| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
куд̣̇д̣̇аганигааяз
Khuddakanikāye
т̇зрийг̇аат̇аа-адтагат̇аа
Therīgāthā-aṭṭhakathā
1. згаганибаад̇о
1. Ekakanipāto
1. ан̃н̃ад̇араат̇зрийг̇аат̇ааван̣н̣анаа
1. Aññatarātherīgāthāvaṇṇanā
ид̣̇аани т̇зрийг̇аат̇аанам̣ ад̇т̇асам̣ван̣н̣анааяа огаасо ануббад̇д̇о. д̇ад̇т̇а яасмаа бхигкунийнам̣ аад̣̇ид̇о яат̇аа баб̣б̣аж̇ж̇аа убасамбад̣̇аа жа бадилад̣̇д̇хаа, д̇ам̣ багаасзд̇ваа ад̇т̇асам̣ван̣н̣анааяа гарийяамаанааяа д̇ад̇т̇а д̇ад̇т̇а г̇аат̇аанам̣ адтуббад̇д̇им̣ вибхаавзд̇ум̣ сугараа ход̇и субаагадаа жа, д̇асмаа д̇ам̣ багаасзд̇ум̣ аад̣̇ид̇о бадтааяа сан̇кзбад̇о аяам̣ анубуб̣б̣игат̇аа –
Idāni therīgāthānaṃ atthasaṃvaṇṇanāya okāso anuppatto. Tattha yasmā bhikkhunīnaṃ ādito yathā pabbajjā upasampadā ca paṭiladdhā, taṃ pakāsetvā atthasaṃvaṇṇanāya karīyamānāya tattha tattha gāthānaṃ aṭṭhuppattiṃ vibhāvetuṃ sukarā hoti supākaṭā ca, tasmā taṃ pakāsetuṃ ādito paṭṭhāya saṅkhepato ayaṃ anupubbikathā –
аяан̃хи логанаат̇о ‘‘мануссад̇д̇ам̣ лин̇г̇асамбад̇д̇ий’’д̇яаад̣̇инаа вуд̇д̇аани адтан̇г̇аани самод̇хаанзд̇ваа д̣̇ийбан̇гарасса бхаг̇авад̇о баад̣̇амуулз гад̇амахаабхинийхааро самад̇им̣сабаарамияо буурзнд̇о жад̇увийсад̇ияаа б̣уд̣̇д̇хаанам̣ санд̇игз лад̣̇д̇хаб̣яаагаран̣о ануггамзна баарамияо буурзд̇ваа н̃аад̇ад̇т̇ажарияааяа логад̇т̇ажарияааяа б̣уд̣̇д̇хад̇т̇ажарияааяа жа годим̣ бад̇ваа д̇усид̇абхаванз ниб̣б̣ад̇д̇ид̇ваа д̇ад̇т̇а яаавад̇ааяугам̣ тад̇ваа д̣̇асасахассажаггаваал̣ад̣̇звад̇аахи б̣уд̣̇д̇хабхаавааяа –
Ayañhi lokanātho ‘‘manussattaṃ liṅgasampattī’’tyādinā vuttāni aṭṭhaṅgāni samodhānetvā dīpaṅkarassa bhagavato pādamūle katamahābhinīhāro samatiṃsapāramiyo pūrento catuvīsatiyā buddhānaṃ santike laddhabyākaraṇo anukkamena pāramiyo pūretvā ñātatthacariyāya lokatthacariyāya buddhatthacariyāya ca koṭiṃ patvā tusitabhavane nibbattitvā tattha yāvatāyukaṃ ṭhatvā dasasahassacakkavāḷadevatāhi buddhabhāvāya –
‘‘гаало ко д̇з махаавийра, уббаж̇ж̇а маад̇угужчияам̣;
‘‘Kālo kho te mahāvīra, uppajja mātukucchiyaṃ;
сад̣̇звагам̣ д̇аараяанд̇о, б̣уж̇жхассу амад̇ам̣ бад̣̇а’’нд̇и. (б̣у. вам̣. 1.67) –
Sadevakaṃ tārayanto, bujjhassu amataṃ pada’’nti. (bu. vaṃ. 1.67) –
ааяаажид̇амануссуубабад̇д̇иго д̇аасам̣ д̣̇звад̇аанам̣ бадин̃н̃ам̣ д̣̇ад̇ваа, гад̇абан̃жамахаавилогано сагяарааж̇агулз суд̣̇д̇ход̣̇анамахаарааж̇асса г̇зхз сад̇о самбаж̇аано маад̇угужчим̣ огганд̇о д̣̇асамаасз сад̇о самбаж̇аано д̇ад̇т̇а тад̇ваа, сад̇о самбаж̇аано д̇ад̇о нигканд̇о лумб̣инийванз лад̣̇д̇хаабхиж̇аад̇иго вивид̇хаа д̇хаад̇ияо аад̣̇им̣ гад̇ваа махад̇аа барихаарзна саммад̣̇зва барихарияамаано ануггамзна вуд̣дхиббад̇д̇о д̇ийсу баасаад̣̇зсу вивид̇ханаадагаж̇анабаривуд̇о д̣̇зво вияа самбад̇д̇им̣ анубхаванд̇о ж̇ин̣н̣аб̣яаад̇химад̇ад̣̇ассанзна ж̇аад̇асам̣взг̇о н̃аан̣асса барибаагад̇ам̣ г̇ад̇ад̇д̇аа, гаамзсу аад̣̇ийнавам̣ нзгкаммз жа аанисам̣сам̣ д̣̇исваа, раахулагумаарасса ж̇аад̇ад̣̇ивасз чаннасахааяо ган̣д̣агам̣ ассарааж̇ам̣ ааруяха , д̣̇звад̇аахи вивадзна д̣̇ваарзна ад̣дхарад̇д̇игасамаяз махаабхинигкаманам̣ нигкамид̇ваа, д̇знзва рад̇д̇аавасзсзна д̇ийн̣и раж̇ж̇аани ад̇иггамид̇ваа аномаанад̣̇ийд̇ийрам̣ бад̇ваа гхадигаарамахааб̣рахмунаа аанийд̇з арахад̇д̇ад̣̇д̇хаж̇з г̇ахзд̇ваа баб̣б̣аж̇ид̇о, д̇аавад̣̇зва вассасадтигад̇т̇зро вияа аагаббасамбанно худ̇ваа, баасаад̣̇игзна ирияаабат̇зна ануггамзна рааж̇аг̇ахам̣ бад̇ваа, д̇ад̇т̇а бин̣д̣ааяа жарид̇ваа бан̣д̣авабаб̣б̣ад̇абаб̣бхаарз бин̣д̣абаад̇ам̣ барибхун̃ж̇ид̇ваа, мааг̇ад̇харааж̇зна раж̇ж̇зна ниманд̇ияамаано д̇ам̣ бадигкибид̇ваа, бхаг̇г̇авассаараамам̣ г̇анд̇ваа, д̇асса самаяам̣ бариг̇г̇ан̣хид̇ваа д̇ад̇о аал̣ааруд̣̇агаанам̣ самаяам̣ бариг̇г̇ан̣хид̇ваа, д̇ам̣ саб̣б̣ам̣ аналан̇гарид̇ваа ануггамзна