| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
அனியதகதா²வண்ணனா
Aniyatakathāvaṇṇanā
542-3. இதா³னி ஸங்கா⁴தி³ஸேஸகதா²னந்தரங் அனியதகத²ங் த³ஸ்ஸேதுமாஹ ‘‘ரஹோனிஸஜ்ஜஸ்ஸாதே³னா’’திஆதி³. ரஹஸி நிஸஜ்ஜா ரஹோனிஸஜ்ஜா, தஸ்ஸா அஸ்ஸாதோ³ ரஹோனிஸஜ்ஜஸ்ஸாதோ³, தேன ரஹோனிஸஜ்ஜஸ்ஸாதே³ன, மேது²னத⁴ம்மஸன்னிஸ்ஸிதேன கிலேஸேனாதி அத்தோ². வுத்தஞ்ஹி அட்ட²கதா²யங் ‘‘ரஹோனிஸஜ்ஜஸ்ஸாதோ³தி மேது²னத⁴ம்மஸன்னிஸ்ஸிதகிலேஸோ வுச்சதீ’’தி (பாரா॰ அட்ட²॰ 2.451). ‘‘ரஹோ நாம சக்கு²ஸ்ஸ ரஹோ ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ங் வா நிக²ணியமானே ப⁴முகங் வா உக்கி²பியமானே ஸீஸங் வா உக்கி²பியமானே பஸ்ஸிதுங். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோது’’ந்தி (பாரா॰ 445) பத³பா⁴ஜனே வுத்தரஹேஸு சக்கு²ஸ்ஸ ரஹோ ஏவ இதா⁴தி⁴ப்பேதோ. யதா²ஹ அட்ட²கதா²யங் ‘‘கிஞ்சாபி பாளியங் ‘ஸோதஸ்ஸ ரஹோ’தி ஆக³தங், சக்கு²ஸ்ஸ ரஹேனேவ பன பரிச்சே²தோ³ வேதி³தப்³போ³’’தி (பாரா॰ அட்ட²॰ 2.444-445).
542-3. Idāni saṅghādisesakathānantaraṃ aniyatakathaṃ dassetumāha ‘‘rahonisajjassādenā’’tiādi. Rahasi nisajjā rahonisajjā, tassā assādo rahonisajjassādo, tena rahonisajjassādena, methunadhammasannissitena kilesenāti attho. Vuttañhi aṭṭhakathāyaṃ ‘‘rahonisajjassādoti methunadhammasannissitakileso vuccatī’’ti (pārā. aṭṭha. 2.451). ‘‘Raho nāma cakkhussa raho sotassa raho. Cakkhussa raho nāma na sakkā hoti akkhiṃ vā nikhaṇiyamāne bhamukaṃ vā ukkhipiyamāne sīsaṃ vā ukkhipiyamāne passituṃ. Sotassa raho nāma na sakkā hoti pakatikathā sotu’’nti (pārā. 445) padabhājane vuttarahesu cakkhussa raho eva idhādhippeto. Yathāha aṭṭhakathāyaṃ ‘‘kiñcāpi pāḷiyaṃ ‘sotassa raho’ti āgataṃ, cakkhussa raheneva pana paricchedo veditabbo’’ti (pārā. aṭṭha. 2.444-445).
சக்கு²ஸ்ஸ ரஹத்தா ‘‘படிச்ச²ன்ன’’ந்தி இமம்பி படிச்ச²ன்னத்தா ஏவ ‘‘அலங்கம்மனிய’’ந்தி இமம்பி ஸங்க³ண்ஹாதி. நிஸஜ்ஜஸத்³தோ³பாதா³னேன ‘‘ஆஸனே’’தி இத³ம்பி க³ஹிதமேவ. ‘‘மாதுகா³மஸ்ஸ ஸந்திகங் க³ந்துகாமோ’’தி இமினா ‘‘மாதுகா³மேன ஸத்³தி⁴’’ந்தி இத³ம்பி க³ஹிதமேவ. ஏவங் ஸாமத்தி²யா லப்³ப⁴மானபதோ³பாதா³னேன யோ பன பி⁴க்கு² மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜஸ்ஸாதே³னாதி வுத்தங் ஹோதி. சக்கு²ஸ்ஸ ரஹபா⁴வேன குட்டாதி³படிச்ச²ன்னே தேனேவ மேது²னஸேவனகம்மஸ்ஸ அனுரூபே ஆஸனே தத³ஹுஜாதாயபி மனுஸ்ஸித்தி²யா ஸஹ நிஸஜ்ஜஸ்ஸாத³ராகே³ன ஸமன்னாக³தோ ஹுத்வாதி அத்தோ². எத்த² ‘‘மாதுகா³மஸ்ஸா’’தி தத³ஹுஜாதம்பி இத்தி²ங் க³ண்ஹாதீதி குதோ லப்³ப⁴தீதி? ‘‘மாதுகா³மோ நாம மனுஸ்ஸித்தீ², ந யக்கீ², ந பேதீ, ந திரச்சா²னக³தா, அந்தமஸோ தத³ஹுஜாதாபி தா³ரிகா, பகே³வ மஹத்தரீ’’தி (பாரா॰ 445) பத³பா⁴ஜனதோ லப்³ப⁴தி.
