| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ಅರಿಯಪಚ್ಚೋರೋಹಣೀಸುತ್ತಂ
2. Ariyapaccorohaṇīsuttaṃ
೧೬೮. ‘‘ಅರಿಯಂ ವೋ, ಭಿಕ್ಖವೇ, ಪಚ್ಚೋರೋಹಣಿಂ ದೇಸೇಸ್ಸಾಮಿ। ತಂ ಸುಣಾಥ, ಸಾಧುಕಂ ಮನಸಿ ಕರೋಥ; ಭಾಸಿಸ್ಸಾಮೀ’’ತಿ। ‘‘ಏವಂ, ಭನ್ತೇ’’ತಿ ಖೋ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ । ಭಗವಾ ಏತದವೋಚ –
168. ‘‘Ariyaṃ vo, bhikkhave, paccorohaṇiṃ desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ . Bhagavā etadavoca –
‘‘ಕತಮಾ ಚ, ಭಿಕ್ಖವೇ, ಅರಿಯಾ ಪಚ್ಚೋರೋಹಣೀ? ಇಧ , ಭಿಕ್ಖವೇ, ಅರಿಯಸಾವಕೋ ಇತಿ ಪಟಿಸಞ್ಚಿಕ್ಖತಿ – ‘ಪಾಣಾತಿಪಾತಸ್ಸ ಖೋ ಪಾಪಕೋ ವಿಪಾಕೋ – ದಿಟ್ಠೇ ಚೇವ ಧಮ್ಮೇ ಅಭಿಸಮ್ಪರಾಯಞ್ಚಾ’ತಿ। ಸೋ ಇತಿ ಪಟಿಸಙ್ಖಾಯ ಪಾಣಾತಿಪಾತಂ ಪಜಹತಿ; ಪಾಣಾತಿಪಾತಾ ಪಚ್ಚೋರೋಹತಿ।
‘‘Katamā ca, bhikkhave, ariyā paccorohaṇī? Idha , bhikkhave, ariyasāvako iti paṭisañcikkhati – ‘pāṇātipātassa kho pāpako vipāko – diṭṭhe ceva dhamme abhisamparāyañcā’ti. So iti paṭisaṅkhāya pāṇātipātaṃ pajahati; pāṇātipātā paccorohati.
… ‘ಅದಿನ್ನಾದಾನಸ್ಸ ಖೋ ಪಾಪಕೋ ವಿಪಾಕೋ – ದಿಟ್ಠೇ ಚೇವ ಧಮ್ಮೇ ಅಭಿಸಮ್ಪರಾಯಞ್ಚಾ’ತಿ। ಸೋ ಇತಿ ಪಟಿಸಙ್ಖಾಯ ಅದಿನ್ನಾದಾನಂ ಪಜಹತಿ; ಅದಿನ್ನಾದಾನಾ ಪಚ್ಚೋರೋಹತಿ।
… ‘Adinnādānassa kho pāpako vipāko – diṭṭhe ceva dhamme abhisamparāyañcā’ti. So iti paṭisaṅkhāya adinnādānaṃ pajahati; adinnādānā paccorohati.
… ‘ಕಾಮೇಸುಮಿಚ್ಛಾಚಾರಸ್ಸ ಖೋ ಪಾಪಕೋ ವಿಪಾಕೋ…ಪೇ॰… ಕಾಮೇಸುಮಿಚ್ಛಾಚಾರಾ ಪಚ್ಚೋರೋಹತಿ।
… ‘Kāmesumicchācārassa kho pāpako vipāko…pe… kāmesumicchācārā paccorohati.
… ‘ಮುಸಾವಾದಸ್ಸ ಖೋ ಪಾಪಕೋ ವಿಪಾಕೋ…ಪೇ॰… ಮುಸಾವಾದಾ ಪಚ್ಚೋರೋಹತಿ।
… ‘Musāvādassa kho pāpako vipāko…pe… musāvādā paccorohati.
