| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
ஆஸனப்படிபா³ஹனாதி³
Āsanappaṭibāhanādi
316. தேன கோ² பன ஸமயேன அஞ்ஞதரஸ்ஸ ஆஜீவகஸாவகஸ்ஸ மஹாமத்தஸ்ஸ ஸங்க⁴ப⁴த்தங் ஹோதி. ஆயஸ்மா உபனந்தோ³ ஸக்யபுத்தோ பச்சா² ஆக³ந்த்வா விப்பகதபோ⁴ஜனங் ஆனந்தரிகங் பி⁴க்கு²ங் வுட்டா²பேஸி. ப⁴த்தக்³க³ங் கோலாஹலங் அஹோஸி. அத² கோ² ஸோ மஹாமத்தோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ஸமணா ஸக்யபுத்தியா பச்சா² ஆக³ந்த்வா விப்பகதபோ⁴ஜனங் ஆனந்தரிகங் பி⁴க்கு²ங் வுட்டா²பெஸ்ஸந்தி! ப⁴த்தக்³க³ங் கோலாஹலங் அஹோஸி. நனு நாம லப்³பா⁴ அஞ்ஞத்ராபி நிஸின்னேன யாவத³த்த²ங் பு⁴ஞ்ஜிது’’ந்தி? அஸ்ஸோஸுங் கோ² பி⁴க்கூ² தஸ்ஸ மஹாமத்தஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசெந்தஸ்ஸ. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ பச்சா² ஆக³ந்த்வா விப்பகதபோ⁴ஜனங் ஆனந்தரிகங் பி⁴க்கு²ங் வுட்டா²பெஸ்ஸதி! ப⁴த்தக்³க³ங் கோலாஹலங் அஹோஸீ’’தி. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ஸச்சங் கிர த்வங், உபனந்த³, பச்சா² ஆக³ந்த்வா விப்பகதபோ⁴ஜனங் ஆனந்தரிகங் பி⁴க்கு²ங் வுட்டா²பேஸி, ப⁴த்தக்³க³ங் கோலாஹலங் அஹோஸீ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம த்வங், மோக⁴புரிஸ, பச்சா² ஆக³ந்த்வா விப்பகதபோ⁴ஜனங் ஆனந்தரிகங் பி⁴க்கு²ங் வுட்டா²பெஸ்ஸஸி? ப⁴த்தக்³க³ங் கோலாஹலங் அஹோஸி. நேதங், மோக⁴புரிஸ, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, விப்பகதபோ⁴ஜனோ 1 பி⁴க்கு² வுட்டா²பேதப்³போ³. யோ வுட்டா²பெய்ய, ஆபத்தி து³க்கடஸ்ஸ. ஸசே வுட்டா²பேதி, பவாரிதோ ச ஹோதி, ‘க³ச்ச² உத³கங் ஆஹரா’தி வத்தப்³போ³. ஏவஞ்சேதங் லபே⁴த², இச்சேதங் குஸலங். நோ சே லபே⁴த², ஸாது⁴கங் ஸித்தா²னி கி³லித்வா வுட்³ட⁴தரஸ்ஸ பி⁴க்கு²னோ ஆஸனங் தா³தப்³ப³ங். ந த்வேவாஹங், பி⁴க்க²வே, கேனசி பரியாயேன வுட்³ட⁴தரஸ்ஸ பி⁴க்கு²னோ ஆஸனங் படிபா³ஹிதப்³ப³ந்தி வதா³மி. யோ படிபா³ஹெய்ய, ஆபத்தி து³க்கடஸ்ஸாதி’’.
