| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੩. ਤਤਿਯਪਣ੍ਣਾਸਕਂ
3. Tatiyapaṇṇāsakaṃ
(੧੧) ੧. ਆਸਾਦੁਪ੍ਪਜਹવਗ੍ਗવਣ੍ਣਨਾ
(11) 1. Āsāduppajahavaggavaṇṇanā
੧੧੯. ਤਤਿਯਪਣ੍ਣਾਸਕਸ੍ਸ ਪਠਮੇ ਦੁਕ੍ਖੇਨ ਪਜਹਿਤਬ੍ਬਾਤਿ ਦੁਪ੍ਪਜਹਾ। ਦੁਚ੍ਚਜਾਤਿਆਦੀਸੁਪਿ ਏਸੇવ ਨਯੋ। ਦ੍વਿਨ੍ਨਂ ਆਸਾਨਂ ਦੁਚ੍ਚਜਭਾવੋ ਕਥਂ ਜਾਨਿਤਬ੍ਬੋਤਿ ਪਠਮਂ ਤਾવ ਲਾਭਾਸਾਯ ਦੁਚ੍ਚਜਭਾવਂ વਿਭਾવੇਤਿ ‘‘ਲਾਭਾਸਾਯਾ’’ਤਿਆਦਿਨਾ। ਉਭਤੋਬ੍ਯੂਲ਼੍ਹਨ੍ਤਿ ਯੁਦ੍ਧਤ੍ਥਾਯ ਉਭਤੋ ਸਨ੍ਨਿਪਤਿਤਂ। ਪਕ੍ਖਨ੍ਦਨ੍ਤੀਤਿ ਅਨੁਪ੍ਪવਿਸਨ੍ਤਿ। ਜੀવਿਤਾਸਾਯ ਦੁਪ੍ਪਜਹਤ੍ਤਾਤਿਆਦਿਨਾ ਜੀવਿਤਾਸਾਯ ਦੁਚ੍ਚਜਭਾવਂ વਿਭਾવੇਤਿ।
119. Tatiyapaṇṇāsakassa paṭhame dukkhena pajahitabbāti duppajahā. Duccajātiādīsupi eseva nayo. Dvinnaṃ āsānaṃ duccajabhāvo kathaṃ jānitabboti paṭhamaṃ tāva lābhāsāya duccajabhāvaṃ vibhāveti ‘‘lābhāsāyā’’tiādinā. Ubhatobyūḷhanti yuddhatthāya ubhato sannipatitaṃ. Pakkhandantīti anuppavisanti. Jīvitāsāya duppajahattātiādinā jīvitāsāya duccajabhāvaṃ vibhāveti.
੧੨੦. ਦੁਤਿਯੇ ਦੁਲ੍ਲਭਾਤਿ ਨ ਸੁਲਭਾ। ਇਣਂ ਦੇਮੀਤਿ ਸਞ੍ਞਂ ਕਰੋਤੀਤਿ ਏવਂ ਸਞ੍ਞਂ ਕਰੋਨ੍ਤੋ વਿਯ ਹੋਤੀਤਿ ਅਤ੍ਥੋ। ਏਤ੍ਥ ਚ ‘‘ਪੁਬ੍ਬਕਾਰੀਤਿ ਪਠਮਂ ਉਪਕਾਰਸ੍ਸ ਕਾਰਕੋ। ਕਤਞ੍ਞੂ ਕਤવੇਦੀਤਿ ਤੇਨ ਕਤਂ ਞਤ੍વਾ ਪਚ੍ਛਾ ਕਾਰਕੋ। ਤੇਸੁ ਪੁਬ੍ਬਕਾਰੀ ‘ਇਣਂ ਦੇਮੀ’ਤਿ ਸਞ੍ਞਂ ਕਰੋਤਿ, ਪਚ੍ਛਾ ਕਾਰਕੋ ‘ਇਣਂ ਜੀਰਾਪੇਮੀ’ਤਿ ਸਞ੍ਞਂ ਕਰੋਤੀ’’ਤਿ ਏਤ੍ਤਕਮੇવ ਇਧ વੁਤ੍ਤਂ। ਪੁਗ੍ਗਲਪਣ੍ਣਤ੍ਤਿਸਂવਣ੍ਣਨਾਯਂ (ਪੁ॰ ਪ॰ ਅਟ੍ਠ॰ ੮੩) ਪਨ –
