| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
33. அரணவிஹாரஞாணனித்³தே³ஸோ
33. Araṇavihārañāṇaniddeso
82. கத²ங் த³ஸ்ஸனாதி⁴பதெய்யங் ஸந்தோ ச விஹாராதி⁴க³மோ பணீதாதி⁴முத்ததா பஞ்ஞா அரணவிஹாரே ஞாணங்? த³ஸ்ஸனாதி⁴பதெய்யந்தி அனிச்சானுபஸ்ஸனா த³ஸ்ஸனாதி⁴பதெய்யங், து³க்கா²னுபஸ்ஸனா த³ஸ்ஸனாதி⁴பதெய்யங், அனத்தானுபஸ்ஸனா த³ஸ்ஸனாதி⁴பதெய்யங், ரூபே அனிச்சானுபஸ்ஸனா த³ஸ்ஸனாதி⁴பதெய்யங், ரூபே து³க்கா²னுபஸ்ஸனா த³ஸ்ஸனாதி⁴பதெய்யங், ரூபே அனத்தானுபஸ்ஸனா த³ஸ்ஸனாதி⁴பதெய்யங்; வேத³னாய…பே॰… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிங்…பே॰… ஜராமரணே அனிச்சானுபஸ்ஸனா த³ஸ்ஸனாதி⁴பதெய்யங், ஜராமரணே து³க்கா²னுபஸ்ஸனா த³ஸ்ஸனாதி⁴பதெய்யங், ஜராமரணே அனத்தானுபஸ்ஸனா த³ஸ்ஸனாதி⁴பதெய்யங்.
82. Kathaṃ dassanādhipateyyaṃ santo ca vihārādhigamo paṇītādhimuttatā paññā araṇavihāre ñāṇaṃ? Dassanādhipateyyanti aniccānupassanā dassanādhipateyyaṃ, dukkhānupassanā dassanādhipateyyaṃ, anattānupassanā dassanādhipateyyaṃ, rūpe aniccānupassanā dassanādhipateyyaṃ, rūpe dukkhānupassanā dassanādhipateyyaṃ, rūpe anattānupassanā dassanādhipateyyaṃ; vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā dassanādhipateyyaṃ, jarāmaraṇe dukkhānupassanā dassanādhipateyyaṃ, jarāmaraṇe anattānupassanā dassanādhipateyyaṃ.
ஸந்தோ ச விஹாராதி⁴க³மோதி ஸுஞ்ஞதோ விஹாரோ ஸந்தோ விஹாராதி⁴க³மோ. அனிமித்தோ விஹாரோ ஸந்தோ விஹாராதி⁴க³மோ. அப்பணிஹிதோ விஹாரோ ஸந்தோ விஹாராதி⁴க³மோ.
Santoca vihārādhigamoti suññato vihāro santo vihārādhigamo. Animitto vihāro santo vihārādhigamo. Appaṇihito vihāro santo vihārādhigamo.
பணீதாதி⁴முத்ததாதி ஸுஞ்ஞதே அதி⁴முத்ததா பணீதாதி⁴முத்ததா. அனிமித்தே அதி⁴முத்ததா பணீதாதி⁴முத்ததா. அப்பணிஹிதே அதி⁴முத்ததா பணீதாதி⁴முத்ததா.
Paṇītādhimuttatāti suññate adhimuttatā paṇītādhimuttatā. Animitte adhimuttatā paṇītādhimuttatā. Appaṇihite adhimuttatā paṇītādhimuttatā.
அரணவிஹாரோதி பட²மங் ஜா²னங் அரணவிஹாரோ. து³தியங் ஜா²னங் அரணவிஹாரோ. ததியங் ஜா²னங் அரணவிஹாரோ. சதுத்த²ங் ஜா²னங் அரணவிஹாரோ. ஆகாஸானஞ்சாயதனஸமாபத்தி அரணவிஹாரோ…பே॰… நேவஸஞ்ஞானாஸஞ்ஞாயதனஸமாபத்தி அரணவிஹாரோ.
Araṇavihāroti paṭhamaṃ jhānaṃ araṇavihāro. Dutiyaṃ jhānaṃ araṇavihāro. Tatiyaṃ jhānaṃ araṇavihāro. Catutthaṃ jhānaṃ araṇavihāro. Ākāsānañcāyatanasamāpatti araṇavihāro…pe… nevasaññānāsaññāyatanasamāpatti araṇavihāro.
அரணவிஹாரோதி கேனட்டே²ன அரணவிஹாரோ? பட²மேன ஜா²னேன நீவரணே ஹரதீதி – அரணவிஹாரோ. து³தியேன ஜா²னேன விதக்கவிசாரே ஹரதீதி – அரணவிஹாரோ. ததியேன ஜா²னேன பீதிங் ஹரதீதி – அரணவிஹாரோ. சதுத்தே²ன ஜா²னேன ஸுக²து³க்கே² ஹரதீதி – அரணவிஹாரோ. ஆகாஸானஞ்சாயதனஸமாபத்தியா ரூபஸஞ்ஞங் படிக⁴ஸஞ்ஞங் நானத்தஸஞ்ஞங் ஹரதீதி – அரணவிஹாரோ. விஞ்ஞாணஞ்சாயதனஸமாபத்தியா ஆகாஸானஞ்சாயதனஸஞ்ஞங் ஹரதீதி – அரணவிஹாரோ. ஆகிஞ்சஞ்ஞாயதனஸமாபத்தியா விஞ்ஞாணஞ்சாயதனஸஞ்ஞங் ஹரதீதி – அரணவிஹாரோ. நேவஸஞ்ஞானாஸஞ்ஞாயதனஸமாபத்தியா ஆகிஞ்சஞ்ஞாயதனஸஞ்ஞங் ஹரதீதி – அரணவிஹாரோ. அயங் அரணவிஹாரோ. தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘த³ஸ்ஸனாதி⁴பதெய்யங் ஸந்தோ ச விஹாராதி⁴க³மோ பணீதாதி⁴முத்ததா பஞ்ஞா அரணவிஹாரே ஞாணங்’’.
Araṇavihāroti kenaṭṭhena araṇavihāro? Paṭhamena jhānena nīvaraṇe haratīti – araṇavihāro. Dutiyena jhānena vitakkavicāre haratīti – araṇavihāro. Tatiyena jhānena pītiṃ haratīti – araṇavihāro. Catutthena jhānena sukhadukkhe haratīti – araṇavihāro. Ākāsānañcāyatanasamāpattiyā rūpasaññaṃ paṭighasaññaṃ nānattasaññaṃ haratīti – araṇavihāro. Viññāṇañcāyatanasamāpattiyā ākāsānañcāyatanasaññaṃ haratīti – araṇavihāro. Ākiñcaññāyatanasamāpattiyā viññāṇañcāyatanasaññaṃ haratīti – araṇavihāro. Nevasaññānāsaññāyatanasamāpattiyā ākiñcaññāyatanasaññaṃ haratīti – araṇavihāro. Ayaṃ araṇavihāro. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘dassanādhipateyyaṃ santo ca vihārādhigamo paṇītādhimuttatā paññā araṇavihāre ñāṇaṃ’’.
அரணவிஹாரஞாணனித்³தே³ஸோ தெத்திங்ஸதிமோ.
Araṇavihārañāṇaniddeso tettiṃsatimo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 33. அரணவிஹாரஞாணனித்³தே³ஸவண்ணனா • 33. Araṇavihārañāṇaniddesavaṇṇanā
