| Library / Tipiṭaka / तिपिटक • Tipiṭaka / चूळवग्गपाळि • Cūḷavaggapāḷi |
१४. अन्तेवासिकवत्तकथा
14. Antevāsikavattakathā
३८१. तेन खो पन समयेन आचरिया अन्तेवासिकेसु न सम्मा वत्तन्ति। ये ते भिक्खू अप्पिच्छा…पे॰… ते उज्झायन्ति खिय्यन्ति विपाचेन्ति – ‘‘कथञ्हि नाम आचरिया अन्तेवासिकेसु न सम्मा वत्तिस्सन्ती’’ति! अथ खो ते भिक्खू भगवतो एतमत्थं आरोचेसुं। अथ खो भगवा एतस्मिं निदाने एतस्मिं पकरणे भिक्खुसङ्घं सन्निपातापेत्वा भिक्खू पटिपुच्छि – ‘‘सच्चं किर, भिक्खवे, आचरिया अन्तेवासिकेसु न सम्मा वत्तन्ती’’ति? ‘‘सच्चं भगवा’’ति…पे॰… विगरहित्वा…पे॰… धम्मिं कथं कत्वा भिक्खू आमन्तेसि –
381. Tena kho pana samayena ācariyā antevāsikesu na sammā vattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma ācariyā antevāsikesu na sammā vattissantī’’ti! Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, ācariyā antevāsikesu na sammā vattantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
३८२. ‘‘तेन हि, भिक्खवे, आचरियानं अन्तेवासिकेसु वत्तं पञ्ञपेस्सामि यथा आचरियेहि अन्तेवासिकेसु सम्मा वत्तितब्बं। 1 आचरियेन, भिक्खवे, अन्तेवासिकम्हि सम्मा वत्तितब्बं। तत्रायं सम्मावत्तना –
382. ‘‘Tena hi, bhikkhave, ācariyānaṃ antevāsikesu vattaṃ paññapessāmi yathā ācariyehi antevāsikesu sammā vattitabbaṃ. 2 Ācariyena, bhikkhave, antevāsikamhi sammā vattitabbaṃ. Tatrāyaṃ sammāvattanā –
‘‘आचरियेन, भिक्खवे, अन्तेवासिको सङ्गहेतब्बो अनुग्गहेतब्बो उद्देसेन परिपुच्छाय ओवादेन अनुसासनिया। सचे आचरियस्स पत्तो होति, अन्तेवासिकस्स पत्तो न होति, आचरियेन अन्तेवासिकस्स पत्तो दातब्बो, उस्सुक्कं वा कातब्बं – किन्ति नु खो अन्तेवासिकस्स पत्तो उप्पज्जियेथाति। सचे आचरियस्स चीवरं होति, अन्तेवासिकस्स चीवरं न होति, आचरियेन अन्तेवासिकस्स चीवरं दातब्बं, उस्सुक्कं वा कातब्बं – किन्ति नु खो अन्तेवासिकस्स चीवरं उप्पज्जियेथाति। सचे आचरियस्स परिक्खारो होति, अन्तेवासिकस्स परिक्खारो न होति, आचरियेन अन्तेवासिकस्स परिक्खारो दातब्बो, उस्सुक्कं वा कातब्बं – किन्ति नु खो अन्तेवासिकस्स परिक्खारो उप्पज्जियेथाति।
‘‘Ācariyena, bhikkhave, antevāsiko saṅgahetabbo anuggahetabbo uddesena paripucchāya ovādena anusāsaniyā. Sace ācariyassa patto hoti, antevāsikassa patto na hoti, ācariyena antevāsikassa patto dātabbo, ussukkaṃ vā kātabbaṃ – kinti nu kho antevāsikassa patto uppajjiyethāti. Sace ācariyassa cīvaraṃ hoti, antevāsikassa cīvaraṃ na hoti, ācariyena antevāsikassa cīvaraṃ dātabbaṃ, ussukkaṃ vā kātabbaṃ – kinti nu kho antevāsikassa cīvaraṃ uppajjiyethāti. Sace ācariyassa parikkhāro hoti, antevāsikassa parikkhāro na hoti, ācariyena antevāsikassa parikkhāro dātabbo, ussukkaṃ vā kātabbaṃ – kinti nu kho antevāsikassa parikkhāro uppajjiyethāti.
‘‘सचे अन्तेवासिको गिलानो होति, कालस्सेव उट्ठाय दन्तकट्ठं दातब्बं, मुखोदकं दातब्बं, आसनं पञ्ञपेतब्बं। सचे यागु होति , भाजनं धोवित्वा यागु उपनामेतब्बा। यागुं पीतस्स उदकं दत्वा भाजनं पटिग्गहेत्वा नीचं कत्वा साधुकं अप्पटिघंसन्तेन धोवित्वा पटिसामेतब्बं । अन्तेवासिकम्हि वुट्ठिते आसनं उद्धरितब्बं। सचे सो देसो उक्लापो होति, सो देसो सम्मज्जितब्बो।
‘‘Sace antevāsiko gilāno hoti, kālasseva uṭṭhāya dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti , bhājanaṃ dhovitvā yāgu upanāmetabbā. Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ . Antevāsikamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.
‘‘सचे अन्तेवासिको गामं पविसितुकामो होति, निवासनं दातब्बं, पटिनिवासनं पटिग्गहेतब्बं, कायबन्धनं दातब्बं, सगुणं कत्वा सङ्घाटियो दातब्बा, धोवित्वा पत्तो सोदको दातब्बो।
‘‘Sace antevāsiko gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ, kāyabandhanaṃ dātabbaṃ, saguṇaṃ katvā saṅghāṭiyo dātabbā, dhovitvā patto sodako dātabbo.
