹிதமேவாதி வேதி³தப்³ப³ங். இதி ஸுத்தந்தேபி கா³தா²யபி அரஹத்தப²லஸமாபத்தியேவ கதி²தாதி.
Saṅkhāyāti ñāṇena jānitvā. Paroparānīti parāni ca oparāni ca. Paraattabhāvasakaattabhāvāni hi parāni ca oparāni cāti vuttaṃ hoti. Yassāti yassa arahato. Iñjitanti rāgiñjitaṃ dosamohamānadiṭṭhikilesaduccaritiñjitanti imāni satta iñjitāni calitāni phanditāni. Natthi kuhiñcīti katthaci ekārammaṇepi natthi. Santoti paccanīkakilesānaṃ santatāya santo. Vidhūmoti kāyaduccaritādidhūmavirahito. Anīghoti rāgādiīghavirahito. Nirāsoti nittaṇho. Atārīti tiṇṇo uttiṇṇo samatikkanto. Soti so arahaṃ khīṇāsavo. Jātijaranti ettha jātijarāgahaṇeneva byādhimaraṇampi gahitamevāti veditabbaṃ. Iti suttantepi gāthāyapi arahattaphalasamāpattiyeva kathitāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஆனந்த³ஸுத்தங் • 2. Ānandasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. ஆனந்த³ஸுத்தவண்ணனா • 2. Ānandasuttavaṇṇanā
