| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൧൭. സത്തരസമവഗ്ഗോ
17. Sattarasamavaggo
(൧൬൬) ൧. അരഹതോ പുഞ്ഞൂപചയകഥാ
(166) 1. Arahato puññūpacayakathā
൭൭൬. അത്ഥി അരഹതോ പുഞ്ഞൂപചയോതി? ആമന്താ. അത്ഥി അരഹതോ അപുഞ്ഞൂപചയോതി? ന ഹേവം വത്തബ്ബേ…പേ॰… നത്ഥി അരഹതോ അപുഞ്ഞൂപചയോതി? ആമന്താ. നത്ഥി അരഹതോ പുഞ്ഞൂപചയോതി? ന ഹേവം വത്തബ്ബേ…പേ॰….
776. Atthi arahato puññūpacayoti? Āmantā. Atthi arahato apuññūpacayoti? Na hevaṃ vattabbe…pe… natthi arahato apuññūpacayoti? Āmantā. Natthi arahato puññūpacayoti? Na hevaṃ vattabbe…pe….
൭൭൭. അത്ഥി അരഹതോ പുഞ്ഞൂപചയോതി? ആമന്താ. അരഹാ പുഞ്ഞാഭിസങ്ഖാരം അഭിസങ്ഖരോതി, ആനേഞ്ജാഭിസങ്ഖാരം അഭിസങ്ഖരോതി, ഗതിസംവത്തനിയം കമ്മം കരോതി, ഭവസംവത്തനിയം കമ്മം കരോതി, ഇസ്സരിയസംവത്തനിയം കമ്മം കരോതി, അധിപച്ചസംവത്തനിയം 1 കമ്മം കരോതി, മഹാഭോഗസംവത്തനിയം കമ്മം കരോതി, മഹാപരിവാരസംവത്തനിയം കമ്മം കരോതി, ദേവസോഭഗ്യസംവത്തനിയം കമ്മം കരോതി, മനുസ്സസോഭഗ്യസംവത്തനിയം കമ്മം കരോതീതി? ന ഹേവം വത്തബ്ബേ…പേ॰….
777. Atthi arahato puññūpacayoti? Āmantā. Arahā puññābhisaṅkhāraṃ abhisaṅkharoti, āneñjābhisaṅkhāraṃ abhisaṅkharoti, gatisaṃvattaniyaṃ kammaṃ karoti, bhavasaṃvattaniyaṃ kammaṃ karoti, issariyasaṃvattaniyaṃ kammaṃ karoti, adhipaccasaṃvattaniyaṃ 2 kammaṃ karoti, mahābhogasaṃvattaniyaṃ kammaṃ karoti, mahāparivārasaṃvattaniyaṃ kammaṃ karoti, devasobhagyasaṃvattaniyaṃ kammaṃ karoti, manussasobhagyasaṃvattaniyaṃ kammaṃ karotīti? Na hevaṃ vattabbe…pe….
൭൭൮. അത്ഥി അരഹതോ പുഞ്ഞൂപചയോതി? ആമന്താ. അരഹാ ആചിനാതീതി? ന ഹേവം വത്തബ്ബേ…പേ॰… അരഹാ അപചിനാതീതി? ന ഹേവം വത്തബ്ബേ …പേ॰… അരഹാ പജഹതീതി…പേ॰… അരഹാ ഉപാദിയതീതി…പേ॰… അരഹാ വിസിനേതീതി…പേ॰… അരഹാ ഉസ്സിനേതീതി…പേ॰… അരഹാ വിധൂപേതീതി …പേ॰… അരഹാ സന്ധൂപേതീതി? ന ഹേവം വത്തബ്ബേ…പേ॰… നനു അരഹാ നേവാചിനാതി ന അപചിനാതി അപചിനിത്വാ ഠിതോതി? ആമന്താ. ഹഞ്ചി അരഹാ നേവാചിനാതി നാപചിനാതി അപചിനിത്വാ ഠിതോ, നോ ച വത രേ വത്തബ്ബേ – ‘‘അത്ഥി അരഹതോ പുഞ്ഞൂപചയോ’’തി.
