| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၉. အန္ဓသုတ္တဝဏ္ဏနာ
9. Andhasuttavaṇṇanā
၂၉. နဝမေ အန္ဓောတိအာဒီသု ပာဠိပဒေသု ပဌမော ဒိဋ္ဌဓမ္မိကဘောဂသံဟရဏပညာစက္ခုနော စ သမ္ပရာယိကတ္ထသာဓနပညာစက္ခုနော စ အဘာဝာ ‘‘အန္ဓော’’တိ ဝုစ္စတိ ဒုတိယောပိ, တတိယော ပန ဒ္ဝိန္နမ္ပိ ဘာဝာ ‘‘ဒ္ဝိစက္ခူ’’တိ ဝုစ္စတိ။ ပညာစက္ခူတိ အာယကောသလ္လဘူတာ ပညာစက္ခု။ တေနာဟ ‘‘ဖာတိံ ကရေယ္ယာ’’တိ။ အဓမုတ္တမေတိ အဓမေ စေဝ ဥတ္တမေ စ။ ပဋိပက္ခဝသေနာတိ ပဋိပက္ခသ္သ အတ္ထိတာဝသေန။ သုက္ကသပ္ပဋိဘာဂာတိ သုက္ကဓမ္မေဟိ ပဟာယကေဟိ သပ္ပဋိဘာဂာတိ ဇာနေယ္ယ။ ကဏ္ဟသပ္ပဋိဘာဂာတိ ကဏ္ဟဓမ္မေဟိ ပဟာတဗ္ဗေဟိ သပ္ပဋိဘာဂာတိ ဇာနေယ္ယ။
29. Navame andhotiādīsu pāḷipadesu paṭhamo diṭṭhadhammikabhogasaṃharaṇapaññācakkhuno ca samparāyikatthasādhanapaññācakkhuno ca abhāvā ‘‘andho’’ti vuccati dutiyopi, tatiyo pana dvinnampi bhāvā ‘‘dvicakkhū’’ti vuccati. Paññācakkhūti āyakosallabhūtā paññācakkhu. Tenāha ‘‘phātiṃ kareyyā’’ti. Adhamuttameti adhame ceva uttame ca. Paṭipakkhavasenāti paṭipakkhassa atthitāvasena. Sukkasappaṭibhāgāti sukkadhammehi pahāyakehi sappaṭibhāgāti jāneyya. Kaṇhasappaṭibhāgāti kaṇhadhammehi pahātabbehi sappaṭibhāgāti jāneyya.
တထာဇာတိကာတိ ယာဒိသေဟိ သပုတ္တဒာရပရိဇနသဉာတိမိတ္တဗန္ဓဝဂ္ဂံ အတ္တာနံ သုခေတိ ပီဏေတိ, တာဒိသာ ဘောဂာပိ န သန္တိ။ ပုညာနိ စ န ကရောတီတိ သမဏဗ္ရာဟ္မဏကပဏဒ္ဓိကယာစကာနံ သန္တပ္ပနဝသေန ပုညာနိ န ကရောတိ။ ဥဘယတ္ထာတိ ဥဘယသ္မိံ လောကေ, ဥဘယသ္မိံ ဝာ အတ္ထေတိ ဝိဂ္ဂဟောတိ ဒသ္သေန္တော ‘‘ဣဓလောကေ’’တိအာဒိမာဟ။ ဥဘယေနာတိ ဝုတ္တမတ္ထံ ယောဇေတ္ဝာ ဒသ္သေတုံ ‘‘ကထ’’န္တိအာဒိ ဝုတ္တံ။ ယသ္မိံ ဌာနေတိ ယသ္မိံယေဝ ဌာနေ။ န သောစတီတိ သောကဟေတူနံ တတ္ထ အဘာဝတော န သောစတိ။
Tathājātikāti yādisehi saputtadāraparijanasañātimittabandhavaggaṃ attānaṃ sukheti pīṇeti, tādisā bhogāpi na santi. Puññāni ca na karotīti samaṇabrāhmaṇakapaṇaddhikayācakānaṃ santappanavasena puññāni na karoti. Ubhayatthāti ubhayasmiṃ loke, ubhayasmiṃ vā attheti viggahoti dassento ‘‘idhaloke’’tiādimāha. Ubhayenāti vuttamatthaṃ yojetvā dassetuṃ ‘‘katha’’ntiādi vuttaṃ. Yasmiṃ ṭhāneti yasmiṃyeva ṭhāne. Na socatīti sokahetūnaṃ tattha abhāvato na socati.
အန္ဓသုတ္တဝဏ္ဏနာ နိဋ္ဌိတာ။
Andhasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၉. အန္ဓသုတ္တံ • 9. Andhasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၉. အန္ဓသုတ္တဝဏ္ဏနာ • 9. Andhasuttavaṇṇanā
