| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༢. ཨརཏིསུཏྟཝཎྞནཱ
2. Aratisuttavaṇṇanā
༢༡༠. ཝིཧཱརགརུཀོ ཀིརེས ཐེརོཏི ཨེཏེན ཐེརོ ཨཏྟནོ སདྡྷིཝིཧཱརིཀཾ ཝངྒཱིསཾ ཨོཝདིཏུཾ ཨནཝསརོ། ཏེན ཨནྟརནྟརཱ ཏསྶ ཙིཏྟཾ རཱགོ ཨནུདྡྷཾསེཏཱིཏི དསྶེཏི། སཱསནེ ཨརཏིནྟི སཱིལཔརིཔཱུརཎེ སམཐཝིཔསྶནཱབྷཱཝནཱཡ ཙ ཨནབྷིརཏིཾ། ཀཱམགུཎེསུ ཙ རཏིནྟི པཉྩསུ ཀཱམཀོཊྛཱསེསུ ཨསྶཱདཾ། པཱཔཝིཏཀྐནྟི ཀཱམསངྐཔྤཾ། སབྦཱཀཱརེནཱཏི སབྦེ ཏདངྒཝིཀྑམྦྷནསམུཙྪིནྡནཱཀཱརེན། ཡཐཱ མཧནྟཾ ཨརཉྙཾ ཝནཐནྟི, ཨེཝཾ མཧནྟཾ ཀིལེསཝནཾ ‘‘ཝནཐ’’ནྟི ཝུཏྟཾ།
210.Vihāragarukokiresa theroti etena thero attano saddhivihārikaṃ vaṅgīsaṃ ovadituṃ anavasaro. Tena antarantarā tassa cittaṃ rāgo anuddhaṃsetīti dasseti. Sāsane aratinti sīlaparipūraṇe samathavipassanābhāvanāya ca anabhiratiṃ. Kāmaguṇesu ca ratinti pañcasu kāmakoṭṭhāsesu assādaṃ. Pāpavitakkanti kāmasaṅkappaṃ. Sabbākārenāti sabbe tadaṅgavikkhambhanasamucchindanākārena. Yathā mahantaṃ araññaṃ vanathanti, evaṃ mahantaṃ kilesavanaṃ ‘‘vanatha’’nti vuttaṃ.
པཐཝིཉྩ ཝེཧཱསནྟི བྷུམྨཏྠེ པཙྩཏྟཝཙནཾ, ཏསྨཱ པཐཝིཡཾ ཨཱཀཱསེ ཙཱཏི ཨཏྠོ། ཏེནཱཧ ‘‘པཐཝིཊྛིཏ’’ནྟིཨཱདི། ཛགཏཱིཏི ཙ པཐཝིཡཱ ཝེཝཙནཾ། ཏེནཱཧ ‘‘ཨནྟོཔཐཝིཡ’’ནྟི། པརིཛཱིརཏཱིཏི སབྦྦསོ ཛརཾ པཱཔུཎཱཏི། སམཱགནྟྭཱཏི ཉཱཎེན སམཱགནྟྭཱཏི ཨཏྠོ། ཏེནཱཧ ‘‘མུཏཏྟཱཏི ཝིཉྙཱཏཏྟབྷཱཝཱ’’ཏི།
Pathaviñca vehāsanti bhummatthe paccattavacanaṃ, tasmā pathaviyaṃ ākāse cāti attho. Tenāha ‘‘pathaviṭṭhita’’ntiādi. Jagatīti ca pathaviyā vevacanaṃ. Tenāha ‘‘antopathaviya’’nti. Parijīratīti sabbbaso jaraṃ pāpuṇāti. Samāgantvāti ñāṇena samāgantvāti attho. Tenāha ‘‘mutattāti viññātattabhāvā’’ti.
པཊིགྷཔདེན གནྡྷརསཱ གཧིཏཱ གྷཱནཛིཝ྄ཧཱནཾ པཊིཧནནཝསེན པཝཏྟནཏོ། མུཏཔདེན ཕོཊྛབྦཱརམྨཎཾ གཧིཏཾ མུཏྭཱ གཧེཏབྦཏོ། ན ལིཔྤཏཱིཏི ན མཀྑཱིཡཏི།
Paṭighapadena gandharasā gahitā ghānajivhānaṃ paṭihananavasena pavattanato. Mutapadena phoṭṭhabbārammaṇaṃ gahitaṃ mutvā gahetabbato. Na lippatīti na makkhīyati.
སཊྛི-སདྡོ ཚ-སདྡེན སམཱནཏྠོཏི ‘‘སཊྛིནིསྶིཏཱ’’ཏི པདསྶ ‘‘ཚཨཱརམྨཎནིསྶིཏཱ’’ཏི ཨཏྠོ ཝུཏྟོ། པུཐཱུ ཨདྷམྨཝིཏཀྐཱཏི རཱུཔཝིཏཀྐཱདིཝསེན བཧཱུ ནཱནཱཝིཏཀྐཱ མིཙྪཱསངྐཔྤཱ། ཛནཏཱཡ ནིཝིཊྛཱཏི མཧཱཛནེ པཏིཊྛིཏཱ། ཏེསཾ ཝསེནཱཏི ཏེསམྤི མིཙྪཱཝིཏཀྐཱནཾ ཝསེན། ན ཀཏྠཙི ཨཱརམྨཎེ། ཀིལེསཝགྒགཏོཏི ཀིལེསསངྒཎིཀཾ ཨུཔགཏོ ན བྷཝེཡྻ, ཀིལེསཝིཏཀྐཱ ན ཨུཔྤཱདེཏབྦཱཏི ཨཏྠོ། དུཊྛུལླཝཙནཾ ཀཱམཔཊིསཾཡུཏྟཀཐཱ།
Saṭṭhi-saddo cha-saddena samānatthoti ‘‘saṭṭhinissitā’’ti padassa ‘‘chaārammaṇanissitā’’ti attho vutto. Puthū adhammavitakkāti rūpavitakkādivasena bahū nānāvitakkā micchāsaṅkappā. Janatāya niviṭṭhāti mahājane patiṭṭhitā. Tesaṃ vasenāti tesampi micchāvitakkānaṃ vasena. Na katthaci ārammaṇe. Kilesavaggagatoti kilesasaṅgaṇikaṃ upagato na bhaveyya, kilesavitakkā na uppādetabbāti attho. Duṭṭhullavacanaṃ kāmapaṭisaṃyuttakathā.
དབྦཛཱཏིཀོཏི དབྦརཱུཔོ། ནེཔཀྐེནཱཏི ཀོསལླེན། ནིབྦཱནཾ པཊིཙྩཱཏི ཨསངྑཏདྷཱཏུཾ ཨཱརམྨཎཝསེན པཊིཙྩ། པརིནིབྦཱནཀཱལནྟི ཨནུཔཱདིསེསནིབྦཱནཀཱལཾ།
Dabbajātikoti dabbarūpo. Nepakkenāti kosallena. Nibbānaṃ paṭiccāti asaṅkhatadhātuṃ ārammaṇavasena paṭicca. Parinibbānakālanti anupādisesanibbānakālaṃ.
ཨརཏིསུཏྟཝཎྞནཱ ནིཊྛིཏཱ།
Aratisuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༢. ཨརཏིསུཏྟཾ • 2. Aratisuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. ཨརཏཱིསུཏྟཝཎྞནཱ • 2. Aratīsuttavaṇṇanā