778. Atthi arahato puññūpacayoti? Āmantā. Arahā ācinātīti? Na hevaṃ vattabbe…pe… arahā apacinātīti? Na hevaṃ vattabbe …pe… arahā pajahatīti…pe… arahā upādiyatīti…pe… arahā visinetīti…pe… arahā ussinetīti…pe… arahā vidhūpetīti …pe… arahā sandhūpetīti? Na hevaṃ vattabbe…pe… nanu arahā nevācināti na apacināti apacinitvā ṭhitoti? Āmantā. Hañci arahā nevācināti nāpacināti apacinitvā ṭhito, no ca vata re vattabbe – ‘‘atthi arahato puññūpacayo’’ti.
നനു അരഹാ നേവ പജഹതി ന ഉപാദിയതി പജഹിത്വാ ഠിതോ, നേവ വിസിനേതി ന ഉസ്സിനേതി വിസിനേത്വാ ഠിതോ, നേവ വിധൂപേതി ന സന്ധൂപേതി വിധൂപേത്വാ ഠിതോതി? ആമന്താ. ഹഞ്ചി അരഹാ നേവ വിധൂപേതി ന സന്ധൂപേതി വിധൂപേത്വാ ഠിതോ, നോ ച വത രേ വത്തബ്ബേ – ‘‘അത്ഥി അരഹതോ പുഞ്ഞൂപചയോ’’തി.
Nanu arahā neva pajahati na upādiyati pajahitvā ṭhito, neva visineti na ussineti visinetvā ṭhito, neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe – ‘‘atthi arahato puññūpacayo’’ti.
൭൭൯. നത്ഥി അരഹതോ പുഞ്ഞൂപചയോതി? ആമന്താ. അരഹാ ദാനം ദദേയ്യാതി? ആമന്താ . ഹഞ്ചി അരഹാ ദാനം ദദേയ്യ, നോ ച വത രേ വത്തബ്ബേ – ‘‘നത്ഥി അരഹതോ പുഞ്ഞൂപചയോ’’തി.
779. Natthi arahato puññūpacayoti? Āmantā. Arahā dānaṃ dadeyyāti? Āmantā . Hañci arahā dānaṃ dadeyya, no ca vata re vattabbe – ‘‘natthi arahato puññūpacayo’’ti.
അരഹാ ചീവരം ദദേയ്യ…പേ॰… പിണ്ഡപാതം ദദേയ്യ… സേനാസനം ദദേയ്യ… ഗിലാനപച്ചയഭേസജ്ജപരിക്ഖാരം ദദേയ്യ… ഖാദനീയം ദദേയ്യ… ഭോജനീയം ദദേയ്യ… പാനീയം ദദേയ്യ… ചേതിയം വന്ദേയ്യ… ചേതിയേ മാലം ആരോപേയ്യ… ഗന്ധം ആരോപേയ്യ… വിലേപനം ആരോപേയ്യ…പേ॰… ചേതിയം അഭിദക്ഖിണം 3 കരേയ്യാതി? ആമന്താ. ഹഞ്ചി അരഹാ ചേതിയം അഭിദക്ഖിണം കരേയ്യ, നോ ച വത രേ വത്തബ്ബേ – ‘‘നത്ഥി അരഹതോ പുഞ്ഞൂപചയോ’’തി.
Arahā cīvaraṃ dadeyya…pe… piṇḍapātaṃ dadeyya… senāsanaṃ dadeyya… gilānapaccayabhesajjaparikkhāraṃ dadeyya… khādanīyaṃ dadeyya… bhojanīyaṃ dadeyya… pānīyaṃ dadeyya… cetiyaṃ vandeyya… cetiye mālaṃ āropeyya… gandhaṃ āropeyya… vilepanaṃ āropeyya…pe… cetiyaṃ abhidakkhiṇaṃ 4 kareyyāti? Āmantā. Hañci arahā cetiyaṃ abhidakkhiṇaṃ kareyya, no ca vata re vattabbe – ‘‘natthi arahato puññūpacayo’’ti.
അത്ഥി അരഹതോ പുഞ്ഞൂപചയോതികഥാ നിട്ഠിതാ.
Atthi arahato puññūpacayotikathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൧. അത്ഥി അരഹതോ പുഞ്ഞൂപചയകഥാവണ്ണനാ • 1. Atthi arahato puññūpacayakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൧. അത്ഥിഅരഹതോപുഞ്ഞൂപചയകഥാവണ്ണനാ • 1. Atthiarahatopuññūpacayakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൧. അത്ഥിഅരഹതോപുഞ്ഞൂപചയകഥാവണ്ണനാ • 1. Atthiarahatopuññūpacayakathāvaṇṇanā
