| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
ஆஸனப்படிபா³ஹனபடிக்கே²பங்
Āsanappaṭibāhanapaṭikkhepaṃ
313. தேன கோ² பன ஸமயேன மனுஸ்ஸா ஸங்க⁴ங் உத்³தி³ஸ்ஸ மண்ட³பே படியாதெ³ந்தி, ஸந்த²ரே படியாதெ³ந்தி, ஓகாஸே படியாதெ³ந்தி. ச²ப்³ப³க்³கி³யானங் பி⁴க்கூ²னங் அந்தேவாஸிகா பி⁴க்கூ² – ‘ஸங்கி⁴கஞ்ஞேவ ப⁴க³வதா யதா²வுட்³ட⁴ங் அனுஞ்ஞாதங் , நோ உத்³தி³ஸ்ஸகத’ந்தி பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா மண்ட³பேபி பரிக்³க³ண்ஹந்தி, ஸந்த²ரேபி பரிக்³க³ண்ஹந்தி, ஓகாஸேபி பரிக்³க³ண்ஹந்தி – இத³ங் அம்ஹாகங் உபஜ்ஜா²யானங் ப⁴விஸ்ஸதி, இத³ங் அம்ஹாகங் ஆசரியானங் ப⁴விஸ்ஸதி, இத³ங் அம்ஹாகங் ப⁴விஸ்ஸதீதி. அத² கோ² ஆயஸ்மா ஸாரிபுத்தோ பு³த்³த⁴ப்பமுக²ஸ்ஸ ஸங்க⁴ஸ்ஸ பிட்டி²தோ பிட்டி²தோ க³ந்த்வா மண்ட³பேஸு பரிக்³க³ஹிதேஸு, ஸந்த²ரேஸு பரிக்³க³ஹிதேஸு, ஓகாஸேஸு பரிக்³க³ஹிதேஸு, ஓகாஸங் அலப⁴மானோ அஞ்ஞதரஸ்மிங் ருக்க²மூலே நிஸீதி³. அத² கோ² ப⁴க³வா ரத்தியா பச்சூஸஸமயங் பச்சுட்டா²ய உக்காஸி. ஆயஸ்மாபி ஸாரிபுத்தோ உக்காஸி. ‘‘கோ எத்தா²’’தி? ‘‘அஹங், ப⁴க³வா, ஸாரிபுத்தோ’’தி. ‘‘கிஸ்ஸ த்வங், ஸாரிபுத்த, இத⁴ நிஸின்னோ’’தி? அத² கோ² ஆயஸ்மா ஸாரிபுத்தோ ப⁴க³வதோ ஏதமத்த²ங் ஆரோசேஸி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, ச²ப்³ப³க்³கி³யானங் பி⁴க்கூ²னங் அந்தேவாஸிகா பி⁴க்கூ² – ‘ஸங்கி⁴கஞ்ஞேவ ப⁴க³வதா யதா²வுட்³ட⁴ங் அனுஞ்ஞாதங், நோ உத்³தி³ஸ்ஸகத’ந்தி பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா மண்ட³பே பரிக்³க³ண்ஹந்தி, ஸந்த²ரே பரிக்³க³ண்ஹந்தி, ஓகாஸே பரிக்³க³ண்ஹந்தி – இத³ங் அம்ஹாகங் உபஜ்ஜா²யானங் ப⁴விஸ்ஸதி, இத³ங் அம்ஹாகங் ஆசரியானங் ப⁴விஸ்ஸதி, இத³ங் அம்ஹாகங் ப⁴விஸ்ஸதீ’’தி? ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, உத்³தி³ஸ்ஸகதம்பி யதா²வுட்³ட⁴ங் படிபா³ஹேதப்³ப³ங். யோ படிபா³ஹெய்ய, ஆபத்தி து³க்கடஸ்ஸா’’தி.
313. Tena kho pana samayena manussā saṅghaṃ uddissa maṇḍape paṭiyādenti, santhare paṭiyādenti, okāse paṭiyādenti. Chabbaggiyānaṃ bhikkhūnaṃ antevāsikā bhikkhū – ‘saṅghikaññeva bhagavatā yathāvuḍḍhaṃ anuññātaṃ , no uddissakata’nti buddhappamukhassa saṅghassa purato purato gantvā maṇḍapepi pariggaṇhanti, santharepi pariggaṇhanti, okāsepi pariggaṇhanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatīti. Atha kho āyasmā sāriputto buddhappamukhassa saṅghassa piṭṭhito piṭṭhito gantvā maṇḍapesu pariggahitesu, santharesu pariggahitesu, okāsesu pariggahitesu, okāsaṃ alabhamāno aññatarasmiṃ rukkhamūle nisīdi. Atha kho bhagavā rattiyā paccūsasamayaṃ paccuṭṭhāya ukkāsi. Āyasmāpi sāriputto ukkāsi. ‘‘Ko etthā’’ti? ‘‘Ahaṃ, bhagavā, sāriputto’’ti. ‘‘Kissa tvaṃ, sāriputta, idha nisinno’’ti? Atha kho āyasmā sāriputto bhagavato etamatthaṃ ārocesi. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, chabbaggiyānaṃ bhikkhūnaṃ antevāsikā bhikkhū – ‘saṅghikaññeva bhagavatā yathāvuḍḍhaṃ anuññātaṃ, no uddissakata’nti buddhappamukhassa saṅghassa purato purato gantvā maṇḍape pariggaṇhanti, santhare pariggaṇhanti, okāse pariggaṇhanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, uddissakatampi yathāvuḍḍhaṃ paṭibāhetabbaṃ. Yo paṭibāheyya, āpatti dukkaṭassā’’ti.
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆஸனப்படிபா³ஹனாதி³கதா²வண்ணனா • Āsanappaṭibāhanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / விஹாரானுஜானநகதா²வண்ணனா • Vihārānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / விஹாரானுஜானநகதா²வண்ணனா • Vihārānujānanakathāvaṇṇanā
