| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
7. அஞ்ஞமஞ்ஞபச்சயனித்³தே³ஸவண்ணனா
7. Aññamaññapaccayaniddesavaṇṇanā
7. அஞ்ஞமஞ்ஞபச்சயனித்³தே³ஸே ஸஹஜாதபச்சயனித்³தே³ஸஸ்ஸ புரிமானங் திண்ணங் கொட்டா²ஸானங் வஸேன பாளி ஆக³தா. தஸ்ஸா தத்த² வுத்தஸதி³ஸாவ வண்ணனாதி புன ந க³ஹிதா. அயம்பி ச அஞ்ஞமஞ்ஞபச்சயோ ஜாதிவஸேன குஸலோ அகுஸலோ விபாகோ கிரியங் ரூபந்தி பஞ்சதா⁴ பி⁴ன்னோ. தத்த² குஸலோ பூ⁴மிதோ சதுப்³பி³தோ⁴. ஸப்³ப³ங் புரிமஸதி³ஸமேவாதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
7. Aññamaññapaccayaniddese sahajātapaccayaniddesassa purimānaṃ tiṇṇaṃ koṭṭhāsānaṃ vasena pāḷi āgatā. Tassā tattha vuttasadisāva vaṇṇanāti puna na gahitā. Ayampi ca aññamaññapaccayo jātivasena kusalo akusalo vipāko kiriyaṃ rūpanti pañcadhā bhinno. Tattha kusalo bhūmito catubbidho. Sabbaṃ purimasadisamevāti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² ஸப்³ப³ம்பி சதுபூ⁴மகங் குஸலங் அத்தனா ஸம்பயுத்தத⁴ம்மானங் அஞ்ஞமஞ்ஞபச்சயேன பச்சயோ. ததா² அகுஸலங். விபாகே பன காமாவசரரூபாவசரவிபாகங் படிஸந்தி⁴யங் வத்து²ரூபஸ்ஸ, பவத்தே ஸம்பயுத்தத⁴ம்மானஞ்ஞேவ. அரூபாவசரலோகுத்தரவிபாகங் அத்தனா ஸம்பயுத்தத⁴ம்மானஞ்ஞேவ அஞ்ஞமஞ்ஞபச்சயேன பச்சயோ. ஸப்³ப³ம்பி கிரியங் ஸம்பயுத்தத⁴ம்மானஞ்ஞேவ அஞ்ஞமஞ்ஞபச்சயேன பச்சயோ. சதுஸமுட்டா²னிகரூபஸ்ஸ கம்மஸமுட்டா²னே ஏகங் மஹாபூ⁴தங் திண்ணங், தீணி ஏகஸ்ஸ, த்³வே த்³வின்னங் மஹாபூ⁴தானங் அஞ்ஞமஞ்ஞபச்சயேன பச்சயோ. காமாவசரரூபாவசரபடிஸந்தி⁴யங் வத்து²ரூபங் விபாகக்க²ந்தா⁴னங் அஞ்ஞமஞ்ஞபச்சயேன பச்சயோ. உதுசித்தாஹாரஸமுட்டா²னேஸு மஹாபூ⁴தானேவ மஹாபூ⁴தானங் அஞ்ஞமஞ்ஞபச்சயேன பச்சயோதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Evaṃ bhinne panettha sabbampi catubhūmakaṃ kusalaṃ attanā sampayuttadhammānaṃ aññamaññapaccayena paccayo. Tathā akusalaṃ. Vipāke pana kāmāvacararūpāvacaravipākaṃ paṭisandhiyaṃ vatthurūpassa, pavatte sampayuttadhammānaññeva. Arūpāvacaralokuttaravipākaṃ attanā sampayuttadhammānaññeva aññamaññapaccayena paccayo. Sabbampi kiriyaṃ sampayuttadhammānaññeva aññamaññapaccayena paccayo. Catusamuṭṭhānikarūpassa kammasamuṭṭhāne ekaṃ mahābhūtaṃ tiṇṇaṃ, tīṇi ekassa, dve dvinnaṃ mahābhūtānaṃ aññamaññapaccayena paccayo. Kāmāvacararūpāvacarapaṭisandhiyaṃ vatthurūpaṃ vipākakkhandhānaṃ aññamaññapaccayena paccayo. Utucittāhārasamuṭṭhānesu mahābhūtāneva mahābhūtānaṃ aññamaññapaccayena paccayoti evamettha paccayuppannatopi viññātabbo vinicchayoti.
அஞ்ஞமஞ்ஞபச்சயனித்³தே³ஸவண்ணனா.
Aññamaññapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