Cakkhussa rahattā ‘‘paṭicchanna’’nti imampi paṭicchannattā eva ‘‘alaṃkammaniya’’nti imampi saṅgaṇhāti. Nisajjasaddopādānena ‘‘āsane’’ti idampi gahitameva. ‘‘Mātugāmassa santikaṃ gantukāmo’’ti iminā ‘‘mātugāmena saddhi’’nti idampi gahitameva. Evaṃ sāmatthiyā labbhamānapadopādānena yo pana bhikkhu mātugāmena saddhiṃ eko ekāya raho paṭicchanne āsane alaṃkammaniye nisajjassādenāti vuttaṃ hoti. Cakkhussa rahabhāvena kuṭṭādipaṭicchanne teneva methunasevanakammassa anurūpe āsane tadahujātāyapi manussitthiyā saha nisajjassādarāgena samannāgato hutvāti attho. Ettha ‘‘mātugāmassā’’ti tadahujātampi itthiṃ gaṇhātīti kuto labbhatīti? ‘‘Mātugāmo nāma manussitthī, na yakkhī, na petī, na tiracchānagatā, antamaso tadahujātāpi dārikā, pageva mahattarī’’ti (pārā. 445) padabhājanato labbhati.
‘‘நிவாஸேதீ’’தி இமினா ‘‘காயப³ந்த⁴னங் ப³ந்த⁴தி, சீவரங் பாருபதீ’’தி இத³ங் லக்கீ²யதி. ஸப்³ப³த்தா²தி யதா²வுத்தங் பயோக³தோ புப்³பா³பரபயோகே³ ஸங்க³ண்ஹாதி. தேனேவ ‘‘பயோகே³ ச பயோகே³ சா’’தி விச்சா²பயோகோ³ கதோ. நிஸீத³தோ சஸ்ஸ து³க்கடந்தி யோஜனா. ‘‘உபி⁴ன்னம்பி நிஸஜ்ஜாய பாசித்திய’’ந்தி வக்க²மானத்தா து³க்கடங் ஸந்தா⁴ய ஏககஸ்ஸ நிஸீத³தோதி க³ஹேதப்³ப³ங்.
‘‘Nivāsetī’’ti iminā ‘‘kāyabandhanaṃ bandhati, cīvaraṃ pārupatī’’ti idaṃ lakkhīyati. Sabbatthāti yathāvuttaṃ payogato pubbāparapayoge saṅgaṇhāti. Teneva ‘‘payoge ca payoge cā’’ti vicchāpayogo kato. Nisīdato cassa dukkaṭanti yojanā. ‘‘Ubhinnampi nisajjāya pācittiya’’nti vakkhamānattā dukkaṭaṃ sandhāya ekakassa nisīdatoti gahetabbaṃ.
544. நிஸஜ்ஜாய உபி⁴ன்னம்பீதி எத்த² ‘‘ஸகி’’ந்தி ஸேஸோ, உபி⁴ன்னங் நிஸஜ்ஜாபூரணவஸேன அஞ்ஞமஞ்ஞஸ்ஸ புரே வா பச்சா² வா ஏகக்க²ணே வா மாதுகா³மஸ்ஸ வா பி⁴க்கு²ஸ்ஸ வா ஏகவாரங் நிஸஜ்ஜாயாதி வுத்தங் ஹோதி. வுத்தஞ்ஹேதங் பாளியங் ‘‘மாதுகா³மே நிஸின்னே பி⁴க்கு² உபனிஸின்னோ வா ஹோதீ’’திஆதி³ (பாரா॰ 445). ஹோதி பாசித்தியந்தி யோஜனா. பயோக³க³ணனாய ச ஹொந்தி பாசித்தியானீதி க³ஹேதப்³ப³ங், மாதுகா³மஸ்ஸ வா பி⁴க்கு²னோ வா உபி⁴ன்னங் வா உட்டா²யுட்டா²ய புனப்புனங் உபனிஸீத³னபயோக³க³ணனாய சாதி அத்தோ². ‘‘ஆபத்தீஹிபி தீஹிபீ’’தி வக்க²மானத்தா பாசித்தியக்³க³ஹணங் பாராஜிகஸங்கா⁴தி³ஸேஸானங் உபலக்க²ணங் ஹோதி, தீஸு ஏகங் ஹோதீதி வுத்தங் ஹோதி. எத்த² ‘‘பயோக³க³ணனாயா’’தி இத³ங் பாராஜிகாய ந லப்³ப⁴தி ஏகபயோகே³னேவ ஸிஜ்ஜ²னதோ. காயஸங்ஸக்³க³ஸங்கா⁴தி³ஸேஸோ, பன ஸரீரதோ புனப்புனங் வியுஜ்ஜித்வா பு²ஸனேன பாசித்தியஞ்ச யதா²வுத்தனயேனேவ லப்³ப⁴தி.