урувзлам̣ г̇анд̇ваа д̇ад̇т̇а чаб̣б̣ассаани д̣̇уггарагааригам̣ гад̇ваа, д̇ааяа арияад̇хаммабадивзд̇хассаабхаавам̣ н̃ад̇ваа ‘‘нааяам̣ маг̇г̇о б̣од̇хааяаа’’д̇и ол̣ааригам̣ аахаарам̣ аахаранд̇о гад̇ибаахзна б̣алам̣ г̇аахзд̇ваа висаакаабун̣н̣амад̣̇ивасз суж̇аад̇ааяа д̣̇иннам̣ варабхож̇анам̣ бхун̃ж̇ид̇ваа, суван̣н̣абаад̇им̣ над̣̇ияаа бадисод̇ам̣ кибид̇ваа, ‘‘аж̇ж̇а б̣уд̣̇д̇хо бхависсаамий’’д̇и гад̇асаннидтаано сааяанхасамаяз гаал̣зна нааг̇арааж̇зна абхид̇т̇уд̇иг̇ун̣о б̣од̇химан̣д̣ам̣ ааруяха ажаладтаанз баажийналогад̇хаад̇уабхимуко абарааж̇ид̇абаллан̇гз нисинно жад̇уран̇г̇асаманнааг̇ад̇ам̣ вийрияам̣ ад̇хидтааяа, суурияз анад̇т̇ан̇г̇ад̇зязва маараб̣алам̣ вид̇хамид̇ваа, батамаяаамз буб̣б̣зниваасам̣ ануссарид̇ваа , маж̇жхимаяаамз д̣̇иб̣б̣ажагкум̣ висод̇хзд̇ваа, бажчимаяаамз бадижжасамуббаад̣̇з н̃аан̣ам̣ од̇аарзд̇ваа, ануломабадиломам̣ бажжаяаагаарам̣ саммасанд̇о вибассанам̣ вад̣дхзд̇ваа саб̣б̣аб̣уд̣̇д̇хзхи ад̇хиг̇ад̇ам̣ анан̃н̃асаад̇хааран̣ам̣ саммаасамб̣од̇хим̣ ад̇хиг̇анд̇ваа, ниб̣б̣аанаарамман̣ааяа паласамаабад̇д̇ияаа д̇ад̇т̇зва сад̇д̇аахам̣ вийд̇инаамзд̇ваа, д̇знзва наязна ид̇арасад̇д̇аахзби б̣од̇химан̣д̣зязва вийд̇инаамзд̇ваа, рааж̇ааяад̇анамуулз мад̇хубин̣д̣игабхож̇анам̣ бхун̃ж̇ид̇ваа, буна аж̇абааланиг̇род̇хамуулз нисинно д̇хаммад̇ааяа д̇хаммаг̇амбхийрад̇ам̣ бажжавзгкид̇ваа аббоссуггад̇ааяа жид̇д̇з наманд̇з махааб̣рахмунаа ааяаажид̇о б̣уд̣̇д̇хажагкунаа логам̣ вологзнд̇о д̇игкинд̣̇рияамуд̣̇инд̣̇рияаад̣̇ибхзд̣̇з сад̇д̇з д̣̇исваа махааб̣рахмунаа д̇хаммад̣̇зсанааяа гад̇абадин̃н̃о ‘‘гасса ну ко ахам̣ батамам̣ д̇хаммам̣ д̣̇зсзяяа’’нд̇и ааваж̇ж̇знд̇о аал̣ааруд̣̇агаанам̣ гаалан̇гад̇абхаавам̣ н̃ад̇ваа, ‘‘б̣ахубагаараа ко мз бан̃жаваг̇г̇ияаа бхигкуу, яз мам̣ бад̇хаанабахид̇ад̇д̇ам̣ убадтахим̣су, яам̣нуунаахам̣ бан̃жаваг̇г̇ияаанам̣ бхигкуунам̣ батамам̣ д̇хаммам̣ д̣̇зсзяяа’’нд̇и (махаава. 10) жинд̇зд̇ваа, аасаал̣хибун̣н̣амааяам̣ махааб̣од̇хид̇о б̣аараан̣асим̣ уд̣̇д̣̇исса адтаарасаяож̇анам̣ маг̇г̇ам̣ бадибанно анд̇араамаг̇г̇з убагзна ааж̇ийвагзна сад̣̇д̇хим̣ манд̇зд̇ваа, ануггамзна исибад̇анам̣ бад̇ваа д̇ад̇т̇а бан̃жаваг̇г̇ияз сан̃н̃аабзд̇ваа ‘‘д̣̇взмз, бхигкавз, анд̇аа баб̣б̣аж̇ид̇зна на сзвид̇аб̣б̣аа’’д̇иаад̣̇инаа (махаава. 13; сам̣. ни. 5.1081; бади. ма. 2.30) д̇хаммажаггабавад̇д̇анасуд̇д̇анд̇ад̣̇зсанааяа ан̃н̃аасигон̣д̣ан̃н̃аббамукаа адтаарасаб̣рахмагодияо д̇хаммаамад̇ам̣ бааязд̇ваа баадибад̣̇з бхад̣̇д̣̇ияад̇т̇зрам̣, багкасса д̣̇уд̇ияааяам̣ ваббад̇т̇зрам̣, багкасса д̇ад̇ияааяам̣ махаанаамад̇т̇зрам̣, жад̇уд̇т̇ияам̣ ассаж̇ид̇т̇зрам̣, сод̇аабад̇д̇ипалз бад̇идтаабзд̇ваа, бан̃жамияам̣ бана багкасса анад̇д̇алагкан̣асуд̇д̇анд̇ад̣̇зсанааяа (махаава. 20; сам̣. ни. 3.59) саб̣б̣зби арахад̇д̇з бад̇идтаабзд̇ваа д̇ад̇о барам̣ яасад̣̇аарагаббамукз бан̃жабан̣н̣аасабурисз, габбаасигаванасан̣д̣з д̇им̣самад̇д̇з бхад̣̇д̣̇аваг̇г̇ияз, г̇аяаасийсз бидтибаасаан̣з сахассамад̇д̇з бураан̣аж̇адилзд̇и звам̣ махааж̇анам̣ арияабхуумим̣ од̇аарзд̇ваа б̣имб̣исаараббамукаани згаад̣̇асанахуд̇аани сод̇аабад̇д̇ипалз нахуд̇ам̣ саран̣ад̇д̇аяз бад̇идтаабзд̇ваа взл̣уванам̣ бадиг̇г̇ахзд̇ваа д̇ад̇т̇а вихаранд̇о ассаж̇ид̇т̇зрасса ваахасаа ад̇хиг̇ад̇абатамамаг̇г̇з сан̃жаяам̣ аабужчид̇ваа, сад̣̇д̇хим̣ барисааяа ад̇д̇ано санд̇игам̣ убаг̇ад̇з саарибуд̇д̇амог̇г̇аллаанз аг̇г̇апалам̣ сажчигад̇ваа саавагабаарамияаа мад̇т̇агам̣ бад̇д̇з аг̇г̇асаавагадтаанз табзд̇ваа гаал̣уд̣̇ааяид̇т̇зрасса абхияаажанааяа габилавад̇т̇ум̣ г̇анд̇ваа, маанад̇т̇ад̣̇д̇хз н̃аад̇агз яамагабаадихаариязна д̣̇амзд̇ваа, бид̇арам̣ анааг̇аамипалз, махаабаж̇аабад̇им̣ сод̇аабад̇д̇ипалз бадидтаабзд̇ваа , нанд̣̇агумаарам̣ раахулагумааран̃жа баб̣б̣ааж̇зд̇ваа, сад̇т̇аа бунад̣̇зва рааж̇аг̇ахам̣ бажжааг̇ажчи.