‘‘एत्तावता निवत्तिस्सतीति आसनं पञ्ञपेतब्बं, पादोदकं पादपीठं पादकथलिकं उपनिक्खिपितब्बं, पच्चुग्गन्त्वा पत्तचीवरं पटिग्गहेतब्बं, पटिनिवासनं दातब्बं, निवासनं पटिग्गहेतब्बं। सचे चीवरं सिन्नं होति, मुहुत्तं उण्हे ओतापेतब्बं, न च उण्हे चीवरं निदहितब्बं। चीवरं सङ्घरितब्बं। चीवरं सङ्घरन्तेन चतुरङ्गुलं कण्णं उस्सारेत्वा चीवरं सङ्घरितब्बं – मा मज्झे भङ्गो अहोसीति। ओभोगे कायबन्धनं कातब्बं।
‘‘Ettāvatā nivattissatīti āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ – mā majjhe bhaṅgo ahosīti. Obhoge kāyabandhanaṃ kātabbaṃ.
‘‘सचे पिण्डपातो होति, अन्तेवासिको च भुञ्जितुकामो होति, उदकं दत्वा पिण्डपातो उपनामेतब्बो। अन्तेवासिको पानीयेन पुच्छितब्बो। भुत्ताविस्स उदकं दत्वा पत्तं पटिग्गहेत्वा नीचं कत्वा साधुकं अप्पटिघंसन्तेन धोवित्वा वोदकं कत्वा मुहुत्तं उण्हे ओतापेतब्बो, न च उण्हे पत्तो निदहितब्बो। पत्तचीवरं निक्खिपितब्बं। पत्तं निक्खिपन्तेन…पे॰… चीवरं निक्खिपन्तेन…पे॰… पारतो अन्तं ओरतो भोगं कत्वा चीवरं निक्खिपितब्बं। अन्तेवासिकम्हि उट्ठिते आसनं उद्धरितब्बं, पादोदकं पादपीठं पादकथलिकं पटिसामेतब्बं। सचे सो देसो उक्लापो होति, सो देसो सम्मज्जितब्बो।
‘‘Sace piṇḍapāto hoti, antevāsiko ca bhuñjitukāmo hoti, udakaṃ datvā piṇḍapāto upanāmetabbo. Antevāsiko pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena…pe… cīvaraṃ nikkhipantena…pe… pārato antaṃ orato bhogaṃ katvā cīvaraṃ nikkhipitabbaṃ. Antevāsikamhi uṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo.
‘‘सचे अन्तेवासिको नहायितुकामो होति, नहानं पटियादेतब्बं। सचे सीतेन अत्थो होति, सीतं पटियादेतब्बं। सचे उण्हेन अत्थो होति, उण्हं पटियादेतब्बं।
‘‘Sace antevāsiko nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
‘‘सचे अन्तेवासिको जन्ताघरं पविसितुकामो होति, चुण्णं सन्नेतब्बं, मत्तिका तेमेतब्बा, जन्ताघरपीठं आदाय 3 गन्त्वा जन्ताघरपीठं दत्वा चीवरं पटिग्गहेत्वा एकमन्तं निक्खिपितब्बं, चुण्णं दातब्बं, मत्तिका दातब्बा। सचे उस्सहति जन्ताघरं पविसितब्बं। जन्ताघरं पविसन्तेन मत्तिकाय मुखं मक्खेत्वा पुरतो च पच्छतो च पटिच्छादेत्वा जन्ताघरं पविसितब्बं। न थेरे भिक्खू अनुपखज्ज निसीदितब्बं। न नवा भिक्खू आसनेन पटिबाहितब्बा । जन्ताघरे अन्तेवासिकस्स परिकम्मं कातब्बं। जन्ताघरा निक्खमन्तेन जन्ताघरपीठं आदाय पुरतो च पच्छतो च पटिच्छादेत्वा जन्ताघरा निक्खमितब्बं।
‘‘Sace antevāsiko jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya 4 gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā . Jantāghare antevāsikassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
‘‘उदकेपि अन्तेवासिकस्स परिकम्मं कातब्बं। नहातेन पठमतरं उत्तरित्वा अत्तनो गत्तं वोदकं कत्वा निवासेत्वा अन्तेवासिकस्स गत्ततो उदकं पमज्जितब्बं, निवासनं दातब्बं, सङ्घाटि दातब्बा, जन्ताघरपीठं आदाय पठमतरं आगन्त्वा आसनं पञ्ञपेतब्बं, पादोदकं पादपीठं पादकथलिकं उपनिक्खिपितब्बं, अन्तेवासिको पानीयेन पुच्छितब्बो।
‘‘Udakepi antevāsikassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā antevāsikassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, antevāsiko pānīyena pucchitabbo.
