| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. ஆரம்மணபச்சயனித்³தே³ஸவண்ணனா
2. Ārammaṇapaccayaniddesavaṇṇanā
2. ஆரம்மணபச்சயனித்³தே³ஸே ரூபாயதனந்தி ரூபஸங்கா²தங் ஆயதனங். ஸேஸேஸுபி ஏஸேவ நயோ. சக்கு²விஞ்ஞாணதா⁴துயாதி சக்கு²விஞ்ஞாணஸங்கா²தாய தா⁴துயா. ஸேஸபதே³ஸுபி ஏஸேவ நயோ. தங்ஸம்பயுத்தகானந்தி தாய சக்கு²விஞ்ஞாணதா⁴துயா ஸம்பயுத்தகானங் திண்ணங் க²ந்தா⁴னங், ஸப்³பே³ஸம்பி சக்கு²பஸாத³வத்து²கானங் சதுன்னங் க²ந்தா⁴னங் ரூபாயதனங் ஆரம்மணபச்சயேன பச்சயோதி அத்தோ². இதோ பரேஸுபி ஏஸேவ நயோ. மனோதா⁴துயாதி ஸஸம்பயுத்தத⁴ம்மாய திவிதா⁴யபி மனோதா⁴துயா ரூபாயதனாதீ³னி பஞ்ச ஆரம்மணபச்சயேன பச்சயோ, நோ ச கோ² ஏகக்க²ணே. ஸப்³பே³ த⁴ம்மாதி ஏதானி ச ரூபாயதனாதீ³னி பஞ்ச அவஸேஸா ச ஸப்³பே³பி ஞெய்யத⁴ம்மா இமா ச² தா⁴துயோ ட²பெத்வா ஸேஸாய ஸஸம்பயுத்தத⁴ம்மாய மனோவிஞ்ஞாணதா⁴துயா ஆரம்மணபச்சயேன பச்சயோதி அத்தோ². யங் யங் த⁴ம்மங் ஆரப்³பா⁴தி இமினா யே ஏதே ஏதாஸங் ஸத்தன்னங் விஞ்ஞாணதா⁴தூனங் ஆரம்மணத⁴ம்மா வுத்தா, தே தாஸங் தா⁴தூனங் ஆரம்மணங் கத்வா உப்பஜ்ஜனக்க²ணேயேவ ஆரம்மணபச்சயோ ஹொந்தீதி தீ³பேதி. ஏவங் ஹொந்தாபி ச ந ஏகதோ ஹொந்தி, யங் யங் ஆரப்³ப⁴ யே யே உப்பஜ்ஜந்தி, தேஸங் தேஸங் தே தே விஸுங் விஸுங் ஆரம்மணபச்சயோ ஹொந்தீதிபி தீ³பேதி. உப்பஜ்ஜந்தீதி இத³ங் யதா² நஜ்ஜோ ஸந்த³ந்தி, பப்³ப³தா திட்ட²ந்தீதி ஸப்³ப³காலஸங்க³ஹவஸேன, ஏவங் வுத்தந்தி வேதி³தப்³ப³ங். தேன யேபி ஆரப்³ப⁴ யே உப்பஜ்ஜிங்ஸு, யேபி உப்பஜ்ஜிஸ்ஸந்தி, தே ஸப்³பே³ ஆரம்மணபச்சயேனேவ உப்பஜ்ஜிங்ஸு ச உப்பஜ்ஜிஸ்ஸந்தி சாதி ஸித்³த⁴ங் ஹோதி. சித்தசேதஸிகா த⁴ம்மாதி இத³ங் ‘‘யே யே த⁴ம்மா’’தி வுத்தானங் ஸரூபதோ நித³ஸ்ஸனங். தே தே த⁴ம்மாதி தே தே ஆரம்மணத⁴ம்மா. தேஸங் தேஸந்தி தேஸங் தேஸங் சித்தசேதஸிகத⁴ம்மானங். அயங் தாவெத்த² பாளிவண்ணனா.
