| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၃၃. အရဏဝိဟာရဉာဏနိဒ္ဒေသော
33. Araṇavihārañāṇaniddeso
၈၂. ကထံ ဒသ္သနာဓိပတေယ္ယံ သန္တော စ ဝိဟာရာဓိဂမော ပဏီတာဓိမုတ္တတာ ပညာ အရဏဝိဟာရေ ဉာဏံ? ဒသ္သနာဓိပတေယ္ယန္တိ အနိစ္စာနုပသ္သနာ ဒသ္သနာဓိပတေယ္ယံ, ဒုက္ခာနုပသ္သနာ ဒသ္သနာဓိပတေယ္ယံ, အနတ္တာနုပသ္သနာ ဒသ္သနာဓိပတေယ္ယံ, ရူပေ အနိစ္စာနုပသ္သနာ ဒသ္သနာဓိပတေယ္ယံ, ရူပေ ဒုက္ခာနုပသ္သနာ ဒသ္သနာဓိပတေယ္ယံ, ရူပေ အနတ္တာနုပသ္သနာ ဒသ္သနာဓိပတေယ္ယံ; ဝေဒနာယ။ပေ.။ သညာယ။ သင္ခာရေသု။ ဝိညာဏေ။ စက္ခုသ္မိံ။ပေ.။ ဇရာမရဏေ အနိစ္စာနုပသ္သနာ ဒသ္သနာဓိပတေယ္ယံ, ဇရာမရဏေ ဒုက္ခာနုပသ္သနာ ဒသ္သနာဓိပတေယ္ယံ, ဇရာမရဏေ အနတ္တာနုပသ္သနာ ဒသ္သနာဓိပတေယ္ယံ။
82. Kathaṃ dassanādhipateyyaṃ santo ca vihārādhigamo paṇītādhimuttatā paññā araṇavihāre ñāṇaṃ? Dassanādhipateyyanti aniccānupassanā dassanādhipateyyaṃ, dukkhānupassanā dassanādhipateyyaṃ, anattānupassanā dassanādhipateyyaṃ, rūpe aniccānupassanā dassanādhipateyyaṃ, rūpe dukkhānupassanā dassanādhipateyyaṃ, rūpe anattānupassanā dassanādhipateyyaṃ; vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā dassanādhipateyyaṃ, jarāmaraṇe dukkhānupassanā dassanādhipateyyaṃ, jarāmaraṇe anattānupassanā dassanādhipateyyaṃ.
သန္တော စ ဝိဟာရာဓိဂမောတိ သုညတော ဝိဟာရော သန္တော ဝိဟာရာဓိဂမော။ အနိမိတ္တော ဝိဟာရော သန္တော ဝိဟာရာဓိဂမော။ အပ္ပဏိဟိတော ဝိဟာရော သန္တော ဝိဟာရာဓိဂမော။
Santoca vihārādhigamoti suññato vihāro santo vihārādhigamo. Animitto vihāro santo vihārādhigamo. Appaṇihito vihāro santo vihārādhigamo.
ပဏီတာဓိမုတ္တတာတိ သုညတေ အဓိမုတ္တတာ ပဏီတာဓိမုတ္တတာ။ အနိမိတ္တေ အဓိမုတ္တတာ ပဏီတာဓိမုတ္တတာ။ အပ္ပဏိဟိတေ အဓိမုတ္တတာ ပဏီတာဓိမုတ္တတာ။
Paṇītādhimuttatāti suññate adhimuttatā paṇītādhimuttatā. Animitte adhimuttatā paṇītādhimuttatā. Appaṇihite adhimuttatā paṇītādhimuttatā.
အရဏဝိဟာရောတိ ပဌမံ ဈာနံ အရဏဝိဟာရော။ ဒုတိယံ ဈာနံ အရဏဝိဟာရော။ တတိယံ ဈာနံ အရဏဝိဟာရော။ စတုတ္ထံ ဈာနံ အရဏဝိဟာရော။ အာကာသာနဉ္စာယတနသမာပတ္တိ အရဏဝိဟာရော။ပေ.။ နေဝသညာနာသညာယတနသမာပတ္တိ အရဏဝိဟာရော။
Araṇavihāroti paṭhamaṃ jhānaṃ araṇavihāro. Dutiyaṃ jhānaṃ araṇavihāro. Tatiyaṃ jhānaṃ araṇavihāro. Catutthaṃ jhānaṃ araṇavihāro. Ākāsānañcāyatanasamāpatti araṇavihāro…pe… nevasaññānāsaññāyatanasamāpatti araṇavihāro.
အရဏဝိဟာရောတိ ကေနဋ္ဌေန အရဏဝိဟာရော? ပဌမေန ဈာနေန နီဝရဏေ ဟရတီတိ – အရဏဝိဟာရော။ ဒုတိယေန ဈာနေန ဝိတက္ကဝိစာရေ ဟရတီတိ – အရဏဝိဟာရော။ တတိယေန ဈာနေန ပီတိံ ဟရတီတိ – အရဏဝိဟာရော။ စတုတ္ထေန ဈာနေန သုခဒုက္ခေ ဟရတီတိ – အရဏဝိဟာရော။ အာကာသာနဉ္စာယတနသမာပတ္တိယာ ရူပသညံ ပဋိဃသညံ နာနတ္တသညံ ဟရတီတိ – အရဏဝိဟာရော။ ဝိညာဏဉ္စာယတနသမာပတ္တိယာ အာကာသာနဉ္စာယတနသညံ ဟရတီတိ – အရဏဝိဟာရော။ အာကိဉ္စညာယတနသမာပတ္တိယာ ဝိညာဏဉ္စာယတနသညံ ဟရတီတိ – အရဏဝိဟာရော။ နေဝသညာနာသညာယတနသမာပတ္တိယာ အာကိဉ္စညာယတနသညံ ဟရတီတိ – အရဏဝိဟာရော။ အယံ အရဏဝိဟာရော။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဒသ္သနာဓိပတေယ္ယံ သန္တော စ ဝိဟာရာဓိဂမော ပဏီတာဓိမုတ္တတာ ပညာ အရဏဝိဟာရေ ဉာဏံ’’။
Araṇavihāroti kenaṭṭhena araṇavihāro? Paṭhamena jhānena nīvaraṇe haratīti – araṇavihāro. Dutiyena jhānena vitakkavicāre haratīti – araṇavihāro. Tatiyena jhānena pītiṃ haratīti – araṇavihāro. Catutthena jhānena sukhadukkhe haratīti – araṇavihāro. Ākāsānañcāyatanasamāpattiyā rūpasaññaṃ paṭighasaññaṃ nānattasaññaṃ haratīti – araṇavihāro. Viññāṇañcāyatanasamāpattiyā ākāsānañcāyatanasaññaṃ haratīti – araṇavihāro. Ākiñcaññāyatanasamāpattiyā viññāṇañcāyatanasaññaṃ haratīti – araṇavihāro. Nevasaññānāsaññāyatanasamāpattiyā ākiñcaññāyatanasaññaṃ haratīti – araṇavihāro. Ayaṃ araṇavihāro. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘dassanādhipateyyaṃ santo ca vihārādhigamo paṇītādhimuttatā paññā araṇavihāre ñāṇaṃ’’.
အရဏဝိဟာရဉာဏနိဒ္ဒေသော တေတ္တိံသတိမော။
Araṇavihārañāṇaniddeso tettiṃsatimo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၃၃. အရဏဝိဟာရဉာဏနိဒ္ဒေသဝဏ္ဏနာ • 33. Araṇavihārañāṇaniddesavaṇṇanā
