| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૫. અસઙ્કમનપટિસન્દહનપઞ્હો
5. Asaṅkamanapaṭisandahanapañho
૫. રાજા આહ ‘‘ભન્તે નાગસેન, ન ચ સઙ્કમતિ પટિસન્દહતિ ચા’’તિ? ‘‘આમ, મહારાજ, ન ચ સઙ્કમતિ પટિસન્દહતિ ચા’’તિ. ‘‘કથં, ભન્તે નાગસેન, ન ચ સઙ્કમતિ પટિસન્દહતિ ચ, ઓપમ્મં કરોહી’’તિ? ‘‘યથા, મહારાજ, કોચિદેવ પુરિસો પદીપતો પદીપં પદીપેય્ય, કિંનુ ખો સો, મહારાજ, પદીપો પદીપમ્હા સઙ્કન્તો’’તિ? ‘‘ન હિ, ભન્તે’’તિ. ‘‘એવમેવ ખો, મહારાજ, ન ચ સઙ્કમતિ પટિસન્દહતિ ચા’’તિ.
5. Rājā āha ‘‘bhante nāgasena, na ca saṅkamati paṭisandahati cā’’ti? ‘‘Āma, mahārāja, na ca saṅkamati paṭisandahati cā’’ti. ‘‘Kathaṃ, bhante nāgasena, na ca saṅkamati paṭisandahati ca, opammaṃ karohī’’ti? ‘‘Yathā, mahārāja, kocideva puriso padīpato padīpaṃ padīpeyya, kiṃnu kho so, mahārāja, padīpo padīpamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cā’’ti.
‘‘ભિય્યો ઓપમ્મં કરોહી’’તિ. ‘‘અભિજાનાસિ નુ, ત્વં મહારાજ, દહરકો સન્તો સિલોકાચરિયસ્સ સન્તિકે કિઞ્ચિ સિલોકં ગહિત’’ન્તિ? ‘‘આમ, ભન્તે’’તિ . ‘‘કિંનુ ખો, મહારાજ, સો સિલોકો આચરિયમ્હા સઙ્કન્તો’’તિ? ‘‘ન હિ, ભન્તે’’તિ. ‘‘એવમેવ ખો, મહારાજ, ન ચ સઙ્કમતિ પટિસન્દહતિ ચાતિ.
‘‘Bhiyyo opammaṃ karohī’’ti. ‘‘Abhijānāsi nu, tvaṃ mahārāja, daharako santo silokācariyassa santike kiñci silokaṃ gahita’’nti? ‘‘Āma, bhante’’ti . ‘‘Kiṃnu kho, mahārāja, so siloko ācariyamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cāti.
‘‘કલ્લોસિ, ભન્તે નાગસેના’’તિ.
‘‘Kallosi, bhante nāgasenā’’ti.
અસઙ્કમનપટિસન્દહનપઞ્હો પઞ્ચમો.
Asaṅkamanapaṭisandahanapañho pañcamo.
