| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၀. အနုတ္တရိယသုတ္တဝဏ္ဏနာ
10. Anuttariyasuttavaṇṇanā
၃၀. ဒသမေ နိဟီနန္တိ လာမကံ, ကိလိဋ္ဌံ ဝာ။ ဂာမဝာသိကာနန္တိ ဗာလာနံ။ ပုထုဇ္ဇနာနံ ဣဒန္တိ ပောထုဇ္ဇနိကံ။ တေနာဟ ‘‘ပုထုဇ္ဇနာနံ သန္တက’’န္တိ, ပုထုဇ္ဇနေဟိ သေဝိတဗ္ဗတ္တာ တေသံ သန္တကန္တိ ဝုတ္တံ ဟောတိ။ အနရိယန္တိ န နိဒ္ဒောသံ။ နိဒ္ဒောသဋ္ဌော ဟိ အရိယဋ္ဌော။ တေနာဟ ‘‘န ဥတ္တမံ န ပရိသုဒ္ဓ’’န္တိ။ အရိယေဟိ ဝာ န သေဝိတဗ္ဗန္တိ အနရိယံ။ အနတ္ထသံဟိတန္တိ ဒိဋ္ဌဓမ္မိကသမ္ပရာယိကာဒိဝိဝိဓဝိပုလာနတ္ထသဟိတံ။ တာဒိသဉ္စ အတ္ထသန္နိသ္သိတံ န ဟောတီတိ အာဟ ‘‘န အတ္ထသန္နိသ္သိတ’’န္တိ။ န ဝဋ္ဋေ နိဗ္ဗိန္ဒနတ္ထာယာတိ စတုသစ္စကမ္မဋ္ဌာနာဘာဝတော။ အသတိ ပန ဝဋ္ဋေ နိဗ္ဗိဒာယ ဝိရာဂာဒီနံ အသမ္ဘဝောယေဝာတိ အာဟ ‘‘န ဝိရာဂာယာ’’တိအာဒိ။
30. Dasame nihīnanti lāmakaṃ, kiliṭṭhaṃ vā. Gāmavāsikānanti bālānaṃ. Puthujjanānaṃ idanti pothujjanikaṃ. Tenāha ‘‘puthujjanānaṃ santaka’’nti, puthujjanehi sevitabbattā tesaṃ santakanti vuttaṃ hoti. Anariyanti na niddosaṃ. Niddosaṭṭho hi ariyaṭṭho. Tenāha ‘‘na uttamaṃ na parisuddha’’nti. Ariyehi vā na sevitabbanti anariyaṃ. Anatthasaṃhitanti diṭṭhadhammikasamparāyikādivividhavipulānatthasahitaṃ. Tādisañca atthasannissitaṃ na hotīti āha ‘‘na atthasannissita’’nti. Na vaṭṭe nibbindanatthāyāti catusaccakammaṭṭhānābhāvato. Asati pana vaṭṭe nibbidāya virāgādīnaṃ asambhavoyevāti āha ‘‘na virāgāyā’’tiādi.
အနုတ္တမံ အနုတ္တရိယန္တိ အာဟ ‘‘ဧတံ အနုတ္တရ’’န္တိ။ ဟတ္ထိသ္မိန္တိ နိမိတ္တတ္ထေ ဘုမ္မန္တိ အာဟ ‘‘ဟတ္ထိနိမိတ္တံ သိက္ခိတဗ္ဗ’’န္တိ။ ဟတ္ထိဝိသယတ္တာ ဟတ္ထိသန္နိသ္သိတတ္တာ စ ဟတ္ထိသိပ္ပံ ‘‘ဟတ္ထီ’’တိ ဂဟေတ္ဝာ ‘‘ဟတ္ထိသ္မိမ္ပိ သိက္ခတီ’’တိ ဝုတ္တံ။ တသ္မာ ဟတ္ထိသိပ္ပေ သိက္ခတီတိ ဧဝမေတ္ထ အတ္ထော ဒဋ္ဌဗ္ဗော။ သေသပဒေသုပိ ဧသေဝ နယော။
Anuttamaṃ anuttariyanti āha ‘‘etaṃ anuttara’’nti. Hatthisminti nimittatthe bhummanti āha ‘‘hatthinimittaṃ sikkhitabba’’nti. Hatthivisayattā hatthisannissitattā ca hatthisippaṃ ‘‘hatthī’’ti gahetvā ‘‘hatthismimpi sikkhatī’’ti vuttaṃ. Tasmā hatthisippe sikkhatīti evamettha attho daṭṭhabbo. Sesapadesupi eseva nayo.
လိင္ဂဗ္ယတ္တယေန ဝိဘတ္တိဗ္ယတ္တယေန ပာရိစရိယေတိ ဝုတ္တန္တိ အာဟ ‘‘ပာရိစရိယာယ ပစ္စုပဋ္ဌိတာ’’တိ။ သေသမေတ္ထ သုဝိညေယ္ယမေဝ။
Liṅgabyattayena vibhattibyattayena pāricariyeti vuttanti āha ‘‘pāricariyāya paccupaṭṭhitā’’ti. Sesamettha suviññeyyameva.
အနုတ္တရိယသုတ္တဝဏ္ဏနာ နိဋ္ဌိတာ။
Anuttariyasuttavaṇṇanā niṭṭhitā.
အနုတ္တရိယဝဂ္ဂဝဏ္ဏနာ နိဋ္ဌိတာ။
Anuttariyavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. အနုတ္တရိယသုတ္တံ • 10. Anuttariyasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. အနုတ္တရိယသုတ္တဝဏ္ဏနာ • 10. Anuttariyasuttavaṇṇanā