120. Dutiye dullabhāti na sulabhā. Iṇaṃ demīti saññaṃ karotīti evaṃ saññaṃ karonto viya hotīti attho. Ettha ca ‘‘pubbakārīti paṭhamaṃ upakārassa kārako. Kataññū katavedīti tena kataṃ ñatvā pacchā kārako. Tesu pubbakārī ‘iṇaṃ demī’ti saññaṃ karoti, pacchā kārako ‘iṇaṃ jīrāpemī’ti saññaṃ karotī’’ti ettakameva idha vuttaṃ. Puggalapaṇṇattisaṃvaṇṇanāyaṃ (pu. pa. aṭṭha. 83) pana –
‘‘ਪੁਬ੍ਬਕਾਰੀਤਿ ਪਠਮਮੇવ ਕਾਰਕੋ। ਕਤવੇਦੀਤਿ ਕਤਂ વੇਦੇਤਿ, વਿਦਿਤਂ ਪਾਕਟਂ ਕਰੋਤਿ। ਤੇ ਅਗਾਰਿਯਾਨਗਾਰਿਯੇਹਿ ਦੀਪੇਤਬ੍ਬਾ। ਅਗਾਰਿਕੇਸੁ ਹਿ ਮਾਤਾਪਿਤਰੋ ਪੁਬ੍ਬਕਾਰਿਨੋ ਨਾਮ, ਪੁਤ੍ਤਧੀਤਰੋ ਪਨ ਮਾਤਾਪਿਤਰੋ ਪਟਿਜਗ੍ਗਨ੍ਤਾ ਅਭਿવਾਦਨਾਦੀਨਿ ਤੇਸਂ ਕੁਰੁਮਾਨਾ ਕਤવੇਦਿਨੋ ਨਾਮ। ਅਨਗਾਰਿਯੇਸੁ ਆਚਰਿਯੁਪਜ੍ਝਾਯਾ ਪੁਬ੍ਬਕਾਰਿਨੋ ਨਾਮ, ਅਨ੍ਤੇવਾਸਿਕਸਦ੍ਧਿવਿਹਾਰਿਕਾ ਆਚਰਿਯੁਪਜ੍ਝਾਯੇ ਪਟਿਜਗ੍ਗਨ੍ਤਾ ਅਭਿવਾਦਨਾਦੀਨਿ ਚ ਤੇਸਂ ਕੁਰੁਮਾਨਾ ਕਤવੇਦਿਨੋ ਨਾਮ। ਤੇਸਂ ਆવਿਭਾવਤ੍ਥਾਯ ਉਪਜ੍ਝਾਯਪੋਸਕਸੋਣਤ੍ਥੇਰਾਦੀਨਂ વਤ੍ਥੂਨਿ ਕਥੇਤਬ੍ਬਾਨਿ।
‘‘Pubbakārīti paṭhamameva kārako. Katavedīti kataṃ vedeti, viditaṃ pākaṭaṃ karoti. Te agāriyānagāriyehi dīpetabbā. Agārikesu hi mātāpitaro pubbakārino nāma, puttadhītaro pana mātāpitaro paṭijaggantā abhivādanādīni tesaṃ kurumānā katavedino nāma. Anagāriyesu ācariyupajjhāyā pubbakārino nāma, antevāsikasaddhivihārikā ācariyupajjhāye paṭijaggantā abhivādanādīni ca tesaṃ kurumānā katavedino nāma. Tesaṃ āvibhāvatthāya upajjhāyaposakasoṇattherādīnaṃ vatthūni kathetabbāni.
