32. ஆனந்தரிகஸமாதி⁴ஞாணனித்³தே³ஸோ

32. Ānantarikasamādhiñāṇaniddeso

80. கத²ங் அவிக்கே²பபரிஸுத்³த⁴த்தா ஆஸவஸமுச்சே²தே³ பஞ்ஞா ஆனந்தரிகஸமாதி⁴ம்ஹி ஞாணங்? நெக்க²ம்மவஸேன சித்தஸ்ஸ ஏகக்³க³தா அவிக்கே²போ ஸமாதி⁴. தஸ்ஸ ஸமாதி⁴ஸ்ஸ வஸேன உப்பஜ்ஜதி ஞாணங். தேன ஞாணேன ஆஸவா கீ²யந்தி. இதி பட²மங் ஸமதோ², பச்சா² ஞாணங். தேன ஞாணேன ஆஸவானங் க²யோ ஹோதி . தேன வுச்சதி – ‘‘அவிக்கே²பபரிஸுத்³த⁴த்தா ஆஸவஸமுச்சே²தே³ பஞ்ஞா ஆனந்தரிகஸமாதி⁴ம்ஹி ஞாணங்’’.

80. Kathaṃ avikkhepaparisuddhattā āsavasamucchede paññā ānantarikasamādhimhi ñāṇaṃ? Nekkhammavasena cittassa ekaggatā avikkhepo samādhi. Tassa samādhissa vasena uppajjati ñāṇaṃ. Tena ñāṇena āsavā khīyanti. Iti paṭhamaṃ samatho, pacchā ñāṇaṃ. Tena ñāṇena āsavānaṃ khayo hoti . Tena vuccati – ‘‘avikkhepaparisuddhattā āsavasamucchede paññā ānantarikasamādhimhi ñāṇaṃ’’.

ஆஸவாதி கதமே தே ஆஸவா? காமாஸவோ, ப⁴வாஸவோ, தி³ட்டா²ஸவோ, அவிஜ்ஜாஸவோ. கத்தே²தே ஆஸவா கீ²யந்தி? ஸோதாபத்திமக்³கே³ன அனவஸேஸோ தி³ட்டா²ஸவோ கீ²யதி, அபாயக³மனீயோ காமாஸவோ கீ²யதி, அபாயக³மனீயோ ப⁴வாஸவோ கீ²யதி, அபாயக³மனீயோ அவிஜ்ஜாஸவோ கீ²யதி. எத்தே²தே ஆஸவா கீ²யந்தி. ஸகதா³கா³மிமக்³கே³ன ஓளாரிகோ காமாஸவோ கீ²யதி, ததே³கட்டோ² ப⁴வாஸவோ கீ²யதி, ததே³கட்டோ² அவிஜ்ஜாஸவோ கீ²யதி. எத்தே²தே ஆஸவா கீ²யந்தி. அனாகா³மிமக்³கே³ன அனவஸேஸோ காமாஸவோ கீ²யதி, ததே³கட்டோ² ப⁴வாஸவோ கீ²யதி, ததே³கட்டோ² அவிஜ்ஜாஸவோ கீ²யதி. எத்தே²தே ஆஸவா கீ²யந்தி. அரஹத்தமக்³கே³ன அனவஸேஸோ ப⁴வாஸவோ கீ²யதி, அனவஸேஸோ அவிஜ்ஜாஸவோ கீ²யதி. எத்தே²தே ஆஸவா கீ²யந்தி.

Āsavāti katame te āsavā? Kāmāsavo, bhavāsavo, diṭṭhāsavo, avijjāsavo. Katthete āsavā khīyanti? Sotāpattimaggena anavaseso diṭṭhāsavo khīyati, apāyagamanīyo kāmāsavo khīyati, apāyagamanīyo bhavāsavo khīyati, apāyagamanīyo avijjāsavo khīyati. Etthete āsavā khīyanti. Sakadāgāmimaggena oḷāriko kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Anāgāmimaggena anavaseso kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Arahattamaggena anavaseso bhavāsavo khīyati, anavaseso avijjāsavo khīyati. Etthete āsavā khīyanti.

