| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၃. အညတရဗ္ရာဟ္မဏသုတ္တဝဏ္ဏနာ
3. Aññatarabrāhmaṇasuttavaṇṇanā
၅၄. တတိယေ သမ္မောဒနီယန္တိ သမ္မောဒဇနနိံ။ သာရဏီယန္တိ သရိတဗ္ဗယုတ္တကံ။ ဝီတိသာရေတ္ဝာတိ ပရိယောသာပေတ္ဝာ။ ကိတ္တာဝတာတိ ကိတ္တကေန။ သန္ဒိဋ္ဌိကော ဓမ္မော ဟောတီတိ သာမံ ပသ္သိတဗ္ဗော ဟောတိ။ အကာလိကောတိ န ကာလန္တရေ ဖလဒာယကော။ ဧဟိပသ္သိကောတိ ‘‘ဧဟိ ပသ္သာ’’တိ ဧဝံ ဒသ္သေတုံ သက္ကာတိ အာဂမနီယပဋိပဒံ ပုစ္ဆတိ။ ဩပနေယ္ယိကောတိ အတ္တနော စိတ္တံ ဥပနေတဗ္ဗော။ ပစ္စတ္တံ ဝေဒိတဗ္ဗောတိ သာမံယေဝ ဇာနိတဗ္ဗော။ ဝိညူဟီတိ ပဏ္ဍိတေဟိ။ ပရိယာဒိန္နစိတ္တောတိ အာဒိန္နဂဟိတပရာမဋ္ဌစိတ္တော ဟုတ္ဝာ။ စေတေတီတိ စိန္တေတိ။ သေသမေတ္ထ ဥတ္တာနမေဝ။ ဣမသ္မိံ ပန သုတ္တေ ဗ္ရာဟ္မဏေန လောကုတ္တရမဂ္ဂော ပုစ္ဆိတော, သတ္ထာရာပိ သောယေဝ ကထိတော။ သော ဟိ သာမံ ပသ္သိတဗ္ဗတ္တာ သန္ဒိဋ္ဌိကော နာမာတိ။
54. Tatiye sammodanīyanti sammodajananiṃ. Sāraṇīyanti saritabbayuttakaṃ. Vītisāretvāti pariyosāpetvā. Kittāvatāti kittakena. Sandiṭṭhiko dhammo hotīti sāmaṃ passitabbo hoti. Akālikoti na kālantare phaladāyako. Ehipassikoti ‘‘ehi passā’’ti evaṃ dassetuṃ sakkāti āgamanīyapaṭipadaṃ pucchati. Opaneyyikoti attano cittaṃ upanetabbo. Paccattaṃ veditabboti sāmaṃyeva jānitabbo. Viññūhīti paṇḍitehi. Pariyādinnacittoti ādinnagahitaparāmaṭṭhacitto hutvā. Cetetīti cinteti. Sesamettha uttānameva. Imasmiṃ pana sutte brāhmaṇena lokuttaramaggo pucchito, satthārāpi soyeva kathito. So hi sāmaṃ passitabbattā sandiṭṭhiko nāmāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. အညတရဗ္ရာဟ္မဏသုတ္တံ • 3. Aññatarabrāhmaṇasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃-၄. အညတရဗ္ရာဟ္မဏသုတ္တာဒိဝဏ္ဏနာ • 3-4. Aññatarabrāhmaṇasuttādivaṇṇanā
