| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૨. બલવગ્ગો
2. Balavaggo
૧. અનનુસ્સુતસુત્તવણ્ણના
1. Ananussutasuttavaṇṇanā
૧૧. દુતિયસ્સ પઠમે પુબ્બાહં, ભિક્ખવે, અનનુસ્સુતેસુ ધમ્મેસૂતિ અહં, ભિક્ખવે, પુબ્બે અનનુસ્સુતેસુ ચતૂસુ સચ્ચધમ્મેસુ. અભિઞ્ઞાવોસાનપારમિપ્પત્તો પટિજાનામીતિ ચતૂસુ સચ્ચેસુ ચતૂહિ મગ્ગેહિ સોળસવિધસ્સ કિચ્ચસ્સ કરણેન અભિજાનિત્વા વોસાનપારમિં સબ્બેસં કિચ્ચાનં નિટ્ઠિતત્તા કતકિચ્ચભાવં પારં પત્તો પટિજાનામીતિ મહાબોધિપલ્લઙ્કે અત્તનો આગમનીયગુણં દસ્સેતિ. તથાગતસ્સાતિ અટ્ઠહિ કારણેહિ તથાગતસ્સ. તથાગતબલાનીતિ યથા તેહિ ગન્તબ્બં, તથેવ ગતાનિ પવત્તાનિ ઞાણબલાનિ. આસભં ઠાનન્તિ સેટ્ઠટ્ઠાનં. સીહનાદન્તિ અભીતનાદં. બ્રહ્મચક્કન્તિ સેટ્ઠચક્કં. પવત્તેતીતિ કથેતિ.
11. Dutiyassa paṭhame pubbāhaṃ, bhikkhave, ananussutesu dhammesūti ahaṃ, bhikkhave, pubbe ananussutesu catūsu saccadhammesu. Abhiññāvosānapāramippatto paṭijānāmīti catūsu saccesu catūhi maggehi soḷasavidhassa kiccassa karaṇena abhijānitvā vosānapāramiṃ sabbesaṃ kiccānaṃ niṭṭhitattā katakiccabhāvaṃ pāraṃ patto paṭijānāmīti mahābodhipallaṅke attano āgamanīyaguṇaṃ dasseti. Tathāgatassāti aṭṭhahi kāraṇehi tathāgatassa. Tathāgatabalānīti yathā tehi gantabbaṃ, tatheva gatāni pavattāni ñāṇabalāni. Āsabhaṃ ṭhānanti seṭṭhaṭṭhānaṃ. Sīhanādanti abhītanādaṃ. Brahmacakkanti seṭṭhacakkaṃ. Pavattetīti katheti.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૧. અનનુસ્સુતસુત્તં • 1. Ananussutasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૬. મહાસુપિનસુત્તવણ્ણના • 6. Mahāsupinasuttavaṇṇanā