‘‘ਅਪਰੋ ਨਯੋ – ਪਰੇਨ ਅਕਤੇਯੇવ ਉਪਕਾਰੇ ਅਤ੍ਤਨਿ ਕਤਂ ਉਪਕਾਰਂ ਅਨਪੇਕ੍ਖਿਤ੍વਾ ਕਾਰਕੋ ਪੁਬ੍ਬਕਾਰੀ, ਸੇਯ੍ਯਥਾਪਿ ਮਾਤਾਪਿਤਰੋ ਚੇવ ਆਚਰਿਯੁਪਜ੍ਝਾਯਾ ਚ। ਸੋ ਦੁਲ੍ਲਭੋ ਸਤ੍ਤਾਨਂ ਤਣ੍ਹਾਭਿਭੂਤਤ੍ਤਾ। ਪਰੇਨ ਕਤਸ੍ਸ ਉਪਕਾਰਸ੍ਸ ਅਨੁਰੂਪਪ੍ਪવਤ੍ਤਿਂ ਅਤ੍ਤਨਿ ਕਤਂ ਉਪਕਾਰਂ ਉਪਕਾਰਤੋ ਜਾਨਨ੍ਤੋ વੇਦਿਯਨ੍ਤੋ ਕਤਞ੍ਞੁਕਤવੇਦੀ ਸੇਯ੍ਯਥਾਪਿ ਮਾਤਾਪਿਤੁਆਚਰਿਯੁਪਜ੍ਝਾਯੇਸੁ ਸਮ੍ਮਾਪਟਿਪਨ੍ਨੋ। ਸੋਪਿ ਦੁਲ੍ਲਭੋ ਸਤ੍ਤਾਨਂ ਅવਿਜ੍ਜਾਭਿਭੂਤਤ੍ਤਾ। ਅਪਿਚ ਅਕਾਰਣવਚ੍ਛਲੋ ਪੁਬ੍ਬਕਾਰੀ, ਸਕਾਰਣવਚ੍ਛਲੋ ਕਤਞ੍ਞੁਕਤવੇਦੀ। ‘ਕਰਿਸ੍ਸਤਿ ਮੇ’ਤਿ ਏવਮਾਦਿਕਾਰਣਨਿਰਪੇਕ੍ਖਕਿਰਿਯੋ ਪੁਬ੍ਬਕਾਰੀ, ‘ਕਰਿਸ੍ਸਤਿ ਮੇ’ਤਿ ਏવਮਾਦਿਕਾਰਣਸਾਪੇਕ੍ਖਕਿਰਿਯੋ ਕਤਞ੍ਞੁਕਤવੇਦੀ। ਤਮੋਜੋਤਿਪਰਾਯਣੋ ਪੁਬ੍ਬਕਾਰੀ, ਜੋਤਿਜੋਤਿਪਰਾਯਣੋ ਕਤਞ੍ਞੁਕਤવੇਦੀ। ਦੇਸੇਤਾ ਪੁਬ੍ਬਕਾਰੀ, ਪਟਿਪਜ੍ਜਿਤਾ ਕਤਞ੍ਞੁਕਤવੇਦੀ। ਸਦੇવਕੇ ਲੋਕੇ ਅਰਹਂ ਸਮ੍ਮਾਸਮ੍ਬੁਦ੍ਧੋ ਪੁਬ੍ਬਕਾਰੀ, ਅਰਿਯਸਾવਕੋ ਕਤਞ੍ਞੁਕਤવੇਦੀ’’ਤਿ વੁਤ੍ਤਂ।
‘‘Aparo nayo – parena akateyeva upakāre attani kataṃ upakāraṃ anapekkhitvā kārako pubbakārī, seyyathāpi mātāpitaro ceva ācariyupajjhāyā ca. So dullabho sattānaṃ taṇhābhibhūtattā. Parena katassa upakārassa anurūpappavattiṃ attani kataṃ upakāraṃ upakārato jānanto vediyanto kataññukatavedī seyyathāpi mātāpituācariyupajjhāyesu sammāpaṭipanno. Sopi dullabho sattānaṃ avijjābhibhūtattā. Apica akāraṇavacchalo pubbakārī, sakāraṇavacchalo kataññukatavedī. ‘Karissati me’ti evamādikāraṇanirapekkhakiriyo pubbakārī, ‘karissati me’ti evamādikāraṇasāpekkhakiriyo kataññukatavedī. Tamojotiparāyaṇo pubbakārī, jotijotiparāyaṇo kataññukatavedī. Desetā pubbakārī, paṭipajjitā kataññukatavedī. Sadevake loke arahaṃ sammāsambuddho pubbakārī, ariyasāvako kataññukatavedī’’ti vuttaṃ.
