| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೩. ಅನ್ಧಕವಿನ್ದಸುತ್ತವಣ್ಣನಾ
3. Andhakavindasuttavaṇṇanā
೧೮೪. ಜನತನ್ತಿ ಜನಾನಂ ಸಮೂಹಂ, ಜನಸಞ್ಚರಣಟ್ಠಾನನ್ತಿ ಅತ್ಥೋ। ಮನುಸ್ಸಾನಂ ಅನುಪಚಾರೇತಿ ಯತ್ತಕೇ ಕಸನಾದಿಕಿಚ್ಚಂ ಕರೋನ್ತಾನಂ ಸಞ್ಚಾರೋ ಹೋತಿ, ಏತ್ತಕಂ ಅತಿಕ್ಕಮಿತ್ವಾ ಅನುಪಚಾರೇ। ಸಂಯೋಜನವಿಪ್ಪಮೋಕ್ಖಾತಿ ಸಂಯೋಜನವಿಮೋಕ್ಖಹೇತು। ವಿವೇಕರತಿಂ ಪವಿವೇಕಸುಖಜ್ಝಾನಂ ಅಲಭನ್ತೋ। ಚಿತ್ತಾನುರಕ್ಖಣತ್ಥನ್ತಿ ಪುಬ್ಬೇ ಮಂ ಮನುಸ್ಸಾ ‘‘ಅರಞ್ಞವಾಸೇನ ಪವಿವಿತ್ತೋ ಅಸಂಸಟ್ಠೋ ಆರದ್ಧವೀರಿಯೋ’’ತಿ ಮಞ್ಞಿಂಸು, ಇದಾನಿ ಗಾಮನ್ತೇ ವಸನ್ತಂ ದಿಸ್ವಾ ಗಣಸಙ್ಗಣಿಕಾಯ ನಿವುಟ್ಠೋತಿ ಅಪ್ಪಸಾದಂ ಆಪಜ್ಜಿಸ್ಸನ್ತಿ। ಯದಿಪಿ ಮೇ ಇಧ ಅಭಿರತಿ ನತ್ಥಿ, ಏವಂ ಸನ್ತೇಪಿ ಇಧೇವ ವಸಿಸ್ಸಾಮೀತಿ ವಿಕ್ಖಿತ್ತಚಿತ್ತೇನ ಹುತ್ವಾ ನ ವಸಿತಬ್ಬಂ, ಕೋ ಅತ್ಥೋ ಚಿತ್ತವಸಂ ಗನ್ತ್ವಾತಿ ಅಧಿಪ್ಪಾಯೋ। ಸತಿಪಟ್ಠಾನಪರಾಯಣೋತಿ ಸತಿಪಟ್ಠಾನಭಾವನಾರತೋ। ಏವಂ ಹಿಸ್ಸ ಗಣವಾಸೋಪಿ ಪಾಸಂಸೋ ವಿವೇಕವಾಸೇನ ವಿನಾ ಸಮಣಕಿಚ್ಚಸ್ಸ ಅಸಿಜ್ಝನತೋ।
184.Janatanti janānaṃ samūhaṃ, janasañcaraṇaṭṭhānanti attho. Manussānaṃ anupacāreti yattake kasanādikiccaṃ karontānaṃ sañcāro hoti, ettakaṃ atikkamitvā anupacāre. Saṃyojanavippamokkhāti saṃyojanavimokkhahetu. Vivekaratiṃ pavivekasukhajjhānaṃ alabhanto. Cittānurakkhaṇatthanti pubbe maṃ manussā ‘‘araññavāsena pavivitto asaṃsaṭṭho āraddhavīriyo’’ti maññiṃsu, idāni gāmante vasantaṃ disvā gaṇasaṅgaṇikāya nivuṭṭhoti appasādaṃ āpajjissanti. Yadipi me idha abhirati natthi, evaṃ santepi idheva vasissāmīti vikkhittacittena hutvā na vasitabbaṃ, ko attho cittavasaṃ gantvāti adhippāyo. Satipaṭṭhānaparāyaṇoti satipaṭṭhānabhāvanārato. Evaṃ hissa gaṇavāsopi pāsaṃso vivekavāsena vinā samaṇakiccassa asijjhanato.
ವಟ್ಟಭಯತೋ ಪಮುತ್ತೋ ಅಜ್ಝಾಸಯವಸೇನಾತಿ ಅಧಿಪ್ಪಾಯೋ।
Vaṭṭabhayato pamutto ajjhāsayavasenāti adhippāyo.
