| Library / Tipiṭaka / तिपिटक • Tipiṭaka / सारत्थदीपनी-टीका • Sāratthadīpanī-ṭīkā |
आपत्तिभेदवण्णना
Āpattibhedavaṇṇanā
१२२. तत्थ तत्थाति भूमट्ठथलट्ठादीसु। अङ्गञ्च दस्सेन्तोति योजेतब्बं। वत्थुभेदेनाति अवहरितब्बस्स वत्थुस्स गरुकलहुकभेदेन। आपत्तिभेदन्ति पाराजिकथुल्लच्चयदुक्कटानं वसेन आपत्तिभेदं। मनुस्सभूतेन परेन परिग्गहितं परपरिग्गहितं।
122.Tattha tatthāti bhūmaṭṭhathalaṭṭhādīsu. Aṅgañca dassentoti yojetabbaṃ. Vatthubhedenāti avaharitabbassa vatthussa garukalahukabhedena. Āpattibhedanti pārājikathullaccayadukkaṭānaṃ vasena āpattibhedaṃ. Manussabhūtena parena pariggahitaṃ parapariggahitaṃ.
१२५. न च सकसञ्ञीति इमिना पन परपरिग्गहितं वत्थु कथितं। न च विस्सासग्गाही, न च तावकालिकन्ति इमिना पन परपरिग्गहितसञ्ञा कथिता। न विस्सासग्गाहिताति विस्सासग्गाहेन अग्गहितभावो। न तावकालिकताति पच्छा दातब्बतं कत्वा अग्गहितभावो। अनज्झावुत्थकन्ति ‘‘ममेद’’न्ति परिग्गहवसेन अनज्झावुत्थकं अरञ्ञे दारुतिणपण्णादि। छड्डितन्ति कट्ठहारादीहि अतिभारादिताय अनत्थिकभावेन अरञ्ञादीसु छड्डितं। छिन्नमूलकन्ति नट्ठं परियेसित्वा आलयसङ्खातस्स मूलस्स छिन्नत्ता छिन्नमूलं। असामिकन्ति अनज्झावुत्थकादीहि तीहि आकारेहि दस्सितं असामिकवत्थु। उभयम्पीति यथावुत्तलक्खणं असामिकं अत्तनो सन्तकञ्च।
125.Naca sakasaññīti iminā pana parapariggahitaṃ vatthu kathitaṃ. Na ca vissāsaggāhī, na ca tāvakālikanti iminā pana parapariggahitasaññā kathitā. Na vissāsaggāhitāti vissāsaggāhena aggahitabhāvo. Na tāvakālikatāti pacchā dātabbataṃ katvā aggahitabhāvo. Anajjhāvutthakanti ‘‘mameda’’nti pariggahavasena anajjhāvutthakaṃ araññe dārutiṇapaṇṇādi. Chaḍḍitanti kaṭṭhahārādīhi atibhārāditāya anatthikabhāvena araññādīsu chaḍḍitaṃ. Chinnamūlakanti naṭṭhaṃ pariyesitvā ālayasaṅkhātassa mūlassa chinnattā chinnamūlaṃ. Asāmikanti anajjhāvutthakādīhi tīhi ākārehi dassitaṃ asāmikavatthu. Ubhayampīti yathāvuttalakkhaṇaṃ asāmikaṃ attano santakañca.
आपत्तिभेदवण्णना निट्ठिता।
Āpattibhedavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / २. दुतियपाराजिकं • 2. Dutiyapārājikaṃ
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महाविभङ्ग-अट्ठकथा • Mahāvibhaṅga-aṭṭhakathā / २. दुतियपाराजिकं • 2. Dutiyapārājikaṃ
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / आपत्तिभेदवण्णना • Āpattibhedavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / आपत्तिभेदवण्णना • Āpattibhedavaṇṇanā