ਤਤ੍ਥ ਕਾਰਣੇਨ વਿਨਾ ਪવਤ੍ਤਹਿਤਚਿਤ੍ਤੋ ਅਕਾਰਣવਚ੍ਛਲੋ। ਅਨਾਗਤਮ੍ਹਿ ਪਯੋਜਨਂ ਅਪੇਕ੍ਖਮਾਨੋ ‘‘ਕਰਿਸ੍ਸਤਿ ਮੇ’’ਤਿਆਦਿਨਾ ਚਿਤ੍ਤੇਨ ਪਠਮਂ ਗਹਿਤਂ ਤਾਦਿਸਂ ਕਤਂ ਉਪਾਦਾਯ ਕਤਞ੍ਞੂ ਏવ ਨਾਮ ਹੋਤਿ, ਨ ਪੁਬ੍ਬਕਾਰੀਤਿ ਅਧਿਪ੍ਪਾਯੇਨ ‘‘ਕਰਿਸ੍ਸਤਿ ਮੇਤਿ ਏવਮਾਦਿਕਾਰਣਸਾਪੇਕ੍ਖਕਿਰਿਯੋ ਕਤਞ੍ਞੁਕਤવੇਦੀ’’ਤਿ વੁਤ੍ਤਂ। ਤਮੋਜੋਤਿਪਰਾਯਣੋ ਪੁਞ੍ਞਫਲਾਨਿ ਅਨੁਪਜੀવਨ੍ਤੋ ਏવ ਪੁਞ੍ਞਾਨਿ ਕਰੋਤੀਤਿ ‘‘ਪੁਬ੍ਬਕਾਰੀ’’ਤਿ વੁਤ੍ਤੋ। ਪੁਞ੍ਞਫਲਂ ਉਪਜੀવਨ੍ਤੋ ਹਿ ਕਤਞ੍ਞੁਪਕ੍ਖੇ ਤਿਟ੍ਠਤਿ।
Tattha kāraṇena vinā pavattahitacitto akāraṇavacchalo. Anāgatamhi payojanaṃ apekkhamāno ‘‘karissati me’’tiādinā cittena paṭhamaṃ gahitaṃ tādisaṃ kataṃ upādāya kataññū eva nāma hoti, na pubbakārīti adhippāyena ‘‘karissati meti evamādikāraṇasāpekkhakiriyo kataññukatavedī’’ti vuttaṃ. Tamojotiparāyaṇo puññaphalāni anupajīvanto eva puññāni karotīti ‘‘pubbakārī’’ti vutto. Puññaphalaṃ upajīvanto hi kataññupakkhe tiṭṭhati.