2. Ārammaṇapaccayaniddese rūpāyatananti rūpasaṅkhātaṃ āyatanaṃ. Sesesupi eseva nayo. Cakkhuviññāṇadhātuyāti cakkhuviññāṇasaṅkhātāya dhātuyā. Sesapadesupi eseva nayo. Taṃsampayuttakānanti tāya cakkhuviññāṇadhātuyā sampayuttakānaṃ tiṇṇaṃ khandhānaṃ, sabbesampi cakkhupasādavatthukānaṃ catunnaṃ khandhānaṃ rūpāyatanaṃ ārammaṇapaccayena paccayoti attho. Ito paresupi eseva nayo. Manodhātuyāti sasampayuttadhammāya tividhāyapi manodhātuyā rūpāyatanādīni pañca ārammaṇapaccayena paccayo, no ca kho ekakkhaṇe. Sabbe dhammāti etāni ca rūpāyatanādīni pañca avasesā ca sabbepi ñeyyadhammā imā cha dhātuyo ṭhapetvā sesāya sasampayuttadhammāya manoviññāṇadhātuyā ārammaṇapaccayena paccayoti attho. Yaṃ yaṃ dhammaṃ ārabbhāti iminā ye ete etāsaṃ sattannaṃ viññāṇadhātūnaṃ ārammaṇadhammā vuttā, te tāsaṃ dhātūnaṃ ārammaṇaṃ katvā uppajjanakkhaṇeyeva ārammaṇapaccayo hontīti dīpeti. Evaṃ hontāpi ca na ekato honti, yaṃ yaṃ ārabbha ye ye uppajjanti, tesaṃ tesaṃ te te visuṃ visuṃ ārammaṇapaccayo hontītipi dīpeti. Uppajjantīti idaṃ yathā najjo sandanti, pabbatā tiṭṭhantīti sabbakālasaṅgahavasena, evaṃ vuttanti veditabbaṃ. Tena yepi ārabbha ye uppajjiṃsu, yepi uppajjissanti, te sabbe ārammaṇapaccayeneva uppajjiṃsu ca uppajjissanti cāti siddhaṃ hoti. Cittacetasikā dhammāti idaṃ ‘‘ye ye dhammā’’ti vuttānaṃ sarūpato nidassanaṃ. Te te dhammāti te te ārammaṇadhammā. Tesaṃ tesanti tesaṃ tesaṃ cittacetasikadhammānaṃ. Ayaṃ tāvettha pāḷivaṇṇanā.
இத³ங் பன ஆரம்மணங் நாம ரூபாரம்மணங் ஸத்³த³க³ந்த⁴ரஸபொ²ட்ட²ப்³ப³த⁴ம்மாரம்மணந்தி கொட்டா²ஸதோ ச²ப்³பி³த⁴ங் ஹோதி. தத்த² ட²பெத்வா பஞ்ஞத்திங் அவஸேஸங் பூ⁴மிதோ காமாவசரங்…பே॰… அபரியாபன்னந்தி சதுப்³பி³த⁴ங் ஹோதி. தத்த² காமாவசரங் குஸலாகுஸலவிபாககிரியரூபபே⁴த³தோ பஞ்சவித⁴ங்; ரூபாவசரங் குஸலவிபாககிரியதோ திவித⁴ங், ததா² அரூபாவசரங், அபரியாபன்னங் குஸலவிபாகனிப்³பா³னவஸேன திவித⁴ங் ஹோதி. ஸப்³ப³மேவ வா ஏதங் குஸலாகுஸலவிபாககிரியரூபனிப்³பா³னபஞ்ஞத்திபே⁴த³தோ ஸத்தவித⁴ங் ஹோதி. தத்த² குஸலங் பூ⁴மிபே⁴த³தோ சதுப்³பி³த⁴ங் ஹோதி, அகுஸலங் காமாவசரமேவ, விபாகங் சதுபூ⁴மகங், கிரியங் திபூ⁴மகங், ரூபங் ஏகபூ⁴மகங் காமாவசரமேவ, நிப்³பா³னம்பி ஏகபூ⁴மகங் அபரியாபன்னமேவ, பஞ்ஞத்தி பூ⁴மிவினிமுத்தாதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
Idaṃ pana ārammaṇaṃ nāma rūpārammaṇaṃ saddagandharasaphoṭṭhabbadhammārammaṇanti koṭṭhāsato chabbidhaṃ hoti. Tattha ṭhapetvā paññattiṃ avasesaṃ bhūmito kāmāvacaraṃ…pe… apariyāpannanti catubbidhaṃ hoti. Tattha kāmāvacaraṃ kusalākusalavipākakiriyarūpabhedato pañcavidhaṃ; rūpāvacaraṃ kusalavipākakiriyato tividhaṃ, tathā arūpāvacaraṃ, apariyāpannaṃ kusalavipākanibbānavasena tividhaṃ hoti. Sabbameva vā etaṃ kusalākusalavipākakiriyarūpanibbānapaññattibhedato sattavidhaṃ hoti. Tattha kusalaṃ bhūmibhedato catubbidhaṃ hoti, akusalaṃ kāmāvacarameva, vipākaṃ catubhūmakaṃ, kiriyaṃ tibhūmakaṃ, rūpaṃ ekabhūmakaṃ kāmāvacarameva, nibbānampi ekabhūmakaṃ apariyāpannameva, paññatti bhūmivinimuttāti evamettha nānappakārabhedato viññātabbo vinicchayo.
