| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೪. ಆನನ್ದಸುತ್ತವಣ್ಣನಾ
4. Ānandasuttavaṇṇanā
೨೧೨. ರಾಗೋತಿ ಏತ್ಥ ಆಯಸ್ಮತೋ ವಙ್ಗೀಸಸ್ಸ ರಾಗಸ್ಸ ಉಪ್ಪತ್ತಿಯಾ ಕಾರಣಂ ವಿಭಾವೇತುಂ ‘‘ಆಯಸ್ಮಾ ಆನನ್ದೋ’’ತಿಆದಿ ವುತ್ತಂ। ತನ್ತಿ ಆನನ್ದತ್ಥೇರಂ। ಆರಮ್ಮಣಂ ಪರಿಗ್ಗಹೇತುನ್ತಿ ಕಾಯವೇದನಾದಿಭೇದಂ ಆರಮ್ಮಣಂ ಸತಿಗೋಚರಂ। ಅಸುಭದುಕ್ಖಾದಿತೋ, ರೂಪಾದಿಏಕೇಕಮೇವ ವಾ ಛಳಾರಮ್ಮಣಂ ಅನಿಚ್ಚದುಕ್ಖಾದಿತೋ ಪರಿಗ್ಗಣ್ಹಿತುಂ ಪರಿಚ್ಛಿಜ್ಜ ಜಾನಿತುಂ। ಇತ್ಥಿರೂಪಾರಮ್ಮಣೇತಿ ಇತ್ಥಿಸನ್ತಾನೇ ರೂಪಸಭಾವೇ ಆರಮ್ಮಣೇ।
212.Rāgoti ettha āyasmato vaṅgīsassa rāgassa uppattiyā kāraṇaṃ vibhāvetuṃ ‘‘āyasmā ānando’’tiādi vuttaṃ. Tanti ānandattheraṃ. Ārammaṇaṃ pariggahetunti kāyavedanādibhedaṃ ārammaṇaṃ satigocaraṃ. Asubhadukkhādito, rūpādiekekameva vā chaḷārammaṇaṃ aniccadukkhādito pariggaṇhituṃ paricchijja jānituṃ. Itthirūpārammaṇeti itthisantāne rūpasabhāve ārammaṇe.
ನಿಬ್ಬಾಪನನ್ತಿ ನಿಬ್ಬಾಪಯತಿ ಏತೇನಾತಿ ನಿಬ್ಬಾಪನಂ। ವಿಪಲ್ಲಾಸೇನಾತಿ ಅಸುಭೇ ‘‘ಸುಭ’’ನ್ತಿ ವಿಪಲ್ಲಾಸಭಾವಹೇತು। ರಾಗಟ್ಠಾನಿಯನ್ತಿ ರಾಗುಪ್ಪತ್ತಿಹೇತು। ಇಟ್ಠಾರಮ್ಮಣನ್ತಿ ಸುಭಾರಮ್ಮಣಂ। ಏತ್ಥ ಚ ಇಟ್ಠಾರಮ್ಮಣಸೀಸೇನ ತತ್ಥ ಇಟ್ಠಾಕಾರಗ್ಗಹಣಂ ವದತಿ। ತಞ್ಹಿ ವಜ್ಜನೀಯಂ। ಪರತೋತಿ ಅವಸವತ್ತನತ್ಥೇನ ಅಞ್ಞತೋ। ಸಙ್ಖಾರಾ ಹಿ ‘‘ಮಾ ಭಿಜ್ಜನ್ತೂ’’ತಿ ಇಚ್ಛಿತಾಪಿ ಭಿಜ್ಜನ್ತೇವ, ತಸ್ಮಾ ತೇ ಅವಸವತ್ತಿತ್ತಾ ಪರೋ ನಾಮ, ಸಾ ಚ ನೇಸಂ ಪರತಾ ಅನಿಚ್ಚದಸ್ಸನೇನ ಪಾಕಟಾ ಹೋತೀತಿ ವುತ್ತಂ ‘‘ಪರತೋ ಪಸ್ಸಾತಿ ಅನಿಚ್ಚತೋ ಪಸ್ಸಾ’’ತಿ। ಕಾಮಂ ವಿಪಸ್ಸನಾ ಸಙ್ಖಾರನಿಮಿತ್ತಂ ನ ಪರಿಚ್ಚಜತಿ ಸಙ್ಖಾರೇ ಆರಬ್ಭ ವತ್ತನತೋ, ಯೇಸಂ ಪನ ನಿಮಿತ್ತಾನಂ ಅಗ್ಗಹಣೇನ ಅನಿಮಿತ್ತಾತಿ ಗಹಿತುಂ ಅರಹತಿ, ತಂ ದಸ್ಸೇತುಂ ‘‘ನಿಚ್ಚಾದೀನಂ ನಿಮಿತ್ತಾನ’’ನ್ತಿಆದಿ ವುತ್ತಂ। ಸಲಕ್ಖಣ-ಸಾಮಞ್ಞಲಕ್ಖಣ-ದಸ್ಸನವಸೇನ ಮಾನಸ್ಸ ದಸ್ಸನಾಭಿಸಮಯೋ, ವಿಪಸ್ಸನಾಯ ಪಹಾನಾಭಿಸಮಯೋ। ‘‘ಮಗ್ಗೇನಾ’’ತಿ ವದನ್ತಿ, ಮಗ್ಗೇನೇವ ಪನ ಅಸಮ್ಮೋಹತೋ ಪರಿಞ್ಞಾಪಟಿವೇಧವಸೇನ ದಸ್ಸನಾಭಿಸಮಯೋ, ಪಹಾನಪಟಿವೇಧವಸೇನ ಪಹಾನಾಭಿಸಮಯೋ। ರಾಗಾದಿಸನ್ತತಾಯಾತಿ ರಾಗಾದೀನಂ ಸಮುಚ್ಛೇದವಸೇನ ಪಟಿಪ್ಪಸ್ಸದ್ಧಿವಸೇನ ವೂಪಸಮೇತಬ್ಬತೋ ಸನ್ತಭಾವೇನ।
Nibbāpananti nibbāpayati etenāti nibbāpanaṃ. Vipallāsenāti asubhe ‘‘subha’’nti vipallāsabhāvahetu. Rāgaṭṭhāniyanti rāguppattihetu. Iṭṭhārammaṇanti subhārammaṇaṃ. Ettha ca iṭṭhārammaṇasīsena tattha iṭṭhākāraggahaṇaṃ vadati. Tañhi vajjanīyaṃ. Paratoti avasavattanatthena aññato. Saṅkhārā hi ‘‘mā bhijjantū’’ti icchitāpi bhijjanteva, tasmā te avasavattittā paro nāma, sā ca nesaṃ paratā aniccadassanena pākaṭā hotīti vuttaṃ ‘‘parato passāti aniccato passā’’ti. Kāmaṃ vipassanā saṅkhāranimittaṃ na pariccajati saṅkhāre ārabbha vattanato, yesaṃ pana nimittānaṃ aggahaṇena animittāti gahituṃ arahati, taṃ dassetuṃ ‘‘niccādīnaṃ nimittāna’’ntiādi vuttaṃ. Salakkhaṇa-sāmaññalakkhaṇa-dassanavasena mānassa dassanābhisamayo, vipassanāya pahānābhisamayo. ‘‘Maggenā’’ti vadanti, maggeneva pana asammohato pariññāpaṭivedhavasena dassanābhisamayo, pahānapaṭivedhavasena pahānābhisamayo. Rāgādisantatāyāti rāgādīnaṃ samucchedavasena paṭippassaddhivasena vūpasametabbato santabhāvena.
ಆನನ್ದಸುತ್ತವಣ್ಣನಾ ನಿಟ್ಠಿತಾ।
Ānandasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೪. ಆನನ್ದಸುತ್ತಂ • 4. Ānandasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೪. ಆನನ್ದಸುತ್ತವಣ್ಣನಾ • 4. Ānandasuttavaṇṇanā