316. Tena kho pana samayena aññatarassa ājīvakasāvakassa mahāmattassa saṅghabhattaṃ hoti. Āyasmā upanando sakyaputto pacchā āgantvā vippakatabhojanaṃ ānantarikaṃ bhikkhuṃ vuṭṭhāpesi. Bhattaggaṃ kolāhalaṃ ahosi. Atha kho so mahāmatto ujjhāyati khiyyati vipāceti – ‘‘kathañhi nāma samaṇā sakyaputtiyā pacchā āgantvā vippakatabhojanaṃ ānantarikaṃ bhikkhuṃ vuṭṭhāpessanti! Bhattaggaṃ kolāhalaṃ ahosi. Nanu nāma labbhā aññatrāpi nisinnena yāvadatthaṃ bhuñjitu’’nti? Assosuṃ kho bhikkhū tassa mahāmattassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto pacchā āgantvā vippakatabhojanaṃ ānantarikaṃ bhikkhuṃ vuṭṭhāpessati! Bhattaggaṃ kolāhalaṃ ahosī’’ti. Atha kho te bhikkhū bhagavato etamatthaṃ ārocesuṃ. ‘‘Saccaṃ kira tvaṃ, upananda, pacchā āgantvā vippakatabhojanaṃ ānantarikaṃ bhikkhuṃ vuṭṭhāpesi, bhattaggaṃ kolāhalaṃ ahosī’’ti? ‘‘Saccaṃ bhagavā’’ti. Vigarahi buddho bhagavā…pe… ‘‘kathañhi nāma tvaṃ, moghapurisa, pacchā āgantvā vippakatabhojanaṃ ānantarikaṃ bhikkhuṃ vuṭṭhāpessasi? Bhattaggaṃ kolāhalaṃ ahosi. Netaṃ, moghapurisa, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, vippakatabhojano 2 bhikkhu vuṭṭhāpetabbo. Yo vuṭṭhāpeyya, āpatti dukkaṭassa. Sace vuṭṭhāpeti, pavārito ca hoti, ‘gaccha udakaṃ āharā’ti vattabbo. Evañcetaṃ labhetha, iccetaṃ kusalaṃ. No ce labhetha, sādhukaṃ sitthāni gilitvā vuḍḍhatarassa bhikkhuno āsanaṃ dātabbaṃ. Na tvevāhaṃ, bhikkhave, kenaci pariyāyena vuḍḍhatarassa bhikkhuno āsanaṃ paṭibāhitabbanti vadāmi. Yo paṭibāheyya, āpatti dukkaṭassāti’’.
தேன கோ² பன ஸமயேன ச²ப்³ப³க்³கி³யா பி⁴க்கூ² கி³லானே பி⁴க்கூ² வுட்டா²பெந்தி. கி³லானா ஏவங் வதெ³ந்தி – ‘‘ந மயங், ஆவுஸோ, ஸக்கோம வுட்டா²துங், கி³லானாம்ஹா’’தி. ‘‘மயங் ஆயஸ்மந்தே வுட்டா²பெஸ்ஸாமா’’தி பரிக்³க³ஹெத்வா வுட்டா²பெத்வா டி²தகே முஞ்சந்தி. கி³லானா முச்சி²தா பபதந்தி. ப⁴க³வதோ ஏதமத்த²ங் ஆரோசேஸுங் . ‘‘ந, பி⁴க்க²வே, கி³லானோ வுட்டா²பேதப்³போ³. யோ வுட்டா²பெய்ய, ஆபத்தி து³க்கடஸ்ஸா’’தி.
Tena kho pana samayena chabbaggiyā bhikkhū gilāne bhikkhū vuṭṭhāpenti. Gilānā evaṃ vadenti – ‘‘na mayaṃ, āvuso, sakkoma vuṭṭhātuṃ, gilānāmhā’’ti. ‘‘Mayaṃ āyasmante vuṭṭhāpessāmā’’ti pariggahetvā vuṭṭhāpetvā ṭhitake muñcanti. Gilānā mucchitā papatanti. Bhagavato etamatthaṃ ārocesuṃ . ‘‘Na, bhikkhave, gilāno vuṭṭhāpetabbo. Yo vuṭṭhāpeyya, āpatti dukkaṭassā’’ti.