ನಿಸೀದಿ ತತ್ಥ ಭಿಕ್ಖೂತಿ ಇಮಿನಾ ಸತ್ತೂಪಲದ್ಧಿಯಾ ಅನಿಸ್ಸಿತತ್ತಾ ಯಥಾರುಚಿಯಾ ತೇಸಂ ನಿಸಜ್ಜಂ ದಸ್ಸೇತಿ। ತೇನಾಹ ‘‘ಇಮಿನಾ’’ತಿಆದಿ।
Nisīdi tattha bhikkhūti iminā sattūpaladdhiyā anissitattā yathāruciyā tesaṃ nisajjaṃ dasseti. Tenāha ‘‘iminā’’tiādi.
ಇಮಿನಾ ಚ ಇಮಿನಾ ಚ ಆಕಾರೇನ ಜಾತನ್ತಿ ನ ಅನುಸ್ಸವದಸ್ಸನಮೇತಂ, ನ ಅನುಸ್ಸವಗ್ಗಹಣಂ। ತಕ್ಕಹೇತು ನಯಹೇತು ವಾ ನ ವದಾಮೀತಿ ಯೋಜನಾ। ಪಿಟಕಂ ಗನ್ಥೋ ಸಮ್ಪದೀಯತಿ ಏತಸ್ಸಾತಿ ಪಿಟಕಸಮ್ಪದಾನಂ, ಗನ್ಥಸ್ಸ ಉಗ್ಗಣ್ಹನತೋ ತೇನ ಪಿಟಕಸ್ಸ ಉಗ್ಗಣ್ಹನಕಭಾವೇನ, ಕೇನಚಿ ಗನ್ಥಾನುಸಾರೇನ ಏವಂ ನ ವದಾಮೀತಿ ಅತ್ಥೋ। ಬ್ರಹ್ಮಸ್ಸ ಸೇಟ್ಠಸ್ಸ ಧಮ್ಮಸ್ಸ ಚರಿಯಂ ವಾಚಸಿಕಂ ಪವತ್ತತೀತಿ ಬ್ರಹ್ಮಚರಿಯಂ, ಧಮ್ಮದೇಸನಾ। ಭಾವಿತೇನ ಮರಣಸ್ಸ ಸಬ್ಬಸೋ ಭಾಗೇನ ವಿಪ್ಪಹಾನೇನ ಮರಣಪರಿಚ್ಚಾಗೀನಂ। ತೇ ಚ ಖೀಣಜಾತಿಕಾತಿ ಆಹ ‘‘ಖೀಣಾಸವಾನ’’ನ್ತಿ।
Iminā ca iminā ca ākārena jātanti na anussavadassanametaṃ, na anussavaggahaṇaṃ. Takkahetu nayahetu vā na vadāmīti yojanā. Piṭakaṃ gantho sampadīyati etassāti piṭakasampadānaṃ, ganthassa uggaṇhanato tena piṭakassa uggaṇhanakabhāvena, kenaci ganthānusārena evaṃ na vadāmīti attho. Brahmassa seṭṭhassa dhammassa cariyaṃ vācasikaṃ pavattatīti brahmacariyaṃ, dhammadesanā. Bhāvitena maraṇassa sabbaso bhāgena vippahānena maraṇapariccāgīnaṃ. Te ca khīṇajātikāti āha ‘‘khīṇāsavāna’’nti.
ದಸಧಾ ದಸಾತಿ ದಸಕ್ಖತ್ತುಂ ದಸ। ಅಞ್ಞನ್ತಿ ಪಞ್ಚಸತಾಧಿಕಸಹಸ್ಸತೋ ಅಞ್ಞಂ। ಪುಞ್ಞಭಾಗಿನೋತಿ ವಿವಟ್ಟನಿಸ್ಸಿತಪುಞ್ಞಸ್ಸ ಭಾಗಿನೋ ತಸ್ಸಾ ದೇಸನಾಯ ಏತ್ತಕಾ ಸತ್ತಾ ಜಾತಾತಿ ಗಣೇತುಂ ಅಹಂ ನ ಸಕ್ಕೋಮೀತಿ ದಸ್ಸೇತಿ। ಬ್ರಹ್ಮಧಮ್ಮದೇಸನನ್ತಿ ಬ್ರಹ್ಮುನಾ ವುತ್ತಂ ಆಹ।
Dasadhādasāti dasakkhattuṃ dasa. Aññanti pañcasatādhikasahassato aññaṃ. Puññabhāginoti vivaṭṭanissitapuññassa bhāgino tassā desanāya ettakā sattā jātāti gaṇetuṃ ahaṃ na sakkomīti dasseti. Brahmadhammadesananti brahmunā vuttaṃ āha.
ಅನ್ಧಕವಿನ್ದಸುತ್ತವಣ್ಣನಾ ನಿಟ್ಠಿತಾ।
Andhakavindasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೩. ಅನ್ಧಕವಿನ್ದಸುತ್ತಂ • 3. Andhakavindasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೩. ಅನ್ಧಕವಿನ್ದಸುತ್ತವಣ್ಣನಾ • 3. Andhakavindasuttavaṇṇanā
