| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. அஸனபோ³தி⁴யத்தே²ரஅபதா³னவண்ணனா
10. Asanabodhiyattheraapadānavaṇṇanā
ஜாதியா ஸத்தவஸ்ஸோஹந்திஆதி³கங் ஆயஸ்மதோ அஸனபோ³தி⁴யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ திஸ்ஸஸ்ஸ ப⁴க³வதோ காலே அஞ்ஞதரஸ்மிங் குலகே³ஹே நிப்³ப³த்தோ வுத்³தி⁴ப்பத்தோ ஸுக²ப்பத்தோ ஸாஸனே பஸன்னோ அஸனபோ³தி⁴தோ ப²லங் க³ஹெத்வா ததோ வுட்டி²தபோ³தி⁴தருணே க³ஹெத்வா போ³தி⁴ங் ரோபேஸி, யதா² ந வினஸ்ஸதி ததா² உத³காஸிஞ்சனாதி³கம்மேன ரக்கி²த்வா பூஜேஸி. ஸோ தேன புஞ்ஞேன தே³வமனுஸ்ஸேஸு ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ பரிபக்கஸம்பா⁴ரத்தா ஸத்தவஸ்ஸிகோவ ஸமானோ பப்³ப³ஜித்வா கு²ரக்³கே³யேவ அரஹத்தங் பாபுணி, புராகதபுஞ்ஞனாமேன அஸனபோ³தி⁴யத்தே²ரோதி பாகடோ.
Jātiyā sattavassohantiādikaṃ āyasmato asanabodhiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle aññatarasmiṃ kulagehe nibbatto vuddhippatto sukhappatto sāsane pasanno asanabodhito phalaṃ gahetvā tato vuṭṭhitabodhitaruṇe gahetvā bodhiṃ ropesi, yathā na vinassati tathā udakāsiñcanādikammena rakkhitvā pūjesi. So tena puññena devamanussesu sampattiyo anubhavitvā imasmiṃ buddhuppāde kulagehe nibbatto paripakkasambhārattā sattavassikova samāno pabbajitvā khuraggeyeva arahattaṃ pāpuṇi, purākatapuññanāmena asanabodhiyattheroti pākaṭo.
78. ஸோ புப்³ப³ஸம்பா⁴ரமனுஸ்ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஜாதியா ஸத்தவஸ்ஸோஹந்திஆதி³மாஹ. தத்த² ஜாதியாதி மாதுக³ப்³ப⁴தோ நிக்க²ந்தகாலதோ பட்டா²யாதி அத்தோ². ஸத்தவஸ்ஸோ பரிபுண்ணஸரதோ³ அஹங் லோகனாயகங் திஸ்ஸங் ப⁴க³வந்தங் அத்³த³ஸந்தி ஸம்ப³ந்தோ⁴. பஸன்னசித்தோ ஸுமனோதி பகாரேன பஸன்னஅனாலுளிதஅவிகம்பிதசித்தோ, ஸுமனோ ஸுந்த³ரமனோ ஸோமனஸ்ஸஸஹக³தசித்தோதி அத்தோ².
78. So pubbasambhāramanussaritvā somanassajāto pubbacaritāpadānaṃ pakāsento jātiyā sattavassohantiādimāha. Tattha jātiyāti mātugabbhato nikkhantakālato paṭṭhāyāti attho. Sattavasso paripuṇṇasarado ahaṃ lokanāyakaṃ tissaṃ bhagavantaṃ addasanti sambandho. Pasannacitto sumanoti pakārena pasannaanāluḷitaavikampitacitto, sumano sundaramano somanassasahagatacittoti attho.
79. திஸ்ஸஸ்ஸாஹங் ப⁴க³வதோதி திக்க²த்துங் ஜாதோதி திஸ்ஸோ, ஸோ மாதுக³ப்³ப⁴தோ, மனுஸ்ஸஜாதிதோ, பஞ்சக்க²ந்த⁴தோ ச முத்தோ ஹுத்வா ஜாதோ நிப்³ப³த்தோ பு³த்³தோ⁴ ஜாதோதி அத்தோ². தஸ்ஸ திஸ்ஸஸ்ஸ ப⁴க³வதோ தாதி³னோ, லோகஜெட்ட²ஸ்ஸ அஸனபோ³தி⁴ங் உத்தமங் ரோபயிந்தி ஸம்ப³ந்தோ⁴.
