| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
൪. അഞ്ഞവിഞ്ഞാപനസിക്ഖാപദവണ്ണനാ
4. Aññaviññāpanasikkhāpadavaṇṇanā
പടിലാഭേനാതി പഠമവിഞ്ഞത്തിതോ ഊനതരസ്സാപി അഞ്ഞസ്സ പടിലാഭേന.
Paṭilābhenāti paṭhamaviññattito ūnatarassāpi aññassa paṭilābhena.
തസ്മിം അപ്പഹോന്തേ പുന തഞ്ഞേവാതി യം പഠമം വിഞ്ഞത്തം, ഥോകത്താ തസ്മിം അപ്പഹോന്തേ പുന തഞ്ഞേവ വിഞ്ഞാപേന്തിയാതി അത്ഥോ. അഞ്ഞേനപി അത്ഥേ സതീ തി പഠമം വിഞ്ഞത്തിതോ അഞ്ഞേനപി അത്ഥേ സതി. തേന സദ്ധിം അഞ്ഞഞ്ചാതി യം പഠമം വിഞ്ഞത്തം, തേന സദ്ധിം അഞ്ഞഞ്ച. കിം വുത്തം ഹോതി? സചേ പഠമം സപ്പി വിഞ്ഞത്തം, ‘‘യമകം പചിതബ്ബ’’ന്തി ച വേജ്ജേന വുത്തത്താ തേലേനാപി അത്ഥോ ഹോതി. തതോ ‘‘തേലേനാപി മേ അത്ഥോ’’തി ഏവമാദിനാ അഞ്ഞഞ്ച വിഞ്ഞാപേന്തിയാതി വുത്തം ഹോതി. ആനിസംസം ദസ്സേത്വാതി ‘‘സചേ കഹാപണസ്സ സപ്പി ആഭതം ഹോതി, ഇമിനാ മൂലേന ദ്വിഗുണം തേലം ലബ്ഭതി, തേലേനാപി ച ഇദം കിച്ചം നിപ്പജ്ജതി, തസ്മാ തേലം ആഹരാ’’തി ഏവം ആനിസംസം ദസ്സേത്വാ.
Tasmiṃ appahonte puna taññevāti yaṃ paṭhamaṃ viññattaṃ, thokattā tasmiṃ appahonte puna taññeva viññāpentiyāti attho. Aññenapi atthe satī ti paṭhamaṃ viññattito aññenapi atthe sati. Tena saddhiṃ aññañcāti yaṃ paṭhamaṃ viññattaṃ, tena saddhiṃ aññañca. Kiṃ vuttaṃ hoti? Sace paṭhamaṃ sappi viññattaṃ, ‘‘yamakaṃ pacitabba’’nti ca vejjena vuttattā telenāpi attho hoti. Tato ‘‘telenāpi me attho’’ti evamādinā aññañca viññāpentiyāti vuttaṃ hoti. Ānisaṃsaṃ dassetvāti ‘‘sace kahāpaṇassa sappi ābhataṃ hoti, iminā mūlena dviguṇaṃ telaṃ labbhati, telenāpi ca idaṃ kiccaṃ nippajjati, tasmā telaṃ āharā’’ti evaṃ ānisaṃsaṃ dassetvā.
അഞ്ഞവിഞ്ഞാപനസിക്ഖാപദവണ്ണനാ നിട്ഠിതാ.
Aññaviññāpanasikkhāpadavaṇṇanā niṭṭhitā.