Āyācitamanussūpapattiko tāsaṃ devatānaṃ paṭiññaṃ datvā, katapañcamahāvilokano sakyarājakule suddhodanamahārājassa gehe sato sampajāno mātukucchiṃ okkanto dasamāse sato sampajāno tattha ṭhatvā, sato sampajāno tato nikkhanto lumbinīvane laddhābhijātiko vividhā dhātiyo ādiṃ katvā mahatā parihārena sammadeva parihariyamāno anukkamena vuḍḍhippatto tīsu pāsādesu vividhanāṭakajanaparivuto devo viya sampattiṃ anubhavanto jiṇṇabyādhimatadassanena jātasaṃvego ñāṇassa paripākataṃ gatattā, kāmesu ādīnavaṃ nekkhamme ca ānisaṃsaṃ disvā, rāhulakumārassa jātadivase channasahāyo kaṇḍakaṃ assarājaṃ āruyha , devatāhi vivaṭena dvārena aḍḍharattikasamaye mahābhinikkhamanaṃ nikkhamitvā, teneva rattāvasesena tīṇi rajjāni atikkamitvā anomānadītīraṃ patvā ghaṭikāramahābrahmunā ānīte arahattaddhaje gahetvā pabbajito, tāvadeva vassasaṭṭhikatthero viya ākappasampanno hutvā, pāsādikena iriyāpathena anukkamena rājagahaṃ patvā, tattha piṇḍāya caritvā paṇḍavapabbatapabbhāre piṇḍapātaṃ paribhuñjitvā, māgadharājena rajjena nimantiyamāno taṃ paṭikkhipitvā, bhaggavassārāmaṃ gantvā, tassa samayaṃ pariggaṇhitvā tato āḷārudakānaṃ samayaṃ pariggaṇhitvā, taṃ sabbaṃ analaṅkaritvā anukkamena uruvelaṃ gantvā tattha chabbassāni dukkarakārikaṃ katvā, tāya ariyadhammapaṭivedhassābhāvaṃ ñatvā ‘‘nāyaṃ maggo bodhāyā’’ti oḷārikaṃ āhāraṃ āharanto katipāhena balaṃ gāhetvā visākhāpuṇṇamadivase sujātāya dinnaṃ varabhojanaṃ bhuñjitvā, suvaṇṇapātiṃ nadiyā paṭisotaṃ khipitvā, ‘‘ajja buddho bhavissāmī’’ti katasanniṭṭhāno sāyanhasamaye kāḷena nāgarājena abhitthutiguṇo bodhimaṇḍaṃ āruyha acalaṭṭhāne pācīnalokadhātuabhimukho aparājitapallaṅke nisinno caturaṅgasamannāgataṃ vīriyaṃ adhiṭṭhāya, sūriye anatthaṅgateyeva mārabalaṃ vidhamitvā, paṭhamayāme pubbenivāsaṃ anussaritvā , majjhimayāme dibbacakkhuṃ visodhetvā, pacchimayāme paṭiccasamuppāde ñāṇaṃ otāretvā, anulomapaṭilomaṃ paccayākāraṃ sammasanto vipassanaṃ vaḍḍhetvā sabbabuddhehi adhigataṃ anaññasādhāraṇaṃ sammāsambodhiṃ adhigantvā, nibbānārammaṇāya phalasamāpattiyā tattheva sattāhaṃ vītināmetvā, teneva nayena itarasattāhepi bodhimaṇḍeyeva vītināmetvā, rājāyatanamūle madhupiṇḍikabhojanaṃ bhuñjitvā, puna ajapālanigrodhamūle nisinno dhammatāya dhammagambhīrataṃ paccavekkhitvā appossukkatāya citte namante mahābrahmunā āyācito buddhacakkhunā lokaṃ volokento tikkhindriyamudindriyādibhede satte disvā mahābrahmunā dhammadesanāya katapaṭiñño ‘‘kassa nu kho ahaṃ paṭhamaṃ dhammaṃ deseyya’’nti āvajjento āḷārudakānaṃ kālaṅkatabhāvaṃ ñatvā, ‘‘bahupakārā kho me pañcavaggiyā bhikkhū, ye maṃ padhānapahitattaṃ upaṭṭhahiṃsu, yaṃnūnāhaṃ pañcavaggiyānaṃ bhikkhūnaṃ paṭhamaṃ dhammaṃ deseyya’’nti (mahāva. 10) cintetvā, āsāḷhipuṇṇamāyaṃ mahābodhito bārāṇasiṃ uddissa aṭṭhārasayojanaṃ maggaṃ paṭipanno antarāmagge upakena ājīvakena saddhiṃ mantetvā, anukkamena isipatanaṃ patvā tattha pañcavaggiye saññāpetvā ‘‘dveme, bhikkhave, antā pabbajitena na sevitabbā’’tiādinā (mahāva. 13; saṃ. ni. 5.1081; paṭi. ma. 2.30) dhammacakkapavattanasuttantadesanāya aññāsikoṇḍaññappamukhā aṭṭhārasabrahmakoṭiyo dhammāmataṃ pāyetvā pāṭipade bhaddiyattheraṃ, pakkhassa dutiyāyaṃ vappattheraṃ, pakkhassa tatiyāyaṃ mahānāmattheraṃ, catutthiyaṃ assajittheraṃ, sotāpattiphale patiṭṭhāpetvā, pañcamiyaṃ pana pakkhassa anattalakkhaṇasuttantadesanāya (mahāva. 20; saṃ. ni. 3.59) sabbepi arahatte patiṭṭhāpetvā tato paraṃ yasadārakappamukhe pañcapaṇṇāsapurise, kappāsikavanasaṇḍe tiṃsamatte bhaddavaggiye, gayāsīse piṭṭhipāsāṇe sahassamatte purāṇajaṭileti evaṃ mahājanaṃ ariyabhūmiṃ otāretvā bimbisārappamukhāni ekādasanahutāni sotāpattiphale nahutaṃ saraṇattaye patiṭṭhāpetvā veḷuvanaṃ paṭiggahetvā tattha viharanto assajittherassa vāhasā adhigatapaṭhamamagge sañcayaṃ āpucchitvā, saddhiṃ parisāya attano santikaṃ upagate sāriputtamoggallāne aggaphalaṃ sacchikatvā sāvakapāramiyā matthakaṃ patte aggasāvakaṭṭhāne ṭhapetvā kāḷudāyittherassa abhiyācanāya kapilavatthuṃ gantvā, mānatthaddhe ñātake yamakapāṭihāriyena dametvā, pitaraṃ anāgāmiphale, mahāpajāpatiṃ sotāpattiphale paṭiṭṭhāpetvā , nandakumāraṃ rāhulakumārañca pabbājetvā, satthā punadeva rājagahaṃ paccāgacchi.