544.Nisajjāyaubhinnampīti ettha ‘‘saki’’nti seso, ubhinnaṃ nisajjāpūraṇavasena aññamaññassa pure vā pacchā vā ekakkhaṇe vā mātugāmassa vā bhikkhussa vā ekavāraṃ nisajjāyāti vuttaṃ hoti. Vuttañhetaṃ pāḷiyaṃ ‘‘mātugāme nisinne bhikkhu upanisinno vā hotī’’tiādi (pārā. 445). Hoti pācittiyanti yojanā. Payogagaṇanāya ca honti pācittiyānīti gahetabbaṃ, mātugāmassa vā bhikkhuno vā ubhinnaṃ vā uṭṭhāyuṭṭhāya punappunaṃ upanisīdanapayogagaṇanāya cāti attho. ‘‘Āpattīhipi tīhipī’’ti vakkhamānattā pācittiyaggahaṇaṃ pārājikasaṅghādisesānaṃ upalakkhaṇaṃ hoti, tīsu ekaṃ hotīti vuttaṃ hoti. Ettha ‘‘payogagaṇanāyā’’ti idaṃ pārājikāya na labbhati ekapayogeneva sijjhanato. Kāyasaṃsaggasaṅghādiseso, pana sarīrato punappunaṃ viyujjitvā phusanena pācittiyañca yathāvuttanayeneva labbhati.
ப³ஹூஸுபி மாதுகா³மேஸு ப³ஹுகானி பாசித்தியானி ஹொந்தீதி யோஜனா. ப³ஹூஸு மாதுகா³மேஸு நிஸின்னேஸு நிஸின்னானங் க³ணனாய ஏகேனேவ பயோகே³ன ப³ஹூனி பாசித்தியானி ச ஸங்கா⁴தி³ஸேஸா ச ஹொந்தி. ‘‘பயோக³க³ணனாய சா’’தி இமஸ்ஸ எத்தா²பி யுஜ்ஜமானத்தா தாஸு விஸுங் விஸுங் உட்டா²யுட்டா²ய புனப்புனங் நிஸீத³ந்தீஸு, ஸயஞ்ச உட்டா²யுட்டா²ய புனப்புனங் நிஸீத³தோ தாஸங் க³ணனாய ஆபஜ்ஜிதப்³பா³பத்தியோ பயோக³க³ணனாய ச ப³ஹூ ஹொந்தீதி இத³ங் லப்³ப⁴தி. எத்தா²பி பன பாராஜிகங் ந லப்³ப⁴தி, ஸங்கா⁴தி³ஸேஸோ, பாசித்தியஞ்ச லப்³ப⁴தி.
Bahūsupi mātugāmesu bahukāni pācittiyāni hontīti yojanā. Bahūsu mātugāmesu nisinnesu nisinnānaṃ gaṇanāya ekeneva payogena bahūni pācittiyāni ca saṅghādisesā ca honti. ‘‘Payogagaṇanāya cā’’ti imassa etthāpi yujjamānattā tāsu visuṃ visuṃ uṭṭhāyuṭṭhāya punappunaṃ nisīdantīsu, sayañca uṭṭhāyuṭṭhāya punappunaṃ nisīdato tāsaṃ gaṇanāya āpajjitabbāpattiyo payogagaṇanāya ca bahū hontīti idaṃ labbhati. Etthāpi pana pārājikaṃ na labbhati, saṅghādiseso, pācittiyañca labbhati.
545. ஸமீபே டி²தோபி அந்தோ⁴ அனாபத்திங் ந கரோதீதி ஸோதஸ்ஸ ரஹபா⁴வே அஸதிபி பதா⁴னபூ⁴தஸ்ஸ ‘‘சக்கு²ஸ்ஸ ரஹோ’’தி இமஸ்ஸ அங்க³ஸ்ஸ விஜ்ஜமானத்தா வுத்தங் ‘‘அந்தொத்³வாத³ஸஹத்த²கே’’தி, இமினா ஸவனூபசாரே விஜ்ஜமானேபீதி வுத்தங் ஹோதி. இத்தீ²னங் து ஸதம்பி ச ந கரோதி அனாபத்திந்தி யோஜனா, விஞ்ஞுனோ புரிஸஸ்ஸ அஸன்னிஹிதபா⁴வேனாதி அதி⁴ப்பாயோ. ‘‘இத்தீ²னம்பி ஸதம்பி சா’’தி லிக²ந்தி, ததோபி அயமேவ பாடோ² ஸுந்த³ரோ. பி-ஸத்³தோ³ வா து-ஸத்³த³த்தே² த³ட்ட²ப்³போ³.
