| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૨. આનન્દસુત્તવણ્ણના
2. Ānandasuttavaṇṇanā
૩૨. દુતિયે તથાજાતિકોતિ તથાસભાવો. ચિત્તેકગ્ગતાલાભોતિ ચિત્તેકગ્ગતાય અધિગમો. રૂપમેવ કિલેસુપ્પત્તિયા કારણભાવતો રૂપનિમિત્તં. એસ નયો સેસેસુપિ. સસ્સતાદિનિમિત્તન્તિ સસ્સતુચ્છેદભાવનિમિત્તં. પુગ્ગલનિમિત્તન્તિ પુગ્ગલાભિનિવેસનનિમિત્તં. ધમ્મનિમિત્તન્તિ ધમ્મારમ્મણસઙ્ખાતં નિમિત્તં. ‘‘સિયા નુ ખો, ભન્તે’’તિ થેરેન પુટ્ઠો ભગવા ‘‘સિયા’’તિ અવોચ લોકુત્તરસમાધિપ્પટિલાભં સન્ધાય. સો હિ નિબ્બાનં સન્તં પણીતન્તિ ચ પસ્સતિ. તેનાહ ‘‘ઇધાનન્દા’’તિઆદિ.
32. Dutiye tathājātikoti tathāsabhāvo. Cittekaggatālābhoti cittekaggatāya adhigamo. Rūpameva kilesuppattiyā kāraṇabhāvato rūpanimittaṃ. Esa nayo sesesupi. Sassatādinimittanti sassatucchedabhāvanimittaṃ. Puggalanimittanti puggalābhinivesananimittaṃ. Dhammanimittanti dhammārammaṇasaṅkhātaṃ nimittaṃ. ‘‘Siyā nu kho, bhante’’ti therena puṭṭho bhagavā ‘‘siyā’’ti avoca lokuttarasamādhippaṭilābhaṃ sandhāya. So hi nibbānaṃ santaṃ paṇītanti ca passati. Tenāha ‘‘idhānandā’’tiādi.
નિબ્બાનં સન્તન્તિ સમાપત્તિં અપ્પેત્વાતિ નિબ્બાનં સન્તન્તિ આભુજિત્વા ફલસમાપત્તિં અપ્પેત્વા . દિવસમ્પીતિઆદિના અસઙ્ખતાય ધાતુયા અચ્ચન્તસન્તપણીતાદિભાવં દસ્સેતિ. અટ્ઠવિધેતિ ‘‘સન્તં પણીતં સબ્બસઙ્ખારસમથો સબ્બૂપધિપટિનિસ્સગ્ગો તણ્હાક્ખયો વિરાગો નિરોધો નિબ્બાન’’ન્તિ એવં અટ્ઠવિધે આભોગસઞ્ઞિતે સમન્નાહારે. નિદ્ધારણે ચેતં ભુમ્મં. ઇમસ્મિં ઠાને…પે॰… લબ્ભન્તેવાતિ ‘‘ઇધાનન્દ, ભિક્ખુનો એવં હોતી’’તિ આગતે ઇમસ્મિં સુત્તપ્પદેસે એકોપિ આભોગસમન્નાહારો ચેપિ સબ્બે અટ્ઠપિ આભોગસમન્નાહારા લબ્ભન્તેવ સમન્નાહરતં અત્થાવહત્તા.
Nibbānaṃsantanti samāpattiṃ appetvāti nibbānaṃ santanti ābhujitvā phalasamāpattiṃ appetvā . Divasampītiādinā asaṅkhatāya dhātuyā accantasantapaṇītādibhāvaṃ dasseti. Aṭṭhavidheti ‘‘santaṃ paṇītaṃ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbāna’’nti evaṃ aṭṭhavidhe ābhogasaññite samannāhāre. Niddhāraṇe cetaṃ bhummaṃ. Imasmiṃ ṭhāne…pe… labbhantevāti ‘‘idhānanda, bhikkhuno evaṃ hotī’’ti āgate imasmiṃ suttappadese ekopi ābhogasamannāhāro cepi sabbe aṭṭhapi ābhogasamannāhārā labbhanteva samannāharataṃ atthāvahattā.
ઞાણેન જાનિત્વાતિ વિપસ્સનાઞાણસહિતેન મગ્ગઞાણેન જાનિત્વા. પરાનિ ચ ઓપરાનિ ચ ચક્ખાદીનિ આયતનાનિ. સન્તતાયાતિ પટિપ્પસ્સદ્ધિતાય. કાયદુચ્ચરિતાદિધૂમવિરહિતોતિ કાયદુચ્ચરિતાદિ એવ સન્તાપનટ્ઠેન ધૂમો, તેન વિરહિતો. અનીઘોતિ અપાપો. જાતિજરાગહણેનેવ બ્યાધિમરણમ્પિ ગહિતમેવાતિ તબ્ભાવભાવતોતિ વુત્તં.
Ñāṇena jānitvāti vipassanāñāṇasahitena maggañāṇena jānitvā. Parāni ca oparāni ca cakkhādīni āyatanāni. Santatāyāti paṭippassaddhitāya. Kāyaduccaritādidhūmavirahitoti kāyaduccaritādi eva santāpanaṭṭhena dhūmo, tena virahito. Anīghoti apāpo. Jātijarāgahaṇeneva byādhimaraṇampi gahitamevāti tabbhāvabhāvatoti vuttaṃ.
આનન્દસુત્તવણ્ણના નિટ્ઠિતા.
Ānandasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૨. આનન્દસુત્તં • 2. Ānandasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૨. આનન્દસુત્તવણ્ણના • 2. Ānandasuttavaṇṇanā
