| Library / Tipiṭaka / तिपिटक • Tipiṭaka / सारत्थदीपनी-टीका • Sāratthadīpanī-ṭīkā |
अनुसासनीकथावण्णना
Anusāsanīkathāvaṇṇanā
पराजितकिलेसेनाति सन्ताने पुन अनुप्पत्तिधम्मतापादनेन चतूहि मग्गञाणेहि सह वासनाय समुच्छिन्नसब्बकिलेसेन। इधाति इमस्मिं सासने। तेन सिक्खापदेन समं अञ्ञं अनेकनयवोकिण्णं गम्भीरत्थविनिच्छयं किञ्चि सिक्खापदं न विज्जतीति योजेतब्बं। अत्थो च विनिच्छयो च अत्थविनिच्छया, गम्भीरा अत्थविनिच्छया अस्साति गम्भीरत्थविनिच्छयं। वत्थुम्हि ओतिण्णेति चोदनावत्थुम्हि सङ्घमज्झं ओतिण्णे, एकेन एकस्मिं चोदिते, सयमेव वा आगन्त्वा अत्तनो कतवीतिक्कमे आरोचितेति वुत्तं होति। एत्थाति ओतिण्णे वत्थुम्हि।
Parājitakilesenāti santāne puna anuppattidhammatāpādanena catūhi maggañāṇehi saha vāsanāya samucchinnasabbakilesena. Idhāti imasmiṃ sāsane. Tena sikkhāpadena samaṃ aññaṃ anekanayavokiṇṇaṃ gambhīratthavinicchayaṃ kiñci sikkhāpadaṃ na vijjatīti yojetabbaṃ. Attho ca vinicchayo ca atthavinicchayā, gambhīrā atthavinicchayā assāti gambhīratthavinicchayaṃ. Vatthumhi otiṇṇeti codanāvatthumhi saṅghamajjhaṃ otiṇṇe, ekena ekasmiṃ codite, sayameva vā āgantvā attano katavītikkame ārociteti vuttaṃ hoti. Etthāti otiṇṇe vatthumhi.
विनिच्छयं करोन्तेन सहसा ‘‘पाराजिक’’न्ति अवत्वा यं कत्तब्बं, तं दस्सेतुं ‘‘पाळि’’न्तिआदिमाह। विनिच्छयोति पाराजिकापत्तिविनिच्छयो। अवत्वावाति ‘‘त्वं पाराजिकं आपन्नो’’ति अवत्वाव। कप्पियेपि च वत्थुस्मिन्ति अवत्वापि गण्हितुं कप्पिये मातुपितुसन्तकेपि वत्थुस्मिं। लहुवत्तिनोति थेय्यचित्तुप्पादेन लहुपरिवत्तिनो। आसीविसन्ति सीघमेव सकलसरीरे फरणसमत्थविसं।
Vinicchayaṃ karontena sahasā ‘‘pārājika’’nti avatvā yaṃ kattabbaṃ, taṃ dassetuṃ ‘‘pāḷi’’ntiādimāha. Vinicchayoti pārājikāpattivinicchayo. Avatvāvāti ‘‘tvaṃ pārājikaṃ āpanno’’ti avatvāva. Kappiyepi ca vatthusminti avatvāpi gaṇhituṃ kappiye mātupitusantakepi vatthusmiṃ. Lahuvattinoti theyyacittuppādena lahuparivattino. Āsīvisanti sīghameva sakalasarīre pharaṇasamatthavisaṃ.
अनुसासनीकथावण्णना निट्ठिता।
Anusāsanīkathāvaṇṇanā niṭṭhitā.
पाराजिककण्डट्ठकथाय पठमभागवण्णना समत्ता।
Pārājikakaṇḍaṭṭhakathāya paṭhamabhāgavaṇṇanā samattā.
