| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
7. அந்தக்³கா³ஹிகாதி³ட்டி²னித்³தே³ஸோ
7. Antaggāhikādiṭṭhiniddeso
140. அந்தக்³கா³ஹிகாய தி³ட்டி²யா கதமேஹி பஞ்ஞாஸாய ஆகாரேஹி அபி⁴னிவேஸோ ஹோதி? ‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா கதிஹாகாரேஹி அபி⁴னிவேஸோ ஹோதி? ‘‘அஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா கதிஹாகாரேஹி அபி⁴னிவேஸோ ஹோதி? ‘‘அந்தவா லோகோ’’தி – அந்தக்³கா³ஹிகாய தி³ட்டி²யா… ‘‘அனந்தவா லோகோ’’தி – அந்தக்³கா³ஹிகாய தி³ட்டி²யா… ‘‘தங் ஜீவங் தங் ஸரீர’’ந்தி – அந்தக்³கா³ஹிகாய தி³ட்டி²யா… ‘‘அஞ்ஞங் ஜீவங் அஞ்ஞங் ஸரீர’’ந்தி – அந்தக்³கா³ஹிகாய தி³ட்டி²யா… ‘‘ஹோதி ததா²க³தோ பரங் மரணா’’தி…பே॰… ந ஹோதி ததா²க³தோ பரங் மரணா’’தி… ‘‘ஹோதி ச ந ச ஹோதி ததா²க³தோ பரங் மரணா’’தி… ‘‘நேவ ஹோதி ந ந ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா கதிஹாகாரேஹி அபி⁴னிவேஸோ ஹோதி?
140. Antaggāhikāya diṭṭhiyā katamehi paññāsāya ākārehi abhiniveso hoti? ‘‘Sassato loko’’ti – antaggāhikāya diṭṭhiyā katihākārehi abhiniveso hoti? ‘‘Asassato loko’’ti – antaggāhikāya diṭṭhiyā katihākārehi abhiniveso hoti? ‘‘Antavā loko’’ti – antaggāhikāya diṭṭhiyā… ‘‘anantavā loko’’ti – antaggāhikāya diṭṭhiyā… ‘‘taṃ jīvaṃ taṃ sarīra’’nti – antaggāhikāya diṭṭhiyā… ‘‘aññaṃ jīvaṃ aññaṃ sarīra’’nti – antaggāhikāya diṭṭhiyā… ‘‘hoti tathāgato paraṃ maraṇā’’ti…pe… na hoti tathāgato paraṃ maraṇā’’ti… ‘‘hoti ca na ca hoti tathāgato paraṃ maraṇā’’ti… ‘‘neva hoti na na hoti tathāgato paraṃ maraṇā’’ti – antaggāhikāya diṭṭhiyā katihākārehi abhiniveso hoti?
‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஹோதி…பே॰… ‘‘நேவ ஹோதி ந ந ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா பஞ்சஹாகாரேஹி அபி⁴னிவேஸோ ஹோதி.
‘‘Sassato loko’’ti – antaggāhikāya diṭṭhiyā pañcahākārehi abhiniveso hoti…pe… ‘‘neva hoti na na hoti tathāgato paraṃ maraṇā’’ti – antaggāhikāya diṭṭhiyā pañcahākārehi abhiniveso hoti.
[க] ‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபங் லோகோ சேவ ஸஸ்ஸதங் சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘ஸஸ்ஸதோ லோகோ’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி² …பே॰… இமானி ஸஞ்ஞோஜனானி, ந ச தி³ட்டி²யோ.
[Ka] ‘‘sassato loko’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ loko ceva sassataṃ cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘sassato loko’’ti – antaggāhikā diṭṭhi. Antaggāhikā diṭṭhi micchādiṭṭhi …pe… imāni saññojanāni, na ca diṭṭhiyo.
வேத³னா லோகோ சேவ ஸஸ்ஸதா சாதி…பே॰… ஸஞ்ஞா லோகோ சேவ ஸஸ்ஸதா சாதி…பே॰… ஸங்கா²ரா லோகோ சேவ ஸஸ்ஸதா சாதி…பே॰… விஞ்ஞாணங் லோகோ சேவ ஸஸ்ஸதஞ்சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பஞ்சமீ ஸஸ்ஸதோ லோகோதி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ‘‘ஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Vedanā loko ceva sassatā cāti…pe… saññā loko ceva sassatā cāti…pe… saṅkhārā loko ceva sassatā cāti…pe… viññāṇaṃ loko ceva sassatañcāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ pañcamī sassato lokoti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo. ‘‘Sassato loko’’ti – antaggāhikāya diṭṭhiyā imehi pañcahākārehi abhiniveso hoti.