545. Samīpe ṭhitopi andho anāpattiṃ na karotīti sotassa rahabhāve asatipi padhānabhūtassa ‘‘cakkhussa raho’’ti imassa aṅgassa vijjamānattā vuttaṃ ‘‘antodvādasahatthake’’ti, iminā savanūpacāre vijjamānepīti vuttaṃ hoti. Itthīnaṃ tu satampi ca na karoti anāpattinti yojanā, viññuno purisassa asannihitabhāvenāti adhippāyo. ‘‘Itthīnampi satampi cā’’ti likhanti, tatopi ayameva pāṭho sundaro. Pi-saddo vā tu-saddatthe daṭṭhabbo.
546. நிபஜ்ஜித்வாதி எத்த² ‘‘ஸமீபே’’தி ஸேஸோ, ‘‘நித்³தா³யந்தோபீ’’தி ஏதஸ்ஸ விஸேஸகேன ‘‘நிபஜ்ஜித்வா’’தி இமினா நிஸீதி³த்வா நித்³தா³யந்தோதி இமஸ்ஸ நிவத்திதத்தா ஸமீபே நிஸீதி³த்வா நித்³தா³யந்தோபி அனந்தோ⁴ மனுஸ்ஸபுரிஸோ அனாபத்திங் கரோதீதி லப்³ப⁴தி. ‘‘கேவல’’ந்தி விஸேஸனேன ப³லவனித்³தூ³பக³தோ க³ஹிதோதி ததா² அஹுத்வா அந்தரந்தரா ஆபன்னாபன்னே வினிச்சி²னித்வா பவத்தமானாய கபினித்³தா³ய நித்³தா³யந்தோபி அனாபத்திங் கரோதீதி அயமத்தோ² லப்³ப⁴தி. ‘‘பிஹிதத்³வாரக³ப்³ப⁴ஸ்ஸா’’தி வத்தப்³பே³ மஜ்ஜ²பத³லோபீஸமாஸவஸேன ‘‘பிஹிதக³ப்³ப⁴ஸ்ஸா’’தி வுத்தங். ‘‘த்³வாரே’’தி இமினா த்³வாரேகதே³ஸபூ⁴தங் உம்மாரங் வா தங்ஸமீபங் வா உபசாரேன வுத்தந்தி த³ட்ட²ப்³ப³ங். ஸசே க³ப்³போ⁴ பிஹிதத்³வாரோ ந ஹோதி, அனாபத்தீதி ப்³யதிரேகதோ த³ஸ்ஸிதங்.
546.Nipajjitvāti ettha ‘‘samīpe’’ti seso, ‘‘niddāyantopī’’ti etassa visesakena ‘‘nipajjitvā’’ti iminā nisīditvā niddāyantoti imassa nivattitattā samīpe nisīditvā niddāyantopi anandho manussapuriso anāpattiṃ karotīti labbhati. ‘‘Kevala’’nti visesanena balavaniddūpagato gahitoti tathā ahutvā antarantarā āpannāpanne vinicchinitvā pavattamānāya kapiniddāya niddāyantopi anāpattiṃ karotīti ayamattho labbhati. ‘‘Pihitadvāragabbhassā’’ti vattabbe majjhapadalopīsamāsavasena ‘‘pihitagabbhassā’’ti vuttaṃ. ‘‘Dvāre’’ti iminā dvārekadesabhūtaṃ ummāraṃ vā taṃsamīpaṃ vā upacārena vuttanti daṭṭhabbaṃ. Sace gabbho pihitadvāro na hoti, anāpattīti byatirekato dassitaṃ.
547. இமஸ்மிங் அனியதஸிக்கா²பதே³ பாளியங் அனாபத்திவாரே அஸதிபி ‘‘யோ பன பி⁴க்கு² மாதுகா³மேன ஸத்³தி⁴ங் ரஹோ படிச்ச²ன்னே ஆஸனே நிஸஜ்ஜங் கப்பெய்ய, பாசித்திய’’ந்தி (பாசி॰ 285) பஞ்சமஸ்ஸ அசேலகவக்³க³ஸ்ஸ சதுத்த²ஸிக்கா²பதே³ அனாபத்திவாரே ‘‘அனாபத்தி யோ கோசி விஞ்ஞூ புரிஸோ து³தியோ ஹோதி, திட்ட²தி ந நிஸீத³தி, அரஹோபெக்கோ², அஞ்ஞவிஹிதோ நிஸீத³தி, உம்மத்தகஸ்ஸ ஆதி³கம்மிகஸ்ஸா’’தி (பாசி॰ 288) வுத்தே அனாபத்திவாரே ஸங்க³ஹேதுமாஹ ‘‘அனந்தே⁴ ஸதீ’’திஆதி³. ‘‘ஏதஸ்ஸ ஸமீபே’’தி பகரணதோ லப்³ப⁴தி. இத⁴ புல்லிங்க³னித்³தே³ஸேன புரிஸோ லப்³ப⁴தி, ‘‘தேனாபி அபா³லேன ப⁴விதப்³ப³ங், மனுஸ்ஸஜாதிகேன ப⁴விதப்³ப³’’ந்தி இத³ஞ்ச ‘‘விஞ்ஞுஸ்மி’’ந்தி இமினா லப்³ப⁴தி. அந்த⁴ஸதி³ஸனித்³தூ³பக³தபடிபக்க²வாசிஅனந்த⁴பதே³ன ‘‘அனித்³தா³யந்தே’’தி லப்³ப⁴தி, மனாபாமனாபங் ஜானந்தே அனித்³தா³யந்தே மனுஸ்ஸபுரிஸே த³ஸ்ஸனூபசாரஸ்ஸ அந்தோ விஜ்ஜமானேதி அத்தோ².