… ‘ಪಿಸುಣಾಯ ವಾಚಾಯ ಖೋ ಪಾಪಕೋ ವಿಪಾಕೋ…ಪೇ॰… ಪಿಸುಣಾಯ ವಾಚಾಯ ಪಚ್ಚೋರೋಹತಿ।
… ‘Pisuṇāya vācāya kho pāpako vipāko…pe… pisuṇāya vācāya paccorohati.
… ‘ಫರುಸಾಯ ವಾಚಾಯ ಖೋ ಪಾಪಕೋ ವಿಪಾಕೋ…ಪೇ॰… ಫರುಸಾಯ ವಾಚಾಯ ಪಚ್ಚೋರೋಹತಿ।
… ‘Pharusāya vācāya kho pāpako vipāko…pe… pharusāya vācāya paccorohati.
… ‘ಸಮ್ಫಪ್ಪಲಾಪಸ್ಸ ಖೋ ಪಾಪಕೋ ವಿಪಾಕೋ…ಪೇ॰… ಸಮ್ಫಪ್ಪಲಾಪಾ ಪಚ್ಚೋರೋಹತಿ।
… ‘Samphappalāpassa kho pāpako vipāko…pe… samphappalāpā paccorohati.
… ‘ಅಭಿಜ್ಝಾಯ ಖೋ ಪಾಪಕೋ ವಿಪಾಕೋ…ಪೇ॰… ಅಭಿಜ್ಝಾಯ ಪಚ್ಚೋರೋಹತಿ।
… ‘Abhijjhāya kho pāpako vipāko…pe… abhijjhāya paccorohati.
… ‘ಬ್ಯಾಪಾದಸ್ಸ ಖೋ ಪಾಪಕೋ ವಿಪಾಕೋ…ಪೇ॰… ಬ್ಯಾಪಾದಾ ಪಚ್ಚೋರೋಹತಿ।
… ‘Byāpādassa kho pāpako vipāko…pe… byāpādā paccorohati.
‘‘ಕತಮಾ ಚ, ಭಿಕ್ಖವೇ, ಅರಿಯಾ ಪಚ್ಚೋರೋಹಣೀ? ಇಧ, ಭಿಕ್ಖವೇ, ಅರಿಯಸಾವಕೋ ಇತಿ ಪಟಿಸಞ್ಚಿಕ್ಖತಿ – ‘ಮಿಚ್ಛಾದಿಟ್ಠಿಯಾ ಖೋ ಪಾಪಕೋ ವಿಪಾಕೋ ದಿಟ್ಠೇ ಚೇವ ಧಮ್ಮೇ ಅಭಿಸಮ್ಪರಾಯಞ್ಚಾ’ತಿ। ಸೋ ಇತಿ ಪಟಿಸಙ್ಖಾಯ ಮಿಚ್ಛಾದಿಟ್ಠಿಂ ಪಜಹತಿ; ಮಿಚ್ಛಾದಿಟ್ಠಿಯಾ ಪಚ್ಚೋರೋಹತಿ। ಅಯಂ ವುಚ್ಚತಿ, ಭಿಕ್ಖವೇ, ಅರಿಯಾ ಪಚ್ಚೋರೋಹಣೀ’’ತಿ। ದುತಿಯಂ।
‘‘Katamā ca, bhikkhave, ariyā paccorohaṇī? Idha, bhikkhave, ariyasāvako iti paṭisañcikkhati – ‘micchādiṭṭhiyā kho pāpako vipāko diṭṭhe ceva dhamme abhisamparāyañcā’ti. So iti paṭisaṅkhāya micchādiṭṭhiṃ pajahati; micchādiṭṭhiyā paccorohati. Ayaṃ vuccati, bhikkhave, ariyā paccorohaṇī’’ti. Dutiyaṃ.
Related texts:
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೪೪. ಬ್ರಾಹ್ಮಣಪಚ್ಚೋರೋಹಣೀಸುತ್ತಾದಿವಣ್ಣನಾ • 1-44. Brāhmaṇapaccorohaṇīsuttādivaṇṇanā