‘‘यस्मिं विहारे अन्तेवासिको विहरति, सचे सो विहारो उक्लापो होति, सचे उस्सहति, सोधेतब्बो। विहारं सोधेन्तेन पठमं पत्तचीवरं नीहरित्वा एकमन्तं निक्खिपितब्बं…पे॰… आचमनकुम्भिया उदकं न होति, आचमनकुम्भिया उदकं आसिञ्चितब्बं।
‘‘Yasmiṃ vihāre antevāsiko viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ…pe… ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘सचे अन्तेवासिकस्स अनभिरति उप्पन्ना होति, आचरियेन वूपकासेतब्बो, वूपकासापेतब्बो, धम्मकथा वास्स कातब्बा। सचे अन्तेवासिकस्स कुक्कुच्चं उप्पन्नं होति, आचरियेन विनोदेतब्बं, विनोदापेतब्बं, धम्मकथा वास्स कातब्बा। सचे अन्तेवासिकस्स दिट्ठिगतं उप्पन्नं होति, आचरियेन विवेचेतब्बं, विवेचापेतब्बं, धम्मकथा वास्स कातब्बा। सचे अन्तेवासिको गरुधम्मं अज्झापन्नो होति, परिवासारहो, आचरियेन उस्सुक्कं कातब्बं – किन्ति नु खो सङ्घो अन्तेवासिकस्स परिवासं ददेय्याति। सचे अन्तेवासिको मूलायपटिकस्सनारहो होति, आचरियेन उस्सुक्कं कातब्बं – किन्ति नु खो सङ्घो अन्तेवासिकं मूलाय पटिकस्सेय्याति। सचे अन्तेवासिको मानत्तारहो होति, आचरियेन उस्सुक्कं कातब्बं – किन्ति नु खो सङ्घो अन्तेवासिकस्स मानत्तं ददेय्याति। सचे अन्तेवासिको अब्भानारहो होति, आचरियेन उस्सुक्कं कातब्बं – किन्ति नु खो सङ्घो अन्तेवासिकं अब्भेय्याति। सचे सङ्घो अन्तेवासिकस्स कम्मं कत्तुकामो होति, तज्जनीयं वा नियस्सं वा पब्बाजनीयं वा पटिसारणीयं वा उक्खेपनीयं वा, आचरियेन उस्सुक्कं कातब्बं – किन्ति नु खो सङ्घो अन्तेवासिकस्स कम्मं न करेय्य , लहुकाय वा परिणामेय्याति। कतं वा पनस्स होति, सङ्घेन कम्मं, तज्जनीयं वा नियस्सं वा पब्बाजनीयं वा पटिसारणीयं वा उक्खेपनीयं वा, आचरियेन उस्सुक्कं कातब्बं – किन्ति नु खो अन्तेवासिको सम्मा वत्तेय्य, लोमं पातेय्य, नेत्थारं वत्तेय्य, सङ्घो तं कम्मं पटिप्पस्सम्भेय्याति।
‘‘Sace antevāsikassa anabhirati uppannā hoti, ācariyena vūpakāsetabbo, vūpakāsāpetabbo, dhammakathā vāssa kātabbā. Sace antevāsikassa kukkuccaṃ uppannaṃ hoti, ācariyena vinodetabbaṃ, vinodāpetabbaṃ, dhammakathā vāssa kātabbā. Sace antevāsikassa diṭṭhigataṃ uppannaṃ hoti, ācariyena vivecetabbaṃ, vivecāpetabbaṃ, dhammakathā vāssa kātabbā. Sace antevāsiko garudhammaṃ ajjhāpanno hoti, parivāsāraho, ācariyena ussukkaṃ kātabbaṃ – kinti nu kho saṅgho antevāsikassa parivāsaṃ dadeyyāti. Sace antevāsiko mūlāyapaṭikassanāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ mūlāya paṭikasseyyāti. Sace antevāsiko mānattāraho hoti, ācariyena ussukkaṃ kātabbaṃ – kinti nu kho saṅgho antevāsikassa mānattaṃ dadeyyāti. Sace antevāsiko abbhānāraho hoti, ācariyena ussukkaṃ kātabbaṃ – kinti nu kho saṅgho antevāsikaṃ abbheyyāti. Sace saṅgho antevāsikassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho saṅgho antevāsikassa kammaṃ na kareyya , lahukāya vā pariṇāmeyyāti. Kataṃ vā panassa hoti, saṅghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, ācariyena ussukkaṃ kātabbaṃ – kinti nu kho antevāsiko sammā vatteyya, lomaṃ pāteyya, netthāraṃ vatteyya, saṅgho taṃ kammaṃ paṭippassambheyyāti.
‘‘सचे अन्तेवासिकस्स चीवरं धोवितब्बं होति, आचरियेन आचिक्खितब्बं – एवं धोवेय्यासीति, उस्सुक्कं वा कातब्बं – किन्ति नु खो अन्तेवासिकस्स चीवरं धोवियेथाति। सचे अन्तेवासिकस्स चीवरं कातब्बं होति, आचरियेन आचिक्खितब्बं – एवं करेय्यासीति, उस्सुक्कं वा कातब्बं – किन्ति नु खो अन्तेवासिकस्स चीवरं करियेथाति। सचे अन्तेवासिकस्स रजनं पचितब्बं होति, आचरियेन आचिक्खितब्बं – एवं पचेय्यासीति, उस्सुक्कं वा कातब्बं – किन्ति नु खो अन्तेवासिकस्स रजनं पचियेथाति। सचे अन्तेवासिकस्स चीवरं रजितब्बं होति, आचरियेन आचिक्खितब्बं – एवं रजेय्यासीति, उस्सुक्कं वा कातब्बं – किन्ति नु खो अन्तेवासिकस्स चीवरं रजियेथाति। चीवरं रजन्तेन साधुकं सम्परिवत्तकं सम्परिवत्तकं रजितब्बं। न च अच्छिन्ने थेवे पक्कमितब्बं। सचे अन्तेवासिको गिलानो होति, यावजीवं उपट्ठातब्बो, वुट्ठानमस्स आगमेतब्बं। इदं खो, भिक्खवे, आचरियानं अन्तेवासिकेसु वत्तं यथा आचरियेहि अन्तेवासिकेसु सम्मा वत्तितब्ब’’न्ति।
‘‘Sace antevāsikassa cīvaraṃ dhovitabbaṃ hoti, ācariyena ācikkhitabbaṃ – evaṃ dhoveyyāsīti, ussukkaṃ vā kātabbaṃ – kinti nu kho antevāsikassa cīvaraṃ dhoviyethāti. Sace antevāsikassa cīvaraṃ kātabbaṃ hoti, ācariyena ācikkhitabbaṃ – evaṃ kareyyāsīti, ussukkaṃ vā kātabbaṃ – kinti nu kho antevāsikassa cīvaraṃ kariyethāti. Sace antevāsikassa rajanaṃ pacitabbaṃ hoti, ācariyena ācikkhitabbaṃ – evaṃ paceyyāsīti, ussukkaṃ vā kātabbaṃ – kinti nu kho antevāsikassa rajanaṃ paciyethāti. Sace antevāsikassa cīvaraṃ rajitabbaṃ hoti, ācariyena ācikkhitabbaṃ – evaṃ rajeyyāsīti, ussukkaṃ vā kātabbaṃ – kinti nu kho antevāsikassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ. Na ca acchinne theve pakkamitabbaṃ. Sace antevāsiko gilāno hoti, yāvajīvaṃ upaṭṭhātabbo, vuṭṭhānamassa āgametabbaṃ. Idaṃ kho, bhikkhave, ācariyānaṃ antevāsikesu vattaṃ yathā ācariyehi antevāsikesu sammā vattitabba’’nti.
