| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೫. ಅನ್ನಸಂಸಾವಕತ್ಥೇರಅಪದಾನವಣ್ಣನಾ
5. Annasaṃsāvakattheraapadānavaṇṇanā
ಸುವಣ್ಣವಣ್ಣಂ ಸಮ್ಬುದ್ಧನ್ತಿಆದಿಕಂ ಆಯಸ್ಮತೋ ಅನ್ನಸಂಸಾವಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿದ್ಧತ್ಥಸ್ಸ ಭಗವತೋ ಕಾಲೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ಪಿಣ್ಡಾಯ ಚರನ್ತಂ ದ್ವತ್ತಿಂಸಮಹಾಪುರಿಸಲಕ್ಖಣಬ್ಯಾಮಪ್ಪಭಾಮಣ್ಡಲೋಪಸೋಭಿತಂ ಭಗವನ್ತಂ ದಿಸ್ವಾ ಪಸನ್ನಮಾನಸೋ ಭಗವನ್ತಂ ನಿಮನ್ತೇತ್ವಾ ಗೇಹಂ ನೇತ್ವಾ ವರಅನ್ನಪಾನೇನ ಸನ್ತಪ್ಪೇತ್ವಾ ಸಮ್ಪವಾರೇತ್ವಾ ಭೋಜೇಸಿ। ಸೋ ತೇನೇವ ಚಿತ್ತಪ್ಪಸಾದೇನ ತತೋ ಚುತೋ ದೇವಲೋಕೇ ನಿಬ್ಬತ್ತಿತ್ವಾ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ತತೋ ಚವಿತ್ವಾ ಮನುಸ್ಸಲೋಕೇ ನಿಬ್ಬತ್ತಿತ್ವಾ ಮನುಸ್ಸಸಮ್ಪತ್ತಿಂ ಅನುಭವಿತ್ವಾ ತತೋ ಅಪರಾಪರಂ ದೇವಮನುಸ್ಸಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲೇ ನಿಬ್ಬತ್ತೋ ಸಾಸನೇ ಪಸೀದಿತ್ವಾ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪಾಪುಣಿ। ಸೋ ಪುಬ್ಬೇ ಕತಪುಞ್ಞನಾಮವಸೇನ ಅನ್ನಸಂಸಾವಕತ್ಥೇರೋತಿ ಪಾಕಟನಾಮೋ ಅಹೋಸಿ।
Suvaṇṇavaṇṇaṃ sambuddhantiādikaṃ āyasmato annasaṃsāvakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto piṇḍāya carantaṃ dvattiṃsamahāpurisalakkhaṇabyāmappabhāmaṇḍalopasobhitaṃ bhagavantaṃ disvā pasannamānaso bhagavantaṃ nimantetvā gehaṃ netvā varaannapānena santappetvā sampavāretvā bhojesi. So teneva cittappasādena tato cuto devaloke nibbattitvā dibbasampattiṃ anubhavitvā tato cavitvā manussaloke nibbattitvā manussasampattiṃ anubhavitvā tato aparāparaṃ devamanussasampattiyo anubhavitvā imasmiṃ buddhuppāde ekasmiṃ kule nibbatto sāsane pasīditvā pabbajitvā vipassanaṃ vaḍḍhetvā arahattaṃ pāpuṇi. So pubbe katapuññanāmavasena annasaṃsāvakattheroti pākaṭanāmo ahosi.
೧೫೫-೬. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ‘‘ಏವಂ ಮಯಾ ಇಮಿನಾ ಪುಞ್ಞಸಮ್ಭಾರಾನುಭಾವೇನ ಪತ್ತಂ ಅರಹತ್ತ’’ನ್ತಿ ಅತ್ತನೋ ಪುಬ್ಬಚರಿತಾಪದಾನಂ ಉದಾನವಸೇನ ಪಕಾಸೇನ್ತೋ ಸುವಣ್ಣವಣ್ಣನ್ತಿಆದಿಮಾಹ । ತತ್ಥ ಸುವಣ್ಣಸ್ಸ ವಣ್ಣೋ ವಿಯ ವಣ್ಣೋ ಯಸ್ಸ ಭಗವತೋ ಸೋಯಂ ಸುವಣ್ಣವಣ್ಣೋ, ತಂ ಸುವಣ್ಣವಣ್ಣಂ ಸಮ್ಬುದ್ಧಂ ಸಿದ್ಧತ್ಥನ್ತಿ ಅತ್ಥೋ। ಗಚ್ಛನ್ತಂ ಅನ್ತರಾಪಣೇತಿ ವೇಸ್ಸಾನಂ ಆಪಣಪನ್ತೀನಂ ಅನ್ತರವೀಥಿಯಂ ಗಚ್ಛಮಾನಂ। ಕಞ್ಚನಗ್ಘಿಯಸಂಕಾಸನ್ತಿ ಸುವಣ್ಣತೋರಣಸದಿಸಂ ಬಾತ್ತಿಂಸವರಲಕ್ಖಣಂ ದ್ವತ್ತಿಂಸವರಲಕ್ಖಣೇಹಿ ಸಮ್ಪನ್ನಂ ಲೋಕಪಜ್ಜೋತಂ ಸಕಲಲೋಕದೀಪಭೂತಂ ಅಪ್ಪಮೇಯ್ಯಂ ಪಮಾಣವಿರಹಿತಂ ಅನೋಪಮಂ ಉಪಮಾವಿರಹಿತಂ ಜುತಿನ್ಧರಂ ಪಭಾಧಾರಂ ನೀಲಪೀತಾದಿಛಬ್ಬಣ್ಣಬುದ್ಧರಂಸಿಯೋ ಧಾರಕಂ ಸಿದ್ಧತ್ಥಂ ದಿಸ್ವಾ ಪರಮಂ ಉತ್ತಮಂ ಪೀತಿಂ ಅಲತ್ಥಂ ಅಲಭಿನ್ತಿ ಸಮ್ಬನ್ಧೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
155-6. So aparabhāge attano pubbakammaṃ saritvā somanassajāto ‘‘evaṃ mayā iminā puññasambhārānubhāvena pattaṃ arahatta’’nti attano pubbacaritāpadānaṃ udānavasena pakāsento suvaṇṇavaṇṇantiādimāha . Tattha suvaṇṇassa vaṇṇo viya vaṇṇo yassa bhagavato soyaṃ suvaṇṇavaṇṇo, taṃ suvaṇṇavaṇṇaṃ sambuddhaṃ siddhatthanti attho. Gacchantaṃ antarāpaṇeti vessānaṃ āpaṇapantīnaṃ antaravīthiyaṃ gacchamānaṃ. Kañcanagghiyasaṃkāsanti suvaṇṇatoraṇasadisaṃ bāttiṃsavaralakkhaṇaṃ dvattiṃsavaralakkhaṇehi sampannaṃ lokapajjotaṃ sakalalokadīpabhūtaṃ appameyyaṃ pamāṇavirahitaṃ anopamaṃ upamāvirahitaṃ jutindharaṃ pabhādhāraṃ nīlapītādichabbaṇṇabuddharaṃsiyo dhārakaṃ siddhatthaṃ disvā paramaṃ uttamaṃ pītiṃ alatthaṃ alabhinti sambandho. Sesaṃ suviññeyyamevāti.
ಅನ್ನಸಂಸಾವಕತ್ಥೇರಅಪದಾನವಣ್ಣನಾ ಸಮತ್ತಾ।
Annasaṃsāvakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೫. ಅನ್ನಸಂಸಾವಕತ್ಥೇರಅಪದಾನಂ • 5. Annasaṃsāvakattheraapadānaṃ