547. Imasmiṃ aniyatasikkhāpade pāḷiyaṃ anāpattivāre asatipi ‘‘yo pana bhikkhu mātugāmena saddhiṃ raho paṭicchanne āsane nisajjaṃ kappeyya, pācittiya’’nti (pāci. 285) pañcamassa acelakavaggassa catutthasikkhāpade anāpattivāre ‘‘anāpatti yo koci viññū puriso dutiyo hoti, tiṭṭhati na nisīdati, arahopekkho, aññavihito nisīdati, ummattakassa ādikammikassā’’ti (pāci. 288) vutte anāpattivāre saṅgahetumāha ‘‘anandhe satī’’tiādi. ‘‘Etassa samīpe’’ti pakaraṇato labbhati. Idha pulliṅganiddesena puriso labbhati, ‘‘tenāpi abālena bhavitabbaṃ, manussajātikena bhavitabba’’nti idañca ‘‘viññusmi’’nti iminā labbhati. Andhasadisaniddūpagatapaṭipakkhavācianandhapadena ‘‘aniddāyante’’ti labbhati, manāpāmanāpaṃ jānante aniddāyante manussapurise dassanūpacārassa anto vijjamāneti attho.
‘‘நிஸஜ்ஜபச்சயா தோ³ஸோ நத்தீ²’’தி இமினா ஸம்ப³ந்தோ⁴, ஏவரூபே ரஹோ ஆஸனே மாதுகா³மேன ஸத்³தி⁴ங் நிஸின்னபச்சயா ஆபத்தி நத்தீ²தி அத்தோ². ‘‘டி²தஸ்ஸா’’தி இமினாபி ததே³வ பத³ங் யோஜேதப்³ப³ங். விஞ்ஞும்ஹி படிப³லே மனுஸ்ஸபுரிஸே அஸன்னிஹிதேபி ததா²விதே⁴ ரஹோ ஆஸனே மாதுகா³மே ஆஸனே நிஸின்னேபி ஸயானேபி டி²தேபி ஸயங் டி²தஸ்ஸ நிஸஜ்ஜாய அபா⁴வா தப்பச்சயா ஆபத்தி ந ஹோதீதி அத்தோ². அரஹஸஞ்ஞினோ நிஸஜ்ஜபச்சயா தோ³ஸோ நத்தீ²தி ரஹோ ஆஸனே மாதுகா³மேன ஸத்³தி⁴ங் நிஸஜ்ஜந்தஸ்ஸாபி ‘‘ரஹோ’’தி ஸஞ்ஞாரஹிதஸ்ஸ நிஸீத³தோ நிஸஜ்ஜபச்சயா அனாபத்தீதி அத்தோ². விக்கி²த்தசேதஸோ நிஸஜ்ஜபச்சயா தோ³ஸோ நத்தீ²தி யோஜனா.
‘‘Nisajjapaccayā doso natthī’’ti iminā sambandho, evarūpe raho āsane mātugāmena saddhiṃ nisinnapaccayā āpatti natthīti attho. ‘‘Ṭhitassā’’ti imināpi tadeva padaṃ yojetabbaṃ. Viññumhi paṭibale manussapurise asannihitepi tathāvidhe raho āsane mātugāme āsane nisinnepi sayānepi ṭhitepi sayaṃ ṭhitassa nisajjāya abhāvā tappaccayā āpatti na hotīti attho. Arahasaññino nisajjapaccayā doso natthīti raho āsane mātugāmena saddhiṃ nisajjantassāpi ‘‘raho’’ti saññārahitassa nisīdato nisajjapaccayā anāpattīti attho. Vikkhittacetaso nisajjapaccayā doso natthīti yojanā.