[க²] ‘‘அஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபங் லோகோ சேவ அஸஸ்ஸதஞ்சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே॰… அயங் பட²மா ‘‘அஸஸ்ஸதோ லோகோ’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ.
[Kha] ‘‘asassato loko’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ loko ceva asassatañcāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ayaṃ paṭhamā ‘‘asassato loko’’ti – antaggāhikā diṭṭhi. Antaggāhikā diṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo.
வேத³னா லோகோ சேவ அஸஸ்ஸதா சாதி…பே॰… ஸஞ்ஞா லோகோ சேவ அஸஸ்ஸதா சாதி…பே॰… ஸங்கா²ரா லோகோ சேவ அஸஸ்ஸதா சாதி…பே॰… விஞ்ஞாணங் லோகோ சேவ அஸஸ்ஸதஞ்சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ . ‘‘அஸஸ்ஸதோ லோகோ’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Vedanā loko ceva asassatā cāti…pe… saññā loko ceva asassatā cāti…pe… saṅkhārā loko ceva asassatā cāti…pe… viññāṇaṃ loko ceva asassatañcāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo . ‘‘Asassato loko’’ti – antaggāhikāya diṭṭhiyā imehi pañcahākārehi abhiniveso hoti.
[க³] ‘‘அந்தவா லோகோ’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? இதே⁴கச்சோ பரித்தங் ஓகாஸங் நீலகதோ ப²ரதி. தஸ்ஸ ஏவங் ஹோதி – ‘‘அந்தவா அயங் லோகோ பரிவடுமோ’’தி. அந்தஸஞ்ஞீ ஹோதி. யங் ப²ரதி, தங் வத்து² சேவ லோகோ ச. யேன ப²ரதி, ஸோ அத்தா சேவ லோகோ சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘அந்தவா லோகோ’’தி அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ.
[Ga] ‘‘antavā loko’’ti – antaggāhikāya diṭṭhiyā katamehi pañcahākārehi abhiniveso hoti? Idhekacco parittaṃ okāsaṃ nīlakato pharati. Tassa evaṃ hoti – ‘‘antavā ayaṃ loko parivaṭumo’’ti. Antasaññī hoti. Yaṃ pharati, taṃ vatthu ceva loko ca. Yena pharati, so attā ceva loko cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘antavā loko’’ti antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
இதே⁴கச்சோ பரித்தங் ஓகாஸங் பீதகதோ ப²ரதி… லோஹிதகதோ ப²ரதி… ஓதா³தகதோ ப²ரதி… ஓபா⁴ஸகதோ ப²ரதி. தஸ்ஸ ஏவங் ஹோதி – ‘‘அந்தவா அயங் லோகோ பரிவடுமோ’’தி. அந்தஸஞ்ஞீ ஹோதி. யங் ப²ரதி தங் வத்து² சேவ லோகோ ச. யேன ப²ரதி ஸோ அத்தா சேவ லோகோ சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே॰… அந்தவா லோகோதி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Idhekacco parittaṃ okāsaṃ pītakato pharati… lohitakato pharati… odātakato pharati… obhāsakato pharati. Tassa evaṃ hoti – ‘‘antavā ayaṃ loko parivaṭumo’’ti. Antasaññī hoti. Yaṃ pharati taṃ vatthu ceva loko ca. Yena pharati so attā ceva loko cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… antavā lokoti – antaggāhikāya diṭṭhiyā imehi pañcahākārehi abhiniveso hoti.
[க⁴] ‘‘அனந்தவா லோகோ’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? இதே⁴கச்சோ விபுலங் ஓகாஸங் நீலகதோ ப²ரதி. தஸ்ஸ ஏவங் ஹோதி – ‘‘அனந்தவா அயங் லோகோ அபரியந்தோ’’தி. அனந்தஸஞ்ஞீ ஹோதி. யங் ப²ரதி தங் வத்து² சேவ லோகோ ச; யேன ப²ரதி ஸோ அத்தா சேவ லோகோ சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘அனந்தவா லோகோ’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ.