ат̇аабарзна самаязна сад̇т̇ари взсаалим̣ убаниссааяа гуудааг̇аарасаалааяам̣ вихаранд̇з суд̣̇д̇ход̣̇анамахаарааж̇аа сзд̇ажчад̇д̇асса хздтаава арахад̇д̇ам̣ сажчигад̇ваа бариниб̣б̣ааяи. ат̇а махаабаж̇аабад̇ияаа г̇од̇амияаа баб̣б̣аж̇ж̇ааяа жид̇д̇ам̣ уббаж̇ж̇и, д̇ад̇о рохинийнад̣̇ийд̇ийрз галахавиваад̣̇асуд̇д̇анд̇ад̣̇зсанааяа (су. ни. 868 аад̣̇аяо) барияосаанз нигкамид̇ваа, баб̣б̣аж̇ид̇аанам̣ бан̃жаннам̣ гумаарасад̇аанам̣ баад̣̇абарижааригаа згаж̇жхаасаяаава худ̇ваа махаабаж̇аабад̇ияаа санд̇игам̣ г̇анд̇ваа, саб̣б̣аава ‘‘сад̇т̇у санд̇игз баб̣б̣аж̇иссаамаа’’д̇и махаабаж̇аабад̇им̣ ж̇здтигам̣ гад̇ваа сад̇т̇у санд̇игам̣ г̇анд̇угаамаа ахзсум̣. аяан̃жа махаабаж̇аабад̇и буб̣б̣зби згаваарам̣ сад̇т̇аарам̣ баб̣б̣аж̇ж̇ам̣ яаажид̇ваа наалад̇т̇а, д̇асмаа габбагам̣ баггосаабзд̇ваа гзсз чинд̣̇аабзд̇ваа гаасааяаани ажчаад̣̇зд̇ваа саб̣б̣аа д̇аа саагияаанияо аад̣̇ааяа взсаалим̣ г̇анд̇ваа аананд̣̇ад̇т̇зрзна д̣̇асаб̣алам̣ яаажаабзд̇ваа, адтаг̇аруд̇хаммабадиг̇г̇ахан̣зна баб̣б̣аж̇ж̇ам̣ убасамбад̣̇ан̃жа алад̇т̇а. ид̇араа бана саб̣б̣ааби згад̇о убасамбаннаа ахзсум̣. аяамзд̇т̇а сан̇кзбо. вид̇т̇аарад̇о банзд̇ам̣ вад̇т̇у д̇ад̇т̇а д̇ад̇т̇а баал̣ияам̣ (жуул̣ава. 402) ааг̇ад̇амзва.
Athāparena samayena satthari vesāliṃ upanissāya kūṭāgārasālāyaṃ viharante suddhodanamahārājā setacchattassa heṭṭhāva arahattaṃ sacchikatvā parinibbāyi. Atha mahāpajāpatiyā gotamiyā pabbajjāya cittaṃ uppajji, tato rohinīnadītīre kalahavivādasuttantadesanāya (su. ni. 868 ādayo) pariyosāne nikkhamitvā, pabbajitānaṃ pañcannaṃ kumārasatānaṃ pādaparicārikā ekajjhāsayāva hutvā mahāpajāpatiyā santikaṃ gantvā, sabbāva ‘‘satthu santike pabbajissāmā’’ti mahāpajāpatiṃ jeṭṭhikaṃ katvā satthu santikaṃ gantukāmā ahesuṃ. Ayañca mahāpajāpati pubbepi ekavāraṃ satthāraṃ pabbajjaṃ yācitvā nālattha, tasmā kappakaṃ pakkosāpetvā kese chindāpetvā kāsāyāni acchādetvā sabbā tā sākiyāniyo ādāya vesāliṃ gantvā ānandattherena dasabalaṃ yācāpetvā, aṭṭhagarudhammapaṭiggahaṇena pabbajjaṃ upasampadañca alattha. Itarā pana sabbāpi ekato upasampannā ahesuṃ. Ayamettha saṅkhepo. Vitthārato panetaṃ vatthu tattha tattha pāḷiyaṃ (cūḷava. 402) āgatameva.