79.Tissassāhaṃ bhagavatoti tikkhattuṃ jātoti tisso, so mātugabbhato, manussajātito, pañcakkhandhato ca mutto hutvā jāto nibbatto buddho jātoti attho. Tassa tissassa bhagavato tādino, lokajeṭṭhassa asanabodhiṃ uttamaṃ ropayinti sambandho.
80. அஸனோ நாமதெ⁴ய்யேனாதி நாமபஞ்ஞத்தியா நாமஸஞ்ஞாய அஸனோ நாம அஸனருக்கோ² போ³தி⁴ அஹோஸீதி அத்தோ². த⁴ரணீருஹபாத³போதி வல்லிருக்க²பப்³ப³தக³ங்கா³ஸாக³ராத³யோ தா⁴ரேதீதி த⁴ரணீ, கா ஸா? பத²வீ, தஸ்ஸங் ருஹதி பதிட்ட²ஹதீதி த⁴ரணீருஹோ, பாதே³ன பிவதீதி பாத³போ, பாத³ஸங்கா²தேன மூலேன ஸிஞ்சிதோத³கங் பிவதி ஆபோரஸங் ஸினேஹங் தா⁴ரேதீதி அத்தோ². த⁴ரணீருஹோ ச ஸோ பாத³போ சாதி த⁴ரணீருஹபாத³போ, தங் உத்தமங் அஸனங் போ³தி⁴ங் பஞ்ச வஸ்ஸானி பரிசரிங் போஸேஸிந்தி அத்தோ².
80.Asano nāmadheyyenāti nāmapaññattiyā nāmasaññāya asano nāma asanarukkho bodhi ahosīti attho. Dharaṇīruhapādapoti vallirukkhapabbatagaṅgāsāgarādayo dhāretīti dharaṇī, kā sā? Pathavī, tassaṃ ruhati patiṭṭhahatīti dharaṇīruho, pādena pivatīti pādapo, pādasaṅkhātena mūlena siñcitodakaṃ pivati āporasaṃ sinehaṃ dhāretīti attho. Dharaṇīruho ca so pādapo cāti dharaṇīruhapādapo, taṃ uttamaṃ asanaṃ bodhiṃ pañca vassāni paricariṃ posesinti attho.
81. புப்பி²தங் பாத³பங் தி³ஸ்வாதி தங் மயா போஸிதங் அஸனபோ³தி⁴ருக்க²ங் புப்பி²தங் அச்ச²ரயொக்³க³பூ⁴தபுப்ப²த்தா அப்³பு⁴தங் லோமஹங்ஸகரணங் தி³ஸ்வா ஸகங் கம்மங் அத்தனோ கம்மங் பகித்தெந்தோ பகாரேன கத²யந்தோ பு³த்³த⁴ஸெட்ட²ஸ்ஸ ஸந்திகங் அக³மாஸிந்தி அத்தோ². ஸேஸங் ஸப்³ப³த்த² உத்தானத்த²மேவாதி.
81.Pupphitaṃ pādapaṃ disvāti taṃ mayā positaṃ asanabodhirukkhaṃ pupphitaṃ accharayoggabhūtapupphattā abbhutaṃ lomahaṃsakaraṇaṃ disvā sakaṃkammaṃ attano kammaṃ pakittento pakārena kathayanto buddhaseṭṭhassa santikaṃ agamāsinti attho. Sesaṃ sabbattha uttānatthamevāti.
அஸனபோ³தி⁴யத்தே²ரஅபதா³னவண்ணனா ஸமத்தா.
Asanabodhiyattheraapadānavaṇṇanā samattā.
ச²ட்ட²வக்³க³வண்ணனா ஸமத்தா.
Chaṭṭhavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. அஸனபோ³தி⁴யத்தே²ரஅபதா³னங் • 10. Asanabodhiyattheraapadānaṃ
