| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஆபத்தானாபத்திவாரவண்ணனா
Āpattānāpattivāravaṇṇanā
66. படிஞ்ஞாகரணங் நத்தீ²தி புச்சி²தப்³பா³பா⁴வதோ. ந ஹி தூ³ஸகோ ‘‘கேன சித்தேன வீதிக்கமங் அகாஸி, ஜானித்வா அகாஸி, உதா³ஹு அஜானித்வா’’தி ஏவங் புச்சா²ய அரஹதி. தத்தே²வாதி வேஸாலியங் மஹாவனே ஏவ. ஸப்³ப³ங்க³க³தந்தி ட²பெத்வா கேஸலோமத³ந்தனகா²னங் மங்ஸவினிமுத்தட்டா²னஞ்சேவ த²த்³த⁴ஸுக்க²சம்மஞ்ச உத³கமிவ தேலபி³ந்து³ அவஸேஸஸப்³ப³ஸரீரங் ப்³யாபெத்வா டி²தங். ஸரீரகம்பாதீ³னீதி ஆதி³-ஸத்³தே³ன அக்கீ²னங் பீதவண்ணாதி³ங் ஸங்க³ண்ஹாதி. பித்தகோஸகே டி²தந்தி ஹத³யபப்பா²ஸானங் அந்தரே யகனமங்ஸங் நிஸ்ஸாய பதிட்டி²தே மஹாகோஸாதகீகோஸஸதி³ஸே பித்தகோஸே டி²தங். குபிதேதி பித்தகோஸதோ சலித்வா ப³ஹி நிக்க²ந்தே.
66.Paṭiññākaraṇaṃnatthīti pucchitabbābhāvato. Na hi dūsako ‘‘kena cittena vītikkamaṃ akāsi, jānitvā akāsi, udāhu ajānitvā’’ti evaṃ pucchāya arahati. Tatthevāti vesāliyaṃ mahāvane eva. Sabbaṅgagatanti ṭhapetvā kesalomadantanakhānaṃ maṃsavinimuttaṭṭhānañceva thaddhasukkhacammañca udakamiva telabindu avasesasabbasarīraṃ byāpetvā ṭhitaṃ. Sarīrakampādīnīti ādi-saddena akkhīnaṃ pītavaṇṇādiṃ saṅgaṇhāti. Pittakosake ṭhitanti hadayapapphāsānaṃ antare yakanamaṃsaṃ nissāya patiṭṭhite mahākosātakīkosasadise pittakose ṭhitaṃ. Kupiteti pittakosato calitvā bahi nikkhante.
விஸ்ஸட்ட²சித்தோதி விஸ்ஸட்ட²பகதிசித்தோ. யக்கு²ம்மத்தகோதி யக்கா² கிர யஸ்ஸ சித்தங் கி²பிதுகாமா ஹொந்தி, தஸ்ஸ ஸேதமுக²ங் நீலோத³ரங் ஸுரத்தஹத்த²பாத³ங் மஹாஸீஸங் பஜ்ஜலிதனெத்தங் பே⁴ரவங் வா அத்தபா⁴வங் நிம்மினித்வா த³ஸ்ஸெந்தி, பே⁴ரவங் வா ஸத்³த³ங் ஸாவெந்தி, கதெ²ந்தஸ்ஸேவ வா முகே²ன ஹத்த²ங் பக்கி²பித்வா ஹத³யமங்ஸங் மத்³த³ந்தி, தேன ஸோ ஸத்தோ உம்மத்தகோ ஹோதி கி²த்தசித்தோ. தேனேவாஹ ‘‘பே⁴ரவானி வா ஆரம்மணானி த³ஸ்ஸெத்வா’’திஆதி³. தத்த² பே⁴ரவானீதி த³ஸ்ஸனமத்தேனேவ ஸத்தானங் ப⁴யங் ச²ம்பி⁴தத்தங் லோமஹங்ஸங் உப்பாதே³துங் ஸமத்தா²னி. நிச்சமேவ உம்மத்தகோ ஹோதீதி யஸ்ஸ பித்தகோஸதோ பித்தங் சலித்வா ப³ஹி நிக்க²ந்தங் ஹோதி, தங் ஸந்தா⁴ய வுத்தங். யஸ்ஸ பன பித்தங் சலித்வா பித்தகோஸேயேவ டி²தங் ஹோதி ப³ஹி அனிக்க²ந்தங், ஸோ அந்தரந்தரா ஸஞ்ஞங் படிலப⁴தி, ந நிச்சமேவ உம்மத்தகோ ஹோதீதி வேதி³தப்³ப³ங். ஞத்வாதி ஸஞ்ஞாபடிலாபே⁴ன ஜானித்வா. அதி⁴மத்தாயாதி அதி⁴கப்பமாணாய.
Vissaṭṭhacittoti vissaṭṭhapakaticitto. Yakkhummattakoti yakkhā kira yassa cittaṃ khipitukāmā honti, tassa setamukhaṃ nīlodaraṃ surattahatthapādaṃ mahāsīsaṃ pajjalitanettaṃ bheravaṃ vā attabhāvaṃ nimminitvā dassenti, bheravaṃ vā saddaṃ sāventi, kathentasseva vā mukhena hatthaṃ pakkhipitvā hadayamaṃsaṃ maddanti, tena so satto ummattako hoti khittacitto. Tenevāha ‘‘bheravāni vā ārammaṇāni dassetvā’’tiādi. Tattha bheravānīti dassanamatteneva sattānaṃ bhayaṃ chambhitattaṃ lomahaṃsaṃ uppādetuṃ samatthāni. Niccameva ummattako hotīti yassa pittakosato pittaṃ calitvā bahi nikkhantaṃ hoti, taṃ sandhāya vuttaṃ. Yassa pana pittaṃ calitvā pittakoseyeva ṭhitaṃ hoti bahi anikkhantaṃ, so antarantarā saññaṃ paṭilabhati, na niccameva ummattako hotīti veditabbaṃ. Ñatvāti saññāpaṭilābhena jānitvā. Adhimattāyāti adhikappamāṇāya.
ஆபத்தானாபத்திவாரவண்ணனா நிட்டி²தா.
Āpattānāpattivāravaṇṇanā niṭṭhitā.
பத³பா⁴ஜனீயவண்ணனா நிட்டி²தா.
Padabhājanīyavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஆபத்தானாபத்திவாரவண்ணனா • Āpattānāpattivāravaṇṇanā