அப்³யாபாத³வஸேன …பே॰… ஆலோகஸஞ்ஞாவஸேன… அவிக்கே²பவஸேன… த⁴ம்மவவத்தா²னவஸேன… ஞாணவஸேன… பாமோஜ்ஜவஸேன… பட²மஜ்ஜா²னவஸேன… து³தியஜ்ஜா²னவஸேன… ததியஜ்ஜா²னவஸேன… சதுத்த²ஜ்ஜா²னவஸேன… ஆகாஸானஞ்சாயதனஸமாபத்திவஸேன… விஞ்ஞாணஞ்சாயதனஸமாபத்திவஸேன… ஆகிஞ்சஞ்ஞாயதனஸமாபத்திவஸேன… நேவஸஞ்ஞானாஸஞ்ஞாயதனஸமாபத்திவஸேன… பத²வீகஸிணவஸேன… ஆபோகஸிணவஸேன … தேஜோகஸிணவஸேன… வாயோகஸிணவஸேன… நீலகஸிணவஸேன… பீதகஸிணவஸேன… லோஹிதகஸிணவஸேன… ஓதா³தகஸிணவஸேன… ஆகாஸகஸிணவஸேன… விஞ்ஞாணகஸிணவஸேன… பு³த்³தா⁴னுஸ்ஸதிவஸேன… த⁴ம்மானுஸ்ஸதிவஸேன… ஸங்கா⁴னுஸ்ஸதிவஸேன… ஸீலானுஸ்ஸதிவஸேன… சாகா³னுஸ்ஸதிவஸேன… தே³வதானுஸ்ஸதிவஸேன… ஆனாபானஸ்ஸதிவஸேன… மரணஸ்ஸதிவஸேன… காயக³தாஸதிவஸேன… உபஸமானுஸ்ஸதிவஸேன… உத்³து⁴மாதகஸஞ்ஞாவஸேன… வினீலகஸஞ்ஞாவஸேன… விபுப்³ப³கஸஞ்ஞாவஸேன… விச்சி²த்³த³கஸஞ்ஞாவஸேன… விக்கா²யிதகஸஞ்ஞாவஸேன… விக்கி²த்தகஸஞ்ஞாவஸேன… ஹதவிக்கி²த்தகஸஞ்ஞாவஸேன … லோஹிதகஸஞ்ஞாவஸேன… புளவகஸஞ்ஞாவஸேன… அட்டி²கஸஞ்ஞாவஸேன.

Abyāpādavasena …pe… ālokasaññāvasena… avikkhepavasena… dhammavavatthānavasena… ñāṇavasena… pāmojjavasena… paṭhamajjhānavasena… dutiyajjhānavasena… tatiyajjhānavasena… catutthajjhānavasena… ākāsānañcāyatanasamāpattivasena… viññāṇañcāyatanasamāpattivasena… ākiñcaññāyatanasamāpattivasena… nevasaññānāsaññāyatanasamāpattivasena… pathavīkasiṇavasena… āpokasiṇavasena … tejokasiṇavasena… vāyokasiṇavasena… nīlakasiṇavasena… pītakasiṇavasena… lohitakasiṇavasena… odātakasiṇavasena… ākāsakasiṇavasena… viññāṇakasiṇavasena… buddhānussativasena… dhammānussativasena… saṅghānussativasena… sīlānussativasena… cāgānussativasena… devatānussativasena… ānāpānassativasena… maraṇassativasena… kāyagatāsativasena… upasamānussativasena… uddhumātakasaññāvasena… vinīlakasaññāvasena… vipubbakasaññāvasena… vicchiddakasaññāvasena… vikkhāyitakasaññāvasena… vikkhittakasaññāvasena… hatavikkhittakasaññāvasena … lohitakasaññāvasena… puḷavakasaññāvasena… aṭṭhikasaññāvasena.