548. எத்தாவதா பாசித்தியாபத்திமத்ததோ அனாபத்திப்பகாரங் த³ஸ்ஸெத்வா இதா³னி இமஸ்ஸ ஸிக்கா²பத³ஸ்ஸ அனியதவோஹாரஹேதுபூ⁴தாஹி தீஹி ஆபத்தீஹி அனாபத்திபகாரங் த³ஸ்ஸேதுமாஹ ‘‘ந தோ³ஸோ’’திஆதி³. ஆபத்தீஹிபி தீஹிபீதி ‘‘நிஸஜ்ஜங் பி⁴க்கு² படிஜானமானோ திண்ணங் த⁴ம்மானங் அஞ்ஞதரேன காரேதப்³போ³ பாராஜிகேன வா ஸங்கா⁴தி³ஸேஸேன வா பாசித்தியேன வா’’தி (பாரா॰ 444) பாளியங் வுத்தாஹி ‘‘பட²மபாராஜிகாபத்திகாயஸங்ஸக்³க³ஸங்கா⁴தி³ஸேஸாபத்திபாசித்தியாபத்தீ’’தி இமாஹி தீஹிபி ஆபத்தீஹீதி வுத்தங் ஹோதீதி.
548. Ettāvatā pācittiyāpattimattato anāpattippakāraṃ dassetvā idāni imassa sikkhāpadassa aniyatavohārahetubhūtāhi tīhi āpattīhi anāpattipakāraṃ dassetumāha ‘‘na doso’’tiādi. Āpattīhipi tīhipīti ‘‘nisajjaṃ bhikkhu paṭijānamāno tiṇṇaṃ dhammānaṃ aññatarena kāretabbo pārājikena vā saṅghādisesena vā pācittiyena vā’’ti (pārā. 444) pāḷiyaṃ vuttāhi ‘‘paṭhamapārājikāpattikāyasaṃsaggasaṅghādisesāpattipācittiyāpattī’’ti imāhi tīhipi āpattīhīti vuttaṃ hotīti.
பட²மானியதகதா²வண்ணனா.
Paṭhamāniyatakathāvaṇṇanā.
549. வத்தப்³ப³பா⁴வேனாதி⁴கதது³தியானியதவினிச்ச²யதோ பட²மானியதே வுத்தவினிச்ச²யேஹி ஸமங் வினிச்ச²யங் பஹாய தத்த² அவுத்தங் இமஸ்ஸேவ வினிச்ச²யவிஸேஸங் த³ஸ்ஸேதுமாஹ ‘‘அனந்தா⁴’’திஆதி³. இத⁴ து³ட்டு²ல்லவாசாஸங்கா⁴தி³ஸேஸஸ்ஸாபி க³ஹிதத்தா ததோ அனாபத்திகரங் த³ஸ்ஸேதுங் ‘‘அப³தி⁴ரோ’’தி வுத்தங். அனந்தோ⁴ அப³தி⁴ரோதி ‘‘புரிஸோ’’தி இத³ங் ஸந்தா⁴ய வுத்தங். ‘‘இத்தீ²’’தி இத³ங் ஸந்தா⁴ய ‘‘அனந்தா⁴ப³தி⁴ரா’’தி க³ஹேதப்³ப³ங். ஏவமுபரிபி. தேனாபி ஸவனூபசாரந்தோக³தே⁴ன ப⁴விதப்³ப³ந்தி த³ஸ்ஸேதுங் ‘‘அந்தொத்³வாத³ஸஹத்த²ட்டோ²’’தி வுத்தங்.
549. Vattabbabhāvenādhikatadutiyāniyatavinicchayato paṭhamāniyate vuttavinicchayehi samaṃ vinicchayaṃ pahāya tattha avuttaṃ imasseva vinicchayavisesaṃ dassetumāha ‘‘anandhā’’tiādi. Idha duṭṭhullavācāsaṅghādisesassāpi gahitattā tato anāpattikaraṃ dassetuṃ ‘‘abadhiro’’ti vuttaṃ. Anandho abadhiroti ‘‘puriso’’ti idaṃ sandhāya vuttaṃ. ‘‘Itthī’’ti idaṃ sandhāya ‘‘anandhābadhirā’’ti gahetabbaṃ. Evamuparipi. Tenāpi savanūpacārantogadhena bhavitabbanti dassetuṃ ‘‘antodvādasahatthaṭṭho’’ti vuttaṃ.
550. ‘‘அந்தோ⁴ அப³தி⁴ரோ அனாபத்திங் ந கரோதீ’’தி இத³ங் காயஸங்ஸக்³க³ஸங்கா⁴தி³ஸேஸங் ஸந்தா⁴ய வுத்தங். ‘‘ப³தி⁴ரோ வாபி சக்கு²மா, ந கரோதி அனாபத்தி’’ந்தி இத³ங் பன து³ட்டு²ல்லவாசாஸங்கா⁴தி³ஸேஸங் ஸந்தா⁴ய வுத்தந்தி ஏவமெத்த² ஸந்தா⁴ய பா⁴ஸிதத்தோ² வேதி³தப்³போ³.
550.‘‘Andho abadhiro anāpattiṃ na karotī’’ti idaṃ kāyasaṃsaggasaṅghādisesaṃ sandhāya vuttaṃ. ‘‘Badhiro vāpi cakkhumā, na karoti anāpatti’’nti idaṃ pana duṭṭhullavācāsaṅghādisesaṃ sandhāya vuttanti evamettha sandhāya bhāsitattho veditabbo.