੧੨੧. ਤਤਿਯੇ ਤਿਤ੍ਤੋਤਿ ਸੁਹਿਤੋ ਪਰਿਯੋਸਿਤੋ ਨਿਟ੍ਠਿਤਕਿਚ੍ਚਤਾਯ ਨਿਰੁਸ੍ਸੁਕ੍ਕੋ। ਗੁਣਪਾਰਿਪੂਰਿਯਾ ਹਿ ਪਰਿਪੁਣ੍ਣੋ ਯਾવਦਤ੍ਥੋ ਇਧ ਤਿਤ੍ਤੋ વੁਤ੍ਤੋ। ਤਪ੍ਪੇਤਾਤਿ ਅਞ੍ਞੇਸਮ੍ਪਿ ਤਿਤ੍ਤਿਕਰੋ। ਪਚ੍ਚੇਕਬੁਦ੍ਧੋ ਚ ਤਥਾਗਤਸਾવਕੋ ਚ ਖੀਣਾਸવੋ ਤਿਤ੍ਤੋਤਿ ਏਤ੍ਥ ਪਚ੍ਚੇਕਬੁਦ੍ਧੋ ਨવਲੋਕੁਤ੍ਤਰਧਮ੍ਮੇਹਿ ਸਯਂ ਤਿਤ੍ਤੋ ਪਰਿਪੁਣ੍ਣੋ, ਅਞ੍ਞਂ ਪਨ ਤਪ੍ਪੇਤੁਂ ਨ ਸਕ੍ਕੋਤਿ। ਤਸ੍ਸ ਹਿ ਧਮ੍ਮਕਥਾਯ ਅਭਿਸਮਯੋ ਨ ਹੋਤਿ, ਸਾવਕਾਨਂ ਪਨ ਧਮ੍ਮਕਥਾਯ ਅਪਰਿਮਾਣਾਨਂ ਦੇવਮਨੁਸ੍ਸਾਨਂ ਅਭਿਸਮਯੋ ਹੋਤਿ। ਏવਂ ਸਨ੍ਤੇਪਿ ਯਸ੍ਮਾ ਤੇ ਧਮ੍ਮਂ ਦੇਸੇਨ੍ਤਾ ਨ ਅਤ੍ਤਨੋ વਚਨਂ ਕਤ੍વਾ ਕਥੇਨ੍ਤਿ, ਬੁਦ੍ਧਾਨਂ વਚਨਂ ਕਤ੍વਾ ਕਥੇਨ੍ਤਿ, ਸੋਤੁਂ ਨਿਸਿਨ੍ਨਪਰਿਸਾਪਿ – ‘‘ਅਯਂ ਭਿਕ੍ਖੁ ਨ ਅਤ੍ਤਨਾ ਪਟਿવਿਦ੍ਧਂ ਧਮ੍ਮਂ ਕਥੇਤੀ’’ਤਿ ਚਿਤ੍ਤੀਕਾਰਂ ਕਰੋਤਿ। ਇਤਿ ਸੋ ਚਿਤ੍ਤੀਕਾਰੋ ਬੁਦ੍ਧਾਨਂਯੇવ ਹੋਤਿ। ਏવਂ ਤਤ੍ਥ ਸਮ੍ਮਾਸਮ੍ਬੁਦ੍ਧੋવ ਤਪ੍ਪੇਤਾ ਨਾਮ। ਯਥਾ ਹਿ ‘‘ਅਸੁਕਸ੍ਸ ਨਾਮ ਇਦਞ੍ਚਿਦਞ੍ਚ ਦੇਥਾ’’ਤਿ ਰਞ੍ਞਾ ਆਣਤ੍ਤੇ ਕਿਞ੍ਚਾਪਿ ਆਨੇਤ੍વਾ ਦੇਨ੍ਤਿ, ਅਥ ਖੋ ਰਾਜਾવ ਤਤ੍ਥ ਦਾਯਕੋ। ਯੇਹਿਪਿ ਲਦ੍ਧਂ ਹੋਤਿ, ਤੇ ‘‘ਰਞ੍ਞਾ ਅਮ੍ਹਾਕਂ ਠਾਨਨ੍ਤਰਂ ਦਿਨ੍ਨਂ, ਇਸ੍ਸਰਿਯવਿਭવੋ ਦਿਨ੍ਨੋ’’ਤ੍વੇવ ਗਣ੍ਹਨ੍ਤਿ, ਨ ‘‘ਰਾਜਪੁਰਿਸੇਹੀ’’ਤਿ ਏવਂਸਮ੍ਪਦਮਿਦਂ વੇਦਿਤਬ੍ਬਂ।
121. Tatiye tittoti suhito pariyosito niṭṭhitakiccatāya nirussukko. Guṇapāripūriyā hi paripuṇṇo yāvadattho idha titto vutto. Tappetāti aññesampi tittikaro. Paccekabuddho ca tathāgatasāvako ca khīṇāsavo tittoti ettha paccekabuddho navalokuttaradhammehi sayaṃ titto paripuṇṇo, aññaṃ pana tappetuṃ na sakkoti. Tassa hi dhammakathāya abhisamayo na hoti, sāvakānaṃ pana dhammakathāya aparimāṇānaṃ devamanussānaṃ abhisamayo hoti. Evaṃ santepi yasmā te dhammaṃ desentā na attano vacanaṃ katvā kathenti, buddhānaṃ vacanaṃ katvā kathenti, sotuṃ nisinnaparisāpi – ‘‘ayaṃ bhikkhu na attanā paṭividdhaṃ dhammaṃ kathetī’’ti cittīkāraṃ karoti. Iti so cittīkāro buddhānaṃyeva hoti. Evaṃ tattha sammāsambuddhova tappetā nāma. Yathā hi ‘‘asukassa nāma idañcidañca dethā’’ti raññā āṇatte kiñcāpi ānetvā denti, atha kho rājāva tattha dāyako. Yehipi laddhaṃ hoti, te ‘‘raññā amhākaṃ ṭhānantaraṃ dinnaṃ, issariyavibhavo dinno’’tveva gaṇhanti, na ‘‘rājapurisehī’’ti evaṃsampadamidaṃ veditabbaṃ.
੧੨੨. ਚਤੁਤ੍ਥੇ ਦੁਤ੍ਤਪ੍ਪਯਾਤਿ ਅਤਪ੍ਪਯਾ, ਨ ਸਕ੍ਕਾ ਕੇਨਚਿ ਤਪ੍ਪੇਤੁਂ। ਯੋ ਹਿ ਉਪਟ੍ਠਾਕਕੁਲਂ વਾ ਞਾਤਿਕੁਲਂ વਾ ਨਿਸ੍ਸਾਯ વਸਮਾਨੋ ਚੀવਰੇ ਜਿਣ੍ਣੇ ਤੇਹਿ ਦਿਨ੍ਨਂ ਚੀવਰਂ ਨਿਕ੍ਖਿਪਤਿ, ਨ ਪਰਿਭੁਞ੍ਜਤਿ । ਪੁਨਪ੍ਪੁਨਂ ਦਿਨ੍ਨਮ੍ਪਿ ਗਹੇਤ੍વਾ ਨਿਕ੍ਖਿਪਤੇવ। ਯੋ ਚ ਤੇਨੇવ ਨਯੇਨ ਲਦ੍ਧਂ ਲਦ੍ਧਂ વਿਸ੍ਸਜ੍ਜੇਤਿ, ਪਰਸ੍ਸ ਦੇਤਿ, ਪੁਨਪ੍ਪੁਨਂ ਲਦ੍ਧਮ੍ਪਿ ਤਥੇવ ਕਰੋਤਿ। ਇਮੇ ਦ੍વੇ ਪੁਗ੍ਗਲਾ ਸਕਟੇਹਿਪਿ ਪਚ੍ਚਯੇ ਉਪਨੇਨ੍ਤੇਨ ਤਪ੍ਪੇਤੁਂ ਨ ਸਕ੍ਕਾਤਿ ਦੁਤ੍ਤਪ੍ਪਯਾ।
122. Catutthe duttappayāti atappayā, na sakkā kenaci tappetuṃ. Yo hi upaṭṭhākakulaṃ vā ñātikulaṃ vā nissāya vasamāno cīvare jiṇṇe tehi dinnaṃ cīvaraṃ nikkhipati, na paribhuñjati . Punappunaṃ dinnampi gahetvā nikkhipateva. Yo ca teneva nayena laddhaṃ laddhaṃ vissajjeti, parassa deti, punappunaṃ laddhampi tatheva karoti. Ime dve puggalā sakaṭehipi paccaye upanentena tappetuṃ na sakkāti duttappayā.