звам̣ убасамбаннаа бана махаабаж̇аабад̇и сад̇т̇аарам̣ убасан̇гамид̇ваа абхиваад̣̇зд̇ваа згаманд̇ам̣ адтааси. ат̇ассаа сад̇т̇аа д̇хаммам̣ д̣̇зсзси. саа сад̇т̇у санд̇игз гаммадтаанам̣ г̇ахзд̇ваа арахад̇д̇ам̣ баабун̣и. сзсаа жа бан̃жасад̇абхигкунияо нанд̣̇аговаад̣̇абарияосаанз (ма. ни. 3.398) арахад̇д̇ам̣ баабун̣им̣су. звам̣ бхигкунисан̇гхз суббад̇идтид̇з бут̇убхууд̇з д̇ад̇т̇а д̇ад̇т̇а г̇ааманиг̇амаж̇анабад̣̇арааж̇ад̇хаанийсу гулид̇т̇ияо гуласун̣хааяо гулагумааригааяо б̣уд̣̇д̇хасуб̣уд̣̇д̇хад̇ам̣ д̇хаммасуд̇хаммад̇ам̣ сан̇гхасуббадибад̇д̇ид̇ан̃жа суд̇ваа, саасанз абхиббасаннаа сам̣саарз жа ж̇аад̇асам̣взг̇аа ад̇д̇ано саамигз маад̇аабид̇аро н̃аад̇агз жа ануж̇аанаабзд̇ваа, саасанз урам̣ д̣̇ад̇ваа баб̣б̣аж̇им̣су. баб̣б̣аж̇ид̇ваа жа сийлаажаарасамбаннаа сад̇т̇уно жа д̇зсам̣ т̇зраанан̃жа санд̇игз оваад̣̇ам̣ лабхид̇ваа гхадзнд̇ияо вааяаманд̇ияо нажирассзва арахад̇д̇ам̣ сажчаагам̣су. д̇аахи уд̣̇аанаад̣̇ивасзна д̇ад̇т̇а д̇ад̇т̇а бхаасид̇аа г̇аат̇аа бажчаа сан̇г̇ийд̇игаарагзхи згаж̇жхам̣ гад̇ваа згаганибаад̇аад̣̇ивасзна сан̇г̇ийд̇им̣ ааробаяим̣су ‘‘имаа т̇зрийг̇аат̇аа наамаа’’д̇и. д̇аасам̣ нибаад̇аад̣̇ивибхааг̇о хздтаа вуд̇д̇оязва. д̇ад̇т̇а нибаад̇зсу згаганибаад̇о аад̣̇и. д̇ад̇т̇аби –
Evaṃ upasampannā pana mahāpajāpati satthāraṃ upasaṅkamitvā abhivādetvā ekamantaṃ aṭṭhāsi. Athassā satthā dhammaṃ desesi. Sā satthu santike kammaṭṭhānaṃ gahetvā arahattaṃ pāpuṇi. Sesā ca pañcasatabhikkhuniyo nandakovādapariyosāne (ma. ni. 3.398) arahattaṃ pāpuṇiṃsu. Evaṃ bhikkhunisaṅghe suppatiṭṭhite puthubhūte tattha tattha gāmanigamajanapadarājadhānīsu kulitthiyo kulasuṇhāyo kulakumārikāyo buddhasubuddhataṃ dhammasudhammataṃ saṅghasuppaṭipattitañca sutvā, sāsane abhippasannā saṃsāre ca jātasaṃvegā attano sāmike mātāpitaro ñātake ca anujānāpetvā, sāsane uraṃ datvā pabbajiṃsu. Pabbajitvā ca sīlācārasampannā satthuno ca tesaṃ therānañca santike ovādaṃ labhitvā ghaṭentiyo vāyamantiyo nacirasseva arahattaṃ sacchākaṃsu. Tāhi udānādivasena tattha tattha bhāsitā gāthā pacchā saṅgītikārakehi ekajjhaṃ katvā ekakanipātādivasena saṅgītiṃ āropayiṃsu ‘‘imā therīgāthā nāmā’’ti. Tāsaṃ nipātādivibhāgo heṭṭhā vuttoyeva. Tattha nipātesu ekakanipāto ādi. Tatthapi –
1.
1.
‘‘сукам̣ субаахи т̇зригз, гад̇ваа жол̣зна бааруд̇аа;
‘‘Sukhaṃ supāhi therike, katvā coḷena pārutā;
убасанд̇о хи д̇з рааг̇о, сугкад̣аагам̣ва гумбхияа’’нд̇и. –
Upasanto hi te rāgo, sukkhaḍākaṃva kumbhiya’’nti. –
аяам̣ г̇аат̇аа аад̣̇и. д̇ассаа гаа уббад̇д̇и? ад̇ийд̇з гира ан̃н̃ад̇араа гулад̇хийд̇аа гон̣ааг̇аманасса бхаг̇авад̇о гаалз саасанз абхиббасаннаа худ̇ваа сад̇т̇аарам̣ ниманд̇зд̇ваа д̣̇уд̇ияад̣̇ивасз саакааман̣д̣абам̣ гаарзд̇ваа ваалигам̣ ад̇т̇арид̇ваа убари вид̇аанам̣ б̣анд̇хид̇ваа г̇анд̇хабубпаад̣̇ийхи бууж̇ам̣ гад̇ваа сад̇т̇у гаалам̣ аарожаабзси. сад̇т̇аа д̇ад̇т̇а г̇анд̇ваа бан̃н̃ад̇д̇з аасанз нисийд̣̇и. саа бхаг̇аванд̇ам̣ ванд̣̇ид̇ваа бан̣ийд̇зна каад̣̇анийязна бхож̇анийязна баривисид̇ваа, бхаг̇аванд̇ам̣ бхуд̇д̇аавим̣ онийд̇абад̇д̇абаан̣им̣ д̇ижийварзна ажчаад̣̇зси. д̇ассаа бхаг̇аваа анумод̣̇анам̣ гад̇ваа баггаами. саа яаавад̇ааяугам̣ бун̃н̃аани гад̇ваа ааяубарияосаанз д̣̇звалогз ниб̣б̣ад̇д̇ид̇ваа згам̣ б̣уд̣̇д̇ханд̇арам̣ суг̇ад̇ийсу зва сам̣саранд̇ий гассабасса бхаг̇авад̇о гаалз г̇ахабад̇игулз ниб̣б̣ад̇д̇ид̇ваа вин̃н̃уд̇ам̣ бад̇ваа, сам̣саарз ж̇аад̇асам̣взг̇аа саасанз баб̣б̣аж̇ид̇ваа убасамбаж̇ж̇ид̇ваа вийсад̇ивассахассаани бхигкунисийлам̣ буурзд̇ваа, бут̇уж̇ж̇анагаалагирияам̣ гад̇ваа, саг̇г̇з ниб̣б̣ад̇д̇аа згам̣ б̣уд̣̇д̇ханд̇арам̣ саг̇г̇асамбад̇д̇им̣ анубхавид̇ваа имасмим̣ б̣уд̣̇д̇хуббаад̣̇з взсаалияам̣ кад̇д̇ияамахаасаалагулз ниб̣б̣ад̇д̇и. д̇ам̣ т̇ирасанд̇асарийрад̇ааяа т̇зригаад̇и вохарим̣су. саа ваяаббад̇д̇аа гулаббад̣̇зсаад̣̇инаа самаанаж̇аад̇игасса кад̇д̇ияагумаарасса маад̇аабид̇уухи д̣̇иннаа бад̇ид̣̇звад̇аа худ̇ваа васанд̇ий сад̇т̇у взсаалиг̇аманз саасанз бадилад̣̇д̇хасад̣̇д̇хаа убаасигаа худ̇ваа, абарабхааг̇з махаабаж̇аабад̇иг̇од̇амийт̇зрияаа санд̇игз д̇хаммам̣ суд̇ваа баб̣б̣аж̇ж̇ааяа ружим̣ уббаад̣̇зд̇ваа ‘‘ахам̣ баб̣б̣аж̇иссаамий’’д̇и саамигассаарожзси. саамиго наануж̇аанаад̇и. саа бана гад̇аад̇хигаарад̇ааяа яат̇аасуд̇ам̣ д̇хаммам̣ бажжавзгкид̇ваа руубааруубад̇хаммз бариг̇г̇ахзд̇ваа вибассанам̣ ануяуд̇д̇аа вихарад̇и.
