| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ಅಸ್ಸದ್ಧಸುತ್ತಂ
2. Assaddhasuttaṃ
೨೦೨. ‘‘ಅಸಪ್ಪುರಿಸಞ್ಚ ವೋ, ಭಿಕ್ಖವೇ, ದೇಸೇಸ್ಸಾಮಿ, ಅಸಪ್ಪುರಿಸೇನ ಅಸಪ್ಪುರಿಸತರಞ್ಚ; ಸಪ್ಪುರಿಸಞ್ಚ, ಸಪ್ಪುರಿಸೇನ ಸಪ್ಪುರಿಸತರಞ್ಚ। ತಂ ಸುಣಾಥ…ಪೇ॰…।
202. ‘‘Asappurisañca vo, bhikkhave, desessāmi, asappurisena asappurisatarañca; sappurisañca, sappurisena sappurisatarañca. Taṃ suṇātha…pe….
‘‘ಕತಮೋ ಚ, ಭಿಕ್ಖವೇ, ಅಸಪ್ಪುರಿಸೋ? ಇಧ, ಭಿಕ್ಖವೇ, ಏಕಚ್ಚೋ ಅಸ್ಸದ್ಧೋ ಹೋತಿ, ಅಹಿರಿಕೋ ಹೋತಿ, ಅನೋತ್ತಪ್ಪೀ ಹೋತಿ, ಅಪ್ಪಸ್ಸುತೋ ಹೋತಿ, ಕುಸೀತೋ ಹೋತಿ, ಮುಟ್ಠಸ್ಸತಿ ಹೋತಿ, ದುಪ್ಪಞ್ಞೋ ಹೋತಿ। ಅಯಂ ವುಚ್ಚತಿ, ಭಿಕ್ಖವೇ, ಅಸಪ್ಪುರಿಸೋ।
‘‘Katamo ca, bhikkhave, asappuriso? Idha, bhikkhave, ekacco assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti. Ayaṃ vuccati, bhikkhave, asappuriso.
‘‘ಕತಮೋ ಚ, ಭಿಕ್ಖವೇ, ಅಸಪ್ಪುರಿಸೇನ ಅಸಪ್ಪುರಿಸತರೋ? ಇಧ, ಭಿಕ್ಖವೇ, ಏಕಚ್ಚೋ ಅತ್ತನಾ ಚ ಅಸ್ಸದ್ಧೋ ಹೋತಿ, ಪರಞ್ಚ ಅಸ್ಸದ್ಧಿಯೇ 1 ಸಮಾದಪೇತಿ; ಅತ್ತನಾ ಚ ಅಹಿರಿಕೋ ಹೋತಿ, ಪರಞ್ಚ ಅಹಿರಿಕತಾಯ ಸಮಾದಪೇತಿ; ಅತ್ತನಾ ಚ ಅನೋತ್ತಪ್ಪೀ ಹೋತಿ, ಪರಞ್ಚ ಅನೋತ್ತಪ್ಪೇ ಸಮಾದಪೇತಿ; ಅತ್ತನಾ ಚ ಅಪ್ಪಸ್ಸುತೋ ಹೋತಿ, ಪರಞ್ಚ ಅಪ್ಪಸ್ಸುತೇ ಸಮಾದಪೇತಿ; ಅತ್ತನಾ ಚ ಕುಸೀತೋ ಹೋತಿ, ಪರಞ್ಚ ಕೋಸಜ್ಜೇ ಸಮಾದಪೇತಿ; ಅತ್ತನಾ ಚ ಮುಟ್ಠಸ್ಸತಿ ಹೋತಿ, ಪರಞ್ಚ ಮುಟ್ಠಸ್ಸಚ್ಚೇ 2 ಸಮಾದಪೇತಿ; ಅತ್ತನಾ ಚ ದುಪ್ಪಞ್ಞೋ ಹೋತಿ, ಪರಞ್ಚ ದುಪ್ಪಞ್ಞತಾಯ ಸಮಾದಪೇತಿ। ಅಯಂ ವುಚ್ಚತಿ, ಭಿಕ್ಖವೇ, ಅಸಪ್ಪುರಿಸೇನ ಅಸಪ್ಪುರಿಸತರೋ।
‘‘Katamo ca, bhikkhave, asappurisena asappurisataro? Idha, bhikkhave, ekacco attanā ca assaddho hoti, parañca assaddhiye 3 samādapeti; attanā ca ahiriko hoti, parañca ahirikatāya samādapeti; attanā ca anottappī hoti, parañca anottappe samādapeti; attanā ca appassuto hoti, parañca appassute samādapeti; attanā ca kusīto hoti, parañca kosajje samādapeti; attanā ca muṭṭhassati hoti, parañca muṭṭhassacce 4 samādapeti; attanā ca duppañño hoti, parañca duppaññatāya samādapeti. Ayaṃ vuccati, bhikkhave, asappurisena asappurisataro.