वत्तक्खन्धको अट्ठमो।
Vattakkhandhako aṭṭhamo.
इमम्हि खन्धके वत्थू एकूनवीसति, वत्ता चुद्दस।
Imamhi khandhake vatthū ekūnavīsati, vattā cuddasa.
तस्सुद्दानं –
Tassuddānaṃ –
सउपाहना छत्ता च, ओगुण्ठि सीसं पानीयं।
Saupāhanā chattā ca, oguṇṭhi sīsaṃ pānīyaṃ;
नाभिवादे न पुच्छन्ति, अहि उज्झन्ति पेसला॥
Nābhivāde na pucchanti, ahi ujjhanti pesalā.
ओमुञ्चि छत्तं खन्धे च, अतरञ्च पटिक्कमं।
Omuñci chattaṃ khandhe ca, atarañca paṭikkamaṃ;
पत्तचीवरं निक्खिपा, पतिरूपञ्च पुच्छिता॥
Pattacīvaraṃ nikkhipā, patirūpañca pucchitā.
आसिञ्चेय्य धोवितेन, सुक्खेनल्लेनुपाहना।
Āsiñceyya dhovitena, sukkhenallenupāhanā;
वुड्ढो नवको पुच्छेय्य, अज्झावुट्ठञ्च गोचरा॥
Vuḍḍho navako puccheyya, ajjhāvuṭṭhañca gocarā.
सेक्खा वच्चा पानी परि, कत्तरं कतिकं ततो।
Sekkhā vaccā pānī pari, kattaraṃ katikaṃ tato;
कालं मुहुत्तं उक्लापो, भूमत्थरणं नीहरे॥
Kālaṃ muhuttaṃ uklāpo, bhūmattharaṇaṃ nīhare.
पटिपादो भिसिबिब्बो, मञ्चपीठञ्च मल्लकं।
Paṭipādo bhisibibbo, mañcapīṭhañca mallakaṃ;
अपस्सेनुल्लोककण्णा, गेरुका काळ अकता॥
Apassenullokakaṇṇā, gerukā kāḷa akatā.
सङ्कारञ्च भूमत्थरणं, पटिपादकं मञ्चपीठं।
Saṅkārañca bhūmattharaṇaṃ, paṭipādakaṃ mañcapīṭhaṃ;
भिसि निसीदनम्पि, मल्लकं अपस्सेन च॥
Bhisi nisīdanampi, mallakaṃ apassena ca.
पत्तचीवरं भूमि च, पारन्तं ओरतो भोगं।
Pattacīvaraṃ bhūmi ca, pārantaṃ orato bhogaṃ;
पुरत्थिमा पच्छिमा च, उत्तरा अथ दक्खिणा॥
Puratthimā pacchimā ca, uttarā atha dakkhiṇā.
सीतुण्हे च दिवारत्तिं, परिवेणञ्च कोट्ठको।
Sītuṇhe ca divārattiṃ, pariveṇañca koṭṭhako;
उपट्ठानग्गि साला च, वत्तं वच्चकुटीसु च॥
Upaṭṭhānaggi sālā ca, vattaṃ vaccakuṭīsu ca.
पानी परिभोजनिया, कुम्भि आचमनेसु च।
Pānī paribhojaniyā, kumbhi ācamanesu ca;
नेवासनं न उदकं, न पच्चु न च पानियं।
Nevāsanaṃ na udakaṃ, na paccu na ca pāniyaṃ;
नाभिवादे नपञ्ञपे, उज्झायन्ति च पेसला॥
Nābhivāde napaññape, ujjhāyanti ca pesalā.
वुड्ढासनञ्च उदकं, पच्चुग्गन्त्वा च पानियं।
Vuḍḍhāsanañca udakaṃ, paccuggantvā ca pāniyaṃ;
उपाहने एकमन्तं, अभिवादे च पञ्ञपे॥
Upāhane ekamantaṃ, abhivāde ca paññape.
वुत्थं गोचरसेक्खो च, ठानं पानियभोजनं।
Vutthaṃ gocarasekkho ca, ṭhānaṃ pāniyabhojanaṃ;
कत्तरं कतिकं कालं, नवकस्स निसिन्नके॥
Kattaraṃ katikaṃ kālaṃ, navakassa nisinnake.
अभिवादये आचिक्खे, यथा हेट्ठा तथा नये।
Abhivādaye ācikkhe, yathā heṭṭhā tathā naye;
निद्दिट्ठं सत्थवाहेन वत्तं आवासिकेहिमे॥
Niddiṭṭhaṃ satthavāhena vattaṃ āvāsikehime.
गमिका दारुमत्ति च, विवरित्वा न पुच्छिय।
Gamikā dārumatti ca, vivaritvā na pucchiya;
नस्सन्ति च अगुत्तञ्च, उज्झायन्ति च पेसला॥
Nassanti ca aguttañca, ujjhāyanti ca pesalā.