Ayaṃ gāthā ādi. Tassā kā uppatti? Atīte kira aññatarā kuladhītā koṇāgamanassa bhagavato kāle sāsane abhippasannā hutvā satthāraṃ nimantetvā dutiyadivase sākhāmaṇḍapaṃ kāretvā vālikaṃ attharitvā upari vitānaṃ bandhitvā gandhapupphādīhi pūjaṃ katvā satthu kālaṃ ārocāpesi. Satthā tattha gantvā paññatte āsane nisīdi. Sā bhagavantaṃ vanditvā paṇītena khādanīyena bhojanīyena parivisitvā, bhagavantaṃ bhuttāviṃ onītapattapāṇiṃ ticīvarena acchādesi. Tassā bhagavā anumodanaṃ katvā pakkāmi. Sā yāvatāyukaṃ puññāni katvā āyupariyosāne devaloke nibbattitvā ekaṃ buddhantaraṃ sugatīsu eva saṃsarantī kassapassa bhagavato kāle gahapatikule nibbattitvā viññutaṃ patvā, saṃsāre jātasaṃvegā sāsane pabbajitvā upasampajjitvā vīsativassahassāni bhikkhunisīlaṃ pūretvā, puthujjanakālakiriyaṃ katvā, sagge nibbattā ekaṃ buddhantaraṃ saggasampattiṃ anubhavitvā imasmiṃ buddhuppāde vesāliyaṃ khattiyamahāsālakule nibbatti. Taṃ thirasantasarīratāya therikāti vohariṃsu. Sā vayappattā kulappadesādinā samānajātikassa khattiyakumārassa mātāpitūhi dinnā patidevatā hutvā vasantī satthu vesāligamane sāsane paṭiladdhasaddhā upāsikā hutvā, aparabhāge mahāpajāpatigotamītheriyā santike dhammaṃ sutvā pabbajjāya ruciṃ uppādetvā ‘‘ahaṃ pabbajissāmī’’ti sāmikassārocesi. Sāmiko nānujānāti. Sā pana katādhikāratāya yathāsutaṃ dhammaṃ paccavekkhitvā rūpārūpadhamme pariggahetvā vipassanaṃ anuyuttā viharati.
ат̇згад̣̇ивасам̣ махаанасз б̣яан̃ж̇анз бажжамаанз махад̇ий аг̇г̇иж̇аалаа удтахи. саа аг̇г̇иж̇аалаа сагалабхааж̇анам̣ д̇адад̇адааяанд̇ам̣ жхааяад̇и. саа д̇ам̣ д̣̇исваа д̇ад̣̇зваарамман̣ам̣ гад̇ваа судтуд̇арам̣ анижжад̇ам̣ убадтаханд̇ам̣ убад̇хаарзд̇ваа д̇ад̇о д̇ад̇т̇а д̣̇угкаанижжаанад̇д̇ад̇ан̃жа ааробзд̇ваа вибассанам̣ вад̣дхзд̇ваа ануггамзна уссуггаабзд̇ваа маг̇г̇абадибаадияаа анааг̇аамипалз бад̇идтахи. саа д̇ад̇о бадтааяа аабхаран̣ам̣ ваа алан̇гаарам̣ ваа на д̇хаарзд̇и. саа саамигзна ‘‘гасмаа д̇вам̣, бхад̣̇д̣̇з, ид̣̇аани буб̣б̣з вияа аабхаран̣ам̣ ваа алан̇гаарам̣ ваа на д̇хаарзсий’’д̇и вуд̇д̇аа ад̇д̇ано г̇ихибхаавз абхаб̣б̣абхаавам̣ аарожзд̇ваа баб̣б̣аж̇ж̇ам̣ ануж̇аанаабзси. со висаако убаасаго вияа д̇хаммад̣̇иннам̣ махад̇аа барихаарзна махаабаж̇аабад̇иг̇од̇амияаа санд̇игам̣ нзд̇ваа ‘‘имам̣, аяяз, баб̣б̣ааж̇зт̇аа’’д̇и ааха. ат̇а махаабаж̇аабад̇иг̇од̇амий д̇ам̣ баб̣б̣ааж̇зд̇ваа убасамбаад̣̇зд̇ваа вихаарам̣ нзд̇ваа сад̇т̇аарам̣ д̣̇ассзси. сад̇т̇аабиссаа багад̇ияаа д̣̇идтаарамман̣амзва вибхаавзнд̇о ‘‘сукам̣ субаахий’’д̇и г̇аат̇амааха.
Athekadivasaṃ mahānase byañjane paccamāne mahatī aggijālā uṭṭhahi. Sā aggijālā sakalabhājanaṃ taṭataṭāyantaṃ jhāyati. Sā taṃ disvā tadevārammaṇaṃ katvā suṭṭhutaraṃ aniccataṃ upaṭṭhahantaṃ upadhāretvā tato tattha dukkhāniccānattatañca āropetvā vipassanaṃ vaḍḍhetvā anukkamena ussukkāpetvā maggapaṭipāṭiyā anāgāmiphale patiṭṭhahi. Sā tato paṭṭhāya ābharaṇaṃ vā alaṅkāraṃ vā na dhāreti. Sā sāmikena ‘‘kasmā tvaṃ, bhadde, idāni pubbe viya ābharaṇaṃ vā alaṅkāraṃ vā na dhāresī’’ti vuttā attano gihibhāve abhabbabhāvaṃ ārocetvā pabbajjaṃ anujānāpesi. So visākho upāsako viya dhammadinnaṃ mahatā parihārena mahāpajāpatigotamiyā santikaṃ netvā ‘‘imaṃ, ayye, pabbājethā’’ti āha. Atha mahāpajāpatigotamī taṃ pabbājetvā upasampādetvā vihāraṃ netvā satthāraṃ dassesi. Satthāpissā pakatiyā diṭṭhārammaṇameva vibhāvento ‘‘sukhaṃ supāhī’’ti gāthamāha.
д̇ад̇т̇а суканд̇и бхааванабум̣саганид̣̇д̣̇зсо. субаахийд̇и аан̣ад̇д̇иважанам̣. т̇зригзд̇и ааманд̇анаважанам̣. гад̇ваа жол̣зна бааруд̇аад̇и аббижчад̇ааяа нияож̇анам̣. убасанд̇о хи д̇з рааг̇од̇и бадибад̇д̇игид̇д̇анам̣. сугкад̣аагам̣ваад̇и убасамзд̇аб̣б̣асса гилзсасса асаарабхааванид̣̇ассанам̣. гумбхияанд̇и д̇ад̣̇аад̇хаарасса анижжад̇ужчаад̣̇ибхааванид̣̇ассанам̣.
