| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૩. તતિયપણ્ણાસકં
3. Tatiyapaṇṇāsakaṃ
(૧૧) ૧. આસાદુપ્પજહવગ્ગવણ્ણના
(11) 1. Āsāduppajahavaggavaṇṇanā
૧૧૯. તતિયસ્સ પણ્ણાસકસ્સ પઠમે આસાતિ તણ્હા. દુપ્પજહાતિ દુચ્ચજા દુન્નીહરા. લાભાસાય દુપ્પજહભાવેન સત્તા દસપિ વસ્સાનિ વીસતિપિ સટ્ઠિપિ વસ્સાનિ ‘‘અજ્જ લભિસ્સામ, સ્વે લભિસ્સામા’’તિ રાજાનં ઉપટ્ઠહન્તિ, કસિકમ્માદીનિ કરોન્તિ, ઉભતોબ્યૂળ્હં સઙ્ગામં પક્ખન્દન્તિ, અજપથસઙ્કુપથાદયો પટિપજ્જન્તિ, નાવાય મહાસમુદ્દં પવિસન્તિ. જીવિતાસાય દુપ્પજહત્તા સમ્પત્તે મરણકાલેપિ વસ્સસતજીવિં અત્તાનં મઞ્ઞન્તિ. સો કમ્મકમ્મનિમિત્તાદીનિ પસ્સન્તોપિ ‘‘દાનં દેહિ પૂજં, કરોહી’’તિ અનુકમ્પકેહિ વુચ્ચમાનો ‘‘નાહં મરિસ્સામિ, જીવિસ્સામિ’’ચ્ચેવ આસાય કસ્સચિ વચનં ન ગણ્હાતિ.
119. Tatiyassa paṇṇāsakassa paṭhame āsāti taṇhā. Duppajahāti duccajā dunnīharā. Lābhāsāya duppajahabhāvena sattā dasapi vassāni vīsatipi saṭṭhipi vassāni ‘‘ajja labhissāma, sve labhissāmā’’ti rājānaṃ upaṭṭhahanti, kasikammādīni karonti, ubhatobyūḷhaṃ saṅgāmaṃ pakkhandanti, ajapathasaṅkupathādayo paṭipajjanti, nāvāya mahāsamuddaṃ pavisanti. Jīvitāsāya duppajahattā sampatte maraṇakālepi vassasatajīviṃ attānaṃ maññanti. So kammakammanimittādīni passantopi ‘‘dānaṃ dehi pūjaṃ, karohī’’ti anukampakehi vuccamāno ‘‘nāhaṃ marissāmi, jīvissāmi’’cceva āsāya kassaci vacanaṃ na gaṇhāti.
૧૨૦. દુતિયે પુબ્બકારીતિ પઠમં ઉપકારસ્સ કારકો. કતઞ્ઞૂકતવેદીતિ તેન કતં ઞત્વા પચ્છા કારકો. તેસુ પુબ્બકારી ‘‘ઇણં દેમી’’તિ સઞ્ઞં કરોતિ, પચ્છા કારકો ‘‘ઇણં જીરાપેમી’’તિ સઞ્ઞં કરોતિ.
120. Dutiye pubbakārīti paṭhamaṃ upakārassa kārako. Kataññūkatavedīti tena kataṃ ñatvā pacchā kārako. Tesu pubbakārī ‘‘iṇaṃ demī’’ti saññaṃ karoti, pacchā kārako ‘‘iṇaṃ jīrāpemī’’ti saññaṃ karoti.
૧૨૧. તતિયે તિત્તો ચ તપ્પેતા ચાતિ પચ્ચેકબુદ્ધો ચ તથાગતસાવકો ચ ખીણાસવો તિત્તો નામ, તથાગતો અરહં સમ્માસમ્બુદ્ધો તિત્તો ચ તપ્પેતા ચ.
121. Tatiye titto ca tappetā cāti paccekabuddho ca tathāgatasāvako ca khīṇāsavo titto nāma, tathāgato arahaṃ sammāsambuddho titto ca tappetā ca.
૧૨૨. ચતુત્થે દુત્તપ્પયાતિ દાયકેન દુત્તપ્પયા તપ્પેતું ન સુકરા. નિક્ખિપતીતિ નિદહતિ ન પરિભુઞ્જતિ. વિસ્સજ્જેતીતિ પરેસં દેતિ.
122. Catutthe duttappayāti dāyakena duttappayā tappetuṃ na sukarā. Nikkhipatīti nidahati na paribhuñjati. Vissajjetīti paresaṃ deti.
૧૨૩. પઞ્ચમે ન વિસ્સજ્જેતીતિ સબ્બંયેવ પરેસં ન દેતિ, અત્તનો પન યાપનમત્તં ગહેત્વા અવસેસં દેતિ.
123. Pañcame na vissajjetīti sabbaṃyeva paresaṃ na deti, attano pana yāpanamattaṃ gahetvā avasesaṃ deti.
૧૨૪. છટ્ઠે સુભનિમિત્તન્તિ ઇટ્ઠારમ્મણં.
124. Chaṭṭhe subhanimittanti iṭṭhārammaṇaṃ.
૧૨૫. સત્તમે પટિઘનિમિત્તન્તિ અનિટ્ઠનિમિત્તં.
125. Sattame paṭighanimittanti aniṭṭhanimittaṃ.
૧૨૬. અટ્ઠમે પરતો ચ ઘોસોતિ પરસ્સ સન્તિકા અસ્સદ્ધમ્મસવનં.
126. Aṭṭhame parato ca ghosoti parassa santikā assaddhammasavanaṃ.
૧૨૭. નવમે પરતો ચ ઘોસોતિ પરસ્સ સન્તિકા સદ્ધમ્મસવનં. સેસં સબ્બત્થ ઉત્તાનત્થમેવાતિ.
127. Navame parato ca ghosoti parassa santikā saddhammasavanaṃ. Sesaṃ sabbattha uttānatthamevāti.
આસાદુપ્પજહવગ્ગો પઠમો.
Āsāduppajahavaggo paṭhamo.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / (૧૧) ૧. આસાદુપ્પજહવગ્ગો • (11) 1. Āsāduppajahavaggo
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / (૧૧) ૧. આસાદુપ્પજહવગ્ગવણ્ણના • (11) 1. Āsāduppajahavaggavaṇṇanā