पटिसामेत्वा थकेत्वा, आपुच्छित्वाव पक्कमे।
Paṭisāmetvā thaketvā, āpucchitvāva pakkame;
भिक्खु वा सामणेरो वा, आरामिको उपासको॥
Bhikkhu vā sāmaṇero vā, ārāmiko upāsako.
पासाणकेसु च पुञ्जं, पटिसामे थकेय्य च।
Pāsāṇakesu ca puñjaṃ, paṭisāme thakeyya ca;
सचे उस्सहति उस्सुक्कं, अनोवस्से तथेव च॥
Sace ussahati ussukkaṃ, anovasse tatheva ca.
सब्बो ओवस्सति गामं, अज्झोकासे तथेव च।
Sabbo ovassati gāmaṃ, ajjhokāse tatheva ca;
अप्पेवङ्गानि सेसेय्युं, वत्तं गमिकभिक्खुना॥
Appevaṅgāni seseyyuṃ, vattaṃ gamikabhikkhunā.
नानुमोदन्ति थेरेन, ओहाय चतुपञ्चहि।
Nānumodanti therena, ohāya catupañcahi;
वच्चितो मुच्छितो आसि, वत्तानुमोदनेसुमे॥
Vaccito mucchito āsi, vattānumodanesume.
छब्बग्गिया दुन्निवत्था, अथोपि च दुप्पारुता।
Chabbaggiyā dunnivatthā, athopi ca duppārutā;
अनाकप्पा च वोक्कम्म, थेरे अनुपखज्जने॥
Anākappā ca vokkamma, there anupakhajjane.
नवे भिक्खू च सङ्घाटि, उज्झायन्ति च पेसला।
Nave bhikkhū ca saṅghāṭi, ujjhāyanti ca pesalā;
तिमण्डलं निवासेत्वा, कायसगुणगण्ठिका॥
Timaṇḍalaṃ nivāsetvā, kāyasaguṇagaṇṭhikā.
न वोक्कम्म पटिच्छन्नं, सुसंवुतोक्खित्तचक्खु।
Na vokkamma paṭicchannaṃ, susaṃvutokkhittacakkhu;
उक्खित्तोज्जग्घिकासद्दो, तयो चेव पचालना॥
Ukkhittojjagghikāsaddo, tayo ceva pacālanā.
खम्भोगुण्ठिउक्कुटिका, पटिच्छन्नं सुसंवुतो।
Khambhoguṇṭhiukkuṭikā, paṭicchannaṃ susaṃvuto;
ओक्खित्तुक्खित्तउज्जग्घि, अप्पसद्दो तयो चला॥
Okkhittukkhittaujjagghi, appasaddo tayo calā.
खम्भोगुण्ठिपल्लत्थि च, अनुपखज्ज नासने।
Khambhoguṇṭhipallatthi ca, anupakhajja nāsane;
ओत्थरित्वान उदके, नीचं कत्वान सिञ्चिया॥
Ottharitvāna udake, nīcaṃ katvāna siñciyā.
पटि सामन्ता सङ्घाटि, ओदने च पटिग्गहे।
Paṭi sāmantā saṅghāṭi, odane ca paṭiggahe;
सूपं उत्तरिभङ्गेन, सब्बेसं समतित्थि च॥
Sūpaṃ uttaribhaṅgena, sabbesaṃ samatitthi ca.
सक्कच्चं पत्तसञ्ञी च, सपदानञ्च सूपकं।
Sakkaccaṃ pattasaññī ca, sapadānañca sūpakaṃ;
न थूपतो पटिच्छादे, विञ्ञत्तुज्झानसञ्ञिना॥
Na thūpato paṭicchāde, viññattujjhānasaññinā.
महन्तमण्डलद्वारं, सब्बहत्थो न ब्याहरे।
Mahantamaṇḍaladvāraṃ, sabbahattho na byāhare;
उक्खेपो छेदनागण्ड, धुनं सित्थावकारकं॥
Ukkhepo chedanāgaṇḍa, dhunaṃ sitthāvakārakaṃ.
जिव्हानिच्छारकञ्चेव, चपुचपु सुरुसुरु।
Jivhānicchārakañceva, capucapu surusuru;
हत्थपत्तोट्ठनिल्लेहं, सामिसेन पटिग्गहे॥
Hatthapattoṭṭhanillehaṃ, sāmisena paṭiggahe.
याव न सब्बे उदके, नीचं कत्वान सिञ्चियं।
Yāva na sabbe udake, nīcaṃ katvāna siñciyaṃ;
पटि सामन्ता सङ्घाटि, नीचं कत्वा छमाय च॥
Paṭi sāmantā saṅghāṭi, nīcaṃ katvā chamāya ca.
ससित्थकं निवत्तन्ते, सुप्पटिच्छन्नमुक्कुटि।
Sasitthakaṃ nivattante, suppaṭicchannamukkuṭi;
धम्मराजेन पञ्ञत्तं, इदं भत्तग्गवत्तनं॥
Dhammarājena paññattaṃ, idaṃ bhattaggavattanaṃ.
दुन्निवत्था अनाकप्पा, असल्लेक्खेत्वा च सहसा।
Dunnivatthā anākappā, asallekkhetvā ca sahasā;
दूरे अच्च चिरं लहुं, तथेव पिण्डचारिको॥
Dūre acca ciraṃ lahuṃ, tatheva piṇḍacāriko.
पटिच्छन्नोव गच्छेय्य, सुंसवुतोक्खित्तचक्खु।
Paṭicchannova gaccheyya, suṃsavutokkhittacakkhu;
उक्खित्तोज्जग्घिकासद्दो, तयो चेव पचालना॥
Ukkhittojjagghikāsaddo, tayo ceva pacālanā.
खम्भोगुण्ठिउक्कुटिका, सल्लक्खेत्वा च सहसा।
Khambhoguṇṭhiukkuṭikā, sallakkhetvā ca sahasā;
दूरे अच्च चिरं लहुं, आसनकं कटच्छुका॥
Dūre acca ciraṃ lahuṃ, āsanakaṃ kaṭacchukā.