தேன கோ² பன ஸமயேன ச²ப்³ப³க்³கி³யா பி⁴க்கூ² ‘கி³லானா மயம்ஹா அவுட்டா²பனீயா’தி வரஸெய்யாயோ பலிபு³த்³தெ⁴ந்தி 3. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கி³லானஸ்ஸ பதிரூபங் ஸெய்யங் தா³து’’ந்தி.
Tena kho pana samayena chabbaggiyā bhikkhū ‘gilānā mayamhā avuṭṭhāpanīyā’ti varaseyyāyo palibuddhenti 4. Bhagavato etamatthaṃ ārocesuṃ. ‘‘Anujānāmi, bhikkhave, gilānassa patirūpaṃ seyyaṃ dātu’’nti.
தேன கோ² பன ஸமயேன ச²ப்³ப³க்³கி³யா பி⁴க்கூ² லேஸகப்பேன ஸேனாஸனங் படிபா³ஹந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, லேஸகப்பேன ஸேனாஸனங் படிபா³ஹிதப்³ப³ங். யோ படிபா³ஹெய்ய, ஆபத்தி து³க்கடஸ்ஸா’’தி.
Tena kho pana samayena chabbaggiyā bhikkhū lesakappena senāsanaṃ paṭibāhanti. Bhagavato etamatthaṃ ārocesuṃ. ‘‘Na, bhikkhave, lesakappena senāsanaṃ paṭibāhitabbaṃ. Yo paṭibāheyya, āpatti dukkaṭassā’’ti.
5 தேன கோ² பன ஸமயேன ஸத்தரஸவக்³கி³யா பி⁴க்கூ² அஞ்ஞதரங் பச்சந்திமங் மஹாவிஹாரங் படிஸங்க²ரொந்தி – ‘இத⁴ மயங் வஸ்ஸங் வஸிஸ்ஸாமா’தி. அத்³த³ஸங்ஸு 6 கோ² ச²ப்³ப³க்³கி³யா பி⁴க்கூ² ஸத்தரஸவக்³கி³யே பி⁴க்கூ² விஹாரங் 7 படிஸங்க²ரொந்தே. தி³ஸ்வான ஏவமாஹங்ஸு – ‘‘இமே, ஆவுஸோ, ஸத்தரஸவக்³கி³யா பி⁴க்கூ² விஹாரங் படிஸங்க²ரொந்தி. ஹந்த³ நே வுட்டா²பெஸ்ஸாமா’’தி. ஏகச்சே ஏவமாஹங்ஸு – ‘‘ஆக³மேதா²வுஸோ, யாவ படிஸங்க²ரொந்தி, படிஸங்க²தே வுட்டா²பெஸ்ஸாமா’’தி. அத² கோ² ச²ப்³ப³க்³கி³யா பி⁴க்கூ² ஸத்தரஸவக்³கி³யே பி⁴க்கூ² ஏதத³வோசுங் – ‘‘உட்டே²தா²வுஸோ, அம்ஹாகங் விஹாரோ பாபுணாதீ’’தி. ‘‘நனு, ஆவுஸோ, படிகச்சேவ ஆசிக்கி²தப்³ப³ங்? மயஞ்சஞ்ஞங் படிஸங்க²ரெய்யாமா’’தி. ‘‘நனு, ஆவுஸோ, ஸங்கி⁴கோ விஹாரோ’’தி? ‘‘ஆமாவுஸோ, ஸங்கி⁴கோ விஹாரோ’’தி. ‘‘உட்டே²தா²வுஸோ, அம்ஹாகங் விஹாரோ பாபுணாதீ’’தி. ‘‘மஹல்லகோ, ஆவுஸோ, விஹாரோ; தும்ஹேபி வஸத², மயம்பி வஸிஸ்ஸாமா’’தி. ‘‘உட்டே²தா²வுஸோ, அம்ஹாகங் விஹாரோ பாபுணாதீ’’தி குபிதா அனத்தமனா கீ³வாயங் க³ஹெத்வா நிக்கட்³ட⁴ந்தி. தே நிக்கட்³டி⁴யமானா ரோத³ந்தி. பி⁴க்கூ² ஏவமாஹங்ஸு – ‘‘கிஸ்ஸ தும்ஹே, ஆவுஸோ, ரோத³தா²’’தி? ‘‘இமே, ஆவுஸோ, ச²ப்³ப³க்³கி³யா பி⁴க்கூ² குபிதா அனத்தமனா அம்ஹே ஸங்கி⁴கா விஹாரா நிக்கட்³ட⁴ந்தீ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² குபிதா அனத்தமனா பி⁴க்கூ² ஸங்கி⁴கா விஹாரா நிக்கட்³டி⁴ஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, தும்ஹே பி⁴க்க²வே, குபிதா அனத்தமனா ஸங்கி⁴கா விஹாரா பி⁴க்கூ² நிக்கட்³ட⁴தா²’’தி? ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, குபிதேன அனத்தமனேன பி⁴க்கு² ஸங்கி⁴கா விஹாரா நிக்கட்³டி⁴தப்³போ³. யோ நிக்கட்³டெ⁴ய்ய, யதா²த⁴ம்மோ காரேதப்³போ³. அனுஜானாமி, பி⁴க்க²வே, ஸேனாஸனங் கா³ஹேது’’ந்தி.
8 Tena kho pana samayena sattarasavaggiyā bhikkhū aññataraṃ paccantimaṃ mahāvihāraṃ paṭisaṅkharonti – ‘idha mayaṃ vassaṃ vasissāmā’ti. Addasaṃsu 9 kho chabbaggiyā bhikkhū sattarasavaggiye bhikkhū vihāraṃ 10 paṭisaṅkharonte. Disvāna evamāhaṃsu – ‘‘ime, āvuso, sattarasavaggiyā bhikkhū vihāraṃ paṭisaṅkharonti. Handa ne vuṭṭhāpessāmā’’ti. Ekacce evamāhaṃsu – ‘‘āgamethāvuso, yāva paṭisaṅkharonti, paṭisaṅkhate vuṭṭhāpessāmā’’ti. Atha kho chabbaggiyā bhikkhū sattarasavaggiye bhikkhū etadavocuṃ – ‘‘uṭṭhethāvuso, amhākaṃ vihāro pāpuṇātī’’ti. ‘‘Nanu, āvuso, paṭikacceva ācikkhitabbaṃ? Mayañcaññaṃ paṭisaṅkhareyyāmā’’ti. ‘‘Nanu, āvuso, saṅghiko vihāro’’ti? ‘‘Āmāvuso, saṅghiko vihāro’’ti. ‘‘Uṭṭhethāvuso, amhākaṃ vihāro pāpuṇātī’’ti. ‘‘Mahallako, āvuso, vihāro; tumhepi vasatha, mayampi vasissāmā’’ti. ‘‘Uṭṭhethāvuso, amhākaṃ vihāro pāpuṇātī’’ti kupitā anattamanā gīvāyaṃ gahetvā nikkaḍḍhanti. Te nikkaḍḍhiyamānā rodanti. Bhikkhū evamāhaṃsu – ‘‘kissa tumhe, āvuso, rodathā’’ti? ‘‘Ime, āvuso, chabbaggiyā bhikkhū kupitā anattamanā amhe saṅghikā vihārā nikkaḍḍhantī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū kupitā anattamanā bhikkhū saṅghikā vihārā nikkaḍḍhissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, tumhe bhikkhave, kupitā anattamanā saṅghikā vihārā bhikkhū nikkaḍḍhathā’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, kupitena anattamanena bhikkhu saṅghikā vihārā nikkaḍḍhitabbo. Yo nikkaḍḍheyya, yathādhammo kāretabbo. Anujānāmi, bhikkhave, senāsanaṃ gāhetu’’nti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஆஸனப்படிபா³ஹனாதி³கதா² • Āsanappaṭibāhanādikathā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஆஸனப்படிபா³ஹனாதி³கதா² • Āsanappaṭibāhanādikathā