ஏவங் பி⁴ன்னே பனேதஸ்மிங் ஆரம்மணே காமாவசரகுஸலாரம்மணங் காமாவசரகுஸலஸ்ஸ, ரூபாவசரகுஸலஸ்ஸ, அகுஸலஸ்ஸ, காமாவசரவிபாகஸ்ஸ, காமாவசரகிரியஸ்ஸ, ரூபாவசரகிரியஸ்ஸ சாதி இமேஸங் ச²ன்னங் ராஸீனங் ஆரம்மணபச்சயோ ஹோதி. ரூபாவசரகுஸலாரம்மணங் தேஸு ச²ஸு ராஸீஸு காமாவசரவிபாகவஜ்ஜானங் பஞ்சன்னங் ராஸீனங் ஆரம்மணபச்சயோ ஹோதி. அரூபாவசரகுஸலாரம்மணங் காமாவசரகுஸலஸ்ஸ, ரூபாவசரகுஸலஸ்ஸ, அரூபாவசரகுஸலஸ்ஸ, அகுஸலஸ்ஸ, அரூபாவரசரவிபாகஸ்ஸ, காமாவசரகிரியஸ்ஸ, ரூபாவசரகிரியஸ்ஸ, அரூபாவசரகிரியஸ்ஸ சாதி இமேஸங் அட்ட²ன்னங் ராஸீனங் ஆரம்மணபச்சயோ ஹோதி. அபரியாபன்னகுஸலாரம்மணங் காமாவசரரூபாவசரதோ குஸலகிரியானமேவ ஆரம்மணபச்சயோ ஹோதி. அகுஸலாரம்மணங் காமாவசரரூபாவசரகுஸலஸ்ஸ, அகுஸலஸ்ஸ, காமாவசரவிபாகஸ்ஸ, காமாவசரரூபாவசரகிரியஸ்ஸ சாதி இமேஸங் ச²ன்னங் ராஸீனங் ஆரம்மணபச்சயோ ஹோதி.
Evaṃ bhinne panetasmiṃ ārammaṇe kāmāvacarakusalārammaṇaṃ kāmāvacarakusalassa, rūpāvacarakusalassa, akusalassa, kāmāvacaravipākassa, kāmāvacarakiriyassa, rūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakusalārammaṇaṃ tesu chasu rāsīsu kāmāvacaravipākavajjānaṃ pañcannaṃ rāsīnaṃ ārammaṇapaccayo hoti. Arūpāvacarakusalārammaṇaṃ kāmāvacarakusalassa, rūpāvacarakusalassa, arūpāvacarakusalassa, akusalassa, arūpāvaracaravipākassa, kāmāvacarakiriyassa, rūpāvacarakiriyassa, arūpāvacarakiriyassa cāti imesaṃ aṭṭhannaṃ rāsīnaṃ ārammaṇapaccayo hoti. Apariyāpannakusalārammaṇaṃ kāmāvacararūpāvacarato kusalakiriyānameva ārammaṇapaccayo hoti. Akusalārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti.
காமாவசரவிபாகாரம்மணங் காமாவசரரூபாவசரகுஸலஸ்ஸ, அகுஸலஸ்ஸ, காமாவசரவிபாகஸ்ஸ, காமாவசரரூபாவசரகிரியஸ்ஸ சாதி இமேஸங் ச²ன்னங் ராஸீனங் ஆரம்மணபச்சயோ ஹோதி. ரூபாவசரவிபாகாரம்மணங் காமாவசரரூபாவசரகுஸலஸ்ஸ, அகுஸலஸ்ஸ, காமாவசரரூபாவசரகிரியஸ்ஸ சாதி இமேஸங் பஞ்சன்னங் ராஸீனங் ஆரம்மணபச்சயோ ஹோதி. அரூபாவசரவிபாகாரம்மணம்பி இமேஸங்யேவ பஞ்சன்னங் ராஸீனங் ஆரம்மணபச்சயோ ஹோதி. அபரியாபன்னவிபாகாரம்மணங் காமாவசரரூபாவசரகுஸலகிரியானஞ்ஞேவ ஆரம்மணபச்சயோ ஹோதி.
Kāmāvacaravipākārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacaravipākārammaṇaṃ kāmāvacararūpāvacarakusalassa, akusalassa, kāmāvacararūpāvacarakiriyassa cāti imesaṃ pañcannaṃ rāsīnaṃ ārammaṇapaccayo hoti. Arūpāvacaravipākārammaṇampi imesaṃyeva pañcannaṃ rāsīnaṃ ārammaṇapaccayo hoti. Apariyāpannavipākārammaṇaṃ kāmāvacararūpāvacarakusalakiriyānaññeva ārammaṇapaccayo hoti.
காமாவசரகிரியாரம்மணங் காமாவசரரூபாவசரகுஸலஸ்ஸ, அகுஸலஸ்ஸ, காமாவசரவிபாகஸ்ஸ, காமாவசரரூபாவசரகிரியஸ்ஸ சாதி இமேஸங் ச²ன்னங் ராஸீனங் ஆரம்மணபச்சயோ ஹோதி. ரூபாவசரகிரியாரம்மணங் இமேஸு ச²ஸு ராஸீஸு காமாவசரவிபாகவஜ்ஜானங் பஞ்சன்னங் ராஸீனங் ஆரம்மணபச்சயோ ஹோதி. அரூபாவசரகிரியாரம்மணங் தேஸங் பஞ்சன்னங் அரூபாவசரகிரியஸ்ஸ சாதி இமேஸங் ச²ன்னங் ராஸீனங் ஆரம்மணபச்சயோ ஹோதி. சதுஸமுட்டா²னங் ரூபக்க²ந்த⁴ஸங்கா²தங் ரூபாரம்மணங் காமாவசரரூபாவசரகுஸலஸ்ஸ அகுஸலஸ்ஸ காமாவசரவிபாகஸ்ஸ காமாவசரரூபாவசரகிரியஸ்ஸ சாதி இமேஸங் ச²ன்னங் ராஸீனங் ஆரம்மணபச்சயோ ஹோதி. நிப்³பா³னாரம்மணங் காமாவசரரூபாவசரகுஸலஸ்ஸ, அபரியாபன்னதோ குஸலவிபாகஸ்ஸ, காமாவசரரூபாவசரகிரியஸ்ஸ சாதி இமேஸங் ச²ன்னங் ராஸீனங் ஆரம்மணபச்சயோ ஹோதி. ரூபாவசரகுஸலகிரியானங் கேசி நிச்ச²ந்தி, தங் யுத்திதோ உபதா⁴ரேதப்³ப³ங். நானப்பகாரகங் பன பஞ்ஞத்திஆரம்மணங் தேபூ⁴மககுஸலஸ்ஸ, அகுஸலஸ்ஸ, ரூபாவசரவிபாகஸ்ஸ, அரூபாவசரவிபாகஸ்ஸ, தேபூ⁴மககிரியஸ்ஸ சாதி இமேஸங் நவன்னங் ராஸீனங் ஆரம்மணபச்சயோ ஹோதி. தத்த² யங் யங் ஆரம்மணங் யேஸங் யேஸங் பச்சயோ, தே தே தங்தங்பச்சயுப்பன்னா நாம ஹொந்தீதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Kāmāvacarakiriyārammaṇaṃ kāmāvacararūpāvacarakusalassa, akusalassa, kāmāvacaravipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakiriyārammaṇaṃ imesu chasu rāsīsu kāmāvacaravipākavajjānaṃ pañcannaṃ rāsīnaṃ ārammaṇapaccayo hoti. Arūpāvacarakiriyārammaṇaṃ tesaṃ pañcannaṃ arūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Catusamuṭṭhānaṃ rūpakkhandhasaṅkhātaṃ rūpārammaṇaṃ kāmāvacararūpāvacarakusalassa akusalassa kāmāvacaravipākassa kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Nibbānārammaṇaṃ kāmāvacararūpāvacarakusalassa, apariyāpannato kusalavipākassa, kāmāvacararūpāvacarakiriyassa cāti imesaṃ channaṃ rāsīnaṃ ārammaṇapaccayo hoti. Rūpāvacarakusalakiriyānaṃ keci nicchanti, taṃ yuttito upadhāretabbaṃ. Nānappakārakaṃ pana paññattiārammaṇaṃ tebhūmakakusalassa, akusalassa, rūpāvacaravipākassa, arūpāvacaravipākassa, tebhūmakakiriyassa cāti imesaṃ navannaṃ rāsīnaṃ ārammaṇapaccayo hoti. Tattha yaṃ yaṃ ārammaṇaṃ yesaṃ yesaṃ paccayo, te te taṃtaṃpaccayuppannā nāma hontīti evamettha paccayuppannatopi viññātabbo vinicchayoti.
ஆரம்மணபச்சயனித்³தே³ஸவண்ணனா.
Ārammaṇapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