भाजनं वा ठपेति च, उच्चारेत्वा पणामेत्वा।
Bhājanaṃ vā ṭhapeti ca, uccāretvā paṇāmetvā;
पटिग्गहे न उल्लोके, सूपेसुपि तथेव तं॥
Paṭiggahe na ulloke, sūpesupi tatheva taṃ.
भिक्खु सङ्घाटिया छादे, पटिच्छन्नेव गच्छियं।
Bhikkhu saṅghāṭiyā chāde, paṭicchanneva gacchiyaṃ;
संवुतोक्खित्तचक्खु च, उक्खित्तोज्जग्घिकाय च।
Saṃvutokkhittacakkhu ca, ukkhittojjagghikāya ca;
अप्पसद्दो तयो चाला, खम्भोगुण्ठिकउक्कुटि॥
Appasaddo tayo cālā, khambhoguṇṭhikaukkuṭi.
पठमासनवक्कार , पानियं परिभोजनी।
Paṭhamāsanavakkāra , pāniyaṃ paribhojanī;
पच्छाकङ्खति भुञ्जेय्य, ओपिलापेय्य उद्धरे॥
Pacchākaṅkhati bhuñjeyya, opilāpeyya uddhare.
पटिसामेय्य सम्मज्जे, रित्तं तुच्छं उपट्ठपे।
Paṭisāmeyya sammajje, rittaṃ tucchaṃ upaṭṭhape;
हत्थविकारे भिन्देय्य, वत्तिदं पिण्डचारिके॥
Hatthavikāre bhindeyya, vattidaṃ piṇḍacārike.
पानी परि अग्गिरणि, नक्खत्तदिसचोरा च।
Pānī pari aggiraṇi, nakkhattadisacorā ca;
सब्बं नत्थीति कोट्टेत्वा, पत्तंसे चीवरं ततो॥
Sabbaṃ natthīti koṭṭetvā, pattaṃse cīvaraṃ tato.
इदानि अंसे लग्गेत्वा, तिमण्डलं परिमण्डलं।
Idāni aṃse laggetvā, timaṇḍalaṃ parimaṇḍalaṃ;
यथा पिण्डचारिवत्तं, नये आरञ्ञकेसुपि॥
Yathā piṇḍacārivattaṃ, naye āraññakesupi.
पत्तंसे चीवरं सीसे, आरोहित्वा च पानियं।
Pattaṃse cīvaraṃ sīse, ārohitvā ca pāniyaṃ;
परिभोजनियं अग्गि, अरणी चापि कत्तरं॥
Paribhojaniyaṃ aggi, araṇī cāpi kattaraṃ.
नक्खत्तं सप्पदेसं वा, दिसापि कुसलो भवे।
Nakkhattaṃ sappadesaṃ vā, disāpi kusalo bhave;
सत्तुत्तमेन पञ्ञत्तं, वत्तं आरञ्ञकेसुमे॥
Sattuttamena paññattaṃ, vattaṃ āraññakesume.
अज्झोकासे ओकिरिंसु, उज्झायन्ति च पेसला।
Ajjhokāse okiriṃsu, ujjhāyanti ca pesalā;
सचे विहारो उक्लापो, पठमं पत्तचीवरं॥
Sace vihāro uklāpo, paṭhamaṃ pattacīvaraṃ.
भिसिबिब्बोहनं मञ्चं, पीठञ्च खेळमल्लकं।
Bhisibibbohanaṃ mañcaṃ, pīṭhañca kheḷamallakaṃ;
अपस्सेनुल्लोककण्णा, गेरुका काळ अकता॥
Apassenullokakaṇṇā, gerukā kāḷa akatā.
सङ्कारं भिक्खुसामन्ता, सेनाविहारपानियं।
Saṅkāraṃ bhikkhusāmantā, senāvihārapāniyaṃ;
परिभोजनसामन्ता, पटिवाते च अङ्गणे॥
Paribhojanasāmantā, paṭivāte ca aṅgaṇe.
अधोवाते अत्थरणं, पटिपादकमञ्चो च।
Adhovāte attharaṇaṃ, paṭipādakamañco ca;
पीठं भिसि निसीदनं, मल्लकं अपस्सेन च॥
Pīṭhaṃ bhisi nisīdanaṃ, mallakaṃ apassena ca.
पत्तचीवरं भूमि च, पारन्तं ओरतो भोगं।
Pattacīvaraṃ bhūmi ca, pārantaṃ orato bhogaṃ;
पुरत्थिमा च पच्छिमा, उत्तरा अथ दक्खिणा॥
Puratthimā ca pacchimā, uttarā atha dakkhiṇā.
सीतुण्हे च दिवा रत्तिं, परिवेणञ्च कोट्ठको।
Sītuṇhe ca divā rattiṃ, pariveṇañca koṭṭhako;
उपट्ठानग्गिसाला च, वच्चकुटी च पानियं॥
Upaṭṭhānaggisālā ca, vaccakuṭī ca pāniyaṃ.
आचमनकुम्भि वुड्ढे च, उद्देसपुच्छना सज्झा।
Ācamanakumbhi vuḍḍhe ca, uddesapucchanā sajjhā;
धम्मो पदीपं विज्झापे, न विवरे नपि थके॥
Dhammo padīpaṃ vijjhāpe, na vivare napi thake.
येन वुड्ढो परिवत्ति, कण्णेनपि न घट्टये।
Yena vuḍḍho parivatti, kaṇṇenapi na ghaṭṭaye;
पञ्ञपेसि महावीरो, वत्तं सेनासनेसु तं॥
Paññapesi mahāvīro, vattaṃ senāsanesu taṃ.