Tattha sukhanti bhāvanapuṃsakaniddeso. Supāhīti āṇattivacanaṃ. Theriketi āmantanavacanaṃ. Katvā coḷena pārutāti appicchatāya niyojanaṃ. Upasanto hi te rāgoti paṭipattikittanaṃ. Sukkhaḍākaṃvāti upasametabbassa kilesassa asārabhāvanidassanaṃ. Kumbhiyanti tadādhārassa aniccatucchādibhāvanidassanaṃ.
суканд̇и жзд̇ам̣ идтаад̇хиважанам̣. сукзна нид̣̇угкаа худ̇ваад̇и ад̇т̇о. субаахийд̇и нибаж̇ж̇анид̣̇ассанан̃жзд̇ам̣ жад̇уннам̣ ирияаабат̇аанам̣, д̇асмаа жад̇д̇аароби ирияаабат̇з сукзнзва габбзхи сукам̣ вихараад̇и ад̇т̇о. т̇зригзд̇и ид̣̇ам̣ яад̣̇иби д̇ассаа наамагид̇д̇анам̣, бажурзна анвад̇т̇асан̃н̃аабхаавад̇о бана т̇ирз саасанз т̇ирабхааваббад̇д̇з, т̇ирзхи сийлаад̣̇ид̇хаммзхи саманнааг̇ад̇зд̇и ад̇т̇о. гад̇ваа жол̣зна бааруд̇аад̇и бам̣сугуулажол̣зхи жийварам̣ гад̇ваа ажчаад̣̇ид̇асарийраа д̇ам̣ нивад̇т̇аа жзва бааруд̇аа жа. убасанд̇о хи д̇з рааг̇од̇и хи-сад̣̇д̣̇о хзд̇вад̇т̇о. яасмаа д̇ава санд̇аанз уббаж̇ж̇анагагаамарааг̇о убасанд̇о анааг̇аамимаг̇г̇ан̃аан̣аг̇г̇инаа д̣̇ад̣дхо, ид̣̇аани д̇ад̣̇авасзсам̣ рааг̇ам̣ аг̇г̇амаг̇г̇ан̃аан̣аг̇г̇инаа д̣̇ахзд̇ваа сукам̣ субаахийд̇и ад̇хиббааяо. сугкад̣аагам̣ва гумбхияанд̇и яат̇аа д̇ам̣ баггз бхааж̇анз аббагам̣ д̣аагаб̣яан̃ж̇анам̣ махад̇ияаа аг̇г̇иж̇аалааяа бажжамаанам̣ жхааяид̇ваа суссанд̇ам̣ вуубасаммад̇и, яат̇аа ваа уд̣̇агамиссз д̣аагаб̣яан̃ж̇анз уд̣̇д̇ханам̣ ааробзд̇ваа бажжамаанз уд̣̇агз виж̇ж̇амаанз д̇ам̣ жижжидааяад̇и жидижидааяад̇и, уд̣̇агз бана чиннз убасанд̇амзва ход̇и, звам̣ д̇ава санд̇аанз гаамарааг̇о убасанд̇о, ид̇арамби вуубасамзд̇ваа сукам̣ субаахийд̇и.
Sukhanti cetaṃ iṭṭhādhivacanaṃ. Sukhena nidukkhā hutvāti attho. Supāhīti nipajjanidassanañcetaṃ catunnaṃ iriyāpathānaṃ, tasmā cattāropi iriyāpathe sukheneva kappehi sukhaṃ viharāti attho. Theriketi idaṃ yadipi tassā nāmakittanaṃ, pacurena anvatthasaññābhāvato pana thire sāsane thirabhāvappatte, thirehi sīlādidhammehi samannāgateti attho. Katvā coḷena pārutāti paṃsukūlacoḷehi cīvaraṃ katvā acchāditasarīrā taṃ nivatthā ceva pārutā ca. Upasanto hi te rāgoti hi-saddo hetvattho. Yasmā tava santāne uppajjanakakāmarāgo upasanto anāgāmimaggañāṇagginā daḍḍho, idāni tadavasesaṃ rāgaṃ aggamaggañāṇagginā dahetvā sukhaṃ supāhīti adhippāyo. Sukkhaḍākaṃva kumbhiyanti yathā taṃ pakke bhājane appakaṃ ḍākabyañjanaṃ mahatiyā aggijālāya paccamānaṃ jhāyitvā sussantaṃ vūpasammati, yathā vā udakamisse ḍākabyañjane uddhanaṃ āropetvā paccamāne udake vijjamāne taṃ cicciṭāyati ciṭiciṭāyati, udake pana chinne upasantameva hoti, evaṃ tava santāne kāmarāgo upasanto, itarampi vūpasametvā sukhaṃ supāhīti.
т̇зрий инд̣̇рияаанам̣ барибаагам̣ г̇ад̇ад̇д̇аа сад̇т̇у д̣̇зсанаавилаасзна жа г̇аат̇аабарияосаанз саха бадисамбхид̣̇аахи арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зрий 2.1.26-30).
Therī indriyānaṃ paripākaṃ gatattā satthu desanāvilāsena ca gāthāpariyosāne saha paṭisambhidāhi arahattaṃ pāpuṇi. Tena vuttaṃ apadāne (apa. therī 2.1.26-30).
‘‘гон̣ааг̇аманаб̣уд̣̇д̇хасса, ман̣д̣або гаарид̇о маяаа;
‘‘Koṇāgamanabuddhassa, maṇḍapo kārito mayā;
д̇хувам̣ д̇ижийварам̣д̣̇аасим̣, б̣уд̣̇д̇хасса логаб̣анд̇хуно.
Dhuvaṃ ticīvaraṃdāsiṃ, buddhassa lokabandhuno.
‘‘яам̣ яам̣ ж̇анабад̣̇ам̣ яаами, ниг̇амз рааж̇ад̇хаанияо;
‘‘Yaṃ yaṃ janapadaṃ yāmi, nigame rājadhāniyo;
саб̣б̣ад̇т̇а бууж̇ид̇о хоми, бун̃н̃агаммассид̣̇ам̣ палам̣.
Sabbattha pūjito homi, puññakammassidaṃ phalaṃ.
‘‘гилзсаа жхаабид̇аа маяхам̣, бхаваа саб̣б̣з самуухад̇аа;
‘‘Kilesā jhāpitā mayhaṃ, bhavā sabbe samūhatā;
нааг̇ийва б̣анд̇ханам̣ чзд̇ваа, вихараами анаасаваа.