புரிமானியதகதா²ய அவுத்தவிஸேஸஸ்ஸ து³தியானியதகதா²ய வத்துமிச்சி²தத்தா அயம்பி விஸேஸோ இத⁴ வத்தப்³போ³. கோயங் விஸேஸோ, யோ இத⁴ வத்தப்³போ³தி சே? தத்த² ‘‘படிச்ச²ன்னே ஆஸனே அலங்கம்மனியே’’தி (பாரா॰ 444) வுத்தங் ஆஸனங்க³த்³வயங் இத⁴ ‘‘ந ஹேவ கோ² பன படிச்ச²ன்னங் ஆஸனங் ஹோதி நாலங்கம்மனிய’’ந்தி (பாரா॰ 453) நிஸேதெ⁴த்வா ‘‘அலஞ்ச கோ² ஹோதி மாதுகா³மங் து³ட்டு²ல்லாஹி வாசாஹி ஓபா⁴ஸிது’’ந்தி (பாரா॰ 453) இத³ங் அபுப்³ப³ங்க³ங் வுத்தங். தத்ர மாதுகா³மோதி அந்தமஸோ தத³ஹுஜாதாபி தா³ரிகா க³ஹிதா, இத⁴ ‘‘மாதுகா³மோ நாம மனுஸ்ஸித்தீ², ந யக்கீ², ந பேதீ, ந திரச்சா²னக³தா, விஞ்ஞூ படிப³லா ஸுபா⁴ஸிதது³ப்³பா⁴ஸிதங் து³ட்டு²ல்லாது³ட்டு²ல்லங் ஆஜானிது’’ந்தி (பாரா॰ 454) விஞ்ஞூ படிப³லோ மாதுகா³மோவ வுத்தோ. தத்த² ‘‘பாராஜிகேன வா ஸங்கா⁴தி³ஸேஸேன வா பாசித்தியேன வா’’தி (பாரா॰ 444) திஸ்ஸோ ஆபத்தியோ வுத்தா, இத⁴ ‘‘நிஸஜ்ஜங் பி⁴க்கு² படிஜானமானோ த்³வின்னங் த⁴ம்மானங் அஞ்ஞதரேன காரேதப்³போ³ ஸங்கா⁴தி³ஸேஸேன வா பாசித்தியேன வா’’தி (பாரா॰ 453) த்³வேயேவ ஆபத்தியோ வுத்தா. ஸங்கா⁴தி³ஸேஸேஸு ச தத்த² ‘‘ஸா சே ஏவங் வதெ³ய்ய ‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’தி, ஸோ ச தங் படிஜானாதி, ஆபத்தியா காரேதப்³போ³’’தி (பாரா॰ 448) காயஸங்ஸக்³க³ஸங்கா⁴தி³ஸேஸோவ வுத்தோ, இத⁴ ஸோ ச வுத்தோ, ‘‘ஸா சே ஏவங் வதெ³ய்ய ‘அய்யஸ்ஸ மயா ஸுதங் நிஸின்னஸ்ஸ மாதுகா³மங் து³ட்டு²ல்லாஹி வாசாஹி ஓபா⁴ஸெந்தஸ்ஸா’தி, ஸோ ச தங் படிஜானாதி, ஆபத்தியா காரேதப்³போ³’’தி (பாரா॰ 455) து³ட்டு²ல்லவாசாஸங்கா⁴தி³ஸேஸோ ச வுத்தோ. எத்தகோ உபி⁴ன்னமனியதானங் விஸேஸோ.
Purimāniyatakathāya avuttavisesassa dutiyāniyatakathāya vattumicchitattā ayampi viseso idha vattabbo. Koyaṃ viseso, yo idha vattabboti ce? Tattha ‘‘paṭicchanne āsane alaṃkammaniye’’ti (pārā. 444) vuttaṃ āsanaṅgadvayaṃ idha ‘‘na heva kho pana paṭicchannaṃ āsanaṃ hoti nālaṃkammaniya’’nti (pārā. 453) nisedhetvā ‘‘alañca kho hoti mātugāmaṃ duṭṭhullāhi vācāhi obhāsitu’’nti (pārā. 453) idaṃ apubbaṅgaṃ vuttaṃ. Tatra mātugāmoti antamaso tadahujātāpi dārikā gahitā, idha ‘‘mātugāmo nāma manussitthī, na yakkhī, na petī, na tiracchānagatā, viññū paṭibalā subhāsitadubbhāsitaṃ duṭṭhullāduṭṭhullaṃ ājānitu’’nti (pārā. 454) viññū paṭibalo mātugāmova vutto. Tattha ‘‘pārājikena vā saṅghādisesena vā pācittiyena vā’’ti (pārā. 444) tisso āpattiyo vuttā, idha ‘‘nisajjaṃ bhikkhu paṭijānamāno dvinnaṃ dhammānaṃ aññatarena kāretabbo saṅghādisesena vā pācittiyena vā’’ti (pārā. 453) dveyeva āpattiyo vuttā. Saṅghādisesesu ca tattha ‘‘sā ce evaṃ vadeyya ‘ayyo mayā diṭṭho nisinno mātugāmena saddhiṃ kāyasaṃsaggaṃ samāpajjanto’ti, so ca taṃ paṭijānāti, āpattiyā kāretabbo’’ti (pārā. 448) kāyasaṃsaggasaṅghādisesova vutto, idha so ca vutto, ‘‘sā ce evaṃ vadeyya ‘ayyassa mayā sutaṃ nisinnassa mātugāmaṃ duṭṭhullāhi vācāhi obhāsentassā’ti, so ca taṃ paṭijānāti, āpattiyā kāretabbo’’ti (pārā. 455) duṭṭhullavācāsaṅghādiseso ca vutto. Ettako ubhinnamaniyatānaṃ viseso.