੧੨੩. ਪਞ੍ਚਮੇ ਨ વਿਸ੍ਸਜ੍ਜੇਤੀਤਿ ਅਤ੍ਤਨੋ ਅਕਤ੍વਾ ਪਰਸ੍ਸ ਨ ਦੇਤਿ, ਅਤਿਰੇਕੇ ਪਨ ਸਤਿ ਨ ਨਿਕ੍ਖਿਪਤਿ, ਪਰਸ੍ਸ ਦੇਤਿ। ਤੇਨੇવਾਹ ‘‘ਸਬ੍ਬਂਯੇવ ਪਰੇਸਂ ਨ ਦੇਤੀ’’ਤਿਆਦਿ। ਇਦਂ વੁਤ੍ਤਂ ਹੋਤਿ ‘‘ਯੋ ਭਿਕ੍ਖੁ ਉਪਟ੍ਠਾਕਕੁਲਾ વਾ ਞਾਤਿਕੁਲਾ વਾ ਜਿਣ੍ਣਚੀવਰੋ ਸਾਟਕਂ ਲਭਿਤ੍વਾ ਚੀવਰਂ ਕਤ੍વਾ ਪਰਿਭੁਞ੍ਜਤਿ ਨ ਨਿਕ੍ਖਿਪਤਿ, ਅਗ੍ਗਲ਼ਂ ਦਤ੍વਾ ਪਾਰੁਪਨ੍ਤੋਪਿ ਪੁਨਪਿ ਦਿਯ੍ਯਮਾਨੇ ਸਹਸਾ ਨਪ੍ਪਟਿਗ੍ਗਣ੍ਹਾਤਿ। ਯੋ ਚ ਲਦ੍ਧਂ ਲਦ੍ਧਂ ਅਤ੍ਤਨਾ ਪਰਿਭੁਞ੍ਜਤਿ, ਪਰੇਸਂ ਨ ਦੇਤਿ। ਇਮੇ ਦ੍વੇਪਿ ਸੁਖੇਨ ਸਕ੍ਕਾ ਤਪ੍ਪੇਤੁਨ੍ਤਿ ਸੁਤਪ੍ਪਯਾ’’ਤਿ।
123. Pañcame na vissajjetīti attano akatvā parassa na deti, atireke pana sati na nikkhipati, parassa deti. Tenevāha ‘‘sabbaṃyeva paresaṃ na detī’’tiādi. Idaṃ vuttaṃ hoti ‘‘yo bhikkhu upaṭṭhākakulā vā ñātikulā vā jiṇṇacīvaro sāṭakaṃ labhitvā cīvaraṃ katvā paribhuñjati na nikkhipati, aggaḷaṃ datvā pārupantopi punapi diyyamāne sahasā nappaṭiggaṇhāti. Yo ca laddhaṃ laddhaṃ attanā paribhuñjati, paresaṃ na deti. Ime dvepi sukhena sakkā tappetunti sutappayā’’ti.
੧੨੪-੧੨੭. ਛਟ੍ਠਸਤ੍ਤਮਾਦੀਨਿ ਉਤ੍ਤਾਨਤ੍ਥਾਨੇવ।
124-127. Chaṭṭhasattamādīni uttānatthāneva.
ਆਸਾਦੁਪ੍ਪਜਹવਗ੍ਗવਣ੍ਣਨਾ ਨਿਟ੍ਠਿਤਾ।
Āsāduppajahavaggavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / (੧੧) ੧. ਆਸਾਦੁਪ੍ਪਜਹવਗ੍ਗੋ • (11) 1. Āsāduppajahavaggo
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / (੧੧) ੧. ਆਸਾਦੁਪ੍ਪਜਹવਗ੍ਗવਣ੍ਣਨਾ • (11) 1. Āsāduppajahavaggavaṇṇanā
