| Library / Tipiṭaka / તિપિટક • Tipiṭaka / મહાવગ્ગપાળિ • Mahāvaggapāḷi |
૨૬૨. અપ્પટિનિસ્સગ્ગે ઉક્ખેપનીયકમ્મવિવાદકથા
262. Appaṭinissagge ukkhepanīyakammavivādakathā
૪૩૯. ઇધ પન, ભિક્ખવે, ભિક્ખુ ન ઇચ્છતિ પાપિકં દિટ્ઠિં પટિનિસ્સજ્જિતું. તત્ર ચે ભિક્ખૂનં એવં હોતિ – ‘‘અયં ખો, આવુસો, ભિક્ખુ ન ઇચ્છતિ પાપિકં દિટ્ઠિં પટિનિસ્સજ્જિતું. હન્દસ્સ મયં પાપિકાય દિટ્ઠિયા અપ્પટિનિસ્સગ્ગે ઉક્ખેપનીયકમ્મં કરોમા’’તિ. તે તસ્સ પાપિકાય દિટ્ઠિયા અપ્પટિનિસ્સગ્ગે ઉક્ખેપનીયકમ્મં કરોન્તિ – અધમ્મેન વગ્ગા…પે॰… અધમ્મેન સમગ્ગા… ધમ્મેન વગ્ગા… ધમ્મપતિરૂપકેન વગ્ગા… ધમ્મપતિરૂપકેન સમગ્ગા. તત્રટ્ઠો સઙ્ઘો વિવદતિ – ‘‘અધમ્મેન વગ્ગકમ્મં, અધમ્મેન સમગ્ગકમ્મં, ધમ્મેન વગ્ગકમ્મં, ધમ્મપતિરૂપકેન વગ્ગકમ્મં, ધમ્મપતિરૂપકેન સમગ્ગકમ્મં, અકતં કમ્મં દુક્કટં કમ્મં પુન કાતબ્બં કમ્મ’’ન્તિ. તત્ર, ભિક્ખવે, યે તે ભિક્ખૂ એવમાહંસુ – ‘‘ધમ્મપતિરૂપકેન સમગ્ગકમ્મ’’ન્તિ, યે ચ તે ભિક્ખૂ એવમાહંસુ – ‘‘અકતં કમ્મં દુક્કટં કમ્મં પુન કાતબ્બં કમ્મ’’ન્તિ, ઇમે તત્થ ભિક્ખૂ ધમ્મવાદિનો. ઇમે પઞ્ચ વારા સંખિત્તા.
439. Idha pana, bhikkhave, bhikkhu na icchati pāpikaṃ diṭṭhiṃ paṭinissajjituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu na icchati pāpikaṃ diṭṭhiṃ paṭinissajjituṃ. Handassa mayaṃ pāpikāya diṭṭhiyā appaṭinissagge ukkhepanīyakammaṃ karomā’’ti. Te tassa pāpikāya diṭṭhiyā appaṭinissagge ukkhepanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
અપ્પટિનિસ્સગ્ગે ઉક્ખેપનીયકમ્મવિવાદકથા નિટ્ઠિતા.
Appaṭinissagge ukkhepanīyakammavivādakathā niṭṭhitā.