निवारियमाना द्वारं, मुच्छितुज्झन्ति पेसला।
Nivāriyamānā dvāraṃ, mucchitujjhanti pesalā;
छारिकं छड्डये जन्ता, परिभण्डं तथेव च॥
Chārikaṃ chaḍḍaye jantā, paribhaṇḍaṃ tatheva ca.
परिवेणं कोट्ठको साला, चुण्णमत्तिकदोणिका।
Pariveṇaṃ koṭṭhako sālā, cuṇṇamattikadoṇikā;
मुखं पुरतो न थेरे, न नवे उस्सहति सचे॥
Mukhaṃ purato na there, na nave ussahati sace.
पुरतो उपरिमग्गो, चिक्खल्लं मत्ति पीठकं।
Purato uparimaggo, cikkhallaṃ matti pīṭhakaṃ;
विज्झापेत्वा थकेत्वा च, वत्तं जन्ताघरेसुमे॥
Vijjhāpetvā thaketvā ca, vattaṃ jantāgharesume.
नाचमेति यथावुड्ढं, पटिपाटि च सहसा।
Nācameti yathāvuḍḍhaṃ, paṭipāṭi ca sahasā;
उब्भजि नित्थुनो कट्ठं, वच्चं पस्साव खेळकं॥
Ubbhaji nitthuno kaṭṭhaṃ, vaccaṃ passāva kheḷakaṃ.
फरुसा कूप सहसा, उब्भजि चपु सेसेन।
Pharusā kūpa sahasā, ubbhaji capu sesena;
बहि अन्तो च उक्कासे, रज्जु अतरमानञ्च॥
Bahi anto ca ukkāse, rajju ataramānañca.
सहसा उब्भजि ठिते, नित्थुने कट्ठ वच्चञ्च।
Sahasā ubbhaji ṭhite, nitthune kaṭṭha vaccañca;
पस्साव खेळ फरुसा, कूपञ्च वच्चपादुके॥
Passāva kheḷa pharusā, kūpañca vaccapāduke.
नातिसहसा उब्भजि, पादुकाय चपुचपु।
Nātisahasā ubbhaji, pādukāya capucapu;
न सेसये पटिच्छादे, उहतपिधरेन च॥
Na sesaye paṭicchāde, uhatapidharena ca.
वच्चकुटी परिभण्डं, परिवेणञ्च कोट्ठको।
Vaccakuṭī paribhaṇḍaṃ, pariveṇañca koṭṭhako;
आचमने च उदकं, वत्तं वच्चकुटीसुमे॥
Ācamane ca udakaṃ, vattaṃ vaccakuṭīsume.
उपाहना दन्तकट्ठं, मुखोदकञ्च आसनं।
Upāhanā dantakaṭṭhaṃ, mukhodakañca āsanaṃ;
यागु उदकं धोवित्वा, उद्धारुक्लाप गाम च॥
Yāgu udakaṃ dhovitvā, uddhāruklāpa gāma ca.
निवासना कायबन्धा, सगुणं पत्तसोदकं।
Nivāsanā kāyabandhā, saguṇaṃ pattasodakaṃ;
पच्छा तिमण्डलो चेव, परिमण्डल बन्धनं॥
Pacchā timaṇḍalo ceva, parimaṇḍala bandhanaṃ.
सगुणं धोवित्वा पच्छा, नातिदूरे पटिग्गहे।
Saguṇaṃ dhovitvā pacchā, nātidūre paṭiggahe;
भणमानस्स आपत्ति, पठमागन्त्वान आसनं॥
Bhaṇamānassa āpatti, paṭhamāgantvāna āsanaṃ.
उदकं पीठकथलि, पच्चुग्गन्त्वा निवासनं।
Udakaṃ pīṭhakathali, paccuggantvā nivāsanaṃ;
ओतापे निदहि भङ्गो, ओभोगे भुञ्जितु नमे॥
Otāpe nidahi bhaṅgo, obhoge bhuñjitu name.
पानीयं उदकं नीचं, मुहुत्तं न च निदहे।
Pānīyaṃ udakaṃ nīcaṃ, muhuttaṃ na ca nidahe;
पत्तचीवरं भूमि च, पारन्तं ओरतो भोगं॥
Pattacīvaraṃ bhūmi ca, pārantaṃ orato bhogaṃ.
उद्धरे पटिसामे च, उक्लापो च नहायितुं।
Uddhare paṭisāme ca, uklāpo ca nahāyituṃ;
सीतं उण्हं जन्ताघरं, चुण्णं मत्तिक पिट्ठितो॥
Sītaṃ uṇhaṃ jantāgharaṃ, cuṇṇaṃ mattika piṭṭhito.
पीठञ्च चीवरं चुण्णं, मत्तिकुस्सहति मुखं।
Pīṭhañca cīvaraṃ cuṇṇaṃ, mattikussahati mukhaṃ;
पुरतो थेरे नवे च, परिकम्मञ्च निक्खमे॥
Purato there nave ca, parikammañca nikkhame.
पुरतो उदके न्हाते, निवासेत्वा उपज्झायं।
Purato udake nhāte, nivāsetvā upajjhāyaṃ;
निवासनञ्च सङ्घाटि, पीठकं आसनेन च॥
Nivāsanañca saṅghāṭi, pīṭhakaṃ āsanena ca.
पादो पीठं कथलिञ्च, पानीयुद्देसपुच्छना।
Pādo pīṭhaṃ kathaliñca, pānīyuddesapucchanā;
उक्लापं सुसोधेय्य, पठमं पत्तचीवरं॥
Uklāpaṃ susodheyya, paṭhamaṃ pattacīvaraṃ.
निसीदनपच्चत्थरणं, भिसि बिब्बोहनानि च।
Nisīdanapaccattharaṇaṃ, bhisi bibbohanāni ca;
मञ्चो पीठं पटिपादं, मल्लकं अपस्सेन च॥
Mañco pīṭhaṃ paṭipādaṃ, mallakaṃ apassena ca.
