| Library / Tipiṭaka / तिपिटक • Tipiṭaka / बुद्धवंसपाळि • Buddhavaṃsapāḷi |
९. अनोमदस्सीबुद्धवंसो
9. Anomadassībuddhavaṃso
१.
1.
सोभितस्स अपरेन, सम्बुद्धो द्विपदुत्तमो।
Sobhitassa aparena, sambuddho dvipaduttamo;
अनोमदस्सी अमितयसो, तेजस्सी दुरतिक्कमो॥
Anomadassī amitayaso, tejassī duratikkamo.
२.
2.
सो छेत्वा बन्धनं सब्बं, विद्धंसेत्वा तयो भवे।
So chetvā bandhanaṃ sabbaṃ, viddhaṃsetvā tayo bhave;
अनिवत्तिगमनं मग्गं, देसेसि देवमानुसे॥
Anivattigamanaṃ maggaṃ, desesi devamānuse.
३.
3.
सागरोव असङ्खोभो, पब्बतोव दुरासदो।
Sāgarova asaṅkhobho, pabbatova durāsado;
आकासोव अनन्तो सो, सालराजाव फुल्लितो॥
Ākāsova ananto so, sālarājāva phullito.
४.
4.
दस्सनेनपि तं बुद्धं, तोसिता होन्ति पाणिनो।
Dassanenapi taṃ buddhaṃ, tositā honti pāṇino;
ब्याहरन्तं गिरं सुत्वा, अमतं पापुणन्ति ते॥
Byāharantaṃ giraṃ sutvā, amataṃ pāpuṇanti te.
५.
5.
धम्माभिसमयो तस्स, इद्धो फीतो तदा अहु।
Dhammābhisamayo tassa, iddho phīto tadā ahu;
कोटिसतानि अभिसमिंसु, पठमे धम्मदेसने॥
Koṭisatāni abhisamiṃsu, paṭhame dhammadesane.
६.
6.
ततो परं अभिसमये, वस्सन्ते धम्मवुट्ठियो।
Tato paraṃ abhisamaye, vassante dhammavuṭṭhiyo;
असीतिकोटियोभिसमिंसु, दुतिये धम्मदेसने॥
Asītikoṭiyobhisamiṃsu, dutiye dhammadesane.
७.
7.
ततोपरञ्हि वस्सन्ते, तप्पयन्ते च पाणिनं।
Tatoparañhi vassante, tappayante ca pāṇinaṃ;
अट्ठसत्ततिकोटीनं, ततियाभिसमयो अहु॥
Aṭṭhasattatikoṭīnaṃ, tatiyābhisamayo ahu.
८.
8.
सन्निपाता तयो आसुं, तस्सापि च महेसिनो।
Sannipātā tayo āsuṃ, tassāpi ca mahesino;
अभिञ्ञाबलप्पत्तानं, पुप्फितानं विमुत्तिया॥
Abhiññābalappattānaṃ, pupphitānaṃ vimuttiyā.
९.
9.
अट्ठसतसहस्सानं, सन्निपातो तदा अहु।
Aṭṭhasatasahassānaṃ, sannipāto tadā ahu;
पहीनमदमोहानं, सन्तचित्तान तादिनं॥
Pahīnamadamohānaṃ, santacittāna tādinaṃ.
१०.
10.
सत्तसतसहस्सानं , दुतियो आसि समागमो।
Sattasatasahassānaṃ , dutiyo āsi samāgamo;
अनङ्गणानं विरजानं, उपसन्तान तादिनं॥
Anaṅgaṇānaṃ virajānaṃ, upasantāna tādinaṃ.
११.
11.
छन्नं सतसहस्सानं, ततियो आसि समागमो।
Channaṃ satasahassānaṃ, tatiyo āsi samāgamo;
अभिञ्ञाबलप्पत्तानं, निब्बुतानं तपस्सिनं॥
Abhiññābalappattānaṃ, nibbutānaṃ tapassinaṃ.
१२.
12.
अहं तेन समयेन, यक्खो आसिं महिद्धिको।
Ahaṃ tena samayena, yakkho āsiṃ mahiddhiko;
नेकानं यक्खकोटीनं, वसवत्तिम्हि इस्सरो॥
Nekānaṃ yakkhakoṭīnaṃ, vasavattimhi issaro.
१३.
13.
तदापि तं बुद्धवरं, उपगन्त्वा महेसिनं।
Tadāpi taṃ buddhavaraṃ, upagantvā mahesinaṃ;
अन्नपानेन तप्पेसिं, ससङ्घं लोकनायकं॥
Annapānena tappesiṃ, sasaṅghaṃ lokanāyakaṃ.
१४.
14.
सोपि मं तदा ब्याकासि, विसुद्धनयनो मुनि।
Sopi maṃ tadā byākāsi, visuddhanayano muni;
‘‘अपरिमेय्यितो कप्पे, अयं बुद्धो भविस्सति॥
‘‘Aparimeyyito kappe, ayaṃ buddho bhavissati.
१५.
15.
‘‘पधानं पदहित्वान…पे॰… हेस्साम सम्मुखा इमं’’॥
‘‘Padhānaṃ padahitvāna…pe… hessāma sammukhā imaṃ’’.
१६.
16.
तस्सापि वचनं सुत्वा, हट्ठो संविग्गमानसो।
Tassāpi vacanaṃ sutvā, haṭṭho saṃviggamānaso;
उत्तरिं वतमधिट्ठासिं, दसपारमिपूरिया॥
Uttariṃ vatamadhiṭṭhāsiṃ, dasapāramipūriyā.
१७.
17.
नगरं चन्दवती नाम, यसवा नाम खत्तियो।
Nagaraṃ candavatī nāma, yasavā nāma khattiyo;
माता यसोधरा नाम, अनोमदस्सिस्स सत्थुनो॥
Mātā yasodharā nāma, anomadassissa satthuno.
१८.
18.
दसवस्ससहस्सानि, अगारं अज्झ सो वसि।
Dasavassasahassāni, agāraṃ ajjha so vasi;
सिरी उपसिरी वड्ढो, तयो पासादमुत्तमा॥
Sirī upasirī vaḍḍho, tayo pāsādamuttamā.
१९.
19.
तेवीसतिसहस्सानि, नारियो समलङ्कता।
Tevīsatisahassāni, nāriyo samalaṅkatā;
सिरिमा नाम सा नारी, उपवाणो नाम अत्रजो॥
Sirimā nāma sā nārī, upavāṇo nāma atrajo.
२०.
20.
निमित्ते चतुरो दिस्वा, सिविकायाभिनिक्खमि।
Nimitte caturo disvā, sivikāyābhinikkhami;
अनूनदसमासानि, पधानं पदही जिनो॥
Anūnadasamāsāni, padhānaṃ padahī jino.
२१.
21.
ब्रह्मुना याचितो सन्तो, अनोमदस्सी महामुनि।
Brahmunā yācito santo, anomadassī mahāmuni;
२२.
22.
वरुणो नामुपट्ठाको, अनोमदस्सिस्स सत्थुनो॥
Varuṇo nāmupaṭṭhāko, anomadassissa satthuno.
२३.
23.
सुन्दरी च सुमना च, अहेसुं अग्गसाविका।
Sundarī ca sumanā ca, ahesuṃ aggasāvikā;
बोधि तस्स भगवतो, अज्जुनोति पवुच्चति॥
Bodhi tassa bhagavato, ajjunoti pavuccati.
२४.
24.
नन्दिवड्ढो सिरिवड्ढो, अहेसुं अग्गुपट्ठका।
Nandivaḍḍho sirivaḍḍho, ahesuṃ aggupaṭṭhakā;
उप्पला चेव पदुमा च, अहेसुं अग्गुपट्ठिका॥
Uppalā ceva padumā ca, ahesuṃ aggupaṭṭhikā.
२५.
25.
अट्ठपण्णासरतनं , अच्चुग्गतो महामुनि।
Aṭṭhapaṇṇāsaratanaṃ , accuggato mahāmuni;
पभा निद्धावती तस्स, सतरंसीव उग्गतो॥
Pabhā niddhāvatī tassa, sataraṃsīva uggato.
२६.
26.
वस्ससतसहस्सानि, आयु विज्जति तावदे।
Vassasatasahassāni, āyu vijjati tāvade;
तावता तिट्ठमानो सो, तारेसि जनतं बहुं॥
Tāvatā tiṭṭhamāno so, tāresi janataṃ bahuṃ.
२७.
27.
सुपुप्फितं पावचनं, अरहन्तेहि तादिहि।
Supupphitaṃ pāvacanaṃ, arahantehi tādihi;
वीतरागेहि विमलेहि, सोभित्थ जिनसासनं॥
Vītarāgehi vimalehi, sobhittha jinasāsanaṃ.
२८.
28.
सो च सत्था अमितयसो, युगानि तानि अतुलियानि।
So ca satthā amitayaso, yugāni tāni atuliyāni;
सब्बं तमन्तरहितं, ननु रित्ता सब्बसङ्खारा॥
Sabbaṃ tamantarahitaṃ, nanu rittā sabbasaṅkhārā.
२९.
29.
अनोमदस्सी जिनो सत्था, धम्मारामम्हि निब्बुतो।
Anomadassī jino satthā, dhammārāmamhi nibbuto;
तत्थेवस्स जिनथूपो, उब्बेधो पञ्चवीसतीति॥
Tatthevassa jinathūpo, ubbedho pañcavīsatīti.
अनोमदस्सिस्स भगवतो वंसो सत्तमो।
Anomadassissa bhagavato vaṃso sattamo.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / बुद्धवंस-अट्ठकथा • Buddhavaṃsa-aṭṭhakathā / ९. अनोमदस्सीबुद्धवंसवण्णना • 9. Anomadassībuddhavaṃsavaṇṇanā
