| Library / Tipiṭaka / तिपिटक • Tipiṭaka / परिवार-अट्ठकथा • Parivāra-aṭṭhakathā |
उपालिपञ्चकं
Upālipañcakaṃ
अनिस्सितवग्गवण्णना
Anissitavaggavaṇṇanā
४१७. उपालिपञ्हेसु कतिहि नु खो भन्तेति पुच्छाय अयं सम्बन्धो। थेरो किर रहोगतो सब्बानि इमानि पञ्चकानि आवज्जेत्वा ‘‘भगवन्तं दानि पुच्छित्वा इमेसं निस्साय वसनकादीनं अत्थाय तन्तिं ठपेस्सामी’’ति भगवन्तं उपसङ्कमित्वा ‘‘कतिहि नु खो भन्ते’’तिआदिना नयेन पञ्हे पुच्छि। तेसं विस्सज्जने उपोसथं न जानातीति नवविधं उपोसथं न जानाति। उपोसथकम्मं न जानातीति अधम्मेनवग्गादिभेदं चतुब्बिधं उपोसथकम्मं न जानाति। पातिमोक्खं न जानातीति द्वे मातिका न जानाति। पातिमोक्खुद्देसं न जानातीति भिक्खूनं पञ्चविधं भिक्खुनीनं चतुब्बिधन्ति नवविधं पातिमोक्खुद्देसं न जानाति।
417. Upālipañhesu katihi nu kho bhanteti pucchāya ayaṃ sambandho. Thero kira rahogato sabbāni imāni pañcakāni āvajjetvā ‘‘bhagavantaṃ dāni pucchitvā imesaṃ nissāya vasanakādīnaṃ atthāya tantiṃ ṭhapessāmī’’ti bhagavantaṃ upasaṅkamitvā ‘‘katihi nu kho bhante’’tiādinā nayena pañhe pucchi. Tesaṃ vissajjane uposathaṃ na jānātīti navavidhaṃ uposathaṃ na jānāti. Uposathakammaṃ na jānātīti adhammenavaggādibhedaṃ catubbidhaṃ uposathakammaṃ na jānāti. Pātimokkhaṃ na jānātīti dve mātikā na jānāti. Pātimokkhuddesaṃ na jānātīti bhikkhūnaṃ pañcavidhaṃ bhikkhunīnaṃ catubbidhanti navavidhaṃ pātimokkhuddesaṃ na jānāti.
पवारणं न जानातीति नवविधं पवारणं न जानाति। पवारणाकम्मं न जानातीति अधम्मेनवग्गादिभेदं चतुब्बिधं पवारणाकम्मं न जानाति।
Pavāraṇaṃ na jānātīti navavidhaṃ pavāraṇaṃ na jānāti. Pavāraṇākammaṃ na jānātīti adhammenavaggādibhedaṃ catubbidhaṃ pavāraṇākammaṃ na jānāti.
आपत्तानापत्तिं न जानातीति तस्मिं तस्मिं सिक्खापदे निद्दिट्ठं आपत्तिञ्च अनापत्तिञ्च न जानाति।
Āpattānāpattiṃ na jānātīti tasmiṃ tasmiṃ sikkhāpade niddiṭṭhaṃ āpattiñca anāpattiñca na jānāti.
आपन्नो कम्मकतोति आपत्तिं आपन्नो तप्पच्चयाव सङ्घेन कम्मं कतं होति।
Āpanno kammakatoti āpattiṃ āpanno tappaccayāva saṅghena kammaṃ kataṃ hoti.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / १. अनिस्सितवग्गो • 1. Anissitavaggo
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / अनिस्सितवग्गवण्णना • Anissitavaggavaṇṇanā