81. தீ³க⁴ங் அஸ்ஸாஸவஸேன…பே॰… தீ³க⁴ங் பஸ்ஸாஸவஸேன… ரஸ்ஸங் அஸ்ஸாஸவஸேன… ரஸ்ஸங் பஸ்ஸாஸவஸேன… ஸப்³ப³காயபடிஸங்வேதீ³ அஸ்ஸாஸவஸேன… ஸப்³ப³காயபடிஸங்வேதீ³ பஸ்ஸாஸவஸேன… பஸ்ஸம்ப⁴யங் காயஸங்கா²ரங் அஸ்ஸாஸவஸேன… பஸ்ஸம்ப⁴யங் காயஸங்கா²ரங் பஸ்ஸாஸவஸேன… பீதிபடிஸங்வேதீ³ அஸ்ஸாஸவஸேன… பீதிபடிஸங்வேதீ³ பஸ்ஸாஸவஸேன… ஸுக²படிஸங்வேதீ³ அஸ்ஸாஸவஸேன… ஸுக²படிஸங்வேதீ³ பஸ்ஸாஸவஸேன… சித்தஸங்கா²ரபடிஸங்வேதீ³ அஸ்ஸாஸவஸேன… சித்தஸங்கா²ரபடிஸங்வேதீ³ பஸ்ஸாஸவஸேன… பஸ்ஸம்ப⁴யங் சித்தஸங்கா²ரங் அஸ்ஸாஸவஸேன… பஸ்ஸம்ப⁴யங் சித்தஸங்கா²ரங் பஸ்ஸாஸவஸேன… சித்தபடிஸங்வேதீ³ அஸ்ஸாஸவஸேன… சித்தபடிஸங்வேதீ³ பஸ்ஸாஸவஸேன… அபி⁴ப்பமோத³யங் சித்தங் அஸ்ஸாஸவஸேன… அபி⁴ப்பமோத³யங் சித்தங் பஸ்ஸாஸவஸேன… ஸமாத³ஹங் சித்தங்…பே॰… விமோசயங் சித்தங்… அனிச்சானுபஸ்ஸீ … விராகா³னுபஸ்ஸீ… நிரோதா⁴னுபஸ்ஸீ… படினிஸ்ஸக்³கா³னுபஸ்ஸீ அஸ்ஸாஸவஸேன… படினிஸ்ஸக்³கா³னுபஸ்ஸீ பஸ்ஸாஸவஸேன சித்தஸ்ஸ ஏகக்³க³தா அவிக்கே²போ ஸமாதி⁴. தஸ்ஸ ஸமாதி⁴ஸ்ஸ வஸேன உப்பஜ்ஜதி ஞாணங், தேன ஞாணேன ஆஸவா கீ²யந்தி. இதி பட²மங் ஸமதோ², பச்சா² ஞாணங். தேன ஞாணேன ஆஸவானங் க²யோ ஹோதி. தேன வுச்சதி – ‘‘அவிக்கே²பபரிஸுத்³த⁴த்தா ஆஸவஸமுச்சே²தே³ பஞ்ஞா ஆனந்தரிகஸமாதி⁴ம்ஹி ஞாணங்’’.

81. Dīghaṃ assāsavasena…pe… dīghaṃ passāsavasena… rassaṃ assāsavasena… rassaṃ passāsavasena… sabbakāyapaṭisaṃvedī assāsavasena… sabbakāyapaṭisaṃvedī passāsavasena… passambhayaṃ kāyasaṅkhāraṃ assāsavasena… passambhayaṃ kāyasaṅkhāraṃ passāsavasena… pītipaṭisaṃvedī assāsavasena… pītipaṭisaṃvedī passāsavasena… sukhapaṭisaṃvedī assāsavasena… sukhapaṭisaṃvedī passāsavasena… cittasaṅkhārapaṭisaṃvedī assāsavasena… cittasaṅkhārapaṭisaṃvedī passāsavasena… passambhayaṃ cittasaṅkhāraṃ assāsavasena… passambhayaṃ cittasaṅkhāraṃ passāsavasena… cittapaṭisaṃvedī assāsavasena… cittapaṭisaṃvedī passāsavasena… abhippamodayaṃ cittaṃ assāsavasena… abhippamodayaṃ cittaṃ passāsavasena… samādahaṃ cittaṃ…pe… vimocayaṃ cittaṃ… aniccānupassī … virāgānupassī… nirodhānupassī… paṭinissaggānupassī assāsavasena… paṭinissaggānupassī passāsavasena cittassa ekaggatā avikkhepo samādhi. Tassa samādhissa vasena uppajjati ñāṇaṃ, tena ñāṇena āsavā khīyanti. Iti paṭhamaṃ samatho, pacchā ñāṇaṃ. Tena ñāṇena āsavānaṃ khayo hoti. Tena vuccati – ‘‘avikkhepaparisuddhattā āsavasamucchede paññā ānantarikasamādhimhi ñāṇaṃ’’.

