| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೭. ಆರಕ್ಖಸುತ್ತಂ
7. Ārakkhasuttaṃ
೧೧೭. ‘‘ಚತೂಸು, ಭಿಕ್ಖವೇ, ಠಾನೇಸು ಅತ್ತರೂಪೇನ ಅಪ್ಪಮಾದೋ ಸತಿ ಚೇತಸೋ ಆರಕ್ಖೋ ಕರಣೀಯೋ। ಕತಮೇಸು ಚತೂಸು? ‘ಮಾ ಮೇ ರಜನೀಯೇಸು ಧಮ್ಮೇಸು ಚಿತ್ತಂ ರಜ್ಜೀ’ತಿ ಅತ್ತರೂಪೇನ ಅಪ್ಪಮಾದೋ ಸತಿ ಚೇತಸೋ ಆರಕ್ಖೋ ಕರಣೀಯೋ; ‘ಮಾ ಮೇ ದೋಸನೀಯೇಸು ಧಮ್ಮೇಸು ಚಿತ್ತಂ ದುಸ್ಸೀ’ತಿ ಅತ್ತರೂಪೇನ ಅಪ್ಪಮಾದೋ ಸತಿ ಚೇತಸೋ ಆರಕ್ಖೋ ಕರಣೀಯೋ; ‘ಮಾ ಮೇ ಮೋಹನೀಯೇಸು ಧಮ್ಮೇಸು ಚಿತ್ತಂ ಮುಯ್ಹೀ’ತಿ ಅತ್ತರೂಪೇನ ಅಪ್ಪಮಾದೋ ಸತಿ ಚೇತಸೋ ಆರಕ್ಖೋ ಕರಣೀಯೋ; ‘ಮಾ ಮೇ ಮದನೀಯೇಸು ಧಮ್ಮೇಸು ಚಿತ್ತಂ ಮಜ್ಜೀ’ತಿ ಅತ್ತರೂಪೇನ ಅಪ್ಪಮಾದೋ ಸತಿ ಚೇತಸೋ ಆರಕ್ಖೋ ಕರಣೀಯೋ।
117. ‘‘Catūsu, bhikkhave, ṭhānesu attarūpena appamādo sati cetaso ārakkho karaṇīyo. Katamesu catūsu? ‘Mā me rajanīyesu dhammesu cittaṃ rajjī’ti attarūpena appamādo sati cetaso ārakkho karaṇīyo; ‘mā me dosanīyesu dhammesu cittaṃ dussī’ti attarūpena appamādo sati cetaso ārakkho karaṇīyo; ‘mā me mohanīyesu dhammesu cittaṃ muyhī’ti attarūpena appamādo sati cetaso ārakkho karaṇīyo; ‘mā me madanīyesu dhammesu cittaṃ majjī’ti attarūpena appamādo sati cetaso ārakkho karaṇīyo.
‘‘ಯತೋ ಖೋ, ಭಿಕ್ಖವೇ, ಭಿಕ್ಖುನೋ ರಜನೀಯೇಸು ಧಮ್ಮೇಸು ಚಿತ್ತಂ ನ ರಜ್ಜತಿ ವೀತರಾಗತ್ತಾ, ದೋಸನೀಯೇಸು ಧಮ್ಮೇಸು ಚಿತ್ತಂ ನ ದುಸ್ಸತಿ ವೀತದೋಸತ್ತಾ, ಮೋಹನೀಯೇಸು ಧಮ್ಮೇಸು ಚಿತ್ತಂ ನ ಮುಯ್ಹತಿ ವೀತಮೋಹತ್ತಾ, ಮದನೀಯೇಸು ಧಮ್ಮೇಸು ಚಿತ್ತಂ ನ ಮಜ್ಜತಿ ವೀತಮದತ್ತಾ, ಸೋ ನ ಛಮ್ಭತಿ ನ ಕಮ್ಪತಿ ನ ವೇಧತಿ ನ ಸನ್ತಾಸಂ ಆಪಜ್ಜತಿ, ನ ಚ ಪನ ಸಮಣವಚನಹೇತುಪಿ ಗಚ್ಛತೀ’’ತಿ। ಸತ್ತಮಂ।
‘‘Yato kho, bhikkhave, bhikkhuno rajanīyesu dhammesu cittaṃ na rajjati vītarāgattā, dosanīyesu dhammesu cittaṃ na dussati vītadosattā, mohanīyesu dhammesu cittaṃ na muyhati vītamohattā, madanīyesu dhammesu cittaṃ na majjati vītamadattā, so na chambhati na kampati na vedhati na santāsaṃ āpajjati, na ca pana samaṇavacanahetupi gacchatī’’ti. Sattamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೭. ಆರಕ್ಖಸುತ್ತವಣ್ಣನಾ • 7. Ārakkhasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೭. ಕೇಸಿಸುತ್ತಾದಿವಣ್ಣನಾ • 1-7. Kesisuttādivaṇṇanā