[Gha] ‘‘anantavā loko’’ti – antaggāhikāya diṭṭhiyā katamehi pañcahākārehi abhiniveso hoti? Idhekacco vipulaṃ okāsaṃ nīlakato pharati. Tassa evaṃ hoti – ‘‘anantavā ayaṃ loko apariyanto’’ti. Anantasaññī hoti. Yaṃ pharati taṃ vatthu ceva loko ca; yena pharati so attā ceva loko cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘anantavā loko’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
இதே⁴கச்சோ விபுலங் ஓகாஸங் பீதகதோ ப²ரதி… லோஹிதகதோ ப²ரதி… ஓதா³தகதோ ப²ரதி… ஓபா⁴ஸகதோ ப²ரதி. தஸ்ஸ ஏவங் ஹோதி – ‘‘அனந்தவா அயங் லோகோ அபரியந்தோ’’தி. அனந்தஸஞ்ஞீ ஹோதி. யங் ப²ரதி தங் வத்து² சேவ லோகோ ச; யேன ப²ரதி ஸோ அத்தா சேவ லோகோ சாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே॰… அனந்தவா லோகோதி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Idhekacco vipulaṃ okāsaṃ pītakato pharati… lohitakato pharati… odātakato pharati… obhāsakato pharati. Tassa evaṃ hoti – ‘‘anantavā ayaṃ loko apariyanto’’ti. Anantasaññī hoti. Yaṃ pharati taṃ vatthu ceva loko ca; yena pharati so attā ceva loko cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… anantavā lokoti – antaggāhikāya diṭṭhiyā imehi pañcahākārehi abhiniveso hoti.
[ங] ‘‘தங் ஜீவங் தங் ஸரீர’’ந்தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபங் ஜீவஞ்சேவ ஸரீரஞ்ச; யங் ஜீவங் தங் ஸரீரங், யங் ஸரீரங் தங் ஜீவந்தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘தங் ஜீவங் தங் ஸரீர’’ந்தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ.
[Ṅa] ‘‘taṃ jīvaṃ taṃ sarīra’’nti – antaggāhikāya diṭṭhiyā katamehi pañcahākārehi abhiniveso hoti? Rūpaṃ jīvañceva sarīrañca; yaṃ jīvaṃ taṃ sarīraṃ, yaṃ sarīraṃ taṃ jīvanti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘taṃ jīvaṃ taṃ sarīra’’nti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
வேத³னா ஜீவா சேவ ஸரீரங் ச… ஸஞ்ஞா ஜீவா சேவ ஸரீரங் ச… ஸங்கா²ரா ஜீவா சேவ ஸரீரங் ச… விஞ்ஞாணங் ஜீவஞ்சேவ ஸரீரஞ்ச; யங் ஜீவங் தங் ஸரீரங், யங் ஸரீரங் தங் ஜீவந்தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே॰… ‘‘தங் ஜீவங் தங் ஸரீர’’ந்தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Vedanā jīvā ceva sarīraṃ ca… saññā jīvā ceva sarīraṃ ca… saṅkhārā jīvā ceva sarīraṃ ca… viññāṇaṃ jīvañceva sarīrañca; yaṃ jīvaṃ taṃ sarīraṃ, yaṃ sarīraṃ taṃ jīvanti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ‘‘taṃ jīvaṃ taṃ sarīra’’nti – antaggāhikāya diṭṭhiyā imehi pañcahākārehi abhiniveso hoti.
[ச] ‘‘அஞ்ஞங் ஜீவங் அஞ்ஞங் ஸரீர’’ந்தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபங் ஸரீரங், ந ஜீவங்; ஜீவங் ந ஸரீரங். அஞ்ஞங் ஜீவங் அஞ்ஞங் ஸரீரந்தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘அஞ்ஞங் ஜீவங் அஞ்ஞங் ஸரீர’’ந்தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ.
[Ca] ‘‘aññaṃ jīvaṃ aññaṃ sarīra’’nti – antaggāhikāya diṭṭhiyā katamehi pañcahākārehi abhiniveso hoti? Rūpaṃ sarīraṃ, na jīvaṃ; jīvaṃ na sarīraṃ. Aññaṃ jīvaṃ aññaṃ sarīranti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘aññaṃ jīvaṃ aññaṃ sarīra’’nti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
வேத³னா ஸரீரங், ந ஜீவங்… ஸஞ்ஞா ஸரீரங், ந ஜீவங்… ஸங்கா²ரா ஸரீரங், ந ஜீவங்… விஞ்ஞாணங் ஸரீரங், ந ஜீவங்; ஜீவங் ந ஸரீரங். அஞ்ஞங் ஜீவங், அஞ்ஞங் ஸரீரந்தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே॰… அஞ்ஞங் ஜீவங், அஞ்ஞங் ஸரீரந்தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Vedanā sarīraṃ, na jīvaṃ… saññā sarīraṃ, na jīvaṃ… saṅkhārā sarīraṃ, na jīvaṃ… viññāṇaṃ sarīraṃ, na jīvaṃ; jīvaṃ na sarīraṃ. Aññaṃ jīvaṃ, aññaṃ sarīranti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… aññaṃ jīvaṃ, aññaṃ sarīranti – antaggāhikāya diṭṭhiyā imehi pañcahākārehi abhiniveso hoti.