भूम सन्तान आलोक, गेरुका काळ अकता।
Bhūma santāna āloka, gerukā kāḷa akatā;
भूमत्थरपटिपादा, मञ्चो पीठं बिब्बोहनं॥
Bhūmattharapaṭipādā, mañco pīṭhaṃ bibbohanaṃ.
निसीदत्थरणं खेळ, अपस्से पत्तचीवरं।
Nisīdattharaṇaṃ kheḷa, apasse pattacīvaraṃ;
पुरत्थिमा पच्छिमा च, उत्तरा अथ दक्खिणा॥
Puratthimā pacchimā ca, uttarā atha dakkhiṇā.
सीतुण्हञ्च दिवा रत्तिं, परिवेणञ्च कोट्ठको।
Sītuṇhañca divā rattiṃ, pariveṇañca koṭṭhako;
उपट्ठानग्गिसाला च, वच्चपानियभोजनी॥
Upaṭṭhānaggisālā ca, vaccapāniyabhojanī.
आचमं अनभिरति, कुक्कुच्चं दिट्ठि च गरु।
Ācamaṃ anabhirati, kukkuccaṃ diṭṭhi ca garu;
मूलमानत्तअब्भानं, तज्जनीयं नियस्सकं॥
Mūlamānattaabbhānaṃ, tajjanīyaṃ niyassakaṃ.
पब्बाज पटिसारणी, उक्खेपञ्च कतं यदि।
Pabbāja paṭisāraṇī, ukkhepañca kataṃ yadi;
धोवे कातब्बं रजञ्च, रजे सम्परिवत्तकं॥
Dhove kātabbaṃ rajañca, raje samparivattakaṃ.
पत्तञ्च चीवरञ्चापि, परिक्खारञ्च छेदनं।
Pattañca cīvarañcāpi, parikkhārañca chedanaṃ;
परिकम्मं वेय्यावच्चं, पच्छा पिण्डं पविसनं॥
Parikammaṃ veyyāvaccaṃ, pacchā piṇḍaṃ pavisanaṃ.
न सुसानं दिसा चेव, यावजीवं उपट्ठहे।
Na susānaṃ disā ceva, yāvajīvaṃ upaṭṭhahe;
सद्धिविहारिकेनेतं, वत्तुपज्झायकेसुमे॥
Saddhivihārikenetaṃ, vattupajjhāyakesume.
ओवादसासनुद्देसा, पुच्छा पत्तञ्च चीवरं।
Ovādasāsanuddesā, pucchā pattañca cīvaraṃ;
परिक्खारो गिलानो च, न पच्छासमणो भवे॥
Parikkhāro gilāno ca, na pacchāsamaṇo bhave.
उपज्झायेसु ये वत्ता, एवं आचरियेसुपि।
Upajjhāyesu ye vattā, evaṃ ācariyesupi;
सद्धिविहारिके वत्ता, तथेव अन्तेवासिके॥
Saddhivihārike vattā, tatheva antevāsike.
आगन्तुकेसु ये वत्ता, पुन आवासिकेसु च।
Āgantukesu ye vattā, puna āvāsikesu ca;
गमिकानुमोदनिका, भत्तग्गे पिण्डचारिके॥
Gamikānumodanikā, bhattagge piṇḍacārike.
आरञ्ञकेसु यं वत्तं, यञ्च सेनासनेसुपि।
Āraññakesu yaṃ vattaṃ, yañca senāsanesupi;
जन्ताघरे वच्चकुटी, उपज्झा सद्धिविहारिके॥
Jantāghare vaccakuṭī, upajjhā saddhivihārike.
आचरियेसु यं वत्तं, तथेव अन्तेवासिके।
Ācariyesu yaṃ vattaṃ, tatheva antevāsike;
एकूनवीसति वत्थू, वत्ता चुद्दस खन्धके॥
Ekūnavīsati vatthū, vattā cuddasa khandhake.
वत्तं अपरिपूरेन्तो, न सीलं परिपूरति।
Vattaṃ aparipūrento, na sīlaṃ paripūrati;
असुद्धसीलो दुप्पञ्ञो, चित्तेकग्गं न विन्दति॥
Asuddhasīlo duppañño, cittekaggaṃ na vindati.
विक्खित्तचित्तोनेकग्गो, सम्मा धम्मं न पस्सति।
Vikkhittacittonekaggo, sammā dhammaṃ na passati;
अपस्समानो सद्धम्मं, दुक्खा न परिमुच्चति॥
Apassamāno saddhammaṃ, dukkhā na parimuccati.
यं वत्तं परिपूरेन्तो, सीलम्पि परिपूरति।
Yaṃ vattaṃ paripūrento, sīlampi paripūrati;
विसुद्धसीलो सप्पञ्ञो, चित्तेकग्गम्पि विन्दति॥
Visuddhasīlo sappañño, cittekaggampi vindati.
अविक्खित्तचित्तो एकग्गो, सम्मा धम्मं विपस्सति।
Avikkhittacitto ekaggo, sammā dhammaṃ vipassati;
सम्पस्समानो सद्धम्मं, दुक्खा सो परिमुच्चति॥
Sampassamāno saddhammaṃ, dukkhā so parimuccati.
तस्मा हि वत्तं पूरेय्य, जिनपुत्तो विचक्खणो।
Tasmā hi vattaṃ pūreyya, jinaputto vicakkhaṇo;
ओवादं बुद्धसेट्ठस्स, ततो निब्बानमेहितीति॥
Ovādaṃ buddhaseṭṭhassa, tato nibbānamehitīti.
वत्तक्खन्धकं निट्ठितं।
Vattakkhandhakaṃ niṭṭhitaṃ.
Footnotes:
