| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૯. અન્ધસુત્તવણ્ણના
9. Andhasuttavaṇṇanā
૨૯. નવમે અન્ધોતિઆદીસુ પાળિપદેસુ પઠમો દિટ્ઠધમ્મિકભોગસંહરણપઞ્ઞાચક્ખુનો ચ સમ્પરાયિકત્થસાધનપઞ્ઞાચક્ખુનો ચ અભાવા ‘‘અન્ધો’’તિ વુચ્ચતિ દુતિયોપિ, તતિયો પન દ્વિન્નમ્પિ ભાવા ‘‘દ્વિચક્ખૂ’’તિ વુચ્ચતિ. પઞ્ઞાચક્ખૂતિ આયકોસલ્લભૂતા પઞ્ઞાચક્ખુ. તેનાહ ‘‘ફાતિં કરેય્યા’’તિ. અધમુત્તમેતિ અધમે ચેવ ઉત્તમે ચ. પટિપક્ખવસેનાતિ પટિપક્ખસ્સ અત્થિતાવસેન. સુક્કસપ્પટિભાગાતિ સુક્કધમ્મેહિ પહાયકેહિ સપ્પટિભાગાતિ જાનેય્ય. કણ્હસપ્પટિભાગાતિ કણ્હધમ્મેહિ પહાતબ્બેહિ સપ્પટિભાગાતિ જાનેય્ય.
29. Navame andhotiādīsu pāḷipadesu paṭhamo diṭṭhadhammikabhogasaṃharaṇapaññācakkhuno ca samparāyikatthasādhanapaññācakkhuno ca abhāvā ‘‘andho’’ti vuccati dutiyopi, tatiyo pana dvinnampi bhāvā ‘‘dvicakkhū’’ti vuccati. Paññācakkhūti āyakosallabhūtā paññācakkhu. Tenāha ‘‘phātiṃ kareyyā’’ti. Adhamuttameti adhame ceva uttame ca. Paṭipakkhavasenāti paṭipakkhassa atthitāvasena. Sukkasappaṭibhāgāti sukkadhammehi pahāyakehi sappaṭibhāgāti jāneyya. Kaṇhasappaṭibhāgāti kaṇhadhammehi pahātabbehi sappaṭibhāgāti jāneyya.
તથાજાતિકાતિ યાદિસેહિ સપુત્તદારપરિજનસઞાતિમિત્તબન્ધવગ્ગં અત્તાનં સુખેતિ પીણેતિ, તાદિસા ભોગાપિ ન સન્તિ. પુઞ્ઞાનિ ચ ન કરોતીતિ સમણબ્રાહ્મણકપણદ્ધિકયાચકાનં સન્તપ્પનવસેન પુઞ્ઞાનિ ન કરોતિ. ઉભયત્થાતિ ઉભયસ્મિં લોકે, ઉભયસ્મિં વા અત્થેતિ વિગ્ગહોતિ દસ્સેન્તો ‘‘ઇધલોકે’’તિઆદિમાહ. ઉભયેનાતિ વુત્તમત્થં યોજેત્વા દસ્સેતું ‘‘કથ’’ન્તિઆદિ વુત્તં. યસ્મિં ઠાનેતિ યસ્મિંયેવ ઠાને. ન સોચતીતિ સોકહેતૂનં તત્થ અભાવતો ન સોચતિ.
Tathājātikāti yādisehi saputtadāraparijanasañātimittabandhavaggaṃ attānaṃ sukheti pīṇeti, tādisā bhogāpi na santi. Puññāni ca na karotīti samaṇabrāhmaṇakapaṇaddhikayācakānaṃ santappanavasena puññāni na karoti. Ubhayatthāti ubhayasmiṃ loke, ubhayasmiṃ vā attheti viggahoti dassento ‘‘idhaloke’’tiādimāha. Ubhayenāti vuttamatthaṃ yojetvā dassetuṃ ‘‘katha’’ntiādi vuttaṃ. Yasmiṃ ṭhāneti yasmiṃyeva ṭhāne. Na socatīti sokahetūnaṃ tattha abhāvato na socati.
અન્ધસુત્તવણ્ણના નિટ્ઠિતા.
Andhasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૯. અન્ધસુત્તં • 9. Andhasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૯. અન્ધસુત્તવણ્ણના • 9. Andhasuttavaṇṇanā