[ச²] ‘‘ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபங் இதே⁴வ மரணத⁴ம்மங். ததா²க³தோ காயஸ்ஸ பே⁴தா³ ஹோதிபி திட்ட²திபி உப்பஜ்ஜதிபி நிப்³ப³த்ததிபீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘ஹோதி ததா²க³தோ பரங் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ.
[Cha] ‘‘hoti tathāgato paraṃ maraṇā’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ idheva maraṇadhammaṃ. Tathāgato kāyassa bhedā hotipi tiṭṭhatipi uppajjatipi nibbattatipīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
வேத³னா இதே⁴வ மரணத⁴ம்மா…பே॰… ஸஞ்ஞா இதே⁴வ மரணத⁴ம்மா… ஸங்கா²ரா இதே⁴வ மரணத⁴ம்மா… விஞ்ஞாணங் இதே⁴வ மரணத⁴ம்மங். ததா²க³தோ காயஸ்ஸ பே⁴தா³ ஹோதிபி திட்ட²திபி உப்பஜ்ஜதிபி நிப்³ப³த்ததிபீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே॰… ‘‘ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Vedanā idheva maraṇadhammā…pe… saññā idheva maraṇadhammā… saṅkhārā idheva maraṇadhammā… viññāṇaṃ idheva maraṇadhammaṃ. Tathāgato kāyassa bhedā hotipi tiṭṭhatipi uppajjatipi nibbattatipīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ‘‘hoti tathāgato paraṃ maraṇā’’ti – antaggāhikāya diṭṭhiyā imehi pañcahākārehi abhiniveso hoti.
[ஜ] ‘‘ந ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபங் இதே⁴வ மரணத⁴ம்மங். ததா²க³தோபி காயஸ்ஸ பே⁴தா³ உச்சி²ஜ்ஜதி வினஸ்ஸதி; ந ஹோதி ததா²க³தோ பரங் மரணாதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘ந ஹோதி ததா²க³தோ பரங் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ.
[Ja] ‘‘na hoti tathāgato paraṃ maraṇā’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ idheva maraṇadhammaṃ. Tathāgatopi kāyassa bhedā ucchijjati vinassati; na hoti tathāgato paraṃ maraṇāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘na hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
வேத³னா இதே⁴வ மரணத⁴ம்மா…பே॰… ஸஞ்ஞா இதே⁴வ மரணத⁴ம்மா… ஸங்கா²ரா இதே⁴வ மரணத⁴ம்மா… விஞ்ஞாணங் இதே⁴வ மரணத⁴ம்மங். ததா²க³தோபி காயஸ்ஸ பே⁴தா³ உச்சி²ஜ்ஜதி வினஸ்ஸதி. ‘‘ந ஹோதி ததா²க³தோ பரங் மரணா’’தி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே॰… ‘‘ந ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Vedanā idheva maraṇadhammā…pe… saññā idheva maraṇadhammā… saṅkhārā idheva maraṇadhammā… viññāṇaṃ idheva maraṇadhammaṃ. Tathāgatopi kāyassa bhedā ucchijjati vinassati. ‘‘Na hoti tathāgato paraṃ maraṇā’’ti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ‘‘na hoti tathāgato paraṃ maraṇā’’ti – antaggāhikāya diṭṭhiyā imehi pañcahākārehi abhiniveso hoti.
[ஜ²] ‘‘ஹோதி ச ந ச ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபங் இதே⁴வ மரணத⁴ம்மங். ததா²க³தோ காயஸ்ஸ பே⁴தா³ ஹோதி ச ந ச ஹோதீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘ஹோதி ச ந ச ஹோதி ததா²க³தோ பரங் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி ந ச தி³ட்டி²யோ.