அயங் கஸ்மா ந வுத்தோதி? அயங் ஸம்போ³த⁴வத்து²விஸேஸோ வத்துமிச்சி²தோ பன அட்ட²கதா²க³தவினிச்ச²யவிஸேஸதோதி தஸ்மா ந வுத்தோதி த³ட்ட²ப்³போ³. திஸமுட்டா²னமேவித³ங் காயசித்தவாசாசித்தகாயவாசாசித்தவஸேன தீணி ஸமுட்டா²னானி ஏதஸ்ஸாதி கத்வா.
Ayaṃ kasmā na vuttoti? Ayaṃ sambodhavatthuviseso vattumicchito pana aṭṭhakathāgatavinicchayavisesatoti tasmā na vuttoti daṭṭhabbo. Tisamuṭṭhānamevidaṃ kāyacittavācācittakāyavācācittavasena tīṇi samuṭṭhānāni etassāti katvā.
இமேஹிபி த்³வீஹி அனியதஸிக்கா²பதே³ஹி ஸிக்கா²பத³ந்தரேஸு பஞ்ஞத்தாயேவ ஆபத்தியோ, அனாபத்தியோ ச த³ஸ்ஸிதா, ந கோசி ஆபத்திவிஸேஸோ வுத்தோ, தஸ்மா கிமேதேஸங் வசனேனாதி? வுச்சதே – வினயவினிச்ச²யலக்க²ணங் ட²பேதுங் ப⁴க³வதா உப்பன்னே வத்து²ம்ஹி த்³வே அனியதா பஞ்ஞத்தா. கத²ங்? ஏவரூபாயபி ஸத்³தெ⁴ய்யவசனாய உபாஸிகாய வுச்சமானோ படிஜானமானோவ ஆபத்தியா காரேதப்³போ³, ந அப்படிஜானமானோ, தஸ்மா ‘‘யாய காயசி ஆபத்தியா யேன கேனசி சோதி³தே படிஞ்ஞாதகரணங்யேவங்க³ங் காதப்³ப³’’ந்தி இமேஹி ஸிக்கா²பதே³ஹி வினிச்ச²யலக்க²ணங் ட²பிதந்தி வேதி³தப்³ப³ங். அத² கஸ்மா பி⁴க்கு²னீனங் அனியதங் ந வுத்தந்தி? இத³மேவ லக்க²ணங் ஸப்³ப³த்த² அனுக³தந்தி ந வுத்தங்.
Imehipi dvīhi aniyatasikkhāpadehi sikkhāpadantaresu paññattāyeva āpattiyo, anāpattiyo ca dassitā, na koci āpattiviseso vutto, tasmā kimetesaṃ vacanenāti? Vuccate – vinayavinicchayalakkhaṇaṃ ṭhapetuṃ bhagavatā uppanne vatthumhi dve aniyatā paññattā. Kathaṃ? Evarūpāyapi saddheyyavacanāya upāsikāya vuccamāno paṭijānamānova āpattiyā kāretabbo, na appaṭijānamāno, tasmā ‘‘yāya kāyaci āpattiyā yena kenaci codite paṭiññātakaraṇaṃyevaṅgaṃ kātabba’’nti imehi sikkhāpadehi vinicchayalakkhaṇaṃ ṭhapitanti veditabbaṃ. Atha kasmā bhikkhunīnaṃ aniyataṃ na vuttanti? Idameva lakkhaṇaṃ sabbattha anugatanti na vuttaṃ.
து³தியானியதகதா²வண்ணனா.
Dutiyāniyatakathāvaṇṇanā.
இதி வினயத்த²ஸாரஸந்தீ³பனியா
Iti vinayatthasārasandīpaniyā
வினயவினிச்ச²யவண்ணனாய
Vinayavinicchayavaṇṇanāya
அனியதகதா²வண்ணனா நிட்டி²தா.
Aniyatakathāvaṇṇanā niṭṭhitā.
