| Library / Tipiṭaka / તિપિટક • Tipiṭaka / પાચિત્યાદિયોજનાપાળિ • Pācityādiyojanāpāḷi |
૫. આપત્તિયા અદસ્સને ઉક્ખેપનીયકમ્મકથા
5. Āpattiyā adassane ukkhepanīyakammakathā
૪૬. સંસથાતિ એત્થ સંસધાતુયા કથનત્થં દસ્સેન્તો આહ ‘‘આરોચેથા’’તિ. તુમ્હે સંસથ, કથેથાતિ અત્થો.
46.Saṃsathāti ettha saṃsadhātuyā kathanatthaṃ dassento āha ‘‘ārocethā’’ti. Tumhe saṃsatha, kathethāti attho.
૫૦. ભણ્ડનકારકો હોતીતિઆદિ કારણૂપચારવસેન વુત્તોતિ આહ ‘‘ભણ્ડનાદિપચ્ચયા’’તિઆદિ. ભણ્ડનકારકાદિ કારણં, તેન આપન્ના આપત્તિ ફલં, તસ્સા અદસ્સને ઉક્ખેપનીયકમ્મં કાતબ્બન્તિ અધિપ્પાયો. તસ્સાતિ આપત્તિયા.
50.Bhaṇḍanakārako hotītiādi kāraṇūpacāravasena vuttoti āha ‘‘bhaṇḍanādipaccayā’’tiādi. Bhaṇḍanakārakādi kāraṇaṃ, tena āpannā āpatti phalaṃ, tassā adassane ukkhepanīyakammaṃ kātabbanti adhippāyo. Tassāti āpattiyā.
૫૧. એત્થાતિ ઉક્ખેપનીયકમ્મે. તત્થાતિ તેચત્તાલીસવત્તેસુ. અનુદ્ધંસેતબ્બોતિ એત્થ ધંસધાતુયા ગત્યત્થં પટિક્ખિપન્તો આહ ‘‘ન ચોદેતબ્બો’’તિ. ‘‘રજોનુદ્ધંસતી’’તિઆદીસુ (બુ॰ વં॰ ૨.૧૦૧) હિ ધંસધાતુ ગત્યત્થે વત્તતિ. ‘‘ન ભિક્ખુ ભિક્ખૂહી’’તિ એત્થ સોયેવ ભિક્ખુ તેહેવ ભિક્ખૂહીતિ અત્થં નિવારેન્તો આહ ‘‘અઞ્ઞો ભિક્ખુ અઞ્ઞેહિ ભિક્ખૂહી’’તિ. ન ગિહિદ્ધજોતિ એત્થ ગિહીનં ધજો ગિહિદ્ધજોતિ વુત્તે ઓદાતવત્થાદીનીતિ આહ ‘‘ઓદાતવત્થાની’’તિઆદિ. ન તિત્થિયાદિપદત્તયન્તિ ‘‘ન તિત્થિયા સેવિતબ્બા, ભિક્ખૂ સેવિતબ્બા, ભિક્ખુસિક્ખાય સિક્ખિતબ્બ’’ન્તિ પદાનં તયં. ‘‘ન અપસાદેતબ્બો’’તિ ઇમિના ન આસાદેતબ્બોતિ એત્થ આપુબ્બસદધાતુયા અપપુબ્બસદધાતુયા સમાનભાવં દસ્સેતિ. ‘‘અન્તો વા બહિ વાતિ’’ એત્થ કસ્સ અન્તો વા બહિ વાતિ આહ ‘‘વિહારસ્સા’’તિ. સેસં સબ્બંવત્તન્તિ યોજના. ઇમિનાતિ આપત્તિયા અદસ્સને ઉક્ખેપનીયકમ્મેન.
51.Etthāti ukkhepanīyakamme. Tatthāti tecattālīsavattesu. Anuddhaṃsetabboti ettha dhaṃsadhātuyā gatyatthaṃ paṭikkhipanto āha ‘‘na codetabbo’’ti. ‘‘Rajonuddhaṃsatī’’tiādīsu (bu. vaṃ. 2.101) hi dhaṃsadhātu gatyatthe vattati. ‘‘Na bhikkhu bhikkhūhī’’ti ettha soyeva bhikkhu teheva bhikkhūhīti atthaṃ nivārento āha ‘‘añño bhikkhu aññehi bhikkhūhī’’ti. Na gihiddhajoti ettha gihīnaṃ dhajo gihiddhajoti vutte odātavatthādīnīti āha ‘‘odātavatthānī’’tiādi. Na titthiyādipadattayanti ‘‘na titthiyā sevitabbā, bhikkhū sevitabbā, bhikkhusikkhāya sikkhitabba’’nti padānaṃ tayaṃ. ‘‘Na apasādetabbo’’ti iminā na āsādetabboti ettha āpubbasadadhātuyā apapubbasadadhātuyā samānabhāvaṃ dasseti. ‘‘Anto vā bahi vāti’’ ettha kassa anto vā bahi vāti āha ‘‘vihārassā’’ti. Sesaṃ sabbaṃvattanti yojanā. Imināti āpattiyā adassane ukkhepanīyakammena.
૬૫. તસ્સાતિ આપત્તિયા. ઇધાતિ પાપિકાય દિટ્ઠિયા અપ્પટિનિસ્સગ્ગે કતે ઉક્ખેપનીયકમ્મે. આપત્તિઅદસ્સનાદીસુ ઉદ્ધરિત્વા ખિપીયતિ અપનીયતિ અનેન વિનયકમ્મેનાતિ ઉક્ખેપનીયં, તમેવ કમ્મં ઉક્ખેપનીયકમ્મં.
65.Tassāti āpattiyā. Idhāti pāpikāya diṭṭhiyā appaṭinissagge kate ukkhepanīyakamme. Āpattiadassanādīsu uddharitvā khipīyati apanīyati anena vinayakammenāti ukkhepanīyaṃ, tameva kammaṃ ukkhepanīyakammaṃ.
ઇતિ કમ્મક્ખન્ધકવણ્ણનાય યોજના સમત્તા.
Iti kammakkhandhakavaṇṇanāya yojanā samattā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / ચૂળવગ્ગપાળિ • Cūḷavaggapāḷi
૫. આપત્તિયા અદસ્સને ઉક્ખેપનીયકમ્મં • 5. Āpattiyā adassane ukkhepanīyakammaṃ
આકઙ્ખમાનછક્કં • Ākaṅkhamānachakkaṃ
તેચત્તાલીસવત્તં • Tecattālīsavattaṃ
૭. પાપિકાય દિટ્ઠિયા અપ્પટિનિસ્સગ્ગે ઉક્ખેપનીયકમ્મં • 7. Pāpikāya diṭṭhiyā appaṭinissagge ukkhepanīyakammaṃ
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / ચૂળવગ્ગ-અટ્ઠકથા • Cūḷavagga-aṭṭhakathā / આપત્તિયા અદસ્સને ઉક્ખેપનીયકમ્મકથા • Āpattiyā adassane ukkhepanīyakammakathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / આપત્તિયા અદસ્સને ઉક્ખેપનીયકમ્મકથાવણ્ણના • Āpattiyā adassane ukkhepanīyakammakathāvaṇṇanā