ஆஸவாதி கதமே தே ஆஸவா? காமாஸவோ, ப⁴வாஸவோ, தி³ட்டா²ஸவோ, அவிஜ்ஜாஸவோ. கத்தே²தே ஆஸவா கீ²யந்தி? ஸோதாபத்திமக்³கே³ன அனவஸேஸோ தி³ட்டா²ஸவோ கீ²யதி, அபாயக³மனீயோ காமாஸவோ கீ²யதி, அபாயக³மனீயோ ப⁴வாஸவோ கீ²யதி, அபாயக³மனீயோ அவிஜ்ஜாஸவோ கீ²யதி. எத்தே²தே ஆஸவா கீ²யந்தி. ஸகதா³கா³மிமக்³கே³ன ஓளாரிகோ காமாஸவோ கீ²யதி, ததே³கட்டோ² ப⁴வாஸவோ கீ²யதி, ததே³கட்டோ² அவிஜ்ஜாஸவோ கீ²யதி. எத்தே²தே ஆஸவா கீ²யந்தி. அனாகா³மிமக்³கே³ன அனவஸேஸோ காமாஸவோ கீ²யதி, ததே³கட்டோ² ப⁴வாஸவோ கீ²யதி, ததே³கட்டோ² அவிஜ்ஜாஸவோ கீ²யதி. எத்தே²தே ஆஸவா கீ²யந்தி. அரஹத்தமக்³கே³ன அனவஸேஸோ ப⁴வாஸவோ கீ²யதி, அனவஸேஸோ அவிஜ்ஜாஸவோ கீ²யதி. எத்தே²தே ஆஸவா கீ²யந்தி. தங் ஞாதட்டே²ன ஞாணங் , பஜானநட்டே²ன பஞ்ஞா. தேன வுச்சதி – ‘‘அவிக்கே²பபரிஸுத்³த⁴த்தா ஆஸவஸமுச்சே²தே³ பஞ்ஞா ஆனந்தரிகஸமாதி⁴ம்ஹி ஞாணங்’’.

Āsavāti katame te āsavā? Kāmāsavo, bhavāsavo, diṭṭhāsavo, avijjāsavo. Katthete āsavā khīyanti? Sotāpattimaggena anavaseso diṭṭhāsavo khīyati, apāyagamanīyo kāmāsavo khīyati, apāyagamanīyo bhavāsavo khīyati, apāyagamanīyo avijjāsavo khīyati. Etthete āsavā khīyanti. Sakadāgāmimaggena oḷāriko kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Anāgāmimaggena anavaseso kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Arahattamaggena anavaseso bhavāsavo khīyati, anavaseso avijjāsavo khīyati. Etthete āsavā khīyanti. Taṃ ñātaṭṭhena ñāṇaṃ , pajānanaṭṭhena paññā. Tena vuccati – ‘‘avikkhepaparisuddhattā āsavasamucchede paññā ānantarikasamādhimhi ñāṇaṃ’’.

ஆனந்தரிகஸமாதி⁴ஞாணனித்³தே³ஸோ த்³வத்திங்ஸதிமோ.

Ānantarikasamādhiñāṇaniddeso dvattiṃsatimo.