[Jha] ‘‘hoti ca na ca hoti tathāgato paraṃ maraṇā’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ idheva maraṇadhammaṃ. Tathāgato kāyassa bhedā hoti ca na ca hotīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘hoti ca na ca hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni na ca diṭṭhiyo.
வேத³னா இதே⁴வ மரணத⁴ம்மா…பே॰… ஸஞ்ஞா இதே⁴வ மரணத⁴ம்மா… ஸங்கா²ரா இதே⁴வ மரணத⁴ம்மா… விஞ்ஞாணங் இதே⁴வ மரணத⁴ம்மங். ததா²க³தோ காயஸ்ஸ பே⁴தா³ ஹோதி ச ந ச ஹோதீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி²…பே॰… ‘‘ஹோதி ச ந ச ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி.
Vedanā idheva maraṇadhammā…pe… saññā idheva maraṇadhammā… saṅkhārā idheva maraṇadhammā… viññāṇaṃ idheva maraṇadhammaṃ. Tathāgato kāyassa bhedā hoti ca na ca hotīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ‘‘hoti ca na ca hoti tathāgato paraṃ maraṇā’’ti – antaggāhikāya diṭṭhiyā imehi pañcahākārehi abhiniveso hoti.
[ஞ] ‘‘நேவ ஹோதி ந ந ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா கதமேஹி பஞ்சஹாகாரேஹி அபி⁴னிவேஸோ ஹோதி? ரூபங் இதே⁴வ மரணத⁴ம்மங். ததா²க³தோ காயஸ்ஸ பே⁴தா³ பரங் மரணா நேவ ஹோதி ந ந ஹோதீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி², அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ‘‘நேவ ஹோதி ந ந ஹோதி ததா²க³தோ பரங் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ.
[Ña] ‘‘neva hoti na na hoti tathāgato paraṃ maraṇā’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ idheva maraṇadhammaṃ. Tathāgato kāyassa bhedā paraṃ maraṇā neva hoti na na hotīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi, aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘neva hoti na na hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
வேத³னா இதே⁴வ மரணத⁴ம்மா…பே॰… ஸஞ்ஞா இதே⁴வ மரணத⁴ம்மா… ஸங்கா²ரா இதே⁴வ மரணத⁴ம்மா… விஞ்ஞாணங் இதே⁴வ மரணத⁴ம்மங். ததா²க³தோ காயஸ்ஸ பே⁴தா³ பரங் மரணா நேவ ஹோதி ந ந ஹோதீதி – அபி⁴னிவேஸபராமாஸோ தி³ட்டி². தாய தி³ட்டி²யா ஸோ அந்தோ க³ஹிதோதி – அந்தக்³கா³ஹிகா தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பஞ்சமீ ‘‘நேவ ஹோதி ந ந ஹோதி ததா²க³தோ பரங் மரணா’’தி – அந்தக்³கா³ஹிகா தி³ட்டி². அந்தக்³கா³ஹிகா தி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ‘‘நேவ ஹோதி ந ந ஹோதி ததா²க³தோ பரங் மரணா’’தி – அந்தக்³கா³ஹிகாய தி³ட்டி²யா இமேஹி பஞ்சஹாகாரேஹி அபி⁴னிவேஸோ ஹோதி. அந்தக்³கா³ஹிகாய தி³ட்டி²யா இமேஹி பஞ்ஞாஸாய ஆகாரேஹி அபி⁴னிவேஸோ ஹோதி.
Vedanā idheva maraṇadhammā…pe… saññā idheva maraṇadhammā… saṅkhārā idheva maraṇadhammā… viññāṇaṃ idheva maraṇadhammaṃ. Tathāgato kāyassa bhedā paraṃ maraṇā neva hoti na na hotīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ pañcamī ‘‘neva hoti na na hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo. ‘‘Neva hoti na na hoti tathāgato paraṃ maraṇā’’ti – antaggāhikāya diṭṭhiyā imehi pañcahākārehi abhiniveso hoti. Antaggāhikāya diṭṭhiyā imehi paññāsāya ākārehi abhiniveso hoti.
அந்தக்³கா³ஹிகாதி³ட்டி²னித்³தே³ஸோ ஸத்தமோ.
Antaggāhikādiṭṭhiniddeso sattamo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 7. அந்தக்³கா³ஹிகாதி³ட்டி²னித்³தே³ஸவண்ணனா • 7. Antaggāhikādiṭṭhiniddesavaṇṇanā