Nāgīva bandhanaṃ chetvā, viharāmi anāsavā.
‘‘свааг̇ад̇ам̣ вад̇а мз ааси, б̣уд̣̇д̇хасздтасса санд̇игз;
‘‘Svāgataṃ vata me āsi, buddhaseṭṭhassa santike;
д̇иссо виж̇ж̇аа ануббад̇д̇аа, гад̇ам̣ б̣уд̣̇д̇хасса саасанам̣.
Tisso vijjā anuppattā, kataṃ buddhassa sāsanaṃ.
‘‘бадисамбхид̣̇аа жад̇ассо, вимогкааби жа адтимз;
‘‘Paṭisambhidā catasso, vimokkhāpi ca aṭṭhime;
чал̣абхин̃н̃аа сажчигад̇аа, гад̇ам̣ б̣уд̣̇д̇хасса саасана’’нд̇и.
Chaḷabhiññā sacchikatā, kataṃ buddhassa sāsana’’nti.
арахад̇д̇ам̣ бана бад̇ваа т̇зрий уд̣̇аанзнд̇ий д̇амзва г̇аат̇ам̣ абхааси, д̇знааяам̣ г̇аат̇аа д̇ассаа т̇зрияаа г̇аат̇аа ахоси. д̇ад̇т̇а т̇зрияаа вуд̇д̇аг̇аат̇ааяа анавасзсо рааг̇о бариг̇г̇ахид̇о аг̇г̇амаг̇г̇зна д̇асса вуубасамасса ад̇хиббзд̇ад̇д̇аа. рааг̇авуубасамзнзва жзд̇т̇а саб̣б̣зсамби гилзсаанам̣ вуубасамо вуд̇д̇од̇и д̣̇адтаб̣б̣ам̣ д̇ад̣̇згадтад̇ааяа саб̣б̣зсам̣ гилзсад̇хаммаанам̣ вуубасамасид̣̇д̇хид̇о. д̇ат̇аа хи вужжад̇и –
Arahattaṃ pana patvā therī udānentī tameva gāthaṃ abhāsi, tenāyaṃ gāthā tassā theriyā gāthā ahosi. Tattha theriyā vuttagāthāya anavaseso rāgo pariggahito aggamaggena tassa vūpasamassa adhippetattā. Rāgavūpasameneva cettha sabbesampi kilesānaṃ vūpasamo vuttoti daṭṭhabbaṃ tadekaṭṭhatāya sabbesaṃ kilesadhammānaṃ vūpasamasiddhito. Tathā hi vuccati –
‘‘уд̣̇д̇хажжавижигижчаахи, яо мохо сахаж̇о мад̇о;
‘‘Uddhaccavicikicchāhi, yo moho sahajo mato;
бахаанзгадтабхаавзна, рааг̇зна саран̣о хи со’’д̇и.
Pahānekaṭṭhabhāvena, rāgena saraṇo hi so’’ti.
яат̇аа жзд̇т̇а саб̣б̣зсам̣ сам̣гилзсаанам̣ вуубасамо вуд̇д̇о, звам̣ саб̣б̣ад̇т̇ааби д̇зсам̣ вуубасамо вуд̇д̇од̇и взд̣̇ид̇аб̣б̣ам̣. буб̣б̣абхааг̇з д̇ад̣̇ан̇г̇авасзна, самат̇авибассанаагкан̣з вигкамбханавасзна, маг̇г̇агкан̣з самужчзд̣̇авасзна, палагкан̣з бадиббассад̣̇д̇хивасзна вуубасамасид̣̇д̇хид̇о. д̇зна жад̇уб̣б̣ид̇хассааби бахаанасса сид̣̇д̇хи взд̣̇ид̇аб̣б̣аа . д̇ад̇т̇а д̇ад̣̇ан̇г̇аббахаанзна сийласамбад̣̇аасид̣̇д̇хи, вигкамбханабахаанзна самаад̇хисамбад̣̇аасид̣̇д̇хи, ид̇арзхи бан̃н̃аасамбад̣̇аасид̣̇д̇хи д̣̇ассид̇аа ход̇и бахаанаабхисамаяобасиж̇жханад̇о. яат̇аа бхааванаабхисамаяам̣ саад̇хзд̇и д̇асмим̣ асад̇и д̇ад̣̇абхаавад̇о, д̇ат̇аа сажчигирияаабхисамаяам̣ барин̃н̃аабхисамаяан̃жа саад̇хзд̇и зваад̇и. жад̇ураабхисамаяасид̣̇д̇хияаа д̇иссо сигкаа, бадибад̇д̇ияаа д̇ивид̇хагаляаан̣ад̇аа, сад̇д̇ависуд̣̇д̇хияо жа барибун̣н̣аа имааяа г̇аат̇ааяа багаасид̇аа хонд̇ийд̇и взд̣̇ид̇аб̣б̣ам̣. ан̃н̃ад̇араат̇зрий абан̃н̃аад̇аа наамаг̇од̇д̇аад̣̇ивасзна абаагадаа, згаа т̇зрий лагкан̣асамбаннаа бхигкуний имам̣ г̇аат̇ам̣ абхаасийд̇и ад̇хиббааяо.
Yathā cettha sabbesaṃ saṃkilesānaṃ vūpasamo vutto, evaṃ sabbatthāpi tesaṃ vūpasamo vuttoti veditabbaṃ. Pubbabhāge tadaṅgavasena, samathavipassanākkhaṇe vikkhambhanavasena, maggakkhaṇe samucchedavasena, phalakkhaṇe paṭippassaddhivasena vūpasamasiddhito. Tena catubbidhassāpi pahānassa siddhi veditabbā . Tattha tadaṅgappahānena sīlasampadāsiddhi, vikkhambhanapahānena samādhisampadāsiddhi, itarehi paññāsampadāsiddhi dassitā hoti pahānābhisamayopasijjhanato. Yathā bhāvanābhisamayaṃ sādheti tasmiṃ asati tadabhāvato, tathā sacchikiriyābhisamayaṃ pariññābhisamayañca sādheti evāti. Caturābhisamayasiddhiyā tisso sikkhā, paṭipattiyā tividhakalyāṇatā, sattavisuddhiyo ca paripuṇṇā imāya gāthāya pakāsitā hontīti veditabbaṃ. Aññatarātherī apaññātā nāmagottādivasena apākaṭā, ekā therī lakkhaṇasampannā bhikkhunī imaṃ gāthaṃ abhāsīti adhippāyo.
ан̃н̃ад̇араат̇зрийг̇аат̇ааван̣н̣анаа нидтид̇аа.
Aññatarātherīgāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 1. ан̃н̃ад̇араат̇зрийг̇аат̇аа • 1. Aññatarātherīgāthā