‘‘ಕತಮೋ ಚ, ಭಿಕ್ಖವೇ, ಸಪ್ಪುರಿಸೋ? ಇಧ, ಭಿಕ್ಖವೇ, ಏಕಚ್ಚೋ ಸದ್ಧೋ ಹೋತಿ, ಹಿರಿಮಾ ಹೋತಿ, ಓತ್ತಪ್ಪೀ ಹೋತಿ, ಬಹುಸ್ಸುತೋ ಹೋತಿ, ಆರದ್ಧವೀರಿಯೋ ಹೋತಿ, ಸತಿಮಾ ಹೋತಿ, ಪಞ್ಞವಾ ಹೋತಿ। ಅಯಂ ವುಚ್ಚತಿ, ಭಿಕ್ಖವೇ, ಸಪ್ಪುರಿಸೋ।
‘‘Katamo ca, bhikkhave, sappuriso? Idha, bhikkhave, ekacco saddho hoti, hirimā hoti, ottappī hoti, bahussuto hoti, āraddhavīriyo hoti, satimā hoti, paññavā hoti. Ayaṃ vuccati, bhikkhave, sappuriso.
‘‘ಕತಮೋ ಚ, ಭಿಕ್ಖವೇ, ಸಪ್ಪುರಿಸೇನ ಸಪ್ಪುರಿಸತರೋ? ಇಧ, ಭಿಕ್ಖವೇ, ಏಕಚ್ಚೋ ಅತ್ತನಾ ಚ ಸದ್ಧಾಸಮ್ಪನ್ನೋ ಹೋತಿ, ಪರಞ್ಚ ಸದ್ಧಾಸಮ್ಪದಾಯ ಸಮಾದಪೇತಿ ; ಅತ್ತನಾ ಚ ಹಿರಿಮಾ ಹೋತಿ, ಪರಞ್ಚ ಹಿರಿಮತಾಯ 5 ಸಮಾದಪೇತಿ; ಅತ್ತನಾ ಚ ಓತ್ತಪ್ಪೀ ಹೋತಿ, ಪರಞ್ಚ ಓತ್ತಪ್ಪೇ ಸಮಾದಪೇತಿ; ಅತ್ತನಾ ಚ ಬಹುಸ್ಸುತೋ ಹೋತಿ, ಪರಞ್ಚ ಬಾಹುಸಚ್ಚೇ ಸಮಾದಪೇತಿ; ಅತ್ತನಾ ಚ ಆರದ್ಧವೀರಿಯೋ ಹೋತಿ, ಪರಞ್ಚ ವೀರಿಯಾರಮ್ಭೇ ಸಮಾದಪೇತಿ; ಅತ್ತನಾ ಚ ಉಪಟ್ಠಿತಸ್ಸತಿ ಹೋತಿ, ಪರಞ್ಚ ಸತಿಉಪಟ್ಠಾನೇ 6 ಸಮಾದಪೇತಿ; ಅತ್ತನಾ ಚ ಪಞ್ಞಾಸಮ್ಪನ್ನೋ ಹೋತಿ, ಪರಞ್ಚ ಪಞ್ಞಾಸಮ್ಪದಾಯ ಸಮಾದಪೇತಿ। ಅಯಂ ವುಚ್ಚತಿ, ಭಿಕ್ಖವೇ, ಸಪ್ಪುರಿಸೇನ ಸಪ್ಪುರಿಸತರೋ’’ತಿ। ದುತಿಯಂ।
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca saddhāsampanno hoti, parañca saddhāsampadāya samādapeti ; attanā ca hirimā hoti, parañca hirimatāya 7 samādapeti; attanā ca ottappī hoti, parañca ottappe samādapeti; attanā ca bahussuto hoti, parañca bāhusacce samādapeti; attanā ca āraddhavīriyo hoti, parañca vīriyārambhe samādapeti; attanā ca upaṭṭhitassati hoti, parañca satiupaṭṭhāne 8 samādapeti; attanā ca paññāsampanno hoti, parañca paññāsampadāya samādapeti. Ayaṃ vuccati, bhikkhave, sappurisena sappurisataro’’ti. Dutiyaṃ.
Footnotes:
Related texts:
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೧೦. ಸಿಕ್ಖಾಪದಸುತ್ತಾದಿವಣ್ಣನಾ • 1-10. Sikkhāpadasuttādivaṇṇanā
