| Library / Tipiṭaka / તિપિટક • Tipiṭaka / ખુદ્દસિક્ખા-મૂલસિક્ખા • Khuddasikkhā-mūlasikkhā |
૨૭. અસંવાસિકનિદ્દેસવણ્ણના
27. Asaṃvāsikaniddesavaṇṇanā
૧૯૮. ઉક્ખિત્તોતિ આપત્તિયા અદસ્સને, અપ્પટિકમ્મે, પાપિકાય દિટ્ઠિયા અપ્પટિનિસ્સગ્ગે વા ઉક્ખિત્તકોતિ તિવિધોપિ ઇધ ઉક્ખિત્તો ગહિતો. અનુપસમ્પન્નોતિ ઇમિના સિક્ખમાનસામણેરસામણેરીસિક્ખાપચ્ચક્ખાતકા ગહિતાતિ વેદિતબ્બા. છિન્નમૂલકો નામ અન્તિમવત્થું અજ્ઝાપન્નકો. નાનાસંવાસોતિ લદ્ધિનાનાસંવાસકો. ‘‘નાનાસીમાય ઠિતચતુત્થો કમ્મં કરેય્ય, ઇદ્ધિયા વેહાસે ઠિતચતુત્થો કમ્મં કરેય્ય, અકમ્મં ન ચ કરણીય’’ન્તિ હિ વુત્તત્તા ઇમેપિ ‘‘અસંવાસિકા’’તિ વુત્તા. એતેસુ પન ઉક્ખિત્તકેહિ સદ્ધિં ઉપોસથાદીનિ કરોન્તો પાચિત્તિયં આપજ્જતિ. નિસ્સીમટ્ઠવેહાસટ્ઠેહિ કરોન્તસ્સ કમ્મં કુપ્પતિ, દુક્કટઞ્ચ હોતિ, ઇતરેહિ દુક્કટં. અસંવાસિકવિનિચ્છયો.
198.Ukkhittoti āpattiyā adassane, appaṭikamme, pāpikāya diṭṭhiyā appaṭinissagge vā ukkhittakoti tividhopi idha ukkhitto gahito. Anupasampannoti iminā sikkhamānasāmaṇerasāmaṇerīsikkhāpaccakkhātakā gahitāti veditabbā. Chinnamūlako nāma antimavatthuṃ ajjhāpannako. Nānāsaṃvāsoti laddhinānāsaṃvāsako. ‘‘Nānāsīmāya ṭhitacatuttho kammaṃ kareyya, iddhiyā vehāse ṭhitacatuttho kammaṃ kareyya, akammaṃ na ca karaṇīya’’nti hi vuttattā imepi ‘‘asaṃvāsikā’’ti vuttā. Etesu pana ukkhittakehi saddhiṃ uposathādīni karonto pācittiyaṃ āpajjati. Nissīmaṭṭhavehāsaṭṭhehi karontassa kammaṃ kuppati, dukkaṭañca hoti, itarehi dukkaṭaṃ. Asaṃvāsikavinicchayo.
અસંવાસિકનિદ્દેસવણ્ણના નિટ્ઠિતા.
Asaṃvāsikaniddesavaṇṇanā niṭṭhitā.
