| Library / Tipiṭaka / తిపిటక • Tipiṭaka / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) |
౨. ఆనణ్యసుత్తవణ్ణనా
2. Ānaṇyasuttavaṇṇanā
౬౨. దుతియే అధిగమనీయానీతి పత్తబ్బాని. కామభోగినాతి వత్థుకామే చ కిలేసకామే చ పరిభుఞ్జన్తేన. అత్థిసుఖాదీసు అత్థీతి ఉప్పజ్జనకసుఖం అత్థిసుఖం నామ. భోగే పరిభుఞ్జన్తస్స ఉప్పజ్జనకసుఖం భోగసుఖం నామ. అనణోస్మీతి ఉప్పజ్జనకసుఖం ఆనణ్యసుఖం నామ. నిద్దోసో అనవజ్జోస్మీతి ఉప్పజ్జనకసుఖం అనవజ్జసుఖం నామ.
62. Dutiye adhigamanīyānīti pattabbāni. Kāmabhogināti vatthukāme ca kilesakāme ca paribhuñjantena. Atthisukhādīsu atthīti uppajjanakasukhaṃ atthisukhaṃ nāma. Bhoge paribhuñjantassa uppajjanakasukhaṃ bhogasukhaṃ nāma. Anaṇosmīti uppajjanakasukhaṃ ānaṇyasukhaṃ nāma. Niddoso anavajjosmīti uppajjanakasukhaṃ anavajjasukhaṃ nāma.
భుఞ్జన్తి భుఞ్జమానో. పఞ్ఞా విపస్సతీతి పఞ్ఞాయ విపస్సతి. ఉభో భాగేతి ద్వే కోట్ఠాసే, హేట్ఠిమాని తీణి ఏకం కోట్ఠాసం, అనవజ్జసుఖం ఏకం కోట్ఠాసన్తి ఏవం పఞ్ఞాయ పస్సమానో ద్వే కోట్ఠాసే జానాతీతి అత్థో. అనవజ్జసుఖస్సేతన్తి ఏతం తివిధమ్పి సుఖం అనవజ్జసుఖస్స సోళసిం కలం నాగ్ఘతీతి.
Bhuñjanti bhuñjamāno. Paññā vipassatīti paññāya vipassati. Ubho bhāgeti dve koṭṭhāse, heṭṭhimāni tīṇi ekaṃ koṭṭhāsaṃ, anavajjasukhaṃ ekaṃ koṭṭhāsanti evaṃ paññāya passamāno dve koṭṭhāse jānātīti attho. Anavajjasukhassetanti etaṃ tividhampi sukhaṃ anavajjasukhassa soḷasiṃ kalaṃ nāgghatīti.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / అఙ్గుత్తరనికాయ • Aṅguttaranikāya / ౨. ఆనణ్యసుత్తం • 2. Ānaṇyasuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౧-౪. పత్తకమ్మసుత్తాదివణ్ణనా • 1-4. Pattakammasuttādivaṇṇanā